Fear Index: ಷೇರುಬಜಾರ್ನಲ್ಲಿ ಭಯದ ಸುಳಿವು ನೀಡುತ್ತೆ ಈ ಸೂಚ್ಯಂಕ; ಏನಿದು ವಿಐಎಕ್ಸ್?
India VIX in NSE Explained: ನ್ಯಾಷನಲ್ ಸ್ಟಾಕ್ ಎಕ್ಸ್ಚೇಂಜ್ನಲ್ಲಿ ಇರುವ ವಿವಿಧ ಸೂಚ್ಯಂಕಗಳ ಸಾಲಿನಲ್ಲಿ ನೀವು ಇಂಡಿಯಾ ವಿಐಎಕ್ಸ್ ನೋಡಿರುತ್ತೀರಿ. ಇದು ಷೇರು ಮಾರುಕಟ್ಟೆಯ ಸಂಚಲನವನ್ನು ಪ್ರತಿಬಿಂಬಿಸುವ ಒಂದು ಸೂಚಿ. ಆಪ್ಷನ್ಸ್ ಟ್ರೇಡಿಂಗ್ನಲ್ಲಿ ಕಂಡು ಬರುವ ಟ್ರೆಂಡ್ ಇದು. ಷೇರುಗಳ ವಹಿವಾಟುಗಳು ಎಷ್ಟು ವ್ಯತ್ಯಯ ಆಗುವ ಸಾಧ್ಯತೆಯನ್ನು ಇದು ಸೂಚಿಸಬಹುದು.
Updated on: Jun 01, 2025 | 7:35 PM
ನವದೆಹಲಿ, ಮೇ 28: ನೀವು ಷೇರುಮಾರುಕಟ್ಟೆಯ ವಿವಿಧ ಸೂಚ್ಯಂಕಗಳನ್ನು ಗಮನಿಸಿದರೆ ವಿಐಎಕ್ಸ್ ಇಂಡೆಕ್ಸ್ (VIX index) ಕಂಡಿರುತ್ತೀರಿ. ಎನ್ಎಸ್ಇನಲ್ಲಿರುವ ಹಲವು ಇಂಡೆಕ್ಸ್ಗಳಲ್ಲಿ ವಿಐಎಕ್ಸ್ ಒಂದು. ಷೇರುಪೇಟೆಯ ಇಂಡೆಕ್ಸ್ಗಳಲ್ಲಿ ನೀವು ನಿರ್ದಿಷ್ಟ ಕ್ಷೇತ್ರಕ್ಕೆ ಸಂಬಂಧಿಸಿದ ಆಯ್ದ ಕಂಪನಿಗಳ ಷೇರುಗಳ ಲಿಸ್ಟ್ ಇರುತ್ತದೆ. ಆದರೆ, ವಿಐಎಕ್ಸ್ನಲ್ಲಿ ಭಯ ಕಾಣುತ್ತದೆ. ಅಂತೆಯೇ, ಇದು ಮಾರುಕಟ್ಟೆಯಲ್ಲಿರುವ ಭಯವನ್ನು ಗ್ರಹಿಸಲು ನೆರವಾಗಬಲ್ಲ ಇಂಡೆಕ್ಸ್.
ವಿಐಎಕ್ಸ್ ಎಂದರೇನು?
ವಿಐಎಕ್ಸ್ ಎಂದರೆ ವೊಲಟಾಲಿಟಿ ಇಂಡೆಕ್ಸ್. ಷೇರುಮಾರುಕಟ್ಟೆಯಲ್ಲಿನ ಸಂಭಾವ್ಯ ಏರಿಳಿತವನ್ನು ಇದು ವ್ಯಕ್ತಪಡಿಸುತ್ತದೆ. ಮುಂದಿನ 30 ದಿನಗಳಲ್ಲಿ ಮಾರುಕಟ್ಟೆಯ ಏರಿಳಿತ ಹೇಗಿರುತ್ತೆ ಎಂಬುದರ ಸೂಚಿಯನ್ನು ಇಲ್ಲಿ ಕಾಣಬಹುದು. ವಿಐಎಕ್ಸ್ಗೆ ನಿಫ್ಟಿ ಇಂಡೆಕ್ಸ್ ಆಪ್ಷನ್ ದರಗಳಲ್ಲಿನ ಸಂಚಲನವೇ ಆಧಾರವಾಗಿರುತ್ತದೆ.
ಎಫ್ ಅಂಡ್ ಒ ಟ್ರೇಡಿಂಗ್ ಮಾಡಿದವರಿಗೆ ಆಪ್ಷನ್ಸ್ ಟ್ರೇಡಿಂಗ್ ತಿಳಿದಿರಬಹುದು. ಎನ್ಎಸ್ಇನಲ್ಲಿ ನಿಫ್ಟಿ ಆಪ್ಷನ್ಸ್ಗೆ ಸಿಗುವ ಆರ್ಡರ್ ಬುಕ್ನ ಲೆಕ್ಕಾಚಾರವು ವಿಐಎಕ್ಸ್ನಲ್ಲಿ ಇರುತ್ತದೆ. ನಿಫ್ಟಿ50 ಸೂಚ್ಯಂಕದಲ್ಲಿ ಎಷ್ಟರಮಟ್ಟಿಗೆ ಏರಿಳಿತ ಆಗಬಹುದು ಎಂಬುದನ್ನು ಇದರಿಂದ ಗ್ರಹಿಸಬಹುದು.
ಇದನ್ನೂ ಓದಿ: ಬ್ರಹ್ಮಪುತ್ರ ನದಿಯನ್ನು ಚೀನಾ ತಡೆದರೆ ಭಾರತಕ್ಕೆ ಎಂಥ ಹಾನಿ? ಚೀನಾದಿಂದ ಭಾರತಕ್ಕೆ ಹರಿದುಬರುವ ಬೇರೆ ನದಿಗಳ್ಯಾವುವು?
ನಿಫ್ಟಿ ಆಪ್ಷನ್ಸ್ ಟ್ರೇಡಿಂಗ್ನಲ್ಲಿ ಪುಟ್ ಆಪ್ಷನ್ಸ್ ಎಂಬುದಿರುತ್ತದೆ. ನಷ್ಟದ ಸಂಭಾವ್ಯತೆ ಇದ್ದಾಗ ಟ್ರೇಡರ್ಗಳು ಈ ಪುಟ್ ಆಪ್ಷನ್ಸ್ ಬಳಸುತ್ತಾರೆ. ಇದು ಹೆಚ್ಚಾದಾಗ ಆಪ್ಷನ್ ಪ್ರೀಮಿಯಮ್ ಕೂಡ ಹೆಚ್ಚಾಗುತ್ತದೆ. ಅದರ ಪರಿಣಾಮವಾಗಿ ವಿಐಎಕ್ಸ್ ಕೂಡ ಹೆಚ್ಚುತ್ತದೆ.
ವ್ಯಾಪಾರ ವಹಿವಾಟು, ರಾಜಕೀಯ, ಆರ್ಥಿಕ ಸ್ಥಿತಿಗತಿಯನ್ನು ಬದಲಾಯಿಸಬಲ್ಲಂತಹ ಯಾವುದೇ ವಿದ್ಯಮಾನ ನಡೆದರೂ ವಿಐಎಕ್ಸ್ ಇಂಡೆಕ್ಸ್ ಏರುವ ಟ್ರೆಂಡ್ ಇರುತ್ತದೆ. ವಿಐಎಕ್ಸ್ ಇಂಡೆಕ್ಸ್ ಏರಿದರೆ ಸಾಮಾನ್ಯವಾಗಿ ಷೇರುಪೇಟೆ ಕುಸಿಯಬಹುದು ಎನ್ನುವ ಅಂದಾಜು ಇರುತ್ತದೆ. ಹಾಗಂತ ಅದೇ ಆಗಬೇಕೆಂದಿಲ್ಲ. ವಿಐಎಕ್ಸ್ ಹೆಚ್ಚಿನ ಮಟ್ಟದಲ್ಲಿ ಇದ್ದಾಗ ಮಾರುಕಟ್ಟೆಯಲ್ಲಿ ಏರಿಳಿತದ ಸಾಧ್ಯತೆ ಹೆಚ್ಚಿರುತ್ತದೆ ಎಂಬುದು ನಿಜವಾದ ಸಂಗತಿ.
ಇದನ್ನೂ ಓದಿ: ಬಾಲಿವುಡ್ ನಟ ಅರ್ಷದ್ ವಾರ್ಸಿ ಸೇರಿ 59 ಮಂದಿಗೆ ಷೇರುಬಜಾರು ನಿರ್ಬಂಧ; ಕಾರಣವೇನು? ಇಲ್ಲಿದೆ ಡೀಟೇಲ್ಸ್
ವಿಐಎಕ್ಸ್ ಮಟ್ಟ ಹಾಗೂ ಅದು ನೀಡುವ ಸೂಚನೆ
- 10-15: ಸ್ಥಿರತೆ ಇರುತ್ತದೆ. ಷೇರುಬೆಲೆ ಸಹಜವಾಗಿ ವರ್ತಿಸುತ್ತದೆ.
- 15-25: ಮಧ್ಯಮ ಮಟ್ಟದ ಮಾರುಕಟ್ಟೆ ಏರಿಳಿತ ಕಾಣಬಹುದು.
- 25ಕ್ಕಿಂತ ಹೆಚ್ಚು: ತೀವ್ರತರವಾದ ಏರಿಳಿತ ಸಾಧ್ಯತೆಯನ್ನು ಇದು ಸೂಚಿಸುತ್ತದೆ. ನಿಫ್ಟಿ ಸೂಚ್ಯಂಕಗಳು ತೀವ್ರವಾಗಿ ಏರಲೂ ಬಹುದು, ಅಥವಾ ಕುಸಿಯಲೂ ಬಹುದು ಎಂಬುದನ್ನು ಅರ್ಥ ಮಾಡಿಕೊಳ್ಳಬೇಕು.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
