ಟಾಟಾ ಗ್ರೂಪ್​ಗೆ ಮುಂದಿನ ವಾರಸುದಾರ ಯಾರೆಂದು ಇವತ್ತು ನಿರ್ಧರಿಸಲಿದೆ ಟಾಟಾ ಟ್ರಸ್ಟ್

ಮುಂಬೈ, ಅಕ್ಟೋಬರ್ 11: ಮೊನ್ನೆ ಬುಧವಾರ ರತನ್ ಟಾಟಾ ನಿಧನದ ಬಳಿಕ ಅವರ ಕುಟುಂಬದಿಂದ ಟಾಟಾ ಗ್ರೂಪ್​ಗೆ ಯಾರು ಮುಂದಿನ ನಾಯಕತ್ವ ವಹಿಸುತ್ತಾರೆ ಎಂಬ ಪ್ರಶ್ನೆ ಇದೆ. ಇದಕ್ಕೆ ಇಂದು ಉತ್ತರ ಸಿಗುವ ಸಾಧ್ಯತೆ ಇದೆ. ಬ್ಲೂಮ್​ಬರ್ಗ್ ವರದಿ ಪ್ರಕಾರ ಮುಂಬೈನಲ್ಲಿ ಟಾಟಾ ಟ್ರಸ್ಟ್​ಗಳು ಇಂದು ಸಭೆ ನಡೆಸಿ ಈ ಬಗ್ಗೆ ತೀರ್ಮಾನ ತೆಗೆದುಕೊಳ್ಳಬಹುದು ಎಂದು ಈ ವರದಿಯು ಮೂಲಗಳನ್ನು ಉಲ್ಲೇಖಿಸಿ ಹೇಳುತ್ತಿದೆ.

ಟಾಟಾ ಕುಟುಂಬದ ಟ್ರಸ್ಟ್​ಗಳಲ್ಲಿ ಸರ್ ದೊರಾಬ್​ಜಿ ಟಾಟಾ ಟ್ರಸ್ಟ್ ಮತ್ತು ಸರ್ ರತನ್ ಟಾಟಾ ಟ್ರಸ್ಟ್ ಪ್ರಮುಖವಾದುವು. ಟಾಟಾ ಸನ್ಸ್ ಸಂಸ್ಥೆಯಲ್ಲಿ ಇವುಗಳು ಹೊಂದಿರುವ ಷೇರುಪಾಲು ಶೇ. 66ರಷ್ಟಿದೆ. ಇದೇ ಟಾಟಾ ಸನ್ಸ್ ಅಡಿಯಲ್ಲಿ ಟಾಟಾ ಗ್ರೂಪ್ ಬರುತ್ತದೆ. ಈ ಗ್ರೂಪ್​ನಲ್ಲಿ ಸುಮಾರು 90ರಿಂದ 100 ಕಂಪನಿಗಳು ಅಸ್ತಿತ್ವದಲ್ಲಿವೆ. ನೂರಕ್ಕೂ ಹೆಚ್ಚು ದೇಶಗಳಲ್ಲಿ ವ್ಯವಹಾರಗಳನ್ನು ಹೊಂದಿವೆ. ಒಟ್ಟಾರೆ ಎಲ್ಲಾ ಟಾಟಾ ಗ್ರೂಪ್ ಕಂಪನಿಗಳ ಆದಾಯ ಸೇರಿಸಿದರೆ ವರ್ಷಕ್ಕೆ 165 ಬಿಲಿಯನ್ ಡಾಲರ್​ಗೂ ಅಧಿಕ ಆಗುತ್ತದೆ. ಅಂದರೆ 12 ಲಕ್ಷ ಕೋಟಿ ರೂ ಆಸುಪಾಸಿನ ವರಮಾನವನ್ನು ಹೊಂದಿರುವ ಟಾಟಾ ಗ್ರೂಪ್​ನಿಂದ 10 ಲಕ್ಷಕ್ಕೂ ಹೆಚ್ಚು ಜನರಿಗೆ ಉದ್ಯೋಗ ಸಿಕ್ಕಿದೆ.

ಟಾಟಾ ಗ್ರೂಪ್​ನ ಮುಂದಿನ ವಾರಸುದಾರರು ಯಾರು?

ರತನ್ ಟಾಟಾ ಅವರು ಮುಂದಿನ ವಾರಸುದಾರಿಕೆ ವಿಚಾರದ ಬಗ್ಗೆ ಯಾವುದಾದರೂ ಉಯಿಲು ಬರೆದಿದ್ದಾರಾ ಅಥವಾ ಯಾರೊಂದಿಗಾದರೂ ಚರ್ಚಿಸಿದ್ದಾರಾ ಎಂಬ ಮಾಹಿತಿ ಸದ್ಯಕ್ಕೆ ಗೊತ್ತಾಗಿಲ್ಲ. ಟಾಟಾ ಸನ್ಸ್​ಗೆ ಸದ್ಯಕ್ಕೆ ಛೇರ್ಮನ್ ಆಗಿರುವುದು ಎನ್ ಚಂದ್ರಶೇಖರನ್. ಇವರು ಟಾಟಾ ಕುಟುಂಬಕ್ಕೆ ಸೇರಿದವರಲ್ಲ. ಟಾಟಾ ಕುಟುಂಬದಲ್ಲಿ ಸದ್ಯಕ್ಕೆ ಉಳಿದಿರುವವರೆಂದರೆ ನೋಯಲ್ ಟಾಟಾ ಹಾಗೂ ಅವರ ಮೂವರು ಮಕ್ಕಳಾದ ಮಾಯಾ, ಲಿಯಾ ಮತ್ತು ನೆವಿಲ್ಲೆ ಟಾಟಾ ಅವರುಗಳು.

ಇದನ್ನೂ ಓದಿ: ಫೋನಿಲ್ಲ, ಸಿಂಪಲ್ ಲೈಫ್.. ರತನ್ ಟಾಟಾ ಸಹೋದರ ಜಿಮ್ಮಿಯದ್ದು ಎಲ್ಲಾ ಇದ್ದೂ ಏನೂ ಇಲ್ಲದಂಥ ಜೀವನ

ನೋಯಲ್ ಟಾಟಾ ಅವರು ರತನ್ ಅವರ ತಂದೆಯ ಎರಡನೇ ಪತ್ನಿಯ ಮಗ. ರತನ್ ಟಾಟಾ ಅವಿವಾಹಿತರಾಗಿದ್ದರು. ಅವರ ಕಿರಿಯ ಸಹೋದರ ಬಿಸಿನೆಸ್​ನಿಂದ ದೂರ ಇದ್ದಾರೆ. ಹೀಗಾಗಿ, ನೋಯಲ್ ಟಾಟಾ ಕುಟುಂಬದಲ್ಲಿ ಒಬ್ಬರಿಗೆ ನಾಯಕತ್ವ ಸಿಗಬಹುದು. ಈ ಪೈಕಿ ಮಾಯಾ ಟಾಟಾ ಮತ್ತು ನೆವಿಲ್ಲೆ ಟಾಟಾ ಅವರ ಹೆಸರು ದಟ್ಟವಾಗಿ ಕೇಳಿಬರುತ್ತಿದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ