FIFA World Cup: ತಮಿಳುನಾಡಿನ ನಾಮಕ್ಕಲ್​ನಿಂದ ಕತಾರ್​ಗೆ ಮೊಟ್ಟೆ ರಫ್ತಿನಲ್ಲಿ ಮೂರು ಪಟ್ಟು ಹೆಚ್ಚಳ

ನಾಮಕ್ಕಲ್: ಫಿಫಾ ವಿಶ್ವಕಪ್ (FIFA World Cup) ಆಯೋಜಿಸಿರುವ ಕತಾರ್​ಗೆ ತಮಿಳುನಾಡಿನ (Tamil Nadu) ನಾಮಕ್ಕಲ್​ನಿಂದ (Namakkal) ಮಾಡಲಾಗುತ್ತಿರುವ ಮೊಟ್ಟೆ ರಫ್ತಿನಲ್ಲಿ (Egg exporters) ಮೂರು ಪಟ್ಟು ಹೆಚ್ಚಳವಾಗಿದೆ. ಇದು ನಾಮಕ್ಕಲ್ ಜಿಲ್ಲೆಯ ಕುಕ್ಕುಟೋದ್ಯಮಿಗಳ ಸಂತಸಕ್ಕೆ ಕಾರಣವಾಗಿದೆ. ನಾಮಕ್ಕಲ್​ನಿಂದ ಮೊಟ್ಟೆ ರಫ್ತಾಗುತ್ತಿರುವ ದೇಶಗಳ ಪೈಕಿ ಕತಾರ್ ಪ್ರಮುಖವಾದದ್ದು. ಫುಟ್​ಬಾಲ್ ವಿಶ್ವಕಪ್ ಕಾರಣ ಮೊಟ್ಟೆಯ ಬೇಡಿಕೆಯಲ್ಲಿ ಮೂರು ಪಟ್ಟು ಹೆಚ್ಚಳವಾಗಿದೆ. ಪ್ರತಿ ತಿಂಗಳು 50 ಲಕ್ಷದಷ್ಟು ಮೊಟ್ಟೆಗಳು ಕತಾರ್​ಗೆ ರಫ್ತಾಗುತ್ತಿದ್ದವು. ಈ ಸಂಖ್ಯೆ ಈಗ 1.50 ಕೋಟಿ ತಲುಪಿದೆ ಎಂದು ನಾಮಕ್ಕಲ್ ಮೊಟ್ಟೆ ರಫ್ತುದಾರರ ಮತ್ತು ಫಾರ್ಮ್ ಮಾಲೀಕರ ವ್ಯಾಪಾರಿ ಸಂಘದ ಪ್ರಧಾನ ಕಾರ್ಯದರ್ಶಿ ಪಿ.ವಿ. ಸೆಂಥಿಲ್ ತಿಳಿಸಿದ್ದಾರೆ.

‘ಪ್ರತಿ ತಿಂಗಳು 10 ಕಂಟೇನರ್​ ಮೊಟ್ಟೆಗಳನ್ನು ಕತಾರ್​ಗೆ ಕಳುಹಿಸಿಕೊಡಲಾಗುತ್ತಿತ್ತು. ಈಗ 30 ಕಂಟೇನರ್​ಗಳಲ್ಲಿ ಮೊಟ್ಟೆ ಕಳುಹಿಸಿಕೊಡಲಾಗುತ್ತಿದೆ. ಕತಾರ್​ಗೆ ಕಳುಹಿಸುವ ಪ್ರತಿ ಮೊಟ್ಟೆಗೆ 7 ರೂ. ದರ ನಿಗದಿಪಡಿಸಿದ್ದೇವೆ. ಮೊಟ್ಟೆಯ ಉತ್ಪಾದನಾ ವೆಚ್ಚ 5 ರೂ. ಆಗುತ್ತದೆ. ಕತಾರ್​ಗೆ ಕಳುಹಿಸಿಕೊಡಲು ಪ್ರತಿ ಮೊಟ್ಟೆಗೆ 2 ರೂ.ನಂತೆ ವೆಚ್ಚವಾಗುತ್ತದೆ’ ಎಂದು ಅವರು ಹೇಳಿದ್ದಾರೆ.

ಪ್ರತಿ ದಿನ 5 – 6 ಕೋಟಿ ಮೊಟ್ಟೆ ಉತ್ಪಾದನೆ

ಇದನ್ನೂ ಓದಿ

ಯುಪಿಐ ಮೂಲಕ ಎಟಿಎಂನಿಂದ ಹಣ ವಿತ್​ಡ್ರಾ ಮಾಡುವುದು ಹೇಗೆ? ಇಲ್ಲಿದೆ ಪೂರ್ಣ ಮಾಹಿತಿ

ಇ-ಕಾಮರ್ಸ್ ವೆಬ್​​ಸೈಟ್​ಗಳಲ್ಲಿ ನಕಲಿ ರಿವ್ಯೂಗೆ ಬೀಳಲಿದೆ ಕಡಿವಾಣ; ಶೀಘ್ರದಲ್ಲೇ ಬರಲಿದೆ ನಿಯಮ

It Jobs; ಐಟಿ ಕ್ಷೇತ್ರದಲ್ಲಿ ಉದ್ಯೋಗ ಹುಡುಕುತ್ತಿದ್ದೀರಾ? ಶೀಘ್ರದಲ್ಲೇ ನಿಮಗಿದೆ ಸಿಹಿ ಸುದ್ದಿ

ಡಿಜಿಟಲ್ ಪಾವತಿಗೆ ಶುಲ್ಕ: ರಿಸರ್ವ್ ಬ್ಯಾಂಕ್ ಜೊತೆಗೆ ಮಾತುಕತೆ ಆರಂಭಿಸಿದ ಪೇಮೆಂಟ್ಸ್ ಕಾರ್ಪೊರೇಷನ್

ನಾಮಕ್ಕಲ್​ನಲ್ಲಿ ಸುಮಾರು 1,100 ಪೌಲ್ಟ್ರಿ ಫಾರ್ಮ್​ಗಳಿದ್ದು ಪ್ರತಿ ದಿನ 5ರಿಂದ 6 ಕೋಟಿ ಮೊಟ್ಟೆ ಉತ್ಪಾದಿಸಲಾಗುತ್ತದೆ. ಇಲ್ಲಿ ತಯಾರಾದ ಮೊಟ್ಟೆಗಳನ್ನು ದೇಶದ ಕೆಲವೇ ಕಡೆಗಳಿಗೆ ಕಳುಹಿಸಿಕೊಡಲಾಗುತ್ತದೆ. ಆದರೆ ಸೌದಿ ಅರೇಬಿಯಾ, ಕತಾರ್, ಇರಾನ್, ಇರಾಕ್, ಒಮಾನ್, ಬಹ್ರೈನ್ ಹಾಗೂ ಮಾಲ್ಡೀವ್ಸ್​ಗಳಿಗೆ ರಫ್ತಾಗುತ್ತದೆ. ಈ ದೇಶಗಳಿಗೆ ಪ್ರತಿ ತಿಂಗಳು 2 ಕೋಟಿ ಮೊಟ್ಟೆ ರಫ್ತಾಗುತ್ತದೆ ಎಂದು ನಾಮಕ್ಕಲ್​​ನ ರಫ್ತುದಾರರು ಹೇಳಿದ್ದಾರೆ.

ರಷ್ಯಾ – ಉಕ್ರೇನ್ ಯುದ್ಧವೂ ಕಾರಣ

ಕತಾರ್ ಸೇರಿದಂತೆ ಇತರ ದೇಶಗಳು ಭಾರತದಿಂದ ಹೆಚ್ಚು ಮೊಟ್ಟೆ ಖರೀದಿಸಲು ಉಕ್ರೇನ್-ರಷ್ಯಾ ನಡುವಣ ಯುದ್ಧ ಕೂಡ ಪ್ರಮುಖ ಕಾರಣ. ಯುದ್ಧದ ನಂತರ ಪೌಲ್ಟ್ರಿ ಆಹಾರ ಮತ್ತು ಕಚ್ಚಾ ವಸ್ತುಗಳ ದರ ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಹೆಚ್ಚಾಯಿತು. ಈ ಕಾರಣದಿಂದ ಅತಿ ಹೆಚ್ಚು ಮೊಟ್ಟೆ ಉತ್ಪಾದಿಸುವ ದೇಶವಾದ ಟರ್ಕಿ ದರ ಹೆಚ್ಚಳ ಮಾಡಿತು. 360 ಮೊಟ್ಟೆಗಳುಳ್ಳ ಒಂದು ಬಾಕ್ಸ್​ಗೆ ಟರ್ಕಿಯಲ್ಲಿ ಸಾಮಾನ್ಯವಾಗಿ 18ರಿಂದ 20 ಡಾಲರ್ ಇರುತ್ತಿತ್ತು. ಆದರೆ, ಕಳೆದ ತಿಂಗಳು ಇದನ್ನು 36 ಡಾಲರ್​ಗೆ ಹೆಚ್ಚಿಸಲಾಗಿತ್ತು. ಟರ್ಕಿಯ ಮೊಟ್ಟೆ ದರಕ್ಕೆ ಹೋಲಿಸಿದರೆ ನಾಮಕ್ಕಲ್ ಮೊಟ್ಟೆಯ ದರ ಕಡಿಮೆ ಇದೆ. ಹೀಗಾಗಿ ಯುಎಇ, ಕತಾರ್ ಹಾಗೂ ಒಮಾನ್​ನಂಥ ದೇಶಗಳು ನಮ್ಮಿಂದ ಹೆಚ್ಚು ಮೊಟ್ಟೆ ಖರೀದಿಗೆ ಮುಂದಾಗಿವೆ ಎಂದು ‘ಟಿವಿ 9 ನೆಟ್​ವರ್ಕ್​’ನ ಅಂಗಸಂಸ್ಥೆ ‘ನ್ಯೂಸ್ 9’ಗೆ ನಾಮಕ್ಕಲ್​ನ ರಫ್ತು ಉದ್ಯಮಿ ಎನ್. ಧರ್ಮಲಿಂಗಂ ತಿಳಿಸಿದ್ದಾರೆ.

ಈ ಮಧ್ಯೆ, ಹಕ್ಕಿ ಜ್ವರ ಮುಕ್ತ ಮೊಟ್ಟೆ ಉತ್ಪಾದನಾ ವಲಯ ಎಂಬ ಟ್ಯಾಗ್​ ಅನ್ನು ನಾಮಕ್ಕಲ್​ಗೆ ನೀಡಬೇಕು ಎಂದು ರಫ್ತುದಾರರು ಕೇಂದ್ರ ಸರ್ಕಾರವನ್ನು ಒತ್ತಾಯಿಸಿದ್ದಾರೆ. ಇದರಿಂದ ರಫ್ತು ಹೆಚ್ಚಳಕ್ಕೆ ಇನ್ನಷ್ಟು ಪ್ರಯೋಜನವಾಗಲಿದೆ ಎಂದು ಅವರು ಹೇಳಿದ್ದಾರೆ.

ಇನ್ನಷ್ಟು ವಾಣಿಜ್ಯ ಸುದ್ದಿ ಓದಲು ಇಲ್ಲಿ ಕ್ಲಿಕ್ ಮಾಡಿ