TCS: ಎಪಿಕ್ ಸಿಸ್ಟಮ್ಸ್ ಪ್ರಕರಣದಲ್ಲಿ 140 ಮಿಲಿಯನ್ ಯುಎಸ್​ಡಿ ದಂಡವನ್ನು ಟಿಸಿಎಸ್​ಗೆ ಖಾತ್ರಿ ಪಡಿಸಿದ ಯುಎಸ್​ ಕೋರ್ಟ್

ಭಾರತದ ಪ್ರಮುಖ ಐಟಿ ಕಂಪೆನಿಯಾದ ಟಾಟಾ ಕನ್ಸಲ್ಟೆನ್ಸಿ ಸರ್ವೀಸಸ್​ಗೆ (TCS) ಅಮೆರಿಕದ ಜಿಲ್ಲಾ ಕೋರ್ಟ್ 140 ಮಿಲಿಯನ್ (1.40 ಕೋಟಿ) ಅಮೆರಿಕನ್ ಡಾಲರ್​ ದಂಡ ವಿಧಿಸಿದೆ. ವಿಸ್ಕನ್ಸಿನ್​ನ ವೆಸ್ಟರ್ನ್ ಡಿಸ್ಟ್ರಿಕ್ಟ್ ಇದನ್ನು ಖಾತ್ರಿ ಪಡಿಸಿದೆ. ಎಪಿಕ್ ಸಿಸ್ಟಮ್ಸ್​ ಜತೆಗಿನ ವ್ಯಾಜ್ಯದಲ್ಲಿ ಇಷ್ಟು ದೊಡ್ಡ ಮೊತ್ತದ ದಂಡವನ್ನು ಟಿಸಿಎಸ್ ಪಾವತಿ ಮಾಡಬೇಕಾಗಿದೆ. ಈ ತೀರ್ಪಿನ ವಿರುದ್ಧ ಶಿಕಾಗೋದ 7ನೇ ಸರ್ಕ್ಯೂಟ್ ಕೋರ್ಟ್​​ನಲ್ಲಿ ಮೇಲ್ಮನವಿಯನ್ನು ಸಲ್ಲಿಸಲು ಟಿಸಿಎಸ್​ ಆಲೋಚಿಸಿದೆ. “ನಾವು ನಿಮಗೆ ಈ ಮೂಲಕ ತಿಳಿಸುವುದೇನೆಂದರೆ, ಎಪಿಕ್ ಸಿಸ್ಟಮ್ಸ್ ಕಾರ್ಪೊರೇನ್ ವಿಷಯದಲ್ಲಿ ವೆಸ್ಟರ್ನ್ ಡಿಸ್ಟ್ರಿಕ್ಟ್ ಆಫ್ ವಿಸ್ಕನ್ಸಿನ್​ ಆದೇಶ ಹೊರಡಿಸಿದ್ದು, ಶಿಕ್ಷಾರ್ಹ ಹಾನಿಗೆ 140 ಮಿಲಿಯನ್ ಅಮೆರಿಕನ್ ಡಾಲರ್ ಪರಿಹಾರ ಮೊತ್ತಕ್ಕೆ ಇಳಿಕೆ ಮಾಡಿದೆ. ಇದರ ಪ್ರಕಾರವಾಗಿ ತಿದ್ದುಪಡಿಯಾದ ತೀರ್ಪನ್ನು ಫೈಲ್ ಮಾಡುವಂತೆ ನ್ಯಾಯಾಲಯ ಗುಮಾಸ್ತೆಗೆ ಸೂಚಿಸಲಾಗಿದೆ,” ಎಂದು ನಿಯಂತ್ರಕ ಫೈಲಿಂಗ್​ನಲ್ಲಿ ಟಿಸಿಎಸ್​ ತಿಳಿಸಿದೆ.

2021ರ ಆಗಸ್ಟ್​ನಲ್ಲಿ ಎಪಿಕ್ ಸಿಸ್ಟಮ್ಸ್​ಗೆ 280 ಮಿಲಿಯನ್​ ಯುಎಸ್​ಡಿ ದಂಡ ಪಾವತಿಸಬೇಕು ಎಂದಿದ್ದ ಆದೇಶವನ್ನು 140 ಮಿಲಿಯನ್ ಯುಎಸ್​ಡಿಗೆ ಇಳಿಸಲಾಗಿತ್ತು. 2014ರ ಅಕ್ಟೋಬರ್​ನಲ್ಲಿ ಎಪಿಕ್​ಗೆ 940 ಮಿಲಿಯನ್ ಡಾಲರ್ ಪಾವತಿಸುವಂತೆ ಟಿಸಿಎಸ್​ಗೆ ಸೂಚಿಸಲಾಗಿತ್ತು. ಆ ನಂತರ ಮೊತ್ತವನ್ನು 280 ಮಿಲಿಯನ್ ಡಾಲರ್​ಗೆ ಇಳಿಸಲಾಯಿತು.

ಏನಿದು ಪ್ರಕರಣ?

ವ್ಯಾಪಾರ ರಹಸ್ಯಕ್ಕೆ ಸಂಬಂಧಿಸಿದಂತೆ ಅಮೆರಿಕದ ನ್ಯಾಯಾಲಯದಲ್ಲಿ ಟಾಟಾದ ಎರಡು ಕಂಪೆನಿಗಳಾದ ಟಾಟಾ ಕನ್ಸಲ್ಟೆನ್ಸಿ ಸರ್ವೀಸಸ್ ಮತ್ತು ಟಾಟಾ ಅಮೆರಿಕ ಇಂಟರ್​ನ್ಯಾಷನಲ್ ಕಾರ್ಪೊರೇಷನ್ ವಿರುದ್ಧ ಎಪಿಕ್ ಸಿಸ್ಟಮ್ಸ್ ದೂರು ಸಲ್ಲಿಸಿತ್ತು. ಕಂಪೆನಿಯ ವ್ಯಾಪಾರ ರಹಸ್ಯ, ಗೋಪ್ಯ ಮಾಹಿತಿಗಳು ದಾಖಲಾತಿಗಳು ಮತ್ತು ದತ್ತಾಂಶಗಳನ್ನು ಕಳುವು ಮಾಡಲಾಗಿದೆ ಎಂದು ಆರೋಪಿಸಲಾಗಿತ್ತು.

ಅಮೆರಿಕ ಮೂಲದ ಹೆಲ್ತ್​ಕೇರ್ ಸಾಫ್ಟ್​ವೇರ್ ಕಂಪೆನಿಯಾದ ಎಪಿಕ್ ಸಿಸ್ಟಮ್ಸ್ ಕೈಸರ್ ಪರ್ಮನೆಂಟೆ ಎಂಬ ಸೇವಾ ಪೂರೈಕೆದಾರರ ಜತೆಗೆ ತನ್ನ ಹೆಲ್ತ್​ಕೇರ್ ನಿರ್ವಹಣೆ ವ್ಯವಸಸ್ಥೆಯನ್ನು ಅನುಷ್ಠಾನಗೊಳಿಸಿತ್ತು. ಸಿಸ್ಟಮ್ ಅನುಷ್ಠಾನಕ್ಕೆ ಟಿಸಿಎಸ್​ ಅನ್ನು ನೇಮಿಸಿಕೊಳ್ಳಲಾಗಿತ್ತು. ಈ ಸಂದರ್ಭದಲ್ಲಿ ಎಪಿಕ್​ ಕಂಪೆನಿಯ ದಾಖಲಾತಿಗಳನ್ನು ನೋಡುವುದರಿಂದ ಟಿಸಿಎಸ್ ಸಿಬ್ಬಂದಿಯನ್ನು ನಿರ್ಬಂಧಿಸಲಾಗಿತ್ತು. ಆದರೆ ಎಪಿಕ್ ಸಿಸ್ಟಮ್ಸ್ ಹೇಳುವಂತೆ, ಕೈಸರ್ ಪರ್ಮನೆಂಟೆ ಉದ್ಯೋಗಿಗಳ ಕ್ರೆಡೆನ್ಷಿಯಲ್ಸ್​ಗಳನ್ನು ಬಳಸಿಕೊಂಡು, 6000ದಷ್ಟು ದಾಖಲಾತಿಗಳನ್ನು ಟಿಸಿಎಸ್ ಸಿಬ್ಬಂದಿ ಕಳುವು ಮಾಡಿದ್ದಾರೆ.

ಆದರೆ, ಟಿಸಿಎಸ್ ಈ ತನಕ ಹೇಳಿರುವಂತೆ, ಎಪಿಕ್ ಮಾಹಿತಿಯನ್ನು ದುರ್ಬಳಕೆ ಮಾಡಿಕೊಂಡಿರುವ ಯಾವುದೇ ಸಾಕ್ಷ್ಯ ಇಲ್ಲ. ಮತ್ತು ಇದನ್ನೇ ನ್ಯಾಯಾಲಯದಲ್ಲೂ ಹೇಳುತ್ತಾ ಬಂದಿದೆ.

ಇದನ್ನೂ ಓದಿ: TCS FY22 Q4 Results: ಟಿಸಿಎಸ್ ನಾಲ್ಕನೇ ತ್ರೈಮಾಸಿಕ ಲಾಭ 9926 ಕೋಟಿ ರೂಪಾಯಿ; 22 ರೂ. ಡಿವಿಡೆಂಡ್