ಬಾಯ್​ಫ್ರೆಂಡ್​ಗಾಗಿ.. ಯುವತಿಯರ ಬೆತ್ತಲೆ ವಿಡಿಯೋ ಮಾಡ್ತಿದ್ದ ನರ್ಸ್ ಕೊನೆಗೂ ಅಂದರ್​

ಬೆಂಗಳೂರು: ಬಾಯ್​ಫ್ರೆಂಡ್​ಗಾಗಿ ಯುವತಿಯರ ಬೆತ್ತಲೆ ವಿಡಿಯೋ ಮಾಡ್ತಿದ್ದ ಮಹಿಳೆ ಮತ್ತು ಆಕೆಯ ಪ್ರಿಯಕರನನ್ನು ವೈಟ್​ಫೀಲ್ಡ್​ ಪೊಲೀಸರು ಬಂಧಿಸಿದ್ದಾರೆ. ಬಂಧಿತ ಪ್ರೇಮಿಗಳನ್ನು ಆಶ್ಚಿನಿ ಹಾಗೂ ಪ್ರಭು ಎಂದು ಗುರುತಿಸಲಾಗಿದೆ. ನಗರದ ವೈಟ್​ಫೀಲ್ಡ್​ನಲ್ಲಿರುವ ಪ್ರತಿಷ್ಠಿತ ಖಾಸಗಿ ಆಸ್ಪತ್ರೆಯಲ್ಲಿ ನರ್ಸ್ ಆಗಿ ಕೆಲಸ ಮಾಡುತ್ತಿದ್ದ ಅಶ್ವಿನಿ ತನ್ನ ಪ್ರಿಯಕರ ಪ್ರಭುವಿನೊಂದಿಗೆ ಜೊತೆಗೂಡಿ ಈ ಕುಕೃತ್ಯದಲ್ಲಿ ಭಾಗಿಯಾಗಿದ್ದಾಳೆ ಎಂದು ತಿಳಿದುಬಂದಿದೆ.

ಆಸ್ಪತ್ರೆಯ ಲೆಡೀಸ್​ ಹಾಸ್ಟಲ್​ನಲ್ಲಿ ತಂಗಿದ್ದ ನರ್ಸ್​ಗಳು ಸ್ನಾನದ ಕೋಣೆಗೆ ತೆರಳುತ್ತಿದ್ದ ವೇಳೆ ಅಶ್ವಿನಿ ಅಲ್ಲಿ ಮೊಬೈಲ್ ಇಟ್ಟು ಅವರ ಬೆತ್ತಲೆ ವಿಡಿಯೋಗಳನ್ನ ರೆಕಾರ್ಡ್​ ಮಾಡಿಕೊಳ್ಳುತ್ತಿದ್ದಳು ಎಂದು ಹೇಳಲಾಗಿದೆ. ಬಳಿಕ ಅದನ್ನು ಚೆನ್ನೈನಲ್ಲಿದ್ದ ತನ್ನ ಬಾಯ್​ಫ್ರೆಂಡ್​ ಪ್ರಭುಗೆ ರವಾನಿಸುತ್ತಿದ್ದಳು ಎಂದು ತಿಳಿದುಬಂದಿದೆ.

ಅಂದ ಹಾಗೆ, ಅಶ್ವಿನಿ ಹಾಗೂ ಪ್ರಭು ಕಳೆದ ಎರಡು ವರ್ಷಗಳ ಹಿಂದೆ ಮಿಸ್ಡ್ ಕಾಲ್ ಮೂಲಕ ಪರಿಚಯವಾಗಿದ್ದರಂತೆ. ಚೆನ್ನೈನ ಐಷಾರಾಮಿ ಹೋಟೆಲ್​ನಲ್ಲಿ ಚೀಫ್ ಶೆಫ್ ಆಗಿ ಕೆಲಸ‌ ಮಾಡ್ತಿದ್ದ ಪ್ರಭು ಮೊದಲು ಅಶ್ವಿನಿಗೆ ತಾನು ಸ್ನಾನ ಮಾಡುತ್ತಿರುವ ವಿಡಿಯೋವನ್ನು ರೆಕಾರ್ಡ್ ಮಾಡಿ ಕಳಿಸು ಎಂದು ಹೇಳಿ ತರಿಸಿಕೊಂಡಿದ್ದನಂತೆ. ಬಳಿಕ ನಿನ್ನ ಸಹೋದ್ಯೋಗಿ ನರ್ಸ್​ಗಳ ಬೆತ್ತಲೆ ವಿಡಿಯೋ ಸಹ ಕಳಿಸು ಎಂದು ಡಿಮ್ಯಾಂಡ್ ಮಾಡಿದ್ದನಂತೆ. ಕರುಡು ಪ್ರೀತಿಯೋ ಏನೋ ಗೊತ್ತಿಲ್ಲ. ಆದರೆ, ಅಶ್ವಿನಿ ತನ್ನ ಪ್ರಿಯಕರಿನಿಗೋಸ್ಕರ ಈ ಕೆಟ್ಟ ಕೆಲಸಕ್ಕೂ ಇಳಿದಿದ್ದಳು ಎಂಬುದು ವಿಚಾರಣೆ ವೇಳೆ ಒಪ್ಪಿಕೊಂಡಿದ್ದಾಳಂತೆ. ಸದ್ಯ, ಈ ವಿಷಯ ಬೆಳಕಿಗೆ ಬರುತ್ತಿದ್ದಂತೆ ಅಶ್ವಿನಿ ಹಾಗೂ ಚೆನ್ನೈನಿಂದ ಆಕೆಯ ಕಾಮುಕ ಪ್ರೇಮಿ ಪ್ರಭುವನ್ನು ಪೊಲೀಸರು ಬಂಧಿಸಿದ್ದಾರೆ.