ನೋಯ್ಡಾದಲ್ಲಿ ನಾಲ್ಕು ವರ್ಷದ ಬಾಲಕಿ ಮೇಲೆ ಡಿಜಿಟಲ್ ರೇಪ್: ಏನಿದು ಡಿಜಿಟಲ್ ರೇಪ್ ಅಂದ್ರೆ?
ಇತ್ತೀಚೆಗೆಷ್ಟೆ ಡಿಜಿಟಲ್ ಅತ್ಯಾಚಾರ ಆರೋಪಿಯೊಬ್ಬನಿಗೆ ಜೀವಾವಧಿ ಶಿಕ್ಷೆ ವಿಧಿಸಿದ ನಂತರ ನೋಯ್ಡಾದಲ್ಲಿ ಮತ್ತೊಂದು ಪ್ರಕರಣ ಬೆಳಕಿಗೆ ಬಂದಿದೆ. ನಾಲ್ಕು ವರ್ಷದ ಬಾಲಕಿ ಮೇಲೆ ಶಾಲೆಯಲ್ಲಿ ಡಿಜಿಟಲ್ ಅತ್ಯಾಚಾರ ಎಸಗಲಾಗಿದೆ.
Updated on:Sep 18, 2022 | 6:49 PM
ಕಳೆದ ತಿಂಗಳುಗಳಲ್ಲಿ ನೋಯ್ಡಾದಲ್ಲಿ ಡಿಜಿಟಲ್ ಅತ್ಯಾಚಾರದ ಅನೇಕ ಘಟನೆಗಳು ಮುನ್ನೆಲೆಗೆ ಬಂದಿವೆ. ಇತ್ತೀಚೆಗೆಷ್ಟೆ 2019 ರಲ್ಲಿ ನೋಯ್ಡಾದಲ್ಲಿ 3 ವರ್ಷದ ಬಾಲಕಿಯ ಮೇಲೆ ಡಿಜಿಟಲ್ ಅತ್ಯಾಚಾರ ನಡೆಸಿದ್ದ ಡಿಜಿಟಲ್ ಅತ್ಯಾಚಾರ ಆರೋಪಿ 65 ವರ್ಷದ ಅಕ್ಬರ್ ಅಲಿಗೆ ಜೀವಾವಧಿ ಶಿಕ್ಷೆ ವಿಧಿಸಲಾಗಿದೆ. ಆದರೂ, ಈ ಪ್ರಕರಣಗಳು ನಿಲ್ಲುವಂತೆ ಕಾಣುತ್ತಿಲ್ಲ. ಕೆಲವು ದಿನಗಳ ಹಿಂದೆ ಇಂತಹದ್ದೇ ಮತ್ತೊಂದು ಪ್ರಕರಣವು ಬೆಳಕಿಗೆ ಬಂದಿದೆ. ನೋಯ್ಡಾದ ಥಾನಾ 39 ಪ್ರದೇಶದಲ್ಲಿ 4ವರ್ಷದ ಶಾಲಾ ಬಾಲಕಿ ಮೇಲೆ ಡಿಜಿಟಲ್ ರೇಪ್ (Digital Rape) ಎಸಗಲಾಗಿದೆ. ಶಾಲೆಯ ಬಾತ್ ರೂಂನಲ್ಲಿ ಯುವಕನೊಬ್ಬ ತನ್ನ ಮಗಳೊಂದಿಗೆ ಡಿಜಿಟಲ್ ಅತ್ಯಾಚಾರದಂತಹ ಹೇಯ ಘಟನೆ ಎಸಗಿದ್ದಾನೆ ಎಂದು ಬಾಲಕಿಯ ತಾಯಿ ಆರೋಪಿಸಿದ್ದಾರೆ.
ತನ್ನ ಮಗಳ ಮೇಲೆ ಸೆಪ್ಟೆಂಬರ್ 7 ರಂದು ಶಾಲೆಯಲ್ಲಿ ಡಿಜಿಟಲ್ ಅತ್ಯಾಚಾರ ನಡೆದಿದೆ ಎಂದು ಬಾಲಕಿಯ ತಾಯಿ ಪೊಲೀಸರಿಗೆ ದೂರು ನೀಡಿದ್ದಾರೆ. ಬಾಲಕಿ ಡಿಜಿಟಲ್ ಅತ್ಯಾಚಾರದ ಬಗ್ಗೆ ತನ್ನ ಪೋಷಕರಿಗೆ ಯಾವುದೇ ಮಾಹಿತಿ ನೀಡಿಲ್ಲ. ಬದಲಾಗಿ ಹುಡುಗಿ ತನ್ನ ದೇಹದಲ್ಲಿ ತುರಿಕೆ ಎಂದಷ್ಟೇ ಹೇಳಿದ್ದಳು. ಅದರಂತೆ ಪೋಷಕರು ವೈದ್ಯರ ಬಳಿ ಕರೆದೊಯ್ದಾಗ ಬಾಲಕಿ ಘಟನೆಯನ್ನು ವಿವರಿಸಿದ್ದಾಳೆ. ಅದರಂತೆ ಬಾಲಕಿಯ ತಾಯಿ ಪೊಲೀಸ್ ಠಾಣೆಗೆ ದೂರು ನೀಡಿದ್ದು, ಪ್ರಕರಣ ದಾಖಲಿಸಿದ ಪೊಲಿಸರು ಸೆಪ್ಟೆಂಬರ್ 7ರ ಶಾಲೆಯ ಸಿಸಿಟಿವಿ ದೃಶ್ಯಾವಳಿಗಳನ್ನು ಪರಿಶೀಲಿಸಿದ್ದಾರೆ. ಅಂದು ಹುಡುಗಿ ಶಾಲೆಯ ಶೌಚಾಲಯಕ್ಕೆ ಹೋಗುತ್ತಿರುವುದು ಸೆರೆಯಾಗಿದ್ದು, ಸ್ವಲ್ಪ ಸಮಯದ ನಂತರ ಹೊರಗೆ ಬಂದಿದ್ದಾಳೆ. ಸಿಸಿಟಿವಿ ದೃಶ್ಯಾವಳಿಗಳಲ್ಲಿ ಎರಡನೇ ವ್ಯಕ್ತಿ ಕಾಣಿಸುತ್ತಿಲ್ಲ.
ಸದ್ಯ ಪೊಲೀಸರು ಬಾಲಕಿಗೆ ವೈದ್ಯಕೀಯ ಚಿಕಿತ್ಸೆ ನೀಡಿದ್ದು, ಬಾಲಕಿಯ ತಾಯಿ ನೀಡಿದ ದೂರಿನ ಆಧಾರದ ಮೇಲೆ ಪೊಲೀಸರು ಅಪರಿಚಿತ ಯುವಕನ ವಿರುದ್ಧ ಪೋಕ್ಸೋ ಕಾಯ್ದೆಯಡಿ ಪ್ರಕರಣ ದಾಖಲಿಸಿಕೊಂಡಿದ್ದಾರೆ. ಅಷ್ಟೇ ಅಲ್ಲದೆ ಘಟನೆಯ ತನಿಖೆಗೆ ಪೊಲೀಸರು ನಾಲ್ಕು ತಂಡಗಳನ್ನು ರಚಿಸಿದ್ದಾರೆ.
ಏನಿದು ಡಿಜಿಟಲ್ ರೇಪ್?
ಕಳೆದ ಹಲವಾರು ತಿಂಗಳುಗಳಿಂದ ನೋಯ್ಡಾದಲ್ಲಿ ಅನೇಕ ಡಿಜಿಟಲ್ ಅತ್ಯಾಚಾರ ಪ್ರಕರಣಗಳು ಬೆಳಕಿಗೆ ಬಂದಿವೆ. ಡಿಜಿಟಲ್ ಅತ್ಯಾಚಾರ ಅಂದರೆ ಇಂಟರ್ನೆಟ್ ಮೂಲಕ ಲೈಂಗಿಕ ಕಿರುಕುಳವನ್ನು ಮಾಡಲಾಗಿದೆ ಎಂದು ಅರ್ಥವಲ್ಲ. ಬದಲಿಗೆ, ಅಂಕಿ (Digit) ಮತ್ತು ಅತ್ಯಾಚಾರ (Rape) ಎರಡನ್ನೂ ಒಳಗೊಂಡಿರುವ ಎರಡು ಪದಗಳನ್ನು ಸಂಯೋಜಿಸುವ ಮೂಲಕ ಡಿಜಿಟಲ್ ರೇಪ್ ಅನ್ನು ರಚಿಸಲಾಗಿದೆ. ಇಂಗ್ಲಿಷ್ ನಿಘಂಟಿನ ಪ್ರಕಾರ, ಅಂಕಿಗಳ ಅರ್ಥವನ್ನು ಬೆರಳು, ಹೆಬ್ಬೆರಳು ಎಂದು ಕರೆಯಲಾಗುತ್ತದೆ. ಇದರರ್ಥ ಯಾವುದೇ ಮಹಿಳೆಯ ಒಪ್ಪಿಗೆಯಿಲ್ಲದೆ ಯಾವುದೇ ಪುರುಷ ಬೆರಳು ಮತ್ತು ಹೆಬ್ಬೆರಳಿನಿಂದ ಆಕೆಯ ಖಾಸಗಿ ಅಂಗವನ್ನು ಸ್ಪರ್ಶಿಸಿದರೆ ಅದನ್ನು ಡಿಜಿಟಲ್ ರೇಪ್ ಎಂದು ಕರೆಯಲಾಗುತ್ತದೆ.
ಮತ್ತಷ್ಟು ಅಪರಾಧ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
Published On - 6:46 pm, Sun, 18 September 22
