ಯಾರಾದರೂ ಬಿಜೆಪಿಯನ್ನು ಸೋಲಿಸಲು ಬಯಸಿದರೆ, ಟಿಎಂಸಿ ಬೆಂಬಲಿಸುವುದು ಅವರಿಗೆ ಬಿಟ್ಟದ್ದು: ಮಮತಾ ಬ್ಯಾನರ್ಜಿ

ಪಣಜಿ: ಪಶ್ಚಿಮ ಬಂಗಾಳದ (West Bengal) ಮುಖ್ಯಮಂತ್ರಿ ಮತ್ತು ತೃಣಮೂಲ ಕಾಂಗ್ರೆಸ್ (TMC) ನಾಯಕಿ ಮಮತಾ ಬ್ಯಾನರ್ಜಿ (Mamata Banerjee) ಪ್ರಸ್ತುತ ಗೋವಾಕ್ಕೆ (Goa) ಎರಡು ದಿನಗಳ ಭೇಟಿ ನೀಡಿದ್ದು, ಮುಂದಿನ ವರ್ಷ ನಡೆಯಲಿರುವ ರಾಜ್ಯ ವಿಧಾನಸಭಾ ಚುನಾವಣೆಯಲ್ಲಿ ಗೆಲ್ಲುವ ವಿಶ್ವಾಸವನ್ನು ವ್ಯಕ್ತಪಡಿಸಿದ್ದಾರೆ. ಭಾರತೀಯ ಜನತಾ ಪಕ್ಷವನ್ನು (BJP) ಸೋಲಿಸಲು ಇತರ ಪಕ್ಷಗಳು ಟಿಎಂಸಿಯನ್ನು ಬೆಂಬಲಿಸುವುದು ಅವರವರಿಗೆ ಬಿಟ್ಟದ್ದು ಎಂದು ಮಮತಾ ಹೇಳಿದ್ದಾರೆ. 2022ರಲ್ಲಿ ರಾಜ್ಯ ವಿಧಾನಸಭೆ ಚುನಾವಣೆಗೆ ಮುಂಚಿತವಾಗಿ ಬಂಗಾಳ ಮುಖ್ಯಮಂತ್ರಿ ಕರಾವಳಿ ರಾಜ್ಯಕ್ಕೆ ಎರಡನೇ ಬಾರಿ ಭೇಟಿ ನೀಡಿದ್ದಾರೆ. ಅವರು ಈ ವರ್ಷದ ಅಕ್ಟೋಬರ್‌ನಲ್ಲಿ ರಾಜ್ಯಕ್ಕೆ ಭೇಟಿ ನೀಡಿದ್ದರು. ಮುಂಬರುವ ವಿಧಾನಸಭಾ ಚುನಾವಣೆಯಲ್ಲಿ ನಾವು ಗೆಲ್ಲುತ್ತೇವೆ. ಯಾರಾದರೂ ಬಿಜೆಪಿಯನ್ನು ಸೋಲಿಸಲು ಬಯಸಿದರೆ ನಮ್ಮನ್ನು ಬೆಂಬಲಿಸುವುದು ಅವರಿಗೆ ಬಿಟ್ಟದ್ದು. ನಾನು ಪಶ್ಚಿಮ ಬಂಗಾಳಕ್ಕೆ ಪ್ಲಾನ್ ಮಾಡಿದಂತೆಯೇ ಗೋವಾಕ್ಕೂ ಯೋಜನೆ ಹಾಕಿಕೊಂಡಿದ್ದೇನೆ. ನಾನು ಎಲ್ಲಾ ಧರ್ಮ ಮತ್ತು ಜಾತಿಗಳಿಗಾಗಿ ಕೆಲಸ ಮಾಡುತ್ತೇನೆ ಎಂದು ಮಮತಾ ಬ್ಯಾನರ್ಜಿ ಹೇಳಿದ್ದಾರೆ.

ಕಾಂಗ್ರೆಸ್‌ ಬಗ್ಗೆ ಉಲ್ಲೇಖಿಸದೆಯೇ ಟೀಕೆ ಮಾಡಿದ ಅವರು “ನೀವು ಪಶ್ಚಿಮ ಬಂಗಾಳದಲ್ಲಿ ನಮ್ಮ ವಿರುದ್ಧ ಹೋರಾಡಬಹುದಾದಾಗ ಗೋವಾದಲ್ಲಿ ನಿಮ್ಮ ವಿರುದ್ಧ ಏಕೆ ಹೋರಾಡಬಾರದು. ನಾವು ನಿಮ್ಮೊಂದಿಗೆ ಕೆಲಸ ಮಾಡಲು ಬಯಸುತ್ತೇವೆ, ಆದರೆ ನಾವು ಹೋರಾಡುತ್ತೇವೆ. ನಾವು ನಿಮ್ಮ ಮಾತನ್ನು ಕೇಳುವುದಿಲ್ಲ ಮತ್ತು ಬಿಜೆಪಿಯೊಂದಿಗೆ ‘ಅರ್ಧ ಒಪ್ಪಂದ ‘ ಮಾಡಿಕೊಳ್ಳುವುದಿಲ್ಲ ಎಂದು ಮಮತಾ ಹೇಳಿರುವುದಾಗಿ ಸುದ್ದಿ ಸಂಸ್ಥೆ ಪಿಟಿಐ ವರದಿ ಮಾಡಿದೆ.

ಮಹಿಳೆಯರಿಗೆ ನೇರ ನಗದು ವರ್ಗಾವಣೆಗಾಗಿ ಗೋವಾದಲ್ಲಿ ಟಿಎಂಸಿಯ ಚುನಾವಣಾ ಪೂರ್ವ ಭರವಸೆಯಾದ ‘ಗೃಹ ಲಕ್ಷ್ಮಿ’ ಯೋಜನೆ ಕುರಿತು ಟ್ವಿಟರ್‌ನಲ್ಲಿ ಅವರ ಪಕ್ಷ ಮತ್ತು ಕಾಂಗ್ರೆಸ್ ಕಿತ್ತಾಡಿಕೊಂಡ ಒಂದು ದಿನದ ನಂತರ ಬ್ಯಾನರ್ಜಿ ಈ ರೀತಿ ಹೇಳಿಕೆ ನೀಡಿದ್ದಾರೆ .ಈ ಯೋಜನೆಗೆ ವರ್ಷಕ್ಕೆ ₹ 2,100 ಕೋಟಿ ವೆಚ್ಚವಾಗಲಿದೆ ಎಂದು ಕಾಂಗ್ರೆಸ್ ನಾಯಕ ಮತ್ತು ಮಾಜಿ ಕೇಂದ್ರ ಸಚಿವ ಪಿ ಚಿದಂಬರಂ ಟಿಎಂಸಿಯನ್ನು ಲೇವಡಿ ಮಾಡಿದ್ದರು. ಆದರೆ ಟಿಎಂಸಿ ಸಂಸದ ಮತ್ತು ಪಕ್ಷದ ಗೋವಾ ಉಸ್ತುವಾರಿ ಮಹುವಾ ಮೊಯಿತ್ರಾ ಇದು “ಸಂಪೂರ್ಣವಾಗಿ ಸಾಧ್ಯವಾಗುವಂತದ್ದು” ಎಂದು ಹೇಳಿದರು.

ಏತನ್ಮಧ್ಯೆ, ಯಾವುದೇ ಪಕ್ಷವು ಬಿಜೆಪಿಗೆ ಪೈಪೋಟಿ ನೀಡದ ಕಾರಣ ಗೋವಾದಲ್ಲಿ ಚುನಾವಣೆಯಲ್ಲಿ ಸ್ಪರ್ಧಿಸಲು ತಮ್ಮ ಪಕ್ಷ ನಿರ್ಧರಿಸಿದೆ ಎಂದು ಬ್ಯಾನರ್ಜಿ ಹೇಳಿದರು. “ಇಷ್ಟು ವರ್ಷಗಳ ಕಾಲ ನಾವು ಗೋವಾಕ್ಕೆ ಬರಲಿಲ್ಲ, ಆದರೆ ಯಾರೂ ಏನನ್ನೂ ಮಾಡುತ್ತಿಲ್ಲ ಎಂದು ನಾವು ಅರಿತುಕೊಂಡೆವು. ಬಿಜೆಪಿ ವಿರುದ್ಧ ಯಾರೂ ಹೋರಾಟ ಮಾಡಿಲ್ಲ. ಅದಕ್ಕಾಗಿಯೇ ನಾವು ಇಲ್ಲಿಗೆ ಬರಲು ಯೋಚಿಸಿದ್ದೇವೆ, ”ಎಂದು ಅವರು ಹೇಳಿದರು.

ಗೋವಾವನ್ನು “ಮುದ್ದಾದ, ಸುಂದರ ಮತ್ತು ಅತ್ಯಂತ ಬುದ್ಧಿವಂತ” ರಾಜ್ಯ ಎಂದು ಕರೆದ ಮಮತಾ ತಮ್ಮ ಪಕ್ಷವು ಬಿಜೆಪಿ ವಿರುದ್ಧ ಮತಗಳನ್ನು ಒಗ್ಗೂಡಿಸುತ್ತದೆ ಎಂದು ಹೇಳಿದರು. “ನಾವು ಮತಗಳನ್ನು ವಿಭಜಿಸಲು ಬಂದಿಲ್ಲ, ಬಿಜೆಪಿ ವಿರುದ್ಧದ ಮತಗಳನ್ನು ಒಗ್ಗೂಡಿಸಲು ಬಂದಿದ್ದೇವೆ. ನಾವು ಹೋರಾಡುತ್ತೇವೆ, ಆದರೆ ನಾವು ಎಂದಿಗೂ ತಲೆಬಾಗುವುದಿಲ್ಲ, ”ಎಂದು ಅವರು ಹೇಳಿದರು.

ಬಂಗಾಳದ ಮುಖ್ಯಮಂತ್ರಿ ಎರಡು ರಾಜ್ಯಗಳ ನಡುವೆ ಚಲನಚಿತ್ರಗಳು ಮತ್ತು ಫುಟ್‌ಬಾಲ್‌ಗೆ ಒಲವು ತೋರಿದರು. ಪಶ್ಚಿಮ ಬಂಗಾಳದ ಫುಟ್‌ಬಾಲ್ ದಂತಕಥೆಗಳು ಗೋವಾದಲ್ಲಿನ ಸ್ಥಳೀಯ ನಾಯಕರನ್ನು ಸೇರಿಕೊಳ್ಳುತ್ತಾರೆ ಮತ್ತು ಟಿಎಂಸಿಗೆ ಪ್ರಚಾರ ಮಾಡುತ್ತಾರೆ ಎಂದು ಹೇಳಿದರು.  ಟಿಎಂಸಿ ಎಂದರೆ ‘Temple-Mosque-Church’. ನಾವು ಬಿಜೆಪಿ ವಿರುದ್ಧ ಹೋರಾಡುತ್ತೇವೆ. ಗೆಲ್ಲುವ ಅವಕಾಶವಿದೆಯೇ? ನಾವು ಗೆಲ್ಲುತ್ತೇವೆ ಎಂಬ ವಿಶ್ವಾಸ ನಿಮ್ಮಲ್ಲಿದೆಯೇ? ನೀವು ಆತ್ಮವಿಶ್ವಾಸ ಹೊಂದಿದ್ದರೆ, ನಂತರ ಒಂದು ಹೆಜ್ಜೆ ಹಿಂದಕ್ಕೆ ತೆಗೆದುಕೊಳ್ಳಬೇಡಿ. ಮುಂದೆ ಸಾಗಿ ಎಂದು ಗೋವಾದ ಪಣಜಿಯಲ್ಲಿ ಪಕ್ಷದ ಕಾರ್ಯಕರ್ತರನ್ನು ಉದ್ದೇಶಿಸಿ ಮಾತನಾಡಿದ ಪಶ್ಚಿಮ ಬಂಗಾಳ ಸಿಎಂ ಮಮತಾ ಬ್ಯಾನರ್ಜಿ ಹೇಳಿದ್ದಾರೆ.

ಇದನ್ನೂ ಓದಿ: ಸಾರ್ವಜನಿಕವಾಗಿ ಸಂಸದೆ ಮಹುವಾ ಮೊಯಿತ್ರಾರನ್ನು ತರಾಟೆಗೆ ತೆಗೆದುಕೊಂಡ ಮಮತಾ ಬ್ಯಾನರ್ಜಿ

ಇದನ್ನೂ ಓದಿ:  ಇಲ್ಲಿ ಔರಂಗಜೇಬ್ ಬಂದಾಗಲೆಲ್ಲಾ ಶಿವಾಜಿಯೂ ಎದ್ದು ನಿಲ್ಲುತ್ತಾರೆ: ನರೇಂದ್ರ ಮೋದಿ