ಪತ್ನಿ ಜಯಾ ಬಗ್ಗೆ ಅಮಿತಾಭ್ ಬಚ್ಚನ್ ಬಹಿರಂಗವಾಗಿ ಹೇಳಿಕೊಂಡ 5 ವಿಶೇಷ ಮಾತುಗಳು ಇಲ್ಲಿವೆ
Amitabh Bachchan Jaya Bachchan Wedding Anniversary: ಮದುವೆ ನಂತರವೂ ಬೇರೆ ನಟಿಯರ ಜೊತೆ ಅಮಿತಾಭ್ ಹೆಸರು ತಳುಕು ಹಾಕಿಕೊಂಡಿತ್ತು. ಹತ್ತಾರು ಗಾಸಿಪ್ಗಳು ಹರಿದಾಡಿದ್ದವು. ಆದರೂ ಅವುಗಳಿಂದ ಅಮಿತಾಭ್ ಮತ್ತು ಜಯ ದಾಂಪತ್ಯಕ್ಕೆ ಧಕ್ಕೆ ಆಗಲಿಲ್ಲ.
Updated on: Jun 03, 2021 | 8:26 AM
ಸೆಲೆಬ್ರಿಟಿಗಳ ಜಗತ್ತಿನಲ್ಲಿ ಮದುವೆ ಎಷ್ಟು ಸುಲಭವೋ ವಿಚ್ಛೇದನವೂ ಅಷ್ಟೇ ಸುಲಭ ಎಂಬಂತಹ ವಾತಾವರಣ ಇದೆ. ಅದರ ನಡುವೆಯೂ ಆದರ್ಶ ದಂಪತಿಗಳಾಗಿ ಬಾಳುತ್ತಿರುವ ಸೆಲೆಬ್ರಿಟಿಗಳು ಅನೇಕರಿದ್ದಾರೆ. ಆ ಸಾಲಿನಲ್ಲಿ ಮುಂಚೂಣಿಯಾಗಿ ಕೇಳಿಬರುವ ಹೆಸರು ಅಮಿತಾಭ್ ಬಚ್ಚನ್ ಮತ್ತು ಜಯಾ ಬಚ್ಚನ್ ಅವರದ್ದು. ಇಂದು (ಜೂ.3) ಈ ಜೋಡಿಗೆ 48ನೇ ವರ್ಷದ ವಿವಾಹ ವಾರ್ಷಿಕೋತ್ಸವ ಸಂಭ್ರಮ. ಕೊವಿಡ್ ಇರುವುದರಿಂದ ಬಂಧು-ಬಾಂಧವರನ್ನು ಜೊತೆ ಸೇರಿಸಿಕೊಂಡು ಈ ದಿನವನ್ನು ಸಂಭ್ರಮಿಸಲು ಸಾಧ್ಯವಾಗುತ್ತಿಲ್ಲ.
ಮದುವೆ ನಂತರವೂ ಬೇರೆ ನಟಿಯರ ಜೊತೆ ಅಮಿತಾಭ್ ಹೆಸರು ತಳುಕು ಹಾಕಿಕೊಂಡಿತ್ತು. ಹತ್ತಾರು ಗಾಸಿಪ್ಗಳು ಹರಿದಾಡಿದ್ದವು. ಆದರೂ ಅವುಗಳಿಂದ ಅಮಿತಾಭ್ ಮತ್ತು ಜಯ ದಾಂಪತ್ಯಕ್ಕೆ ಧಕ್ಕೆ ಆಗಲಿಲ್ಲ. ಕಳೆದ 48 ವರ್ಷಗಳಿಂದ ಪರಸ್ಪರ ನಂಬಿಕೆ, ಪ್ರೀತಿ, ಗೌರವಗಳೊಂದಿಗೆ ದಾಂಪತ್ಯ ಜೀವನ ನಡೆಸುತ್ತಿರುವ ಈ ಸ್ಟಾರ್ಗಳಿಬ್ಬರು ಅನೇಕರಿಗೆ ಮಾದರಿ. ತಮ್ಮ ಪತ್ನಿ ಬಗ್ಗೆ ಅಮಿತಾಭ್ ಹೇಳಿಕೊಂಡ 5 ಇಂಟರೆಸ್ಟಿಂಗ್ ಮಾತುಗಳು ಇಲ್ಲಿವೆ.
1) ‘ನಾನು ಬಯಸಿದ ಎಲ್ಲ ಒಳ್ಳೆಯ ಗುಣಗಳು ಜಯಾ ಅವರಲ್ಲಿ ಇತ್ತು. ಅದೇ ಕಾರಣಕ್ಕಾಗಿ ನಾನು ಅವರನ್ನು ಮದುವೆ ಆದೆ. ಪ್ರೀತಿಯ ಭಾವನೆಗಳನ್ನು ಜಯಾ ಚೆನ್ನಾಗಿ ಅಭಿವ್ಯಕ್ತಿಸುತ್ತಾರೆ’ ಎನ್ನುವ ಮೂಲಕ 1998ರಲ್ಲಿ ಪತ್ನಿಯ ಗುಣಗಾನ ಮಾಡಿದ್ದರು ಬಿಗ್ ಬಿ.
2) ‘ಕೆಟ್ಟ ಉದ್ದೇಶ ಹೊಂದಿರುವ ವ್ಯಕ್ತಿಗಳನ್ನು ಜಯಾ ತಕ್ಷಣಕ್ಕೆ ಪತ್ತೆ ಹಚ್ಚುತ್ತಾರೆ. ಅವರಿಗೆ ಸಿಕ್ಸ್ತ್ ಸೆನ್ಸ್ ಇದೆ ಎನಿಸುತ್ತದೆ. ಅದೇ ಕಾರಣಕ್ಕಾಗಿ ಅವರು ಇಂಥವರನ್ನು ಬೇಗ ಕಂಡು ಹಿಡಿಯುತ್ತಾರೆ’ ಎಂದು ಕೌನ್ ಬನೇಗಾ ಕರೋಡ್ಪತಿ ಕಾರ್ಯಕ್ರಮದಲ್ಲಿ ಬಚ್ಚನ್ ಹೇಳಿದ್ದರು.
3) ‘ಇಂದಿಗೂ ನಾನು ನನ್ನ ಪತ್ನಿಗೆ ಲವ್ ಲೆಟರ್ ಬರೆಯುತ್ತೇನೆ’ ಎಂದು ಕೌನ್ ಬನೇಗಾ ಕರೋಡ್ಪತಿ ಕಾರ್ಯಕ್ರಮದ ವೇದಿಕೆಯಲ್ಲಿ ಅಮಿತಾಭ್ ಬಚ್ಚನ್ ಹೇಳಿದ್ದರು. ಆ ಮೂಲಕ ತಮ್ಮ ರೊಮ್ಯಾಂಟಿಕ್ ಬಾಂಧವ್ಯದ ಬಗ್ಗೆ ಅವರು ಬಾಯಿ ಬಿಟ್ಟಿದ್ದರು.
4) ಗಂಡಂದಿರು ತಮ್ಮ ಪತ್ನಿಯ ಹೆಸರನ್ನು ಮೊಬೈಲ್ನಲ್ಲಿ ತಮ್ಮಿಷ್ಟದಂತೆ ಸೇವ್ ಮಾಡಿಕೊಳ್ಳುತ್ತಾರೆ. ಹಾಗಾದರೆ ಅಮಿತಾಭ್ ಮೊಬೈಲ್ನಲ್ಲಿ ಜಯಾ ಹೆಸರು ಹೇಗೆ ಸೇವ್ ಆಗಿದೆ? ‘JB’ ಎಂದು ಸೇವ್ ಮಾಡಿಕೊಂಡಿರುವುದನ್ನು ಕೂಡ ಕೌನ್ ಬನೇಗಾ ಕರೋಡ್ಪತಿ ಕಾರ್ಯಕ್ರಮದಲ್ಲಿ ಅಮಿತಾಭ್ ಹೇಳಿದ್ದರು.
5) ಇಂಥ ಪತ್ನಿ ಸಿಕ್ಕಿದ್ದು ಆ ದೇವರ ಕೃಪೆ ಎಂದೇ ಅಮಿತಾಭ್ ಹೇಳುತ್ತಾರೆ. ಈ ಬಗ್ಗೆ ಅವರು ತಮ್ಮ ಬ್ಲಾಗ್ನಲ್ಲಿ ಬರೆದುಕೊಂಡಿದ್ದರು. ‘ಫೋಟೋ ನೋಡಿ, ಜೊತೆಯಲ್ಲಿ ಕೆಲಸ ಮಾಡಿ, ಒಟ್ಟಿಗೆ ಸಮಯ ಕಳೆದು, ಒಟ್ಟಿಗೆ ನಿರ್ಧರಿಸಿ, ಮದುವೆ ಆಗಿ, ಮಕ್ಕಳು-ಮೊಮ್ಮಕ್ಕಳನ್ನು ಪಡೆದೆವು. ಎಷ್ಟೋ ಜನರಿಗೆ ಈ ಭಾಗ್ಯ ಇರುವುದಿಲ್ಲ. ನಮಗೆ ಅದೃಷ್ಟ ನೀಡಿದ್ದಕ್ಕೆ ದೇವರಿಗೆ ಧನ್ಯವಾದ ಹೇಳಲೇ ಬೇಕು’ ಎಂದು ಅಮಿತಾಭ್ ಬರೆದುಕೊಂಡಿದ್ದರು.
ಇದನ್ನೂ ಓದಿ:
‘ನಾನು ದೇಣಿಗೆ ಕೇಳಲ್ಲ, ಕೊಡ್ತೀನಿ’; ಬೇರೆ ಸ್ಟಾರ್ಗಳಿಗಿಂತ ಭಿನ್ನ ಹೆಜ್ಜೆ ಇಟ್ಟ ಅಮಿತಾಭ್
