‘ಚಿಂತೆ ಯಾಕೆ ಮಾಡಲಿ’ ಅಂತ ನಿರ್ದೇಶಕಿ ಆದ ಹಾಟ್​ ನಟಿ ದಿಶಾ ಪಟಾಣಿ

ಪುರುಷರಿಗೆ ಹೋಲಿಸಿದರೆ ಸಿನಿಮಾ ನಿರ್ದೇಶನ ಮಾಡುವ ಮಹಿಳೆಯರ ಸಂಖ್ಯೆ ಕಡಿಮೆ. ಅಲ್ಲೊಂದು ಇಲ್ಲೊಂದು ಪ್ರಯತ್ನಗಳು ನಡೆಯುತ್ತವೆಯಾದರೂ ಗಣನೀಯ ಪ್ರಮಾಣದಲ್ಲಿ ನಿರ್ದೇಶಕಿಯರು ಇನ್ನೂ ಬರಬೇಕಿದೆ. ಈ ನಡುವೆ ನಟಿ ದಿಶಾ ಪಟಾಣಿ (Disha Patani) ಅವರು ನಿರ್ದೇಶನದತ್ತ ಆಸಕ್ತಿ ತೋರಿಸಿದ್ದಾರೆ. ಇಷ್ಟು ದಿನ ಹಾಟ್​ ಆಗಿ ಕಾಣಿಸಿಕೊಂಡು ಪಡ್ಡೆಗಳ ನಿದ್ದೆ ಕದಿಯುತ್ತಿದ್ದ ಅವರು ಈಗ ನಿರ್ದೇಶಕರ ಚೇರ್​ನಲ್ಲಿ ಕುಳಿತಿದ್ದಾರೆ. ಅಂದಹಾಗೆ, ದಿಶಾ ಪಟಾಣಿ ಅವರು ನಿರ್ದೇಶನ ಮಾಡಿರುವುದು ಸಿನಿಮಾಗೆ ಅಲ್ಲ. ಬದಲಿಗೆ, ಒಂದು ಮ್ಯೂಸಿಕ್​ ವಿಡಿಯೋಗೆ (Music Video) ಅವರು ಡೈರೆಕ್ಷನ್​ ಮಾಡಿದ್ದಾರೆ. ಅದರ ಪೋಸ್ಟರ್​ ಬಿಡುಗಡೆ ಆಗಿದೆ. ‘ಕ್ಯೂ ಕರೂ ಫಿಕರ್​’ (Kyun Karu Fikar) ಎಂಬ ಶೀರ್ಷಿಕೆಯಲ್ಲಿ ಈ ಹಾಡು ಮೂಡಿಬಂದಿದೆ. ‘ಚಿಂತೆ ಯಾಕೆ ಮಾಡಲಿ’ ಎಂಬುದು ಈ ಟೈಟಲ್​ನ ಅರ್ಥ.

‘ಕ್ಯೂ ಕರೂ ಫಿಕರ್​’ ಹಾಡಿಗೆ ನಿರ್ದೇಶನ ಮಾಡುವುದರ ಜೊತೆಗೆ ಮುಖ್ಯ ಪಾತ್ರದಲ್ಲೂ ದಿಶಾ ಪಟಾಣಿ ಅವರೇ ಕಾಣಿಸಿಕೊಂಡಿದ್ದಾರೆ. ಸಮುದ್ರದ ಅಲೆಗಳ ನಡುವೆ ಕುಳಿತು ಖುಷಿ ಖುಷಿಯಾಗಿ ಪೋಸ್​ ನೀಡಿರುವ ಅವರ ಪೋಸ್ಟರ್​ ಗಮನ ಸೆಳೆಯುತ್ತಿದೆ. ಆಗಸ್ಟ್​ 16ರಂದು ಈ ಹಾಡಿನ ಟೀಸರ್​ ಬಿಡುಗಡೆ ಆಗಲಿದೆ. ವೈಭವ್​ ಪಾನಿ ಅವರು ಈ ಹಾಡಿಗೆ ಸಂಗೀತ ನೀಡಿದ್ದಾರೆ. ವಾಯು ಬರೆದ ಸಾಹಿತ್ಯಕ್ಕೆ ಗಾಯಕಿ ನಿಖಿತಾ ಗಾಂಧಿ ಧ್ವನಿ ನೀಡಿದ್ದಾರೆ. ‘ಕ್ಯೂ ಕರೂ ಫಿಕರ್​’ ಸಾಂಗ್​ ಹೇಗೆ ಮೂಡಿಬಂದಿರಬಹುದು ಎಂಬುದನ್ನು ತಿಳಿಯುವ ಕೌತುಕ ಮೂಡಿದೆ.

ದಿಶಾ ಪಟಾಣಿ ಸೋಶಿಯಲ್​ ಮೀಡಿಯಾ ಪೋಸ್ಟ್​:

If you let go of the things you can’t control, it will probably set you free 🦋 🫶🏻‘Kyun Karun Fikar’ 🫶🏻 Sharing a sneak peek to our special project on 16th August 2023 on #PlayDMF official YouTube channel ✨ @NikhitaGandhi @AnshulGarg80 #VaibhavPani @purevayu #DimpleKotecha… pic.twitter.com/azL4lTuJuR

— Disha Patani (@DishPatani) August 14, 2023

ಈ ಮೊದಲು ದಿಶಾ ಪಟಾಣಿ ಅವರು ನಟ ಟೈಗರ್​ ಶ್ರಾಫ್​ ಜೊತೆ ರಿಲೇಷನ್​ಶಿಪ್​ನಲ್ಲಿ ಇದ್ದರು. ಆದರೆ ಇತ್ತೀಚೆಗೆ ಅವರು ಬ್ರೇಕಪ್​ ಮಾಡಿಕೊಂಡಿದ್ದಾರೆ. ಟೈಗರ್​ ಶ್ರಾಫ್​ ಬದಲು ಬೇರೆ ಪ್ರಿಯಕರನ ಸಹವಾಸ ಮಾಡಿದ್ದಾರೆ. ‘ಕ್ಯೂ ಕರೂ ಫಿಕರ್​’ ಹಾಡಿನಲ್ಲಿ ಅವರು ಪ್ರೀತಿ ಮತ್ತು ಬ್ರೇಕಪ್​ ಕುರಿತಾಗಿಯೇ ಹೇಳಲಿದ್ದಾರಾ ಎಂಬ ಅನುಮಾನ ಅನೇಕರಿಗಿದೆ. ಟೀಸರ್​ ಹೊರಬಂದ ಬಳಿಕ ಈ ಬಗ್ಗೆ ಹೆಚ್ಚಿನ ಸ್ಪಷ್ಟತೆ ಸಿಗಲಿದೆ.

ಇದನ್ನೂ ಓದಿ: ‘ನಾನು ಸಿಂಗಲ್’ ಎಂದು ದಿಶಾ ಪಟಾಣಿ ಜೊತೆಗಿನ ಬ್ರೇಕಪ್ ವಿಚಾರ ಒಪ್ಪಿಕೊಂಡ ನಟ ಟೈಗರ್ ಶ್ರಾಫ್

ನಟಿಯಾಗಿ ದಿಶಾ ಪಟಾಣಿ ಅವರಿಗೆ ಚಿತ್ರರಂಗದಲ್ಲಿ ಸಖತ್​ ಬೇಡಿಕೆ ಇದೆ. ಹಲವು ಸಿನಿಮಾಗಳಲ್ಲಿ ಅವರು ಅಭಿನಯಿಸುತ್ತಿದ್ದಾರೆ. ಬಾಲಿವುಡ್​ ಮಾತ್ರವಲ್ಲದೇ ದಕ್ಷಿಣ ಭಾರತದಲ್ಲೂ ಅವರು ಖ್ಯಾತಿ ಗಳಿಸಿದ್ದಾರೆ. ಪ್ರಭಾಸ್​ ಅಭಿನಯದ ‘ಕಲ್ಕಿ 2898 ಎಡಿ’ ಸಿನಿಮಾದಲ್ಲಿ ದಿಶಾ ಪಟಾಣಿ ಅವರಿಗೆ ಒಂದು ಮುಖ್ಯ ಪಾತ್ರ ಇದೆ. ಸೂರ್ಯ ನಟಿಸುತ್ತಿರುವ ಬಹುನಿರೀಕ್ಷಿತ ‘ಕಂಗುವ’ ಸಿನಿಮಾಗೂ ದಿಶಾ ಪಟಾಣಿ ನಾಯಕಿ. ಹಿಂದಿಯ ‘ಯೋಧ’ ಸಿನಿಮಾದಲ್ಲೂ ಅವರು ನಟಿಸಿದ್ದು, ಡಿಸೆಂಬರ್​ನಲ್ಲಿ ಆ ಸಿನಿಮಾ ಬಿಡುಗಡೆ ಆಗಲಿದೆ.

ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ.