‘ಸೀತಾ ರಾಮಂ’ ಸುಂದರಿ ಮೃಣಾಲ್​ ಠಾಕೂರ್​ ಜೊತೆ ಬಾದ್​ಷಾ ಪ್ರೀತಿ-ಪ್ರೇಮ? ಸಿಕ್ತು ಸ್ಪಷ್ಟನೆ

ಸೆಲೆಬ್ರಿಟಿಗಳ ಪ್ರತಿಯೊಂದು ನಡೆಯ ಮೇಲೂ ಅಭಿಮಾನಿಗಳು ಕಣ್ಣಿಟ್ಟಿರುತ್ತಾರೆ. ಅವರ ವರ್ತನೆಯಲ್ಲಿ ಏನಾದರೂ ವ್ಯತ್ಯಾಸ ಕಾಣಿಸಿದರೆ ಕೂಡಲೇ ಗಾಸಿಪ್​ಗಳು (Gossip) ಹುಟ್ಟಿಕೊಳ್ಳುತ್ತವೆ. ಪ್ರೀತಿ-ಪ್ರೇಮದ ವಿಚಾರಗಳು ಕಾಳ್ಗಿಚ್ಚಿನಂತೆ ಹರಡುತ್ತವೆ. ನಟಿ ಮೃಣಾಲ್​ ಠಾಕೂರ್ ಅವರ ವಿಚಾರದಲ್ಲಿ ಈಗ ಅದೇ ರೀತಿ ಆಗಿದೆ. ಖ್ಯಾತ ಸಿಂಗರ್​ ಬಾದ್​ಷಾ (Badshah) ಜೊತೆ ಮೃಣಾಲ್​ ಠಾಕೂರ್​ ಅವರು ಪ್ರೀತಿಯಲ್ಲಿ ಮುಳುಗಿದ್ದಾರೆ ಎಂದು ಕೆಲವರು ಊಹಿಸಿದ್ದಾರೆ. ಇಬ್ಬರ ನಡುವೆ ಆಪ್ತತೆ ಹೆಚ್ಚಿರುವುದೇ ಇದಕ್ಕೆ ಕಾರಣ. ಈ ಗಾಸಿಪ್​ಗಳಿಗೆ ಸ್ವತಃ ಬಾದ್​ಷಾ ಅವರು ಸ್ಪಷ್ಟನೆ ನೀಡಿದ್ದಾರೆ. ಮೃಣಾಲ್ ಠಾಕೂರ್​ (Mrunal Thakur) ಅವರ ಹೆಸರನ್ನು ಪ್ರಸ್ತಾಪ ಮಾಡದೆಯೂ ಅವರು ಪ್ರತಿಕ್ರಿಯೆ ನೀಡಿದ್ದಾರೆ.

ಗಾಸಿಪ್​ ಹುಟ್ಟುಲು ಕಾರಣ?

ಬಾಲಿವುಡ್​ನ ಕೆಲವು ಸೆಲೆಬ್ರಿಟಿಗಳು ಅದ್ದೂರಿಯಾಗಿ ದೀಪಾವಳಿ ಆಯೋಜಿಸುತ್ತಾರೆ. ನಟಿ ಶಿಲ್ಪಾ ಶೆಟ್ಟಿ ಅವರು ತಮ್ಮೆಲ್ಲ ಸ್ನೇಹಿತರಿಗಾಗಿ ದೀಪಾವಳಿ ಹಬ್ಬದ ಔತಣ ಕೂಟ ಆಯೋಜಿಸಿದ್ದರು. ಈ ಪಾರ್ಟಿಗೆ ಬಂದಿದ್ದ ಮೃಣಾಲ್​ ಠಾಕೂರ್​ ಅವರು ಸಿಂಗರ್​ ಬಾದ್​ಷಾ ಜೊತೆ ಕಾಣಿಸಿಕೊಂಡರು. ಅವರಿಬ್ಬರು ಕೈ-ಕೈ ಹಿಡಿದು ನಡೆದಾಡಿದ ವಿಡಿಯೋ ವೈರಲ್​ ಆಯಿತು. ಹಾಗಾಗಿ ಇವರಿಬ್ಬರ ನಡುವೆ ಪ್ರೀತಿ ಚಿಗುರಿದೆ ಎಂದು ಎಲ್ಲರೂ ಮಾತನಾಡಿಕೊಳ್ಳುತ್ತಿದ್ದಾರೆ. ಸೋಶಿಯಲ್​ ಮೀಡಿಯಾ ತುಂಬೆಲ್ಲ ಇವರ ಬಗ್ಗೆಯೇ ಗುಸುಗುಸು ಕೇಳಿಬರಲು ಆರಂಭಿಸಿದೆ.

ಬಾದ್​ಷಾ ಪ್ರತಿಕ್ರಿಯೆ ಏನು?

ಮೃಣಾಲ್​ ಠಾಕೂರ್​ ಜೊತೆಗೆ ತಮ್ಮ ಹೆಸರು ತಳುಕು ಹಾಕಿಕೊಳ್ಳುತ್ತಿದ್ದಂತೆಯೇ ಬಾದ್​ಷಾ ಅವರು ಅಲರ್ಟ್​ ಆಗಿದ್ದಾರೆ. ಇನ್​ಸ್ಟಾಗ್ರಾಮ್​ ಸ್ಟೋರಿ ಮೂಲಕ ಅವರು ಸ್ಪಷ್ಟನೆ ನೀಡಿದ್ದಾರೆ. ‘ಪ್ರೀತಿಯ ಇಂಟರ್​ನೆಟ್​ ಬಳಕೆದಾರರೇ.. ಮತ್ತೊಮ್ಮೆ ನಿಮ್ಮನ್ನು ನಿರಾಸೆ ಮಾಡಿದ್ದಕ್ಕೆ ಕ್ಷಮೆ ಇರಲಿ. ಆದರೆ ನೀವು ಊಹಿಸಿದಂತೆ ಏನೂ ಇಲ್ಲ’ ಎಂದು ಅವರು ಬರೆದುಕೊಂಡಿದ್ದಾರೆ. ಈ ಸಾಲುಗಳಲ್ಲಿ ಮೃಣಾಲ್​ ಠಾಕೂರ್​ ಹೆಸರು ಪ್ರಸ್ತಾಪಿಸಿಲ್ಲವಾದರೂ ಇದು ಅವರ ಬಗ್ಗೆಯೇ ಬರೆದಿದ್ದು ಎಂಬುದು ಅಭಿಮಾನಿಗಳಿಗೆ ಸ್ಪಷ್ಟವಾಗಿದೆ.

ಇದನ್ನೂ ಓದಿ: ಹೊಸ ಫೋಟೋಶೂಟ್​ನಲ್ಲಿ ಮಿಂಚಿದ ಮೃಣಾಲ್ ಠಾಕೂರ್

ಮೃಣಾಲ್​ ಠಾಕೂರ್​ ಬಗ್ಗೆ:

ನಟಿ ಮೃಣಾಲ್​ ಠಾಕೂರ್​ ಅವರು ಬಾಲಿವುಡ್​ ಮತ್ತು ದಕ್ಷಿಣ ಭಾರತದ ಸಿನಿಮಾಗಳಲ್ಲಿ ನಟಿಸಿ ಫೇಮಸ್​ ಆಗಿದ್ದಾರೆ. ಹೃತಿಕ್​ ರೋಷನ್​, ಶಾಹಿದ್​ ಕಪೂರ್​, ಜಾನ್​ ಅಬ್ರಾಹಂ, ಫರ್ಹಾನ್​ ಅಖ್ತರ್​ ಮುಂತಾದ ಸ್ಟಾರ್​ ಹೀರೋಗಳ ಜೊತೆ ಅವರು ತೆರೆ ಹಂಚಿಕೊಂಡಿದ್ದಾರೆ. ದುಲ್ಕರ್​ ಸಲ್ಮಾನ್​ ಜೊತೆ ಅವರು ನಟಿಸಿದ ‘ಸೀತಾ ರಾಮಂ’ ಸಿನಿಮಾ ಸೂಪರ್​ ಹಿಟ್​ ಆಯಿತು. ಆ ಚಿತ್ರದ ಯಶಸ್ಸಿನ ಬಳಿಕ ದಕ್ಷಿಣ ಭಾರತದಲ್ಲಿ ಅವರ ಬೇಡಿಕೆ ಹೆಚ್ಚಾಗಿದೆ. ಬಾದ್​ಷಾ ಜೊತೆಗಿನ ಲವ್​ ಗಾಸಿಪ್​ ಬಗ್ಗೆ ಅವರಿನ್ನೂ ಪ್ರತಿಕ್ರಿಯೆ ನೀಡಬೇಕಿದೆ.

ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ.