ಅಭಿಮಾನಿಯ ಸೆಲ್ಫಿ ಕಾಟಕ್ಕೆ ಜಾರಿ ಬೀಳುವಂತಾದ ನಟ ಸೈಫ್​ ಅಲಿ ಖಾನ್​

ನಟ ಸೈಫ್​ ಅಲಿ ಖಾನ್​ (Saif Ali Khan) ಅವರಿಗೆ ಬಾಲಿವುಡ್​ನಲ್ಲಿ ಸಖತ್ ಬೇಡಿಕೆ ಇದೆ. ದೇಶಾದ್ಯಂತ ಅವರಿಗೆ ಅಭಿಮಾನಿಗಳು ಇದ್ದಾರೆ. ಸಿನಿಮಾ ಮಾತ್ರವಲ್ಲದೇ ವೈಯಕ್ತಿಕ ಕಾರಣಗಳಿಂದಲೂ ಸೈಫ್​ ಆಗಾಗ ಸುದ್ದಿ ಆಗುತ್ತಲೇ ಇರುತ್ತಾರೆ. ಅವರು ಎಲ್ಲೆ ಹೋದರೂ ಕೂಡ ಅಭಿಮಾನಿಗಳು ಸೆಲ್ಫಿಗಾಗಿ ಮುಗಿಬೀಳುತ್ತಾರೆ. ಇದರಿಂದ ಕೆಲವೊಮ್ಮೆ ಅವರಿಗೆ ಕಿರಿಕಿರಿ ಉಂಟಾಗುತ್ತದೆ. ಅದಕ್ಕೆ ಲೇಟೆಸ್ಟ್​ ಉದಾಹರಣೆ ಇಲ್ಲಿದೆ. ಸೈಫ್​ ಅಲಿ ಖಾನ್​ ಜೊತೆ ಸೆಲ್ಫಿ (Selfie) ತೆಗೆದುಕೊಳ್ಳಲು ಬಂದ ಓರ್ವ ವ್ಯಕ್ತಿಯಿಂದಾಗಿ ಅವರು ಜಾರಿ ಬೀಳಬಹುದಾದ ಸಂದರ್ಭ ಎದುರಾಗಿದೆ. ಆ ಸಂದರ್ಭದ ವಿಡಿಯೋ ವೈರಲ್​ ಆಗಿದೆ.

ಕಟ್ಟಡವೊಂದರ ಪಾರ್ಕಿಂಗ್​ ಜಾಗದಲ್ಲಿ ಸೈಫ್​ ಅಲಿ ಖಾನ್​ ನಡೆದುಕೊಂಡು ಬರುವಾಗ ಅವರ ಜೊತೆ ಫೋಟೋ ಕ್ಲಿಕ್ಕಿಸಿಕೊಳ್ಳಲು ಅಭಿಮಾನಿಗಳ ಮುಗಿಬಿದ್ದಿದ್ದಾರೆ. ಸೈಫ್​ ಜೊತೆ ಅವರ ಬಾಡಿ ಗಾರ್ಡ್ಸ್​ ಕೂಡ ಇದ್ದರು. ಹಾಗಿದ್ದರೂ ಕೂಡ ಸೆಲ್ಫಿ ಪಡೆಯಲು ಕೆಲವರು ನೂಕು ನುಗ್ಗಲು ಮಾಡಿದರು. ಮಾತನಾಡುತ್ತಲೇ ನಡೆದುಬರುವಾಗ ಒಬ್ಬ ಅಭಿಮಾನಿ ಅಡ್ಡ ಬಂದಿದ್ದಾನೆ. ಇದರಿಂದ ಸೈಫ್​ ಅಲಿ ಖಾನ್​ ಎಡವಿದ್ದಾರೆ. ಪುಣ್ಯಕ್ಕೆ ಅವರು ನೆಲದ ಮೇಲೆ ಬಿದ್ದಿಲ್ಲ. ‘ಹುಷಾರು..’ ಎಂದು ಹೇಳುತ್ತಲೇ ಅವರು ಮುಂದೆ ಸಾಗಿದ್ದಾರೆ.

ಇದನ್ನೂ ಓದಿ: ಚೆನ್ನೈನಲ್ಲಿ ಕಮಲ್​ ಹಾಸನ್​ ಬರ್ತ್​ಡೇ ಪಾರ್ಟಿಗೆ ಹಾಜರಿ ಹಾಕಿದ ಆಮಿರ್​ ಖಾನ್​, ಸೂರ್ಯ; ಫೋಟೋ ವೈರಲ್​

ಸೈಫ್​ ಅಲ್ಲದೇ ಈ ಜಾಗದಲ್ಲಿ ಬೇರೆ ಯಾವುದಾದರೂ ಸೆಲೆಬ್ರಿಟಿ ಇದ್ದಿದ್ದರೆ ಕೋಪ ಮಾಡಿಕೊಳ್ಳುವ ಸಾಧ್ಯತೆ ಇತ್ತು. ಆದರೆ ಸೈಫ್ ಹಾಗೆ ಮಾಡಿಲ್ಲ. ಕೂಲ್​ ಆಗಿಯೇ ಅವರು ನಡೆದುಕೊಂಡಿದ್ದಾರೆ. ಸೋಶಿಯಲ್​ ಮೀಡಿಯಾದಲ್ಲಿ ಈ ವಿಡಿಯೋ ವೈರಲ್​ ಆಗಿದ್ದು, ನೆಟ್ಟಿಗರು ಬಗೆಬಗೆಯಲ್ಲಿ ಕಮೆಂಟ್​ ಮಾಡುತ್ತಿದ್ದಾರೆ. ಸೆಲೆಬ್ರಿಟಿಗಳ ಜೊತೆ ಅಭಿಮಾನಿಗಳು ಹುಷಾರಾಗಿ ನಡೆದುಕೊಳ್ಳಬೇಕು. ಅವರಿಗೆ ಕಿರಿಕಿರಿ ಆಗುವಂತೆ ಮುಗಿಬೀಳಬಾರದು ಎಂದು ಅನೇಕರು ತಮ್ಮ ಅನಿಸಿಕೆ ಹಂಚಿಕೊಂಡಿದ್ದಾರೆ. ಈ ಹಿಂದೆ ಕೂಡ ಇಂಥ ಘಟನೆಗಳು ಆಗಿದ್ದುಂಟು.

View this post on Instagram

A post shared by Viral Bhayani (@viralbhayani)

ಸಾಮಾನ್ಯವಾಗಿ ಸೈಫ್​ ಅಲಿ ಖಾನ್​ ಅವರು ಸಾರ್ವಜನಿಕವಾಗಿ ಕಾಣಿಸಿಕೊಳ್ಳಲು ಇಷ್ಟಪಡುವುದಿಲ್ಲ. ಪಾಪರಾಜಿಗಳು ಇದ್ದಾಗ ಅಲ್ಲಿಂದ ಬೇಗ ಅವರು ಕಾಲು ಕೀಳುತ್ತಾರೆ. ಅನಗತ್ಯ ತಲೆಬಿಸಿ ಬೇಡ ಎಂಬ ಕಾರಣಕ್ಕೆ ಅವರು ಸೋಶಿಯಲ್​ ಮೀಡಿಯಾ ಕೂಡ ಬಳಸುವುದಿಲ್ಲ. ಬಾಲಿವುಡ್​ನ ಅನೇಕ ಸಿನಿಮಾಗಳಲ್ಲಿ ನಟಿಸಿ ಅವರು ಫೇಮಸ್​ ಆಗಿದ್ದಾರೆ. ಈ ವರ್ಷ ತೆರೆಕಂಡ ‘ಆದಿಪುರುಷ್​’ ಚಿತ್ರದಲ್ಲಿ ರಾವಣನ ಪಾತ್ರ ಮಾಡಿದ್ದರು. ಆದರೆ ಆ ಪಾತ್ರದ ವೇಷ-ಭೂಷಣ ಮತ್ತು ಡೈಲಾಗ್​ ಸೂಕ್ತವಾಗಿ ಇರಲಿಲ್ಲ ಎಂಬ ಕಾರಣಕ್ಕೆ ಸಿಕ್ಕಾಪಟ್ಟೆ ಟ್ರೋಲ್​ ಮಾಡಲಾಗಿತ್ತು.

ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ.

Published On - 7:35 pm, Tue, 7 November 23