Conman Sukesh: ತೆರೆಯ ಮೇಲೆ ಜಾಕ್ವೆಲಿನ್- ಸುಕೇಶ್ ಕಹಾನಿ?; ನೋರಾ- ಸುಕೇಶ್ ವೈಯಕ್ತಿಕ ಚಾಟ್ಸ್ ಕೂಡ ಲೀಕ್
Jacqueline Fernandez | Nora Fatehi: ಬಹುಕೋಟಿ ವಂಚಕ ಸುಕೇಶ್ ಚಂದ್ರಶೇಖರ್ ಹಾಗೂ ನಟಿ ಜಾಕ್ವೆಲಿನ್ ಫರ್ನಾಂಡಿಸ್ ಅವರ ಕತೆ ತೆರೆಯ ಮೇಲೆ ಬರಲಿದೆಯೇ? ಹೌದು ಎನ್ನುತ್ತವೆ ವರದಿಗಳು. ಈ ಕುರಿತ ಮಾಹಿತಿ ಇಲ್ಲಿದೆ.
Updated on: Dec 22, 2021 | 1:00 PM
ಬಹುಕೋಟಿ ವಂಚಕ ಸುಕೇಶ್ ಚಂದ್ರಶೇಖರ್ (Sukesh Chandrasekhar) ಕುರಿತ ದಿನಕ್ಕೊಂದು ಕತೆಗಳು ಹೊರಬರುತ್ತಿದೆ. ಇತ್ತೀಚೆಗಷ್ಟೇ ನಟಿ ಜಾಕ್ವೆಲಿನ್ ಫರ್ನಾಂಡಿಸ್ (Jacqueline Fernandez) ಅವರಿಗೆ ಬರೋಬ್ಬರಿ 500 ಕೋಟಿ ರೂ ಮೊತ್ತದ ಸೂಪರ್ ಹೀರೋ ಚಿತ್ರ ಸರಣಿ ನಿರ್ಮಾಣ ಮಾಡುವುದಾಗಿ ನಂಬಿಸಿದ್ದ ಎನ್ನುವುದು ಬಹಿರಂಗವಾಗಿತ್ತು. ಅಷ್ಟೇ ಅಲ್ಲದೇ ಜೈಲಿನಲ್ಲಿದ್ದುಕೊಂಡೇ ಜಾಕ್ವೆಲಿನ್ಗೆ ₹ 10 ಕೋಟಿಗೂ ಅಧಿಕ ಮೊತ್ತದ ಗಿಫ್ಟ್ ಕಳುಹಿಸಿದ್ದ ಎನ್ನುವುದೂ ಸುದ್ದಿಯಾಗಿತ್ತು. ಈ ಪಟ್ಟಿಯಲ್ಲಿ ಬೆಕ್ಕು, ಕುದುರೆ, ಕಾರು ಎಲ್ಲವೂ ಸೇರಿತ್ತು. ಸುಕೇಶ್ ಹಾಗೂ ಜಾಕ್ವೆಲಿನ್ ಅವರ ಸಂಬಂಧ ಹಾಗೂ ವಂಚನೆ ಪ್ರಕರಣದ ಕುರಿತು ಇಡಿ (ED) ಜಾಕ್ವೆಲಿನ್ ಅವರನ್ನು ಹಲವಾರು ಬಾರಿ ಪ್ರಶ್ನಿಸಿದೆ. ಬಹುಕೋಟಿ ವಂಚಕ ಸುಕೇಶ್ನಿಂದ ಕೇವಲ ಜಾಕ್ವೆಲಿನ್ ಮಾತ್ರವಲ್ಲ, ಇನ್ನೂ ಹಲವು ನಟಿಯರು ವಂಚನೆಗೆ ಒಳಗಾಗಿದ್ದಾರೆ ಎನ್ನುತ್ತವೆ ವರದಿಗಳು. ಇದೀಗ ಸುಕೇಶ್ ಆಡಂಬರದ ಜೀವನ, ವಂಚನೆ.. ಈ ಎಲ್ಲವನ್ನೂ ಸೇರಿಸಿ ಕತೆಯೊಂದು ತೆರೆಯ ಮೇಲೆ ಬರಲು ಸಿದ್ಧವಾಗುತ್ತಿದೆ ಎನ್ನುತ್ತಿವೆ ವರದಿಗಳು.
ಪ್ರಸ್ತುತ ಉದ್ಯಮಿಯೊಬ್ಬರ ಪತ್ನಿಗೆ ₹ 200 ಕೋಟಿ ವಂಚನೆಗೆ ಸಂಬಂಧ ಸುಕೇಶ್ ಚಂದ್ರಶೇಖರ್ ಜೈಲಿನಲ್ಲಿದ್ದಾನೆ. ಸುಕೇಶ್ ಜಾಕ್ವೆಲಿನ್ ಸಹೋದರಿ, ಜಾಕ್ವೆಲಿನ್ ತಾಯಿಗೂ ಉಡುಗೊರೆ ನೀಡಿದ್ದಾಗಿ ಚಾರ್ಜ್ಶೀಟ್ನಲ್ಲಿ ಉಲ್ಲೇಖವಾಗಿದೆ. ಇದೀಗ ಇಂಡಿಯಾ ಟುಡೆ ವರದಿ ಮಾಡಿರುವಂತೆ ಜಾಕ್ವೆಲಿನ್ ಹಾಗೂ ಸುಕೇಶ್ ಕತೆಯನ್ನು ತೆರೆಯ ಮೇಲೆ ತರಲು ನಿರ್ಮಾಪಕರು ಮುಂದಾಗಿದ್ದಾರಂತೆ. ಅದೂ ಕೂಡ ಒಟಿಟಿಗೆ. ಈ ಹಿಂದೆ ಹರ್ಷದ್ ಮೆಹ್ತಾ ಅವರ ಜೀವನವನ್ನಾಧರಿಸಿದ ‘ಸ್ಕ್ಯಾಮ್ 1992’ ಸಖತ್ ಹಿಟ್ ಆಗಿತ್ತು. ಇದೇ ಆಧಾರದಲ್ಲಿ ವಂಚಕ ಸುಕೇಶ್ ಜೀವನವನ್ನೂ ತೆರೆಯ ಮೇಲೆ ತರಲು ಒಟಿಟಿ ನಿರ್ಮಾಪಕರು ಮುಂದಾಗಿದ್ದಾರೆ ಎನ್ನಲಾಗಿದೆ.
ಇದೀಗ ಸುಕೇಶ್ ಹಾಗೂ ಜಾಕ್ವೆಲಿನ್ ಪಾತ್ರಗಳಲ್ಲಿ ಯಾರು ನಟಿಸಬಹುದು ಎಂಬುದರ ಕುರಿತು ಚರ್ಚೆಗಳು ಗರಿಗೆದರಿವೆ. ಇತ್ತೀಚಿನ ದಿನಗಳಲ್ಲಿ ನೋಡಿದ ಅತ್ಯಂತ ದೊಡ್ಡ ವಂಚನೆ ಪ್ರಕರಣ ಇದಾಗಿದ್ದು, ಸಹಜವಾಗಿಯೇ ಜನರಿಗೆ ಈ ಪ್ರಕರಣದ ಕುರಿತು ಕುತೂಹಲವಿದೆ. ಒಂದು ವೇಳೆ ಇದನ್ನು ತೆರೆಯ ಮೇಲೆ ತಂದರೆ ಒಳ್ಳೆಯ ಕಮಾಯಿ ಮಾಡಬಹುದು ಎಂಬ ಲೆಕ್ಕಾಚಾರ ಕೆಲವು ನಿರ್ಮಾಪಕರದ್ದು. ಈ ಕುರಿತು ಮತ್ತಷ್ಟು ಮಾಹಿತಿ ಇನ್ನಷ್ಟೇ ಹೊರಬರಬೇಕಿದೆ.
ಸುಕೇಶ್- ನೋರಾ ಚಾಟ್ಸ್ ಲೀಕ್: ಬಾಲಿವುಡ್ನ ಖ್ಯಾತ ಡಾನ್ಸರ್ ನೋರಾ ಫತೇಹಿ (Nora Fatehi) ಅವರಿಗೂ ಸುಕೇಶ್ ಗಿಫ್ಟ್ಗಳನ್ನು ನೀಡಿದ್ದರು ಎಂದು ವರದಿಯಾಗಿವೆ. ಇತ್ತೀಚೆಗೆ ನೋರಾ ಹಾಗೂ ಸುಕೇಶ್ ಚಾಟ್ಗಳು ಲೀಕ್ ಆಗಿದ್ದು ಅದರಲ್ಲಿ ನೋರಾಗೆ ರೇಂಜ್ ರೋವರ್ ಕಾರು ಇಷ್ಟವೇ, ಎಂದು ಕೇಳಿದ್ದ. ಆಗ ನೋರಾ ಹೌದು, ಅದು ಚೆನ್ನಾಗಿದೆ ಎಂದಾಗ, ಅದರಲ್ಲಿ ಹೆಚ್ಚಿನ ಆಯ್ಕೆ ತೋರಿಸುತ್ತೇನೆ ಎಂದು ಸುಕೇಶ್ ಹೇಳಿದ್ದು ಬಹಿರಂಗವಾಗಿದೆ. ಮತ್ತೊಂದು ಮಾತುಕತೆಯಲ್ಲಿ ಸುಕೇಶ್, ಯಾಕೆ ಗಿಫ್ಟ್ ನೀಡುತ್ತಿರುವುದು ಎಂಬುದರ ಕುರಿತು ಮಾತನಾಡಿದ್ದಾನೆ. ಯಾವುದಾದರೂ ವ್ಯಕ್ತಿ ಇಷ್ಟವಾದರೆ ಅವರಿಗೆ ಗಿಫ್ಟ್ ನೀಡುತ್ತೇವೆ. ಅದರ ಹೊರತಾಗಿ ಮತ್ಯಾವ ಕಾರಣಗಳೂ ಇಲ್ಲ ಎಂದು ನೋರಾಗೆ ತಿಳಿಸಿದ್ದಾನೆ. ಈ ಸಂಭಾಷಣೆಗಳು ಸದ್ಯ ಬಹಿರಂಗವಾಗಿದ್ದನ್ನು ಇಂಡಿಯಾ ಟುಡೆ ವರದಿ ಮಾಡಿದೆ.
ವಂಚನೆ ಪ್ರಕರಣಕ್ಕೆ ಸಂಬಂಧಪಟ್ಟಂತೆ ಇಡಿ ಈಗಾಗಲೇ ಜಾಕ್ವೆಲಿನ್ ಹಾಗೂ ನೋರಾ ಅವರನ್ನು ಪ್ರಶ್ನಿಸಿದೆ. ಪ್ರಸ್ತುತ ಸುಕೇಶ್ ಚಂದ್ರಶೇಖರ್ ತಿಹಾರ್ ಜೈಲಿನಲ್ಲಿದ್ದಾನೆ.
ಇದನ್ನೂ ಓದಿ:
ಜಾಕ್ವೆಲಿನ್ಗೆ ನೀಡಿದ ಉಡುಗೊರೆ ಲಿಸ್ಟ್ ತೆಗೆದಿಟ್ಟ ಸುಕೇಶ್ ಚಂದ್ರಶೇಖರ್; ಅಬ್ಬಬ್ಬಾ ಇಷ್ಟೊಂದಾ?
