ಮಕ್ಕಳಿಗೆ ಚಿತ್ರಮಂದಿರಕ್ಕೆ ಎಂಟ್ರಿ, ಸಮಯ ನಿಗದಿಗೊಳಿಸಿ ಕೋರ್ಟ್ ಸೂಚನೆ

ಸಿನಿಮಾ ಮಂದಿರಕ್ಕೆ ಮಕ್ಕಳನ್ನು ಕರೆತರುವ ಬಗ್ಗೆ ಈಗಾಗಲೇ ಕೆಲವು ನಿಯಮಗಳಿವೆ. ಯಾವ ಸಿನಿಮಾಗಳನ್ನು ಮಕ್ಕಳು ನೋಡಬೇಕು, ಯಾವ ರೀತಿಯ ಸಿನಿಮಾಗಳನ್ನು ನೋಡಬಾರದು, ಯಾವ ರೀತಿಯ ಸಿನಿಮಾಗಳನ್ನು ಪೋಷಕರ ನಿಗಾವಣೆಯಲ್ಲಿ ನೋಡಬೇಕು ಎಂಬಿತ್ಯಾದಿಗಳ ಬಗ್ಗ ಈಗಾಗಲೇ ನಿರ್ದಿಷ್ಟ ನಿಯಮಗಳಿವೆ. ಆದರೆ ಮಕ್ಕಳನ್ನು ಯಾವ ಸಮಯದಲ್ಲಿ ಚಿತ್ರಮಂದಿರಕ್ಕೆ ಕರೆತರಬೇಕು ಯಾವ ಸಮಯದಲ್ಲಿ ಕರೆತರಬಾರದು ಎಂಬ ಬಗ್ಗೆ ಸ್ಪಷ್ಟ ನಿಯಮಗಳು ಇಲ್ಲ. ಇದೀಗ ನ್ಯಾಯಾಲಯ ಈ ಬಗ್ಗೆ ಮಹತ್ವದ ಆದೇಶವನ್ನು ಹೊರಡಿಸಿದೆ.

‘ಪುಷ್ಪ 2’ ಸಿನಿಮಾ ಬಿಡುಗಡೆ ಸಂದರ್ಭದಲ್ಲಿ ನಡೆದ ಅವಘಡದಲ್ಲಿ ಮಹಿಳೆಯೊಬ್ಬರು ನಿಧನ ಹೊಂದಿ, ಒಬ್ಬ ಬಾಲಕ ಗಂಭೀರವಾಗಿ ಗಾಯಗೊಂಡು ವಾರಗಳ ಕಾಲ ಕೋಮದಲ್ಲಿದ್ದ ಘಟನೆ ದೇಶದ ಗಮನ ಸೆಳೆದು, ಚಿತ್ರಮಂದಿರ ವ್ಯವಸ್ಥೆ ಬಗ್ಗೆ ಹಲವು ಚರ್ಚೆಗಳನ್ನು, ಪ್ರಶ್ನೆಗಳನ್ನು ಹುಟ್ಟುಹಾಕಿತ್ತು. ಈ ಬಗ್ಗೆ ನ್ಯಾಯಾಲಯದಲ್ಲಿಯೂ ಸಹ ಪ್ರಕರಣಗಳು, ಸಾರ್ವಜನಿಕ ಹಿತಾಸಕ್ತಿ ಅರ್ಜಿಗಳು ದಾಖಲಾಗಿದ್ದವು. ಸಿನಿಮಾ ಟಿಕೆಟ್ ದರ ಹೆಚ್ಚಳ, ವಿಶೇಷ ಶೋಗೆ ಅವಕಾಶದ ಕುರಿತಾಗಿ ದಾಖಲಾಗಿದ್ದ ಅರ್ಜಿಯ ವಿಚಾರಣೆ ವೇಳೆ ತೆಲಂಗಾಣ ಹೈಕೋರ್ಟ್, ಮಕ್ಕಳು ಯಾವ ಸಮಯದಲ್ಲಿ ಚಿತ್ರಮಂದಿರ ಪ್ರವೇಶಿಸಬೇಕು ಎಂದು ಆದೇಶ ಹೊರಡಿಸಿದೆ.

ಇದನ್ನೂ ಓದಿ:ಚಿತ್ರಮಂದಿರದಲ್ಲಿ ಹೀನಾಯವಾಗಿ ಸೋತ ‘ಕಂಗುವ’ ಸಿನಿಮಾ ಈಗ ಒಟಿಟಿಯಲ್ಲಿ ರಿಲೀಸ್

ನುರಿತ ಮಕ್ಕಳ ಮನೋವೈದ್ಯರ ಸಲಹೆಗಳನ್ನು ಪರಿಗಣಿಸಿರುವ ತೆಲಂಗಾಣ ಹೈಕೋರ್ಟ್, ಮಕ್ಕಳು ಬೆಳಿಗ್ಗೆ 11 ಗಂಟೆ ಮೇಲೆ ಮತ್ತು ರಾತ್ರಿ 11 ಒಳಗೆ ಮಾತ್ರವೇ ಚಿತ್ರಮಂದಿರ ಪ್ರವೇಶಿಸಿ ಸಿನಿಮಾ ವೀಕ್ಷಿಸಬೇಕು ಎಂದಿದೆ. ಈ ಬಗ್ಗೆ ತೆಲಂಗಾಣ ರಾಜ್ಯ ಸರ್ಕಾರಕ್ಕೆ ನಿರ್ದೇಶನ ನೀಡಿರುವ ತೆಲಂಗಾಣ ಹೈಕೋರ್ಟ್, ಮಕ್ಕಳು ಚಿತ್ರಮಂದಿರ ಪ್ರವೇಶದ ಬಗ್ಗೆ ಕಾನೂನು ಮಾಡುವಂತೆ ಸೂಚನೆ ನೀಡಿದೆ. 16 ವರ್ಷದ ಮಕ್ಕಳು ತಡ ರಾತ್ರಿ ಅಥವಾ ಬೆಳ್ಳಂಬೆಳಿಗ್ಗೆ (ವಿಶೇಷ ಶೋಗಳು) ಚಿತ್ರಮಂದಿರಕ್ಕೆ ವೀಕ್ಷಿಸಿ ಸಿನಿಮಾ ವೀಕ್ಷಿಸುವುದು ಅವರ ಮಾನಸಿಕ ಮತ್ತು ದೈಹಿಕ ಆರೋಗ್ಯದ ಮೇಲೆ ಪರಿಣಾಮ ಬೀರುವ ಸಾಧ್ಯತೆ ಇದೆ ಎಂದು ತೆಲಂಗಾಣ ಹೈಕೋರ್ಟ್ ಅಭಿಪ್ರಾಯ ವ್ಯಕ್ತಪಡಿಸಿದೆ.

ತೆಲಂಗಾಣ, ಆಂಧ್ರ, ಕರ್ನಾಟಕದಲ್ಲಿಯೂ ಸಹ ಸ್ಟಾರ್ ನಟರ ಸಿನಿಮಾಗಳು ಬಿಡುಗಡೆ ಆದಾಗ ಬೆಳ್ಳಂಬೆಳಿಗ್ಗೆ 5 ಗಂಟೆ 6 ಗಂಟೆಗೆ ವಿಶೇಷ ಶೋಗಳನ್ನು ಪ್ರದರ್ಶಿಸಲಾಗುತ್ತದೆ. ಮಧ್ಯ ರಾತ್ರಿ 11 ಗಂಟೆ, 12 ಗಂಟೆಗೆ ಸಹ ಶೋಗಳನ್ನು ಪ್ರದರ್ಶಿಸಲಾಗುತ್ತದೆ. ಈ ಶೋಗಳಿಗೆ 16 ವರ್ಷದ ಒಳಗಿನ ಮಕ್ಕಳು ಸಹ ಬರುತ್ತಾರೆ. ಕೆಲವೊಮ್ಮೆ ಪೋಷಕರೇ ಮಕ್ಕಳನ್ನು ಕರೆತರುತ್ತಾರೆ. ಇದು ಮಕ್ಕಳ ಆರೋಗ್ಯದ ಮೇಲೆ ವ್ಯಕ್ತಿತ್ವದ ಮೇಲೆ ಪರಿಣಾಮ ಬೀರುವ ಸಾಧ್ಯತೆ ಇದೆ ಎಂದು ತೆಲಂಗಾಣ ಹೈಕೋರ್ಟ್ ಅಭಿಪ್ರಾಯ ವ್ಯಕ್ತಪಡಿಸಿದೆ.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ