‘ಕಾಮಿಡಿ ಕಿಲಾಡಿಗಳು ಚಾಂಪಿಯನ್ಶಿಪ್ ಸೀಸನ್ 2’ ಫಿನಾಲೆ; ಯಾರಾಗಲಿದ್ದಾರೆ ವಿನ್ನರ್?
ನೂರಾರು ಜನರ ಶ್ರಮದಿಂದ ಈ ಅಂತಿಮ ಸಂಚಿಕೆಗಳ ವೇದಿಕೆ ಸಜ್ಜಾಗಿದೆ. ಯಾರು ಚಾಂಪಿಯನ್ ಆಗಿ ಹೊರಹೊಮ್ಮಲಿದ್ದಾರೆ ಎಂಬುದನ್ನು ತಿಳಿದುಕೊಳ್ಳುವ ಕಾತರ ಪ್ರೇಕ್ಷಕರ ಮನದಲ್ಲಿ ಮೂಡಿದೆ.
Updated on: Jul 09, 2021 | 3:47 PM
ಕಾಮಿಡಿ ಕಿಲಾಡಿಗಳು ಕಾರ್ಯಕ್ರಮದಿಂದ ಅನೇಕ ಪ್ರತಿಭಾವಂತರಿಗೆ ವೇದಿಕೆ ಸಿಕ್ಕಿದೆ. ಜೀ ಕನ್ನಡ ವಾಹಿನಿಯ ಕಾರ್ಯಕ್ರಮಗಳಲ್ಲಿ ಇದೂ ಕೂಡ ಹೆಚ್ಚು ಜನಪ್ರಿಯವಾಗಿದೆ. ಇಷ್ಟು ದಿನಗಳ ಕಾಲ ಪ್ರೇಕ್ಷಕರನ್ನು ನಕ್ಕು ನಗಿಸಿದ ‘ಕಾಮಿಡಿ ಕಿಲಾಡಿಗಳು ಚಾಂಪಿಯನ್ಶಿಪ್ ಸೀಸನ್ 2’ ಶೋ ಈಗ ಫಿನಾಲೆ ಹಂತ ತಲುಪಿದೆ. ಇದೇ ಶನಿವಾರ (ಜು.10) ಮತ್ತು ಭಾನುವಾರ (ಜು.11) ಅದ್ದೂರಿಯಾಗಿ ಈ ಕಾರ್ಯಕ್ರಮದ ಫಿನಾಲೆ ಪ್ರಸಾರವಾಗಲಿದೆ.
ಹಲವು ಕಾರಣಗಳಿಗಾಗಿ ಈ ಶೋ ವಿಭಿನ್ನ ಎನಿಸಿಕೊಂಡಿದೆ. ಪ್ರತಿ ದಿನದ ಜಂಜಾಟದ ಬದುಕಿನಲ್ಲಿ ಸಿಲುಕಿದವರಿಗೆ ಕಾಮಿಡಿ ಕಿಲಾಡಿಗಳು ನಗುವಿನ ಕಚಗುಳಿ ಇಡುತ್ತಾರೆ. ಆ ಉದ್ದೇಶದಿಂದ ಆರಂಭವಾದ ಈ ಕಾರ್ಯಕ್ರಮಕ್ಕೆ ಜನರಿಂದ ಉತ್ತಮ ಪ್ರತಿಕ್ರಿಯೆ ಸಿಕ್ಕಿತು. ವಾರ ಪೂರ್ತಿ ತಯಾರಿ ನಡೆಸಿ, ವಾರಾಂತ್ಯದಲ್ಲಿ ಕರುನಾಡಿನ ಜನರನ್ನು ನಕ್ಕು ನಲಿಸಿದ ಖ್ಯಾತಿ ಕಾಮಿಡಿ ಕಿಲಾಡಿಗಳಿಗೆ ಸಲ್ಲುತ್ತದೆ. ಹೊಸ ಪರಿಲ್ಪನೆಯೊಂದಿಗೆ ಶೋ ಆರಂಭ ಆಗಿತ್ತು. ಮೂರು ಸೀಸನ್‍ನ ಕಿಲಾಡಿಗಳು 6 ತಂಡಗಳಾಗಿ ಪೈಪೋಟಿ ನಡೆಸಿದರು. 37 ವಾರಗಳು ನಡೆದ ಈ ಕಾರ್ಯಕ್ರಮದಲ್ಲಿ 220ಕ್ಕೂ ಅಧಿಕ ನಾಟಕಗಳು, ಹಾಸ್ಯದ ಜೊತೆಗೆ ಸಾಮಾಜಿಕ ಸಂದೇಶ ಸಾರುವ ಸ್ಕಿಟ್‍ಗಳನ್ನು ಪ್ರದರ್ಶಿಸಲಾಯಿತು. ಈಗ ಈ ಶೋ ಫಿನಾಲೆ ಹಂತಕ್ಕೆ ಬಂದಿದೆ.
ತೀರ್ಪುಗಾರರಾದ ನವರಸ ನಾಯಕ ಜಗ್ಗೇಶ್, ನಿರ್ದೇಶಕ ಯೋಗರಾಜ್ ಭಟ್ ಹಾಗೂ ‘ಕ್ರೇಜಿ ಕ್ವೀನ್’ ರಕ್ಷಿತಾ ಪ್ರೇಮ್ ಈ ಫಿನಾಲೆಯಲ್ಲಿ ಭಾಗವಹಿಸಲಿದ್ದಾರೆ. ಮಾಸ್ಟರ್ ಆನಂದ್ ಅವರ ನಿರೂಪಣೆಯಲ್ಲಿ ಫಿನಾಲೆ ಎಪಿಸೋಡ್ಗಳು ಮೂಡಿಬರಲಿವೆ. ನೂರಾರು ಜನರ ಶ್ರಮದಿಂದ ಈ ಅಂತಿಮ ಸಂಚಿಕೆಗಳ ವೇದಿಕೆ ಸಜ್ಜಾಗಿದೆ. ಯಾರು ಚಾಂಪಿಯನ್ ಆಗಿ ಹೊರಹೊಮ್ಮಲಿದ್ದಾರೆ ಎಂಬುದನ್ನು ತಿಳಿದುಕೊಳ್ಳುವ ಕಾತರ ಪ್ರೇಕ್ಷಕರ ಮನದಲ್ಲಿ ಮೂಡಿದೆ.
6 ತಂಡಗಳ ವಿಭಿನ್ನ ಹಾಸ್ಯ ನಾಟಕಗಳ ಜೊತೆ ಡ್ಯಾನ್ಸ್ ಕರ್ನಾಟಕ ಡ್ಯಾನ್ಸ್ ರಿಯಾಲಿಟಿ ಶೋನ ಪ್ರತಿಭೆಗಳು ಕೂಡ ಪ್ರೇಕ್ಷಕರನ್ನು ಈ ವೇದಿಕೆಯಲ್ಲೇ ರಂಜಿಸಲು ಸಿದ್ಧರಾಗಿದ್ದಾರೆ. ಜುಲೈ 10ರ ಶನಿವಾರ ಹಾಗು 11ರ ಭಾನುವಾರ ರಾತ್ರಿ 9 ಗಂಟೆಗೆ ಪ್ರಸಾರವಾಗಲಿರುವ ಈ ಸಂಚಿಕೆಗಳಲ್ಲಿ ಮನರಂಜನೆಯ ಮಹಾಪೂರ ಹರಿಸುವ ಭರವಸೆಯನ್ನು ಜೀ ಕನ್ನಡ ವಾಹಿನಿ ನೀಡಿದೆ.
ಇದನ್ನೂ ಓದಿ:
‘ಇದು ಕೊನೆಯ ದಿನದ ಶೂಟಿಂಗ್’; ಕಾಮಿಡಿ ಕಿಲಾಡಿಗೆ ರಕ್ಷಿತಾ ಭಾವುಕ ವಿದಾಯ
ರಿಯಾಲಿಟಿ ಶೋ ಸುಳ್ಳು ಅನ್ನೋದಕ್ಕೆ ಮತ್ತೊಂದು ಸಾಕ್ಷಿ? ಹಿಗ್ಗಾಮುಗ್ಗ ಟ್ರೋಲ್ ಮಾಡಿದ ನೆಟ್ಟಿಗರು
