ಮತ್ತೆ ಮದುವೆಯಾದರೇ ಹಿರಿಯ ನಟಿ ಸಿಮ್ರಾನ್? ಜಯರಾಮ್ ಜೊತೆಗಿನ ಪೋಸ್ಟರ್ ಅಸಲಿಯತ್ತು ಇಲ್ಲಿದೆ

ದಕ್ಷಿಣ ಭಾರತೀಯ ಚಿತ್ರರಂಗದ ಖ್ಯಾತ ನಟಿ ಸಿಮ್ರಾನ್ ಹಾಗೂ ಹಿರಿಯ ನಟ ಜಯರಾಮ್ ಅವರು ಮದುವೆಯ ಉಡುಪಿನಲ್ಲಿ ಪರಸ್ಪರ ಹೂವಿನ ಹಾರ ಹಾಕಿ ಅಪ್ಪಿಕೊಂಡಿರುವ ಫೋಟೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗುತ್ತಿವೆ. 50 ವರ್ಷದ ಸಿಮ್ರಾನ್ ಹಾಗೂ ಜಯರಾಮ್ ಮದುವೆಯಾಗಿದ್ದಾರೆ ಎನ್ನುವ ಸುದ್ದಿ ಹರಿದಾಡುತ್ತಿದ್ದಂತೆ ನೆಟಿಜನ್‌ಗಳು ಆಶ್ಚರ್ಯ ವ್ಯಕ್ತಪಡಿಸಿ ಕಾಮೆಂಟ್ ಮಾಡಲಾರಂಭಿಸಿದ್ದಾರೆ. ಆದರೆ, ಈ ವೈರಲ್ ಫೋಟೋಗಳ ಹಿಂದಿನ ನಿಜವಾದ ಕಥೆಯೇ ಬೇರೆ.

ಈ ಇಬ್ಬರೂ ಹಿರಿಯ ನಟರು ನಿಜವಾಗಿಯೂ ಮದುವೆಯಾಗಿಲ್ಲ. ಪ್ರಸ್ತುತ ಇಬ್ಬರೂ ತಮ್ಮ ವೈಯಕ್ತಿಕ ಜೀವನದಲ್ಲಿ ಈಗಾಗಲೇ ವಿವಾಹಿತರಾಗಿದ್ದಾರೆ. ಸಾಮಾಜಿಕ ಮಾಧ್ಯಮಗಳಲ್ಲಿ ಸದ್ದು ಮಾಡುತ್ತಿರುವ ಈ ಫೋಟೋಗಳು, ಅವರು ಒಟ್ಟಿಗೆ ನಟಿಸುತ್ತಿರುವ ಹೊಸ ಸಿನಿಮಾದ ಪ್ರಚಾರಕ್ಕಾಗಿ ಮಾಡಿದ ನವೀನ ಅಭಿಯಾನದ ಭಾಗವಾಗಿದೆ.

‘ರಾಕ್ಷಸಿ’ ಹಾಗೂ ‘ಕಳುವೇತ್ತಿ ಮೂರ್ಖನ್’ ಚಿತ್ರಗಳ ಮೂಲಕ ಪ್ರಸಿದ್ಧರಾಗಿರುವ ನಿರ್ದೇಶಕ ಎಸ್. ವೈ. ಗೌತಮ್ ರಾಜ್ ನಿರ್ದೇಶನದ ನೂತನ ಚಿತ್ರದಲ್ಲಿ ಸಿಮ್ರಾನ್ ಮತ್ತು ಜಯರಾಮ್ ನಾಯಕ-ನಾಯಕಿಯಾಗಿ ಕಾಣಿಸಿಕೊಳ್ಳುತ್ತಿದ್ದಾರೆ. ನಟ ಆರ್‍ಯ ಅವರ ‘ದ ಶೋ ಪೀಪಲ್’ ಬ್ಯಾನರ್ ಅಡಿಯಲ್ಲಿ ನಿರ್ಮಾಣವಾಗುತ್ತಿರುವ ಈ ಚಿತ್ರದ ಪೂಜಾ ಸಮಾರಂಭ ಇತ್ತೀಚೆಗೆ ಅದ್ಧೂರಿಯಾಗಿ ನೆರವೇರಿತ್ತು.

ಈ ಮುಂಚೆ 2002ರಲ್ಲಿ ಬಿಡುಗಡೆಯಾಗಿದ್ದ ಕಮಲ್ ಹಾಸನ್ ಅಭಿನಯದ ಹಿಟ್ ಸಿನಿಮಾ ‘ಪಂಚತಂತ್ರಂ’ನಲ್ಲಿ ಸಿಮ್ರಾನ್ ಮತ್ತು ಜಯರಾಮ್ ಒಟ್ಟಿಗೆ ನಟಿಸಿದ್ದರು. ಆದರೆ, ಆ ಚಿತ್ರದಲ್ಲಿ ಸಿಮ್ರಾನ್ ಅವರಿಗೆ ಕಮಲ್ ಹಾಸನ್ ಜೋಡಿಯಾಗಿದ್ದರು. ಸುಮಾರು 24 ವರ್ಷಗಳ ನಂತರ ಇವರಿಬ್ಬರೂ ಮತ್ತೆ ಒಂದೇ ಪರದೆಯ ಮೇಲೆ ಕಾಣಿಸಿಕೊಳ್ಳುತ್ತಿದ್ದು, ಪೂರ್ಣಪ್ರಮಾಣದ ನಾಯಕ-ನಾಯಕಿಯಾಗಿ ಜೋಡಿಯಾಗುತ್ತಿರುವುದು ಇದೇ ಮೊದಲ ಬಾರಿಯಾಗಿದೆ.

ಈ ಚಿತ್ರವು ಸಂಪೂರ್ಣ ರೋಮ್ಯಾಂಟಿಕ್ ಕಾಮಿಡಿ ಹಾಗೂ ಫ್ಯಾಮಿಲಿ ಎಂಟರ್‌ಟೈನರ್ ಕಥಾಹಂದರವನ್ನು ಹೊಂದಿದೆ. 90ರ ದಶಕದ ಪೀಳಿಗೆ ಹಾಗೂ ಇಂದಿನ ಜನರೇಷನ್ ಝೆನ್​ ಜಿ ನಡುವಿನ ಚಿಂತನೆಗಳು, ಬಾಂಧವ್ಯಗಳು ಮತ್ತು ಜೀವನಶೈಲಿಯಲ್ಲಿರುವ ವ್ಯತ್ಯಾಸಗಳನ್ನು ಅತ್ಯಂತ ಹಾಸ್ಯಮಯವಾಗಿ ಚಿತ್ರಿಸುವ ಪ್ರಯತ್ನವನ್ನು ನಿರ್ದೇಶಕರು ಮಾಡಿದ್ದಾರೆ. ಎರಡು ವಿಭಿನ್ನ ತಲೆಮಾರುಗಳು ಮುಖಾಮುಖಿಯಾದಾಗ ಎದುರಾಗುವ ಸನ್ನಿವೇಶಗಳು ಪ್ರೇಕ್ಷಕರನ್ನು ನಗೆಗಡಲಲ್ಲಿ ತೇಲಿಸಲಿವೆ.

ಇದನ್ನೂ ಓದಿ: ರಿಲೀಸ್​ಗೆ ರೆಡಿ ಆಯ್ತು ಮೋಕ್ಷಿತಾ ಪೈ ಹೊಸ ಸಿನಿಮಾ; ಡಿಗ್ಲಾಮ್ ಲುಕ್​ನಲ್ಲಿ ಮಿಂಚಲಿದ್ದಾರೆ ನಟಿ

ಈ ಸಿನಿಮಾದಲ್ಲಿ ಸಿಮ್ರಾನ್ ಮತ್ತು ಜಯರಾಮ್ ಅವರೊಂದಿಗೆ ಪೊನ್ವೇಲ್, ದೇವಿಕಾ ಸತೀಶ್ ಹಾಗೂ ಭಗವತಿ ಪೆರುಮಾಳ್ ಸೇರಿದಂತೆ ಹಲವು ಪ್ರಮುಖ ಕಲಾವಿದರು ನಟಿಸುತ್ತಿದ್ದು, ಚಿತ್ರದ ಕುರಿತ ಹೆಚ್ಚಿನ ಮಾಹಿತಿಯನ್ನು ಚಿತ್ರತಂಡ ಶೀಘ್ರದಲ್ಲೇ ಅಧಿಕೃತವಾಗಿ ಪ್ರಕಟಿಸಲಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.