‘ಆಪನ್​ಹೈಮರ್​’ ಯಶಸ್ಸಿನ ಬಳಿಕ ಹಾರರ್​ ಸಿನಿಮಾ ಮಾಡ್ತಾರೆ ಕ್ರಿಸ್ಟೋಫರ್​ ನೋಲನ್​​

ಹಾಲಿವುಡ್​ನಲ್ಲಿ ಪ್ರಭಾವಿ ನಿರ್ದೇಶಕನಾಗಿ ಗುರುತಿಸಿಕೊಂಡಿರುವ ಕ್ರಿಸ್ಟೋಫರ್​ ನೋಲನ್ (Christopher Nolan)​ ಅವರಿಗೆ ವಿಶ್ವಾದ್ಯಂತ ಅಭಿಮಾನಿಗಳು ಇದ್ದಾರೆ. ಅವರ ಸಿನಿಮಾಗಳು ಸಾವಿರಾರು ನಿರ್ದೇಶಕರಿಗೆ ಸ್ಫೂರ್ತಿ ಆಗಿವೆ. ಸೂಪರ್​ ಹೀರೋ ಕಾನ್ಸೆಪ್ಟ್​ ಇರುವ ‘ಬ್ಯಾಟ್​ ಮ್ಯಾನ್​’ ಸಿನಿಮಾವನ್ನು ಅವರು ನಿರ್ದೇಶಿಸಿ ಸೈ ಎನಿಸಿಕೊಂಡರು. ನಂತರ ‘ಇನ್​ಸೆಪ್ಷನ್​’, ‘ಇಂಟರ್​ಸ್ಟೆಲ್ಲರ್​’ ಮುಂತಾದ ಸೈನ್ಸ್​ ಫಿಕ್ಷನ್​ ಸಿನಿಮಾಗಳನ್ನೂ ಮಾಡಿ ಜನಮೆಚ್ಚುಗೆ ಪಡೆದರು. ಈಗ ಅವರು ಹೊಸ ಪ್ರಕಾರವನ್ನು ಪ್ರಯತ್ನಿಸಿಲು ಸಜ್ಜಾಗುತ್ತಿದ್ದಾರೆ. ಇದೇ ಮೊದಲ ಬಾರಿಗೆ ಹಾರರ್​ ಸಿನಿಮಾ (Horror Movie) ಮಾಡಲು ಕ್ರಿಸ್ಟೋಫರ್​ ನೋಲನ್​ ನಿರ್ಧರಿಸಿದ್ದಾರೆ. ಈ ಬಗ್ಗೆ ಅವರು ಮಾಹಿತಿ ಹಂಚಿಕೊಂಡಿದ್ದಾರೆ. ‘ಬ್ರಿಟಿಷ್​ ಫಿಲ್ಮ್​ ಇನ್​ಸ್ಟಿಟ್ಯೂಟ್​’ಗೆ ನೀಡಿದ ಸಂದರ್ಶನದಲ್ಲಿ ಅವರು ಈ ಕುರಿತು ಮಾತನಾಡಿದ್ದಾರೆ.

ಯಾವುದೇ ಪ್ರಕಾರದ ಸಿನಿಮಾ ಇದ್ದರೂ ಇದಕ್ಕೆ ಕ್ರಿಸ್ಟೋಫರ್​ ನೋಲನ್​ ಅವರು ನ್ಯಾಯ ಒದಗಿಸುತ್ತಾರೆ ಎಂಬುದರಲ್ಲಿ ಅನುಮಾನವೇ ಬೇಡ. ಸೂಪರ್​ ಹೀರೋ ಸಿನಿಮಾ, ಸೈನ್ಸ್​ ಫಿಕ್ಷನ್​ ಸಿನಿಮಾ ಮಾತ್ರವಲ್ಲದೇ ‘ಡಂಕಿರ್ಕ್​’ ಚಿತ್ರದ ಮೂಲಕ ಐತಿಹಾಸಿಕ ಕಥೆಯನ್ನು ಕೂಡ ಅವರು ಬಹಳ ಚೆನ್ನಾಗಿ ತೆರೆಗೆ ತಂದಿದ್ದಾರೆ. ಅದೇ ರೀತಿ, ‘ಆಪನ್​ಹೈಮರ್​’ ಸಿನಿಮಾದ ಮೂಲಕ ಬಯೋಪಿಕ್​ ಮಾಡುವುದರಲ್ಲೂ ತಮ್ಮ ಸಾಮರ್ಥ್ಯ ಏನು ಎಂಬುದನ್ನು ಅವರು ಸಾಬೀತು ಮಾಡಿದ್ದಾರೆ. ಈಗ ಹಾರರ್​ನತ್ತ ಅವರ ಮನಸ್ಸು ಎಳೆಯುತ್ತಿದೆ.

ಇದನ್ನೂ ಓದಿ: ಸೈನ್ಸ್​ ಫಿಕ್ಷನ್​ ಸಿನಿಮಾ ಮಾಡಿದ್ರೂ ಸ್ಮಾರ್ಟ್​ಫೋನ್​ ಬಳಸಲ್ಲ, ಇ-ಮೇಲ್​ ಮಾಡಲ್ಲ; ಕ್ರಿಸ್ಟೋಫರ್ ನೋಲನ್​ ಬಗ್ಗೆ ಅಚ್ಚರಿಯ ಮಾಹಿತಿ

ಕ್ರಿಸ್ಟೋಫರ್​ ನೋಲನ್​ ಅವರು ಹೊಸ ಸಿನಿಮಾ ಘೋಷಣೆ ಮಾಡುತ್ತಾರೆ ಎಂದರೆ ವಿಶ್ವಾದ್ಯಂತ ಇರುವ ಅವರ ಅಭಿಮಾನಿಗಳು ಎಗ್ಸೈಟ್​ ಆಗುತ್ತಾರೆ. ಅಷ್ಟರಮಟ್ಟಿಗೆ ಅವರು ಫೇಮಸ್​ ಆಗಿದ್ದಾರೆ. ಒಂದು ವೇಳೆ ಕ್ರಿಸ್ಟೋಫರ್​ ನೋಲನ್​​ ಅವರು ಹಾರರ್​ ಸಿನಿಮಾ ಮಾಡಿದ್ದೇ ಹೌದಾದರೆ ಅದು ಎಷ್ಟು ಭಯಾನಕವಾಗಿರಬಹುದು ಎಂದು ಅಭಿಮಾನಿಗಳು ಈಗಲೇ ಲೆಕ್ಕಾಚಾರ ಹಾಕುತ್ತಿದ್ದಾರೆ. ಸೋಶಿಯಲ್​ ಮೀಡಿಯಾದಲ್ಲಿ ಈ ಬಗ್ಗೆ ಫ್ಯಾನ್ಸ್​ ಚರ್ಚೆ ಮಾಡುತ್ತಿದ್ದಾರೆ.

ಹಾಲಿವುಡ್​ನಲ್ಲಿ ಹಾರರ್​ ಸಿನಿಮಾಗಳಿಗೇನೂ ಕೊರತೆ ಇಲ್ಲ. ಈಗಾಗಲೇ ಅಂತಹ ನೂರಾರು ಸಿನಿಮಾಗಳು ಸೂಪರ್​ ಹಿಟ್​ ಆಗಿವೆ. ಈಗ ಕ್ರಿಸ್ಟೋಫರ್​ ನೋಲನ್​​ ಅವರು ಅದೇ ಪ್ರಕಾರದ ಮೇಲೆ ಕಣ್ಣಿಟ್ಟಿದ್ದಾರೆ. ‘ಹಾರರ್​ ಸಿನಿಮಾಗಳು ತುಂಬ ಇಂಟರೆಸ್ಟಿಂಗ್​ ಆಗಿರುತ್ತವೆ. ಅವು ಸಂಪೂರ್ಣವಾಗಿ ಸಿನಿಮ್ಯಾಟಿಕ್​ ಸಾಧನದ ಮೇಲೆ ಅವಲಂಬಿತವಾಗಿವೆ. ನನಗೂ ಹಾರರ್​ ಸಿನಿಮಾ ಮಾಡಬೇಕು ಎಂಬ ಬಯಕೆ ಇದೆ. ಆದರೆ ಒಂದು ಅತ್ಯುತ್ತಮವಾದ ಹಾರರ್​ ಸಿನಿಮಾಗೆ ತುಂಬ ಚೆನ್ನಾಗಿ ಇರುವ ಐಡಿಯಾ ಬೇಕು’ ಎಂದು ಕ್ರಿಸ್ಟೋಫರ್​ ನೋಲನ್​ ಹೇಳಿದ್ದಾರೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.