Emmy Awards 2022: ಯಾರಿಗೆಲ್ಲ ಒಲಿದಿದೆ ಎಮಿ ಅವಾರ್ಡ್ಸ್? ಇಲ್ಲಿದೆ ಪ್ರಮುಖರ​ ಲಿಸ್ಟ್​

ಪ್ರತಿಷ್ಠಿತ ಎಮಿ ಅವಾರ್ಡ್ಸ್​ (Emmy Awards 2022) ಸಮಾರಂಭ ಅದ್ದೂರಿಯಾಗಿ ನಡೆದಿದೆ. ಲಾಸ್​ ಎಂಜಲೀಸ್​ನ ಮೈಕ್ರೋಸಾಫ್ಟ್​ ಥಿಯೇಟರ್​ನಲ್ಲಿ ಸೋಮವಾರ (ಸೆ.12) ಜರುಗಿದ ಈ ಕಾರ್ಯಕ್ರಮದಲ್ಲಿ ಅನೇಕ ಸೆಲೆಬ್ರಿಟಿಗಳು ಭಾಗಿ ಆಗಿದ್ದರು. ಹಲವು ವಿಭಾಗಗಳಲ್ಲಿ ಪ್ರಶಸ್ತಿ ನೀಡಲಾಗಿದೆ. ಕಿರುತೆರೆ ಲೋಕದ ಕಲಾವಿದರು ಮತ್ತು ತಂತ್ರಜ್ಞರಿಗೆ ನೀಡುವ ಎಮಿ ಪ್ರಶಸ್ತಿಗೆ (Emmy Awards) ಆಸ್ಕರ್​ ರೀತಿಯೇ ಜನಪ್ರಿಯತೆ ಇದೆ. ಈ ಬಾರಿ ಎಚ್​ಬಿಒ ವಾಹಿನಿಯ ಕಾರ್ಯಕ್ರಮಗಳಿಗೆ ಹೆಚ್ಚು ಪ್ರಶಸ್ತಿಗಳು ಒಲಿದಿವೆ. ಕಳೆದ 8 ವರ್ಷಗಳಲ್ಲಿ ಎಚ್​ಬಿಒ ವಾಹಿನಿ ಈ ರೀತಿ ಹೆಗ್ಗಳಿಕೆಗೆ ಪಾತ್ರವಾಗಿರುವುದು ಇದು ಆರನೇ ಬಾರಿ ಎಂಬುದು ವಿಶೇಷ. ‘ಸಕ್ಸೆಷನ್​’ಗೆ ಅತ್ಯುತ್ತಮ ಡ್ರಾಮಾ ಸೀರಿಸ್​ ಪ್ರಶಸ್ತಿ ನೀಡಲಾಗಿದೆ. ‘ಟೆಡ್​ ಲಾಸೋ’ ಅತ್ಯುತ್ತಮ ಕಾಮಿಡಿ ಸೀರಿಸ್ ಪ್ರಶಸ್ತಿ ಪಡೆದುಕೊಂಡಿದೆ. ‘ಯುಫೋರಿಯಾ’ ಸೀರಿಸ್​ನಲ್ಲಿನ ನಟನೆಗಾಗಿ ನಟಿ ಝಿಂಡೆಯಾ (Zendaya) ಅವರಿಗೆ ಅತ್ಯುತ್ತಮ ನಟಿ ಪ್ರಶಸ್ತಿ ಸಿಕ್ಕಿದೆ.

30ಕ್ಕೂ ಅಧಿಕ ವಿಭಾಗಗಳಲ್ಲಿ ‘ಎಮಿ ಅವಾರ್ಡ್ಸ್​’ ನೀಡಲಾಗಿದೆ. ಡ್ರಾಮಾ ಸೀರಿಸ್​ನ ಅತ್ಯುತ್ತಮ ನಟ ಪ್ರಶಸ್ತಿಯನ್ನು ಲೀ ಜಂಗ್​ ಜೇ (ಸ್ಕ್ವಿಡ್​ ಗೇಮ್​) ಪಡೆದುಕೊಂಡಿದ್ದಾರೆ. ಅತ್ಯುತ್ತಮ ಆಂಥಾಲಜಿ ಸೀರಿಸ್​ ಪ್ರಶಸ್ತಿಯು ‘ದಿ ವೈಟ್​ ಲೋಟಸ್​’ ಪಾಲಾಗಿದೆ. ಎಂಜೆ ಡಿಲೇನಿ ಅವರು ಅತ್ಯುತ್ತಮ ಕಾಮಿಡಿ ಸೀರಿಸ್​ ನಿರ್ದೇಶನ ಪ್ರಶಸ್ತಿಯನ್ನು ಪಡೆದುಕೊಂಡಿದ್ದಾರೆ. ಕಾಮಿಡಿ ಸೀರಿಸ್​ನ ಅತ್ಯುತ್ತಮ ನಟಿ ಪ್ರಶಸ್ತಿಯನ್ನು ಜೀನ್​ ಸ್ಮಾರ್ಟ್​ ಅವರಿಗೆ ನೀಡಲಾಗಿದೆ.

‘ಸ್ಕ್ವಿಡ್​ ಗೇಮ್​’ ನಿರ್ದೇಶನಕ್ಕಾಗಿ ‘ಅತ್ಯುತ್ತಮ ಡ್ರಾಮಾ ಸೀರಿಸ್​ ನಿರ್ದೇಶಕ’ ಪ್ರಶಸ್ತಿಯನ್ನು ಹ್ವಾಂಗ್​ ಡಾಂಗ್​ ಹ್ಯೂಕ್​ ಅವರು ಪಡೆದುಕೊಂಡಿದ್ದಾರೆ. ಕಾಮಿಡಿ ಸೀರಿಸ್​ನ ಅತ್ಯುತ್ತಮ ನಟ ಪ್ರಶಸ್ತಿಯು ಜೇಸನ್​ ಸಡೇಕಿಸ್ (ಟೆಡ್​ ಲಾಸೋ)​ ಪಾಲಾಗಿದೆ.

‘ಟೆಡ್​ ಲಾಸೋ’ ಕಾಮಿಡಿ ಸೀರಿಸ್​ನಲ್ಲಿನ ನಟನೆಗಾಗಿ ಬ್ರೆಟ್​ ಗೋಲ್ಡ್​ಸ್ಟೀನ್​ ಅವರು ಅತ್ಯುತ್ತಮ ಪೋಷಕ ನಟ ಪ್ರಶಸ್ತಿ ಪಡೆದುಕೊಂಡಿದ್ದಾರೆ. ಶೆರ್ಲಿ ಲೀ ರಾಲ್ಫ್​ ಅವರು ಅತ್ಯುತ್ತಮ ಪೋಷಕ ನಟಿ ಪ್ರಶಸ್ತಿ ಮುಡಿಗೇರಿಸಿಕೊಂಡಿದ್ದಾರೆ. ಡ್ರಾಮಾ ಸೀರಿಸ್​ನ ಅತ್ಯುತ್ತಮ ಪೋಷಕ ನಟ ಪ್ರಶಸ್ತಿಯು ಮ್ಯಾಥೀವ್​ ಮೆಕ್​ಫೆಡೀನ್​ (ಸಕ್ಸೆಷನ್​) ಅವರಿಗೆ ಸಿಕ್ಕಿದೆ.

ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ.