Project K Budget: ‘ಪ್ರಾಜೆಕ್ಟ್ ಕೆ’ ಕಲಾವಿದರ ಒಟ್ಟು ಸಂಭಾವನೆ 200 ಕೋಟಿ ರೂ? ಇದರಲ್ಲಿ ಪ್ರಭಾಸ್, ಕಮಲ್ ಹಾಸನ್ ಪಾಲು ಎಷ್ಟು?
Prabhas Remuneration: ‘ಪ್ರಾಜೆಕ್ಟ್ ಕೆ’ ಚಿತ್ರದಲ್ಲಿನ ಕಲಾವಿದರ ಜನಪ್ರಿಯತೆಯನ್ನು ನಂಬಿಕೊಂಡು ನಿರ್ಮಾಪಕರು ಈ ಪರಿ ಬಂಡವಾಳ ಹೂಡುತ್ತಿದ್ದಾರೆ. ಆದರೆ ಬಾಕ್ಸ್ ಆಫೀಸ್ನಲ್ಲಿ ಇದಕ್ಕೆ ತಕ್ಕ ಪ್ರತಿಫಲ ಸಿಗಲಿದೆಯೇ ಎಂಬುದು ದೊಡ್ಡ ಪ್ರಶ್ನೆ.
Updated on: Jun 27, 2023 | 7:00 AM
ನಟ ಪ್ರಭಾಸ್ (Prabhas) ಅವರು ‘ಬಾಹುಬಲಿ 2’ ಸಿನಿಮಾ ಬಳಿಕ ಯಾವುದೇ ಸೂಪರ್ ಹಿಟ್ ಸಿನಿಮಾ ನೀಡಿಲ್ಲ. ಆದರೂ ಕೂಡ ಅವರ ಮುಂಬರುವ ಸಿನಿಮಾಗಳಿಗೆ ಬಹುಕೋಟಿ ರೂಪಾಯಿ ಬಂಡವಾಳ ಹೂಡಲಾಗುತ್ತಿದೆ. ಅದ್ದೂರಿ ಬಜೆಟ್ನಲ್ಲಿ ಮೂಡಿಬಂದ ‘ಆದಿಪುರುಷ್’ ಚಿತ್ರವು ನಿರೀಕ್ಷಿತ ಮಟ್ಟದಲ್ಲಿ ಕಲೆಕ್ಷನ್ ಮಾಡಿಲ್ಲ. ಹಾಗಿದ್ದರೂ ಸಹ ಪ್ರಭಾಸ್ ಅವರ ಮೇಲೆ ನಿರ್ಮಾಪಕರು ಇಟ್ಟಿರುವ ನಂಬಿಕೆ ಕಡಿಮೆ ಆದಂತಿಲ್ಲ. ಪ್ರಭಾಸ್ ನಟಿಸುತ್ತಿರುವ ‘ಪ್ರಾಜೆಕ್ಟ್ ಕೆ’ ಸಿನಿಮಾ (Project K) ಮೇಲೆ ನೂರಾರು ಕೋಟಿ ರೂಪಾಯಿ ಸುರಿಯಲಾಗುತ್ತಿದೆ. ಹಣವನ್ನು ನೀರಿನಂತೆ ಖರ್ಚು ಮಾಡಲಾಗುತ್ತಿದೆ. ಈ ಸಿನಿಮಾದಲ್ಲಿನ ಕಲಾವಿದರ ಸಂಭಾವನೆಯೇ 200 ಕೋಟಿ ರೂಪಾಯಿ ಆಗಲಿದೆ ಎಂದು ಹೇಳಲಾಗುತ್ತಿದೆ. ಇತ್ತೀಚೆಗಷ್ಟೇ ಈ ಸಿನಿಮಾದ ಪಾತ್ರವರ್ಗಕ್ಕೆ ನಟ ಕಮಲ್ ಹಾಸನ್ (Kamal Haasan) ಅವರು ಸೇರ್ಪಡೆ ಆದರು. ಅವರಿಗೂ ದೊಡ್ಡ ಮೊತ್ತದ ಸಂಭಾವನೆಯನ್ನೇ ನೀಡಲಾಗುತ್ತಿದೆ.
ಮೂಲಗಳ ಪ್ರಕಾರ, ‘ಪ್ರಾಜೆಕ್ಟ್ ಕೆ’ ಸಿನಿಮಾಗೆ ಪ್ರಭಾಸ್ ಅವರು 150 ಕೋಟಿ ರೂಪಾಯಿ ಪಡೆದುಕೊಳ್ಳುತ್ತಿದ್ದಾರೆ. ಕಮಲ್ ಹಾಸನ್ ಅವರು ಒಂದು ಪಾತ್ರ ಮಾಡಲಿದ್ದು, ಅವರಿಗೆ 20 ಕೋಟಿ ರೂಪಾಯಿ ನೀಡಲಾಗುತ್ತಿದೆ. ಇನ್ನು, ಚಿತ್ರದ ನಾಯಕಿ ದೀಪಿಕಾ ಪಡುಕೋಣೆ ಅವರಿಗೆ 12 ಕೋಟಿ ರೂಪಾಯಿ ಸಂಬಳ ಸಿಗಲಿದೆ. ಇನ್ನುಳಿದ ಕಲಾವಿದರಾದ ಅಮಿತಾಭ್ ಬಚ್ಚನ್, ದಿಶಾ ಪಟಾಣಿ ಮುಂತಾದವರ ಸಂಭಾವನೆ ಸೇರಿದರೆ 20 ಕೋಟಿ ರೂಪಾಯಿ ಆಗಲಿದೆ. ಒಟ್ಟಾರೆಯಾಗಿ 200 ಕೋಟಿ ರೂಪಾಯಿಯನ್ನು ಕಲಾವಿದರ ಸಂಭಾವನೆಗಾಗಿ ಮೀಸಲಿಡಲಾಗಿದೆ.
ಇದನ್ನೂ ಓದಿ: Project K: ‘ಆದಿಪುರುಷ್’ ಟ್ರೋಲ್ ಮರೆತು ‘ಪ್ರಾಜೆಕ್ಟ್ ಕೆ’ ಅಪ್ಡೇಟ್ ತಿಳಿಯಲು ಕಾದಿರುವ ಪ್ರಭಾಸ್ ಅಭಿಮಾನಿಗಳು
ಸೈನ್ಸ್ ಫಿಕ್ಷನ್ ಶೈಲಿಯಲ್ಲಿ ‘ಪ್ರಾಜೆಕ್ಟ್ ಕೆ’ ಸಿನಿಮಾ ಮೂಡಿಬರುತ್ತಿದೆ. ಹಾಗಾಗಿ ಇದರ ನಿರ್ಮಾಣದ ವೆಚ್ಚ ದುಬಾರಿ ಆಗಿರಲಿದೆ. ಟಾಲಿವುಡ್ ಮಾಧ್ಯಮಗಳಲ್ಲಿ ಬಂದ ವರದಿಗಳ ಪ್ರಕಾರ 400 ಕೋಟಿ ರೂಪಾಯಿಯನ್ನು ಈ ಚಿತ್ರದ ನಿರ್ಮಾಣಕ್ಕಾಗಿ ಸುರಿಯಲಾಗುತ್ತಿದೆ. ಇದಕ್ಕೆ ಕಲಾವಿದರ ಸಂಭಾವನೆಯೂ ಸೇರಿದರೆ ಬರೋಬ್ಬರಿ 600 ಕೋಟಿ ರೂಪಾಯಿಗೆ ತಲುಪಲಿದೆ ಟೋಟಲ್ ಬಜೆಟ್!
ಇದನ್ನೂ ಓದಿ: Om Raut: ಸಾವಿರ ಕೋಟಿ ರೂ. ಬಜೆಟ್ನಲ್ಲಿ ‘ಆದಿಪುರುಷ್ 2’ ಮಾಡುವ ಪ್ಲಾನ್; ನಿರ್ದೇಶಕರ ಐಡಿಯಾಗೆ ಪ್ರಭಾಸ್ ಏನಂದ್ರು?
ದೊಡ್ಡ ದೊಡ್ಡ ಕಲಾವಿದರು ‘ಪ್ರಾಜೆಕ್ಟ್ ಕೆ’ ಸಿನಿಮಾದಲ್ಲಿ ಇದ್ದಾರೆ. ಅವರ ಜನಪ್ರಿಯತೆಯನ್ನು ನಂಬಿಕೊಂಡು ನಿರ್ಮಾಪಕರು ಈ ಚಿತ್ರಕ್ಕೆ 600 ಕೋಟಿ ರೂಪಾಯಿ ಬಂಡವಾಳ ಹೂಡುವುದು ದೊಡ್ಡ ವಿಷಯವೇನಲ್ಲ. ಆದರೆ ಬಾಕ್ಸ್ ಆಫೀಸ್ನಲ್ಲಿ ಇದಕ್ಕೆ ತಕ್ಕ ಪ್ರತಿಫಲ ಸಿಗಲಿದೆಯೇ ಎಂಬುದು ದೊಡ್ಡ ಪ್ರಶ್ನೆ. ಈಗಾಗಲೇ ‘ಆದಿಪುರುಷ್’ ಸಿನಿಮಾ ಮುಗ್ಗರಿಸಿದೆ. ಅದೇ ರೀತಿ ‘ಪ್ರಾಜೆಕ್ಟ್ ಕೆ’ ಚಿತ್ರಕ್ಕೆ ನಿರೀಕ್ಷಿತ ಮಟ್ಟದಲ್ಲಿ ಕಲೆಕ್ಷನ್ ಆಗದೇ ಇದ್ದರೆ ನಿರ್ಮಾಪಕರ ಲೆಕ್ಕಾಚಾರ ತಲೆಕೆಳಗಾಗಲಿದೆ. ನಾಗ್ ಅಶ್ವಿನ್ ಅವರು ಈ ಸಿನಿಮಾಗೆ ನಿರ್ದೇಶನ ಮಾಡುತ್ತಿದ್ದು, ‘ವೈಜಯಂತಿ ಮೂವೀಸ್’ ಬ್ಯಾನರ್ ಮೂಲಕ ನಿರ್ಮಾಣ ಆಗುತ್ತಿದೆ.
