ಜೀವನ್, ನವಿಲಾ ಜೋ, ನವೀನ್ ನಟನೆಯ ‘ಮನ ಮನ ಮಿಡಿದಿದೆ’ ಆಲ್ಬಂ ಸಾಂಗ್

ಕನ್ನಡದ ಆಲ್ಬಂ ಹಾಡುಗಳ ಸಾಲಿಗೆ ‘ಮನ ಮನ ಮಿಡಿದಿದೆ’ ಎಂಬ ಹೊಸ ಗೀತೆ ಕೂಡ ಸೇರ್ಪಡೆ ಆಗಿದೆ. ಇದು ಸಂಗೀತ, ನೃತ್ಯ, ಭಾವನೆ ಮತ್ತು ದೃಶ್ಯಕಥನವನ್ನು ಒಂದೇ ವೇದಿಕೆಯಲ್ಲಿ ಒಗ್ಗೂಡಿಸುವ ಸುಮಧುರ ಸಂಗೀತ ಪಯಣ ಎಂದು ಈ ಟೀಮ್ ಹೇಳಿದೆ. ಸಂಗೀತದೊಂದಿಗೆ ಡ್ರಮ್ ವಾದನ ಹಾಗೂ ಗಾಯನದ ಸೊಗಸನ್ನು ಕೂಡ ಒಳಗೊಂಡಿರುವ ಈ ಹಾಡು, ಪ್ರೇಕ್ಷಕರಿಗೆ ವಿಭಿನ್ನವಾದ ಸಂಗೀತ ಮತ್ತು ದೃಶ್ಯಾನುಭವವನ್ನು ನೀಡುವ ಪ್ರಯತ್ನವಾಗಿದೆ ಎನ್ನುವುದರೊಂದಿಗೆ ಈ ಹಾಡನ್ನು ಇತ್ತೀಚೆಗೆ ರಿಲೀಸ್ ಮಾಡಲಾಯಿತು.

‘ಮನ ಮನ ಮಿಡಿದಿದೆ’ ಹಾಡಿನಲ್ಲಿ ಜೀವನ್ ಹಳ್ಳಿಕಾರ್ ಅವರು ಮುಖ್ಯ ಪಾತ್ರದಲ್ಲಿ ಕಲಾವಿದರಾಗಿ ಕಾಣಿಸಿಕೊಂಡಿದ್ದಾರೆ. ಅಭಿನಯದ ಜೊತೆಗೆ ಅವರು ಈ ಹಾಡಿನ ಸಾಹಿತ್ಯ ರಚನೆ, ನೃತ್ಯ ಸಂಯೋಜನೆ ಹಾಗೂ ನಿರ್ದೇಶನದ ಜವಾಬ್ದಾರಿಯನ್ನೂ ಕೂಡ ನಿಭಾಯಿಸಿದ್ದಾರೆ. ನೃತ್ಯ ಸಂಯೋಜಕ ಹಾಗೂ ಚಿತ್ರ ನಿರ್ದೇಶಕರಾಗಿ ತಮ್ಮ ಅನುಭವವನ್ನು ಬಳಸಿಕೊಂಡು ಈ ಹಾಡನ್ನು ರೂಪಿಸಿದ್ದಾರೆ.

ಈ ಹಾಡಿಗೆ ಸಿದ್ಧಾರ್ಥ್ ಕಾಮತ್ ಅವರು ಸಂಗೀತ ಸಂಯೋಜಿಸಿದ್ದಾರೆ. ಸಾಕ್ಷಿ ಭಾಗವತ್ ಹಾಗೂ ಸಿದ್ಧಾರ್ಥ್ ಕಾಮತ್ ಅವರು ಜೊತೆಯಾಗಿ ಧ್ವನಿ ನೀಡಿದ್ದಾರೆ. ಈ ಗೀತೆಯ ಕಲಾವಿದರ ಬಳಗದಲ್ಲಿ ನವಿಲಾ ಜೋ ಮತ್ತು ನವೀನ್ ಕೂಡ ಇದ್ದಾರೆ. ತಮ್ಮ ಅಭಿನಯದ ಮೂಲಕ ಮೆರುಗು ಹೆಚ್ಚಿಸಿದ್ದಾರೆ. ಜೀವನ್ ಹಳ್ಳಿಕಾರ್ ಅವರ ಯೂಟ್ಯೂಬ್ ಚಾನೆಲ್‌ನಲ್ಲಿ ಈ ಹಾಡು ಲಭ್ಯವಾಗಿದೆ.

‘ಗ್ಲಿಟ್ಟರರ್ಸ್‌ ಸ್ಟಾರ್ ಹೌಸ್ ಪ್ರೊಡಕ್ಷನ್ಸ್’ ಮೂಲಕ ‘ಮನ ಮನ ಮಿಡಿದಿದೆ’ ಹಾಡನ್ನು ನಿರ್ಮಿಸಲಾಗಿದೆ. ಸಂಗೀತ, ಪ್ರದರ್ಶನ ಹಾಗೂ ದೃಶ್ಯಕಥನವನ್ನು ಒಟ್ಟುಗೂಡಿಸಿ ವಿಭಿನ್ನವಾದ ಮೂಲ ಸಂಗೀತ ಕಂಟೆಂಟ್‌ಗಳನ್ನು ರೂಪಿಸುವ ತಮ್ಮ ಸಂಸ್ಥೆಯ ಪ್ರಯತ್ನದ ಮುಂದುವರಿದ ಭಾಗವಾಗಿ ಈ ಆಲ್ಬಂ ಸಾಂಗ್ ಮೂಡಿಬಂದಿದೆ ಎಂದು ಅವರು ಹೇಳಿದ್ದಾರೆ.

ಇದನ್ನೂ ಓದಿ: ಸರಳ, ಸುಂದರ ಪ್ರೇಮಕಥೆ ಹೇಳುವ ‘ಕನಸಲು’ ಆಲ್ಬಂ ಹಾಡು ಬಿಡುಗಡೆ

ಎಡಿಟರ್ ಆಕಾಶ್ ಎಸ್. ಮಹೇಂದ್ರಕರ್ ಅವರು ಹಾಡಿನ ದೃಶ್ಯಕಥನಕ್ಕೆ ಅಂತಿಮ ರೂಪ ನೀಡಿದ್ದಾರೆ. ಕಲರಿಸ್ಟ್ ಕಿಶೋರ್ ಅಕ್ಕನ್ನ ಅವರು ಬಣ್ಣ ಸಂಯೋಜನೆಯಿಂದ ದೃಶ್ಯಗಳಿಗೆ ಇನ್ನಷ್ಟು ಆಕರ್ಷಕ ಹಾಗೂ ವಿಶಿಷ್ಟ ಸ್ಪರ್ಶ ನೀಡಿದ್ದಾರೆ. ಈ ಹಾಡನ್ನು ವೀಕ್ಷಿಸಿದವರಿಂದ ಉತ್ತಮ ಪ್ರತಿಕ್ರಿಯೆ ಸಿಗುತ್ತಿರುವುದು ತಂಡಕ್ಕೆ ಖುಷಿ ನೀಡಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.