ವಿದಾಯ ಹೇಳಿದ ಬಳಿಕ ಮತ್ತೆ ಬಿಗ್​ಬಾಸ್​ ವೇದಿಕೆ ಬರಲಿದ್ದಾರೆ ಕಮಲ್ ಹಾಸನ್

ಕಿಚ್ಚ ಸುದೀಪ್, ತಾವು ಇನ್ನು ಮುಂದೆ ಬಿಗ್​ಬಾಸ್ ನಿರೂಪಣೆ ಮಾಡುವುದಿಲ್ಲ, ಈಗ ನಡೆಯುತ್ತಿರುವ 11ನೇ ಸೀಸನ್ ನನ್ನ ಕೊನೆಯ ಸೀಸನ್ ಎಂದು ಘೋಷಣೆ ಮಾಡಿದ್ದಾರೆ. ಕೆಲವು ವಾರಗಳ ಹಿಂದೆಯಷ್ಟೆ ನಟ ಕಮಲ್ ಹಾಸನ್ ಸಹ ತಾವು ಇನ್ನು ಮುಂದೆ ಬಿಗ್​ಬಾಸ್ ನಿರೂಪಣೆ ಮಾಡುವುದಿಲ್ಲ ಎಂದು ಘೋಷಣೆ ಮಾಡಿದ್ದರು. ಕಮಲ್ ಹಾಸನ್​ರ ನಿರ್ಧಾರದ ಬಗ್ಗೆ ಹಲವು ಬೇಸರ ವ್ಯಕ್ತಪಡಿಸಿದ್ದರು. ಆದರೆ ಈಗ ಕಮಲ್ ಹಾಸನ್ ಮತ್ತೆ ಬಿಗ್​ಬಾಸ್ ವೇದಿಕೆಗೆ ಬರುವವರಿದ್ದಾರೆ. ಆದರೆ ನಿರೂಪಣೆ ಮಾಡಲು ಅಲ್ಲ. ಬೇರೆ ಕಾರಣಕ್ಕೆ.

ತಮಿಳು ಬಿಗ್​ಬಾಸ್​ ಪ್ರಾರಂಭ ಆದಾಗಿನಿಂದಲೂ ಕಮಲ್ ಹಾಸನ್ ಅವರೇ ನಿರೂಪಕರಾಗಿದ್ದರು. 2017 ರಲ್ಲಿ ಮೊದಲ ಬಾರಿಗೆ ತಮಿಳಿನಲ್ಲಿ ಬಿಗ್​ಬಾಸ್ ಪ್ರಾರಂಭವಾಗಿತ್ತು. ಆಗಿನಿಂದ ಏಳು ಸೀಸನ್ ಗಳ ಕಾಲ ಬಿಗ್​ಬಾಸ್ ಅನ್ನು ಕಮಲ್ ಹಾಸನ್ ನಿರೂಪಣೆ ಮಾಡುತ್ತಿದ್ದರು. ಅವರ ನಿರೂಪಣೆಗೆ ಪ್ರೇಕ್ಷಕರು ಫಿದಾ ಆಗಿದ್ದರು. ಕನ್ನಡದ ರೀತಿಯಲ್ಲಿಯೇ ಬಿಗ್​ಬಾಸ್ ಎಂದರೆ ಕಮಲ್ ಹಾಸನ್ ಎಂಬ ಹೆಸರಿತ್ತು. ಆದರೆ ಎಂಟನೇ ಸೀಸನ್ ಪ್ರಾರಂಭ ಆಗುವ ವೇಳೆಗೆ ತಾವು ಇನ್ನು ಮುಂದೆ ಬಿಗ್​ಬಾಸ್ ನಿರೂಪಣೆ ಮಾಡುವುದಿಲ್ಲ ಎಂದು ಕಮಲ್ ಹಾಸನ್ ಘೋಷಣೆ ಮಾಡಿದರು.

ಬಿಗ್​ಬಾಸ್ ಎಂಟನೇ ಸೀಸನ್ ಅನ್ನು ವಿಜಯ್ ಸೇತುಪತಿ ನಿರೂಪಣೆ ಮಾಡುತ್ತಿದ್ದಾರೆ. ವಿಜಯ್ ಸೇತುಪತಿ ಬೇರೆ ಕೆಲವು ಶೋ ನಿರೂಪಣೆ ಮಾಡಿರುವ ಕಾರಣ ಅವರಿಗೆ ಅನುಭವ ಇದೆ. ಆದರೆ ಜನ ಕಮಲ್ ಅವರಷ್ಟು ಚೆನ್ನಾಗಿ ನಿರೂಪಣೆ ಮಾಡುತ್ತಿಲ್ಲ ಎಂದು ದೂರು ಹೇಳುತ್ತಿದ್ದಾರೆ. ಇದರ ನಡುವೆ ಕಮಲ್ ಹಾಸನ್ ಮತ್ತೆ ಬಿಗ್​ಬಾಸ್​ಗೆ ಬರುತ್ತಿದ್ದಾರೆ ಆದರೆ ನಿರೂಪಕರಾಗಿ ಅಲ್ಲ, ಹಾಗೆಂದು ಸ್ಪರ್ಧಿಯಾಗಿ ಸಹ ಅಲ್ಲ.

ಇದನ್ನೂ ಓದಿ:70ರ ವಯಸ್ಸಲ್ಲೂ ಕಲಿಯುವ ಉತ್ಸಾಹ, ಅಮೆರಿಕದಲ್ಲಿ ಕೋರ್ಸ್ ಸೇರಿಕೊಂಡ ಕಮಲ್ ಹಾಸನ್

ಕಮಲ್ ಹಾಸನ್ ತಾವು ನಿರ್ಮಾಣ ಮಾಡಿರುವ ಸಿನಿಮಾದ ಪ್ರಚಾರಕ್ಕಾಗಿ ಬಿಗ್​ಬಾಸ್​ ವೇದಿಕೆಗೆ ಆಗಮಿಸಲಿದ್ದಾರೆ. ಶಿವಕಾರ್ತಿಕೇಯನ್ ಹಾಗೂ ಸಾಯಿ ಪಲ್ಲವಿ ನಟಿಸಿರುವ ‘ಅಮರನ್’ ಸಿನಿಮಾವನ್ನು ಕಮಲ್ ಹಾಸನ್ ನಿರ್ಮಾಣ ಮಾಡಿದ್ದು ಸಿನಿಮಾ ಕೆಲವೇ ದಿನಗಳಲ್ಲಿ ಬಿಡುಗಡೆ ಆಗಲಿದೆ. ಈ ಸಿನಿಮಾದ ಪ್ರಚಾರದಲ್ಲಿ ಕಮಲ್ ಹಾಸನ್ ಸಹ ಭಾಗಿ ಆಗಲಿದ್ದು, ಬಿಗ್​ಬಾಸ್​ನಲ್ಲೂ ಸಹ ಸಿನಿಮಾ ಪ್ರಚಾರ ಮಾಡಲು ಚಿತ್ರತಂಡ ಮುಂದಾಗಿದ್ದು, ಇದೇ ಕಾರಣಕ್ಕೆ ಕಮಲ್ ಹಾಸನ್ ಬಿಗ್​ಬಾಸ್​ಗೆ ಬರಲಿದ್ದಾರೆ.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ

Published On - 1:20 pm, Tue, 15 October 24