ಮತ್ತೊಂದು ಸಾಧನೆ ಮಾಡಿದ ಕಾಂತಾರ; ಸಾರ್ವಕಾಲಿಕ ಟಾಪ್ 5 ತೆಲುಗು ಡಬ್ಬಿಂಗ್ ಚಿತ್ರಗಳ ಪಟ್ಟಿಯಲ್ಲಿ ಸ್ಥಾನ 

ಹೊಂಬಾಳೆ ಸಂಸ್ಥೆ ನಿರ್ಮಾಣದ, ರಿಷಬ್​ ಶೆಟ್ಟಿ ನಟಿಸಿ, ನಿರ್ದೇಶಿಸಿರುವ ಚಿತ್ರ ‘ಕಾಂತಾರ’ (Kantara). ಸೆ. 30 ರಂದು ತೆರೆಗೆ ಬಂದ ಈ ಚಿತ್ರ 50 ದಿನಗಳನ್ನು ಪೂರ್ಣಗೊಳಿಸಿ ಇಂದಿಗೂ ಮುನ್ನುಗ್ಗುತ್ತಿದೆ. ಬಾಕ್ಸ್​ ಆಫಿಸ್ಸ್​ (Kantara Box Office Collection)​ನಲ್ಲಿ ‘ಕಾಂತಾರ’ ಚಿತ್ರ ಈಗಾಗಲೇ ಧೂಳು ಎಬಿಸಿದೆ. ಕಡಿಮೆ ಬಜೆಟ್​ನಲ್ಲಿ ಸಿದ್ಧಗೊಂಡ ‘ಕಾಂತಾರ’ ಸಿನಿಮಾ ಈ ಪರಿ ಹಿಟ್​ ಆಗುತ್ತದೆ ಎಂಬ ಊಹೆ ಇರಲಿಲ್ಲ. ಆದರೆ ಬಿಡುಗಡೆ ಬಳಿಕ ಈ ಸಿನಿಮಾ ಎಲ್ಲರ ನಿರೀಕ್ಷೆಗೂ ಮೀರಿ ದಾಖಲೆ ಮಾಡಿದೆ. ‘ಕಾಂತಾರ’ ಸಿನಿಮಾದ ಬಾಕ್ಸ್​ ಆಫೀಸ್​ ಕಲೆಕ್ಷನ್​ ನೋಡಿ ಪರಭಾಷೆ ಸಿನಿಮಂದಿಗೂ ಅಚ್ಚರಿ ಆಗಿದೆ. ಕಡಿಮೆ ಬಜೆಟ್​ನಲ್ಲಿ ಮೂಡಿಬಂದ ಈ ಸಿನಿಮಾ ಈಗ ಬರೋಬ್ಬರಿ 400 ಕೋಟಿ ರೂಪಾಯಿ ಕಲೆಕ್ಷನ್​ ಮಾಡಿದೆ. ಈಗ ಅದೇ ರೀತಿಯಾಗಿ ‘ಕಾಂತಾರ’ ಮತ್ತೊಂದು ದಾಖಲೆ ನಿರ್ಮಿಸಿದೆ. ಆದರೆ ಅದು ಸ್ಯಾಂಡಲ್​ವುಡ್​ನಲ್ಲಿ ಅಲ್ಲ. ಬದಲಾಗಿ ಟಾಲಿವುಡ್​ನಲ್ಲಿ.

‘ಕಾಂತಾರ’ ಚಿತ್ರ ನಿರ್ಮಾಣವಾದಾಗ ಇದನ್ನು ಪ್ಯಾನ್​ ಇಂಡಿಯಾ ಚಿತ್ರ ಮಾಡಬೇಕು ಎಂಬ ಯಾವ ಉದ್ದೇಶವೂ ನಟ ರಿಷಬ್​ ಶೆಟ್ಟಿ ಅವರಿಗೆ ಇರಲಿಲ್ಲ. ಆದರೆ ಕನ್ನಡದಲ್ಲಿ ಚಿತ್ರ ತೆರೆ ಕಂಡು ಉತ್ತಮ ಪ್ರತಿಕ್ರಿಯೆ ಪಡೆದುಕೊಂಡಿತು. ಪರ ಭಾಷೆಯ ಪ್ರೇಕ್ಷಕರು ಕನ್ನಡದಲ್ಲಿಯೇ ಚಿತ್ರವನ್ನು ನೋಡಿ ಮೆಚ್ಚಿಕೊಳ್ಳ ತೊಡಗಿದರು. ಬಳಿಕ ಈ ಚಿತ್ರವನ್ನು ಪ್ಯಾನ್​ ಇಂಡಿಯಾ ಮಾಡಬೇಕು ಎಂದು ಬೇಡಿಕೆಗಳು ಬಂದವು.

ಪ್ಯಾನ್​​ ಇಂಡಿಯಾದ ಬೇಡಿಕೆ ಹೆಚ್ಚಾಗುತ್ತಿದ್ದಂತೆ ಹಿಂದಿ, ತೆಲುಗು, ತಮಿಳು, ಮಲಯಾಳಂ ಭಾಷೆಗಳಲ್ಲಿ ಡಬ್​ ಮಾಡಲಾಯಿತು. ಸದ್ಯ ಹೀಗೆ ತೆಲುಗಿಗೆ ಡಬ್​ ಆದ ಚಿತ್ರದ ಪೈಕಿ ‘ಕಾಂತಾರ’ ಒಂದು. ಬಾಕ್ಸ್ ಆಫೀಸ್‌ನಲ್ಲಿ ಸಾರ್ವಕಾಲಿಕ ಟಾಪ್ 5 ತೆಲುಗು ಡಬ್ಬಿಂಗ್ ಚಿತ್ರಗಳ ಪಟ್ಟಿಗೆ ‘ಕಾಂತಾರ’ ಕೂಡ ಸೇರಿಕೊಂಡಿದೆ. ಟ್ರ್ಯಾಕ್​ಟಾಲಿವುಡ್​​. ಕಾಮ್ (TrackTollywood.com) ವರದಿ ಪ್ರಕಾರ, ‘ಕಾಂತಾರ’ ಚಿತ್ರ ತೆಲುಗಿನಲ್ಲಿ ಅತಿ ಹೆಚ್ಚು ಗಳಿಕೆಯಾದ ಟಾಪ್ 5 ತೆಲುಗು ಡಬ್ಬಿಂಗ್ ಚಲನಚಿತ್ರಗಳಲ್ಲಿ ಒಂದಾಗಿದೆ. ತೆಲುಗು ಡಬ್ಬಿಂಗ್ ಆವೃತ್ತಿಯಿಂದ ಚಿತ್ರ ಇಲ್ಲಿಯವರೆಗೂ 65 ಕೋಟಿ ಗಳಿಸಿದೆ. ಆ ಮೂಲಕ ನಟ ಚಿಯಾನ್ ವಿಕ್ರಮ್ ಅವರ ‘ಐ’ ಚಿತ್ರವನ್ನು ಹಿಂದಿಕ್ಕಿದೆ. ‘ಕೆಜಿಎಫ್​​ 2’ ಚಿತ್ರ ತೆಲುಗಿಗೆ ಡಬ್​ ಆಗಿ 185 ಕೋಟಿ ರೂ. ಗಳಿಕೆ ಮಾಡಿ ಅಗ್ರಸ್ಥಾನದಲ್ಲಿದೆ.

ಎಲ್ಲ ಭಾಷೆಯಲ್ಲೂ ಈ ಚಿತ್ರಕ್ಕೆ ಮೆಚ್ಚುಗೆ ವ್ಯಕ್ತವಾಗಿದೆ. ಕನ್ನಡದಲ್ಲಿ 168.50 ಕೋಟಿ ರೂಪಾಯಿ ಸಂಗ್ರಹ ಆಗಿದೆ. ಆಂಧ್ರ ಮತ್ತು ತೆಲಂಗಾಣದಲ್ಲಿ ತೆಲುಗು ವರ್ಷನ್​ನಿಂದ 60 ಕೋಟಿ ರೂಪಾಯಿ ಹರಿದುಬಂದಿದೆ. ತಮಿಳುನಾಡಿಲ್ಲಿ 12.70 ಕೋಟಿ ರೂಪಾಯಿ ಹಾಗೂ ಕೇರಳದಲ್ಲಿ 19.20 ಕೋಟಿ ರೂಪಾಯಿ ಕಲೆಕ್ಷನ್​ ಆಗಿದೆ. ಇನ್ನು, ಉತ್ತರ ಭಾರತದ ಮಂದಿ ಈ ಚಿತ್ರವನ್ನು ಮುಗಿಬಿದ್ದು ನೋಡಿದ್ದಾರೆ.

ಹಿಂದಿ ವರ್ಷನ್​ನಿಂದ ಬರೋಬ್ಬರಿ 96 ಕೋಟಿ ರೂಪಾಯಿ ಆದಾಯ ಬಂದಿದೆ. ವಿದೇಶದ ಬಾಕ್ಸ್​ ಆಫೀಸ್​ನಲ್ಲಿ 44.50 ಕೋಟಿ ರೂಪಾಯಿ ಬಾಚಿಕೊಂಡಿದೆ. ಕನ್ನಡದ ಸಿನಿಮಾ ಈ ಪರಿ ಸಾಧನೆ ಮಾಡಿರುವುದು ನಿಜಕ್ಕೂ ಶ್ಲಾಘನೀಯ. ಇಂದಿಗೂ ಅನೇಕ ಕಡೆಗಳಲ್ಲಿ ಉತ್ತಮ ಪ್ರದರ್ಶನ ಕಾಣುತ್ತಿದೆ.

ಮತ್ತಷ್ಟು ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ.

Published On - 10:38 pm, Wed, 23 November 22