ಸಮಂತಾ ಎದುರು ಶೋಭಿತಾ ಜನಪ್ರಿಯತೆಯೇ ಹೆಚ್ಚು; ನಾಗ ಚೈತನ್ಯ ಪತ್ನಿಗೆ 5ನೇ ಸ್ಥಾನ

ಟಾಲಿವುಡ್​ ಹೀರೋ ನಾಗ ಚೈತನ್ಯ ಜೊತೆ ನಟಿ ಶೋಭಿತಾ ಧುಲಿಪಾಲ ಅವರು ಹಸೆಮಣೆ ಏರಿದ್ದಾರೆ. ಡಿಸೆಂಬರ್​ 4ರಂದು ಹೈದರಾಬಾದ್​ನಲ್ಲಿ ಅವರ ಮದುವೆ ನೆರವೇರಿದೆ. ನಾಗ ಚೈತನ್ಯ ಅವರು ಮಾಜಿ ಪತ್ನಿ ಸಮಂತಾಗೆ ವಿಚ್ಛೇದನ ನೀಡಿ 3 ವರ್ಷ ಕಳೆದ ಬಳಿಕ ಶೋಭಿತಾ ಜೊತೆ ದಾಂಪತ್ಯ ಜೀವನ ಆರಂಭಿಸಿದ್ದಾರೆ. ಕಳೆದ ಕೆಲವು ದಿನಗಳಿಂದ ಶೋಭಿತಾ ಅವರ ಬಗ್ಗೆ ಸೋಶಿಯಲ್ ಮೀಡಿಯಾದಲ್ಲಿ ತುಂಬ ಚರ್ಚೆ ಆಗಿದೆ. ಅಚ್ಚರಿ ಏನೆಂದರೆ, ಅತಿ ಜನಪ್ರಿಯತೆ ಹೊಂದಿದ ಸೆಲೆಬ್ರಿಟಿಗಳ ಟಾಪ್​ 10 ಪಟ್ಟಿಯಲ್ಲಿ ಶೋಭಿತಾ ಹೆಸರು ಸ್ಥಾನ ಪಡೆದುಕೊಂಡಿದೆ. ಅಷ್ಟೇ ಅಲ್ಲ, ಈ ಪಟ್ಟಿಯಲ್ಲಿ ಸಮಂತಾ ರುತ್ ಪ್ರಭು ಕೂಡ ಇದ್ದಾರೆ!

2024ರಲ್ಲಿ ಅತಿ ಹೆಚ್ಚು ಜನಪ್ರಿಯತೆ ಪಡೆದ ಭಾರತದ ಸೆಲೆಬ್ರಿಟಿಗಳ ಟಾಪ್​ 10 ಪಟ್ಟಿಯನ್ನು ‘ಐಎಂಡಿಬಿ’ ವೆಬ್​ಸೈಟ್​ ಬಿಡುಗಡೆ ಮಾಡಿದೆ. ಇದರಲ್ಲಿ ಸಮಂತಾ ರುತ್​ ಪ್ರಭು, ಶೋಭಿತಾ, ಪ್ರಭಾಸ್, ಆಲಿಯಾ ಭಟ್​ ಮುಂತಾದವರು ಸ್ಥಾನ ಪಡೆದುಕೊಂಡಿದ್ದಾರೆ. ಶೋಭಿತಾ ಅವರಿಗೆ ಈ ಪಟ್ಟಿಯಲ್ಲಿ 5ನೇ ಸ್ಥಾನ ಸಿಕ್ಕಿದೆ. ಸಮಂತಾ ರುತ್ ಪ್ರಭು ಅವರು 8ನೇ ಸ್ಥಾನದಲ್ಲಿ ಇದ್ದಾರೆ. ಆ ಮೂಲಕ ಜನಪ್ರಿಯತೆಯಲ್ಲಿ ಸಮಂತಾ ಅವರನ್ನು ಶೋಭಿತಾ ಹಿಂದಿಕ್ಕಿದ್ದಾರೆ.

ಇದನ್ನೂ ಓದಿ: ನೆರವೇರಿತು ನಾಗ ಚೈತನ್ಯ-ಶೋಭಿತಾ ಮದುವೆ; ಶುಭಕೋರಿದ ಸೆಲೆಬ್ರಿಟಿಗಳು

‘ಐಎಂಡಿಬಿ’ ವೆಬ್​ಸೈಟ್​ನಲ್ಲಿ ಸೆಲೆಬ್ರಿಟಿಗಳ ಪ್ರೊಫೈಲ್​ ಪುಟಕ್ಕೆ ಭೇಟಿ ನೀಡಿದ ಓದುಗರ ಸಂಖ್ಯೆಯ ಆಧಾರದ ಮೇಲೆ ಈ ಪಟ್ಟಿಯನ್ನು ಬಿಡುಗಡೆ ಮಾಡಲಾಗಿದೆ. ನಟಿ ತೃಪ್ತಿ ದಿಮ್ರಿ ಅವರಿಗೆ ನಂಬರ್​ ಒನ್ ಸ್ಥಾನ ಸಿಕ್ಕಿದೆ. ಕನ್ನಡದ ಯಾವ ಸೆಲೆಬ್ರಿಟಿಗಳು ಕೂಡ ಈ ಪಟ್ಟಿಯಲ್ಲಿ ಇಲ್ಲ. ಶೋಭಿತಾ ಅವರು ಹಲವಾರು ಸಿನಿಮಾಗಳಲ್ಲಿ ಸೈ ಎನಿಸಿಕೊಂಡಿದ್ದಾರೆ. ನಾಗ ಚೈತನ್ಯ ಜೊತೆ ಡೇಟಿಂಗ್ ಮಾಡಲು ಶುರು ಮಾಡಿದ ದಿನದಿಂದ ಅವರ ಹೆಸರು ಹೆಚ್ಚು ಸುದ್ದಿಯಾಗಲು ಆರಂಭವಾಯಿತು. ಮದುವೆಯ ಸುದ್ದಿ ಕೇಳಿಬಂದ ಬಳಿಕ ಶೋಭಿತಾ ಬಗ್ಗೆ ತಿಳಿದುಕೊಳ್ಳಲು ಜನರು ಹೆಚ್ಚು ಆಸಕ್ತಿ ತೋರಿಸಿದರು.

ಐಎಂಡಿಬಿ ಪ್ರಕಟಿಸಿದ 2024ರ ಮೋಸ್ಟ್​ ಪಾಪ್ಯುಲರ್​ ಸೆಲೆಬ್ರಿಟಿಗಳ ಟಾಪ್​ 10 ಪಟ್ಟಿ ಈ ರೀತಿ ಇದೆ:
1. ತೃಪ್ತಿ ದಿಮ್ರಿ
2. ದೀಪಿಕಾ ಪಡುಕೋಣೆ.
3. ಇಶಾನ್ ಕಟ್ಟರ್​.
4. ಶಾರುಖ್ ಖಾನ್​.
5. ಶೋಭಿತಾ ದುಲಿಪಾಲ.
6. ಶಾರ್ವರಿ ವಾಘ್.
7. ಐಶ್ವರ್ಯಾ ರೈ ಬಚ್ಚನ್.
8. ಸಮಂತಾ ರುತ್ ಪ್ರಭು.
9. ಆಲಿಯಾ ಭಟ್.
10. ಪ್ರಭಾಸ್​

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.