ನಟ ಧನ್ವೀರ್ ಗೌಡ ವಿರುದ್ಧ ಮತ್ತೊಂದು ದೂರು ದಾಖಲು

ದರ್ಶನ್ ಪತ್ನಿ ವಿಜಯಲಕ್ಷ್ಮಿ ಮತ್ತು ನಟ ಧನ್ವೀರ್ ಗೌಡ ಅವರ ಮುನಿಸು, ಜಟಾ-ಪಟಿಯಾಗಿ ಬದಲಾಗಿದೆ. ಈಗಾಗಲೇ ದರ್ಶನ್​​ ಪಿಎ ಹಾಗೂ ವಿಜಯಲಕ್ಷ್ಮಿ ಅವರಿಗೆ ಆಪ್ತವಾಗಿರುವ ಪಿಎ ನಾಗರಾಜು ಈಗಾಗಲೇ ನಟ ಧನ್ವೀರ್ ಗೌಡ ವಿರುದ್ಧ ಠಾಣೆಯಲ್ಲಿ ದೂರು ನೀಡಿದ್ದಾರೆ. ಅದಕ್ಕೆ ಪ್ರತಿಯಾಗಿ ಧನ್ವೀರ್ ಅವರ ತಂದೆ ತಿಮ್ಮ ಗೌಡ ಸಹ ವಿಜಯಲಕ್ಷ್ಮಿ, ನಾಗರಾಜು ಸೇರಿದಂತೆ ಇನ್ನೂ ಇಬ್ಬರ ವಿರುದ್ಧ ರಾಜಾಜಿನಗರ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ. ಇದರ ನಡುವೆ ಇದೀಗ ಧನ್ವೀರ್ ವಿರುದ್ಧ ಮತ್ತೊಬ್ಬರು ದೂರು ದಾಖಲಿಸಿದ್ದಾರೆ.

ಧನ್ವೀರ್ ಗೌಡ ವಿರುದ್ಧ ಬೋಜರಾಜ್ ಎಂಬುವರು ದೂರು ದಾಖಲಿಸಿದ್ದು, ಧನ್ವೀರ್, ತಮಗೆ ಕರೆ ಮಾಡಿ ಅವಾಚ್ಯ ಶಬ್ದಗಳಿಂದ ನಿಂದಿಸಿ ಬೆದರಿಕೆ ಹಾಕಿರುವುದಾಗಿ ಬೋಜರಾಜ್ ತಮ್ಮ ದೂರಿನಲ್ಲಿ ತಿಳಿಸಿದ್ದಾರೆ. ತಮ್ಮ ಸ್ನೇಹಿತ ನಾಗರಾಜು (ದರ್ಶನ್ ಪಿಎ) ಅಕ್ಟೋಬರ್ 21ರಂದು ಕರೆ ಮಾಡಿ ಧನ್ವೀರ್ ಮನೆಯ ಬಳಿ ಬರಲು ಹೇಳಿದ್ದರು. ಅದರಂತೆ ನಾನು ಹೋಗಿ ನಾಗರಾಜು ಅವರನ್ನು ಕರೆದುಕೊಂಡು ಹೋಗಿದ್ದೆ. ಆ ಬಳಿಕ ಧನ್ವೀರ್ ಅವರು ನನಗೆ ಕರೆ ಮಾಡಿ ಬೆದರಿಕೆ ಹಾಕಿದ್ದು, ಲೊಕೇಶನ್ ಕಳಿಸುವಂತೆ ಒತ್ತಾಯಿಸಿದ್ದರು. ಅಲ್ಲದೆ ಪದೇ ಪದೇ ಬೆದರಿಕೆ ಸಂದೇಶಗಳನ್ನು ವಾಟ್ಸ್​​ಆಪ್​​ನಲ್ಲಿ ಸಹ ಕಳಿಸಿದ್ದರು. ಅವರು ನನಗೆ ಕಳಿಸಿರುವ ಸಂದೇಶಗಳನ್ನು ನಾನು ಪೊಲೀಸರಿಗೆ ನೀಡಲು ತಯಾರಿದ್ದೇನೆ. ಹಾಗೆಯೇ ನಾನು ಅವರ ಮನೆ ಬಳಿ ಹೋಗಿರುವ ದೃಶ್ಯಗಳು ಸಿಸಿಟಿವಿಯಲ್ಲಿ ದಾಖಲಾಗಿದ್ದು, ಅವುಗಳನ್ನು ಧನ್ವೀರ್ ಹಾಗೂ ಅವರ ಕಡೆಯವರು ಅಳಿಸಿ ಹಾಕುವ ಸಂಭವ ಇದ್ದು, ಅವುಗಳನ್ನು ಕೂಡಲೇ ಪಡೆದುಕೊಂಡು ತನಿಖೆ ನಡೆಸಬೇಕೆಂದು ಬೋಜರಾಜ್ ಮನವಿ ಮಾಡಿದ್ದಾರೆ. ಬೋಜರಾಜ್ ಅವರು ಬಸವೇಶ್ವರ ನಗರ ಪೊಲೀಸ್ ಠಾಣೆಯಲ್ಲಿ ಈ ಪ್ರಕರಣ ದಾಖಲಿಸಿದ್ದು, ಪೊಲೀಸರು ಎನ್​​ಸಿಆರ್ ದಾಖಲು ಮಾಡಿಕೊಂಡಿದ್ದಾರೆ.

ಇದನ್ನೂ ಓದಿ:ಧನ್ವೀರ್ ವಿರುದ್ಧ ಆರ್.ಆರ್. ನಗರ ಠಾಣೆಯಲ್ಲಿ ದೂರು: ದರ್ಶನ್ ಮ್ಯಾನೇಜರ್ ನಾಗರಾಜ್‌ ಗಂಭೀರ ಆರೋಪ

ಧನ್ವೀರ್ ಅವರ ತಂದೆ ತಿಮ್ಮ ಗೌಡ ನೀಡಿರುವ ದೂರಿನಲ್ಲಿಯೂ ಬೋಜರಾಜ್ ಅವರ ಉಲ್ಲೇಖವಿದ್ದು, ಅಕ್ಟೋಬರ್ 21 ರಂದು ವಿಜಯಲಕ್ಷ್ಮಿ ಹಾಗೂ ದರ್ಶನ್ ಪಿಎ ನಾಗರಾಜು, ಧನ್ವೀರ್ ಮನೆಗೆ ಹೋಗಿದ್ದಾಗ. ನಾಗರಾಜು ಅವರು ಲೋಕೇಶ್ ಎಂಬುವರಿಗೆ ಕರೆ ಮಾಡಿ ಕರೆಸಿಕೊಂಡ ಇಬ್ಬರಲ್ಲಿ ಬೋಜರಾಜ್ ಸಹ ಒಬ್ಬರು ಎನ್ನಲಾಗಿತ್ತು.

ಈ ಹಿಂದೆ ದರ್ಶನ್ ಪಿಎ ನಾಗರಾಜು, ಧನ್ವೀರ್ ಗೌಡ ತಮಗೆ ಬೆದರಿಕೆ ಹಾಕಿರುವುದಾಗಿ ಪೊಲೀಸರಿಗೆ ದೂರು ನೀಡಿದ್ದು, ಕರೆ ಮಾಹಿತಿ, ಸಂದೇಶಗಳನ್ನು ಸಹ ಪೊಲೀಸರಿಗೆ ನೀಡಿದ್ದರು. ಅದರ ಬೆನ್ನಲ್ಲೆ ಈಗ ಬೋಜರಾಜ್ ಸಹ ಧನ್ವೀರ್ ವಿರುದ್ಧ ದೂರು ನೀಡಿದ್ದಾರೆ. ಧನ್ವೀರ್ ಅವರನ್ನು ಪೊಲೀಸರು ಕರೆಸಿ ವಿಚಾರಣೆ ನಡೆಸುವ ಸಾಧ್ಯತೆ ಇದೆ.

ಧನ್ವೀರ್ ಮತ್ತು ವಿಜಯಲಕ್ಷ್ಮಿ ದರ್ಶನ್ ನಡುವೆ ಮುನಿಸು ಉಂಟಾಗಿದ್ದು, ಪರಸ್ಪರರ ಮೇಲೆ ಆರೋಪ-ಪ್ರತ್ಯಾರೋಪಗಳನ್ನು ಮಾಡುತ್ತಿದ್ದಾರೆ. ಆ ಮುನಿಸಿನ ಪ್ರತಿಫಲವೇ ಈಗ ಎರಡೂ ಕಡೆಯವರು ಒಬ್ಬರ ಮೇಲೊಬ್ಬರು ದೂರುಗಳನ್ನು ದಾಖಲು ಮಾಡಿಕೊಂಡಿದ್ದಾರೆ. ಪೊಲೀಸರು ಯಾವ ರೀತಿ ಈ ಪ್ರಕರಣವನ್ನು ನಿಭಾಯಿಸುತ್ತಾರೆ, ಪೊಲೀಸರ ಮುಂದಿನ ನಡೆ ಏನಾಗಿರಲಿದೆ ಎಂಬ ಕುತೂಹಲ ಇದೆ.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ