ಜ್ಯೂ.ಎನ್​ಟಿಆರ್ ಕಾರು ರಾಮ್​ಚರಣ್ ಕಾರಿಗಿಂತ ಮುಂದೆ ಹೋಗಿದ್ದೇ ಅಭಿಮಾನಿಗಳ ಕಿತ್ತಾಟಕ್ಕೆ ಕಾರಣವಾಯ್ತು!

ಟಾಲಿವುಡ್ ನಟರಾದ ರಾಮ್​ಚರಣ್ ಹಾಗೂ ಜ್ಯೂನಿಯರ್ ಎನ್​ಟಿಆರ್ ಆರ್​ಆರ್​ಆರ್(RRR)​ ಚಿತ್ರದ ಚಿತ್ರೀಕರಣವನ್ನು ಮುಗಿಸಿದ್ದಾರೆ. ಬಹು ನಿರೀಕ್ಷಿತ ಚಿತ್ರದ ಕೊನೆಯ ದೃಶ್ಯದ ಚಿತ್ರೀಕರಣದ ನಂತರ ಈ ತಾರೆಗಳು ತಮ್ಮ ಐಷಾರಾಮಿ ಕಾರುಗಳಲ್ಲಿ ಮನೆಗೆ ತೆರಳುತ್ತಿರುವ ವಿಡಿಯೊವೊಂದನ್ನು ಆರ್​ಆರ್​ಆರ್​ ತಂಡ ಬಿಡುಗಡೆಗೊಳಿಸಿದೆ. ಈ ವಿಡಿಯೊ ನೋಡಿ ಅಭಿಮಾನಿಗಳು ಹುಬ್ಬೇರಿಸಿದ್ದು, ನೆಚ್ಚಿನ ನಟರ ರೇಸಿಂಗ್ ಪ್ರೀತಿ ನೋಡಿ ಅಚ್ಚರಿಪಟ್ಟಿದ್ದಾರೆ.

ಆರ್​ಆರ್​ಆರ್​ ಚಿತ್ರದ ಅಧಿಕೃತ ಟ್ವಿಟರ್ ಖಾತೆಯಲ್ಲಿ ಈ ಟ್ವೀಟನ್ನು ಹಂಚಿಕೊಳ್ಳಲಾಗಿದ್ದು, ‘ಟೈಗರ್ ಮತ್ತು ಚೀತಾ’ ಎಂದು ಕ್ಯಾಪ್ಶನ್ ನೀಡಲಾಗಿದೆ. ಅದಕ್ಕೆ ತಕ್ಕಂತೆ ಭರ್ಜರಿ ಶಬ್ಧ ಮಾಡುತ್ತಾ, ರೇಸ್ ಸ್ಪರ್ಧೆಯಲ್ಲಿರುವಂತೆ ಎರಡೂ ಕಾರುಗಳು ತೆರಳಿವೆ. ಸ್ಥಳದಲ್ಲಿರುವವರು ಅಚ್ಚರಿಯಿಂದ ನಟರ ಕಾರುಗಳನ್ನು ನೋಡುತ್ತಾ ನಿಂತಿದ್ದಾರೆ. ಈ ವಿಡಿಯೊ ಸದ್ಯ ಅಂತರ್ಜಾಲದಲ್ಲಿ ವೈರಲ್ ಆಗಿದೆ.

ಜ್ಯೂ.ಎನ್​ಟಿಆರ್ ಹಾಗೂ ರಾಮ್​ಚರಣ್ ತೆರಳುತ್ತಿರುವ ವಿಡಿಯೊ:

TIGER and CHEETAH…?? Leaving the set after wrapping up their last shot for the movie today!#RRRMovie @tarak9999 @alwaysramcharan pic.twitter.com/ttpthr8ifn

— RRR Movie (@RRRMovie) August 26, 2021

ಜ್ಯೂನಿಯರ್ ಎನ್​ಟಿಆರ್ ತಮ್ಮ ಲ್ಯಾಂಬೊರ್ಗಿನಿ ಉರುಸ್ ಗ್ರಾಫೈಟ್ ಕ್ಯಾಪ್ಸೂಲ್ ಕಾರನ್ನು ಮೊದಲು ಚಲಾಯಿಸಿಕೊಂಡು ಹೋಗಿದ್ದು, ಅವರ ಹಿಂದೆ ರಾಮ್​ ಚರಣ್ ಅವರ ಸ್ವಾಂಕಿ ರೆಡ್ ಕಾರು ತೆರಳಿದೆ. ವಿಡಿಯೊ ನೋಡಿದ ಅಭಿಮಾನಿಗಳು ಅದರಲ್ಲೂ ಕಿತ್ತಾಡುವುದಿಕ್ಕೆ ತೊಡಗಿದ್ದಾರೆ. ಕಾರಣ, ಜೂನಿಯರ್ ಎನ್​ಟಿಆರ್ ಕಾರು ರಾಮ್​ ಚರಣ್ ಕಾರಿಗಿಂತ ಮುಂದೆ ತೆರಳಿದೆ. ಇದನ್ನೇ ಇಟ್ಟುಕೊಂಡಿರುವ ಎನ್​ಟಿಆರ್ ಅಭಿಮಾನಿಗಳು, ನಾಯಕನಾದವನು ಮುಂದೆ ನಿಂತು ನಡೆಸುತ್ತಾನೆ ಎಂದು ಕಾಮೆಂಟ್ ಮಾಡಿ ಕುಟುಕಿದ್ದಾರೆ. ಇದಕ್ಕೆ ರಾಮ್ ಚರಣ್ ಅಭಿಮಾನಿಗಳು ತಿರುಗಿ ಬಿದ್ದಿದ್ದಾರೆ. ಮುಂದೆ ತೆರಳುವುದು ಬಾಡಿಗಾರ್ಡ್ ವಾಹನ, ಹಿಂದೆ ತೆರಳುವುದು ಹೀರೊ ಎಂದು ಜ್ಯೂನಿಯರ್ ಎನ್​ಟಿಆರ್ ಅಭಿಮಾನಿಗಳ ಕಾಲೆಳೆದಿದ್ದಾರೆ.

ಟಾಲಿವುಡ್​ನಲ್ಲಿ ನಟರಿಗೆ ಅಭಿಮಾನಿ ಬಳಗ ಹೆಚ್ಚು. ಆದ್ದರಿಂದಲೇ ಮಲ್ಟಿ ಸ್ಟಾರರ್ ಸಿನಿಮಾಗಳಲ್ಲಿ ನಟರಿಗೆ ಸ್ಕ್ರೀನ್ ಸ್ಪೇಸ್ ನೀಡುವುದನ್ನು ಬಹಳ ಎಚ್ಚರದಿಂದ ನಿರ್ವಹಿಸುತ್ತಾರೆ. ಸ್ವತಃ ನಟರು ಅನ್ಯೋನ್ಯವಾಗಿದ್ದರೂ, ಅಭಿಮಾನಿಗಳು ಕಿತ್ತಾಡುವುದು ಅಲ್ಲಿ ಮಾಮೂಲು. ಇದನ್ನು ತಿಳಿದಿರುವ ನಿರ್ದೇಶಕ ರಾಜಮೌಳಿ, ಆರ್​ಆರ್​ಆರ್​ ಚಿತ್ರದಲ್ಲಿ ಅಭಿಮಾನಿಗಳಿಗೂ ಬೇಸರವಾಗದಂತೆ, ಖ್ಯಾತ ನಟರಿಬ್ಬರನ್ನೂ ನಿರ್ವಹಿಸಿದ್ದಾರೆ. ಆರ್​ಆರ್​ಆರ್​ ಚಿತ್ರವು ಅಕ್ಟೋಬರ್ 13ರಂದು ಬಿಡುಗಡೆ ಮಾಡಲಾಗುವುದು ಎಂದು ಚಿತ್ರತಂಡ ತಿಳಿಸಿದೆ.

ಇದನ್ನೂ ಓದಿ:

ಜಗ್ಗೇಶ್​ ಪುತ್ರನ ‘ಕಾಗೆ ಮೊಟ್ಟೆ’ ಸಿನಿಮಾ ರಿಲೀಸ್​ಗೆ ರೆಡಿ; ಗುರುರಾಜ್​ ಚಿತ್ರದಲ್ಲಿ ರಜನಿಕಾಂತ್​ ಸ್ನೇಹಿತ ರಾಜ್ ಬಹದ್ದೂರ್​

RGV: ಆರ್​ಜಿವಿ ನೃತ್ಯದ ಮತ್ತೊಂದು ವಿಡಿಯೊ ವೈರಲ್; ಸ್ವತಃ ವಿಡಿಯೊ ಹಂಚಿಕೊಂಡು ಎಲ್ಲರ ಹುಬ್ಬೇರಿಸಿದ ಇನಯಾ

(Ram Charan and Jr NTR left with their luxury cars from RRR sets video viral)