‘ಆ ಡ್ಯಾನ್ಸ್​ ಮಾಡುವಾಗ ಕಂಫರ್ಟ್​ ಇರಲಿಲ್ಲ’: ಈಗ ಬಾಯ್ಬಿಟ್ಟ ಸಮಂತಾ

ನಟಿ ಸಮಂತಾ ರುತ್​ ಪ್ರಭು (Samantha Ruth Prabhu) ಅವರು ಸಖತ್​ ಬೇಡಿಕೆ ಹೊಂದಿದ್ದಾರೆ. ಹೀರೋಯಿನ್​ ಆಗಿ ಮಾತ್ರಲ್ಲದೇ ಐಟಂ ಸಾಂಗ್​ನಲ್ಲಿ ಕುಣಿಯುವ ಮೂಲಕವೂ ಅವರು ಜನರನ್ನು ರಂಜಿಸಿದ್ದಾರೆ. ‘ಪುಷ್ಪ’ ಸಿನಿಮಾದಲ್ಲಿನ ‘ಉ ಅಂಟಾವಾ ಮಾವ..’ ಹಾಡಿನಲ್ಲಿ ಅವರು ಡ್ಯಾನ್ಸ್​ ಮಾಡಿದ ರೀತಿ ನೋಡಿ ಎಲ್ಲರೂ ಅಚ್ಚರಿ ವ್ಯಕ್ತಪಡಿಸಿದ್ದರು. ಅಲ್ಲು ಅರ್ಜುನ್​ (Allu Arjun) ಮತ್ತು ಸಮಂತಾ ಅವರು ಮೈ ಚಳಿ ಬಿಟ್ಟು ಕುಣಿದಿದ್ದರು. ಆ ಹಾಡಿನ ಶೂಟಿಂಗ್​ ಸಂದರ್ಭ ಹೇಗಿತ್ತು ಎಂದು ಸಮಂತಾ ಈಗ ಬಾಯಿ ಬಿಟ್ಟಿದ್ದಾರೆ. ಅದರ ಶೂಟಿಂಗ್​ ಮಾಡುವಾಗ ತಾವು ಕಂಫರ್ಟಬಲ್​ ಆಗಿರಲಿಲ್ಲ ಎಂದು ಸಮಂತಾ (Samantha) ಹೇಳಿದ್ದಾರೆ.

‘ಪುಷ್ಪ’ ಸಿನಿಮಾಗೆ ರಶ್ಮಿಕಾ ಮಂದಣ್ಣ ನಾಯಕಿ. ಆದರೆ ಸ್ಪೆಷಲ್​ ಸಾಂಗ್​ನಲ್ಲಿ ಡ್ಯಾನ್ಸ್​ ಮಾಡಲು ಆಯ್ಕೆ ಆಗಿದ್ದು ಸಮಂತಾ ರುತ್​ ಪ್ರಭು. ಆ ಸಿನಿಮಾದ ಯಶಸ್ಸಿನಲ್ಲಿ ‘ಉ ಅಂಟಾವಾ ಮಾವ..’ ಹಾಡಿಗೆ ಕೊಡುಗೆ ದೊಡ್ಡದಿದೆ. ಬಹಳ ಬೋಲ್ಡ್​ ಆಗಿದ್ದಂತಹ ಆ ಹಾಡನ್ನು ಒಪ್ಪಿಕೊಳ್ಳಲು ಸಮಂತಾ ತುಂಬ ಯೋಚನೆ ಮಾಡಿದ್ದರು. ಯಾಕೆಂದರೆ, ಆಗ ತಾನೇ ಅವರು ನಾಗ ಚೈತನ್ಯ ಜೊತೆಗಿನ ದಾಂಪತ್ಯಕ್ಕೆ ವಿಚ್ಛೇದನ ಘೋಷಿಸಿದ್ದರು.

‘ನನಗೆ ಆ ಹಾಡಿನ ಆಫರ್ ಬಂದಾಗ ನಮ್ಮ ವಿಚ್ಛೇದನದ ಪ್ರಕ್ರಿಯೆ ಅರ್ಧದಲ್ಲಿತ್ತು. ಡಿವೋರ್ಸ್​ ಘೋಷಣೆ ಆದ ತಕ್ಷಣ ಅಂತಹ ಐಟಂ ಡ್ಯಾನ್ಸ್​ ಮಾಡುವುದು ಬೇಡ ಎಂದು ಕುಟುಂಬದವರು, ಆಪ್ತರು ಸಲಹೆ ನೀಡಿದರು. ಸ್ನೇಹಿತರು ಕೂಡ ಹಾಗೆಯೇ ಹೇಳಿದರು. ಆದರೆ ನಾನು ಐಟಂ ಡ್ಯಾನ್ಸ್​ ಮಾಡುವ ನಿರ್ಧಾರ ತೆಗೆದುಕೊಂಡೆ’ ಎಂದು ಸಮಂತಾ ಅವರು ಹೇಳಿದ್ದಾರೆ. ಆದರೆ ಆ ಹಾಡಿನಲ್ಲಿ ಕುಣಿಯುವುದು ಅವರಿಗೆ ಅಷ್ಟು ಸುಲಭದ್ದಾಗಿರಲಿಲ್ಲ.

ಇದನ್ನೂ ಓದಿ: ಆರೋಗ್ಯದ ಬಗ್ಗೆ ತಪ್ಪು ಮಾಹಿತಿ ನೀಡಿದ ಸಮಂತಾ; ಸತ್ಯ ಬಯಲಿಗೆ ಎಳೆದ ಡಾಕ್ಟರ್​

‘ನನ್ನ ಪಾಲಿಗೆ ಅದು ದೊಡ್ಡ ಸವಾಲಾಗಿತ್ತು. ಉ ಅಂಟಾವ ಹಾಡಿನ ಮೊದಲ ಶಾಟ್​ ತೆಗೆಯುವಾಗ ನಾನು ಭಯದಿಂದ ನಡುಗುತ್ತಿದ್ದೆ. ಯಾಕೆಂದರೆ, ಸೆಕ್ಸಿಯಾಗಿ ಕಾಣುವುದು ನನಗೆ ಹೊಂದುವಂಥದಲ್ಲ. ಆದರೆ ನಾನು ನನ್ನನ್ನು ಕಷ್ಟಕ್ಕೆ ನೂಕಿಕೊಂಡು, ಅದರ ವಿರುದ್ಧ ಹೋರಾಡಿ ಹೊರಬರುವ ವ್ಯಕ್ತಿತ್ವದವಳು’ ಎಂದು ಹೇಳುವ ಮೂಲಕ ಆ ಹಾಡನ್ನು ಸವಾಲಾಗಿ ಸ್ವೀಕರಿಸಿದ್ದಾಗಿ ಸಮಂತಾ ಹೇಳಿದ್ದಾರೆ.

ಇದನ್ನೂ ಓದಿ: ಚಿಂತೆಯಿಲ್ಲದೇ ಬಾತ್​ ರೂಂ ಫೋಟೋ ಹಂಚಿಕೊಂಡ ಸಮಂತಾ ರುತ್​ ಪ್ರಭು

‘ಫ್ಯಾಮಿಲಿ ಮ್ಯಾನ್​ 2’ ವೆಬ್​ ಸರಣಿಯಲ್ಲಿ ಸಮಂತಾ ಅವರು ರಾಜಿ ಎಂಬ ಪಾತ್ರ ಮಾಡಿದ್ದರು. ಆ ಪಾತ್ರ ಕೂಡ ಸಖತ್​ ಬೋಲ್ಡ್​ ಆಗಿತ್ತು. ಆ ಪಾತ್ರವನ್ನು ಒಪ್ಪಿಕೊಳ್ಳುವಾಗ ಎಷ್ಟು ಕಷ್ಟವಾಗಿತ್ತೋ ಐಟಂ ಸಾಂಗ್​ ಒಪ್ಪಿಕೊಳ್ಳುವಾಗಲೂ ಅಷ್ಟೇ ಕಷ್ಟವಾಗಿತ್ತು ಎಂದು ಸಮಂತಾ ಹೇಳಿದ್ದಾರೆ. ವಿಚ್ಛೇದನದ ಬಳಿಕ ಸಮಂತಾ ಅವರು ಸಿನಿಮಾ ಮತ್ತು ಪಾತ್ರಗಳನ್ನು ಆಯ್ಕೆ ಮಾಡುವ ರೀತಿ ಬದಲಾಗಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.