ಪುನೀತ್​​ ನೋಡಿ ಮೆಚ್ಚಿದ್ರು ಕನ್ನಡದ ‘ಓಲ್ಡ್​ ಮಾಂಕ್​’ ಟ್ರೇಲರ್​; ಇದರಲ್ಲಿದೆ ಹತ್ತಾರು ವಿಶೇಷತೆ

ಹೊಸಬರ ಪ್ರಯತ್ನಗಳಿಗೆ ನಟ ಪುನೀತ್​ ರಾಜ್​ಕುಮಾರ್ (Puneeth Rajkumar)​ ಅವರ ಸದಾ ಬೆನ್ನು ತಟ್ಟುತ್ತಾರೆ. ಟ್ರೇಲರ್​, ಟೀಸರ್​, ಪೋಸ್ಟರ್​ ಬಿಡುಗಡೆ ಮುಂತಾದ ಕಾರ್ಯಕ್ರಮಗಳಿಗೆ ಬಂದು ಶುಭ ಹಾರೈಸುತ್ತಾರೆ. ಅದೇ ರೀತಿ ಈಗ ಅವರು ‘ಓಲ್ಡ್​ ಮಾಂಕ್​’ ಚಿತ್ರದ ಟ್ರೇಲರ್​ (Old Monk Trailer) ಬಿಡುಗಡೆ ಕಾರ್ಯಕ್ರಮಕ್ಕೆ ಬಂದು ಶುಭಕೋರಿದ್ದಾರೆ. ಅಲ್ಲದೇ, ಈ ಟ್ರೇಲರ್​ ನೋಡಿ ಮನಸಾರೆ ನಕ್ಕಿದ್ದಾರೆ. ಚಿತ್ರದ ಶೀರ್ಷಿಕೆ ‘ಓಲ್ಡ್​ ಮಾಂಕ್​’ ಎಂದಿದ್ದರೂ ಇದು ಅಪ್ಪಟ ಕನ್ನಡದ ಸಿನಿಮಾ. ಸದ್ಯ ಈ ಟ್ರೇಲರ್​ ಮೋಡಿ ಮಾಡುತ್ತಿದೆ.

ಪುನೀತ್​ ರಾಜ್​ಕುಮಾರ್​ ಅವರು ಗುರುವಾರ (ಆ.26) ಈ ಚಿತ್ರದ ಟ್ರೇಲರ್​ ಬಿಡುಗಡೆ ಮಾಡಿದರು. ಟ್ರೇಲರ್​ ನೋಡಿದ ಅವರು ಮನಸಾರೆ ನಕ್ಕಿದ್ದಾರೆ. ಈ ಚಿತ್ರತಂಡದ ಕ್ರಿಯೇಟಿವಿಟಿಗೆ ಅವರು ಸಲಾಂ ಎಂದಿದ್ದಾರೆ. ಹಾಗಾದರೆ ಇದರಲ್ಲಿ ಅಂಥದ್ದೇನಿದೆ? ಟೈಟಲ್​ ಕಾರ್ಡ್​ನಿಂದಲೇ ಇದು ಎಲ್ಲರ ಗಮನ ಸೆಳೆದುಕೊಳ್ಳುತ್ತದೆ. ಇದರಲ್ಲಿ ಅವತಾರ್​, ಕೆಜಿಎಫ್​, ಆರ್​ಆರ್​ಆರ್​, ಟೈಟಾನಿಕ್​ ಸಿನಿಮಾ ಹೆಸರುಗಳ ಜೊತೆ ರಣವೀರ್​ ಸಿಂಗ್​, ಉಪೇಂದ್ರ, ಎ.ಆರ್​. ರೆಹಮಾನ್​ ಮುಂತಾದವರ ಹೆಸರುಗಳು ಕೂಡ ರಾರಾಜಿಸುತ್ತಿವೆ. ಅದು ಹೇಗೆ ಎಂಬುದನ್ನು ಟ್ರೇಲರ್​ ನೋಡಿ ತಿಳಿದಾಗಲೇ ಮಜಾ.

ನಟ-ನಿರ್ದೇಶಕ ಶ್ರೀನಿ ಅವರು ಈ ಚಿತ್ರಕ್ಕೆ ನಿರ್ದೇಶನ ಮಾಡುವುದರ ಜೊತೆಗೆ ನಾಯಕನಾಗಿಯೂ ನಟಿಸಿದ್ದಾರೆ. ಅವರಿಗೆ ಜೋಡಿಯಾಗಿ ಅದಿತಿ ಪ್ರಭುದೇವ ಅಭಿನಯಿಸಿದ್ದಾರೆ. ಸುಜಯ್​ ಶಾಸ್ತ್ರಿ, ಎಸ್​. ನಾರಾಯಣ್​, ಸಿಹಿ ಕಹಿ ಚಂದ್ರು ಮುಂತಾದವರು ಪೋಷಕ ಪಾತ್ರಗಳಲ್ಲಿ ನಟಿಸಿದ್ದಾರೆ. ಭರತ್​ ಪರಶುರಾಮ್​ ಛಾಯಾಗ್ರಹಣ, ಸೌರಭ್​-ವೈಭವ್​ ಸಂಗೀತ ನಿರ್ದೇಶನ, ದೀಪು ಎಸ್​. ಕುಮಾರ್​ ಸಂಕಲನ ಮಾಡಿದ್ದಾರೆ. ಪ್ರದೀಪ್ ಶರ್ಮಾ, ಸೃಜನ್​ ಯರಬೋಲು, ಸೌರಭ್​-ವೈಭವ್, ಶ್ರೀನಿ ಜೊತೆಯಾಗಿ ಸಿನಿಮಾ ನಿರ್ಮಾಣ ಮಾಡಿದ್ದಾರೆ.

ಫ್ರೆಶ್​ ಎನಿಸುವ ಕಾನ್ಸೆಪ್ಟ್​, ಕಚಗುಳಿ ಇರುವ ಡೈಲಾಗ್​ಗಳು, ಹಿರಿಯ-ಕಿರಿಯ ಕಲಾವಿದರ ಸಂಗಮ, ಚುರುಕಾದ ನಿರೂಪಣೆ ಮೂಲಕ ‘ಓಲ್ಡ್​ ಮಾಂಕ್​’ ಟ್ರೇಲರ್​ ಎಲ್ಲರಿಗೂ ಇಷ್ಟ ಆಗುತ್ತಿದೆ. ಬಿಡುಗಡೆಯಾದ ಕೆಲವೇ ಗಂಟೆಗಳಲ್ಲಿ ಇದು ಲಕ್ಷಾಂತರ ವೀವ್ಸ್​ ಪಡೆದುಕೊಂಡಿದೆ. ಈ ಹಿಂದೆ ‘ಟೋಪಿವಾಲಾ’, ‘ಬೀರ್​ಬಲ್​’, ‘ಶ್ರೀನಿವಾಸ ಕಲ್ಯಾಣ’ ಮುಂತಾದ ಸಿನಿಮಾಗಳ ಮೂಲಕ ಪ್ರೇಕ್ಷಕರಿಗೆ ಇಷ್ಟ ಆಗಿರುವ ಶ್ರೀನಿ ಅವರು ಈಗ ‘ಓಲ್ಡ್​ ಮಾಂಕ್​’ ಮೂಲಕ ಭರ್ಜರಿಯಾಗಿ ಮನರಂಜಿಸುವ ಭರವಸೆಯನ್ನು ಈ ಟ್ರೇಲರ್​ ಮೂಲಕ ನೀಡಿದ್ದಾರೆ.

ಇದನ್ನೂ ಓದಿ:

ಪುನೀತ್​ ನಿರ್ಮಾಣದ ‘ಮ್ಯಾನ್​ ಆಫ್​ ದಿ ಮ್ಯಾಚ್​’ ಚಿತ್ರದಲ್ಲಿ ವಾಸುಕಿ ವೈಭವ್; ಏನಿದು ಗುಡ್​ ನ್ಯೂಸ್​?

ಪೋಸ್ಟರ್​ ಕಾಪಿ ಎಂಬ ಆರೋಪಕ್ಕೆ ಪುನೀತ್​ ನಟನೆಯ ‘ದ್ವಿತ್ವ’ ಚಿತ್ರ ತಂಡದಿಂದ ಸ್ಪಷ್ಟನೆ