7 Star Sultan: ‘ಟಗರು ಪಲ್ಯ’ ಚಿತ್ರದಲ್ಲಿ ನಟಿಸಿದ ‘7 ಸ್ಟಾರ್​ ಸುಲ್ತಾನ್​’ ಕುರುಬಾನಿಗೆ ಸೋಶಿಯಲ್​ ಮೀಡಿಯಾದಲ್ಲಿ ವಿರೋಧ

ಪ್ರಾಣಿಗಳ ಮೇಲೆ ಕೆಲವರಿಗೆ ವಿಪರೀತ ಪ್ರೀತಿ ಇರುತ್ತದೆ. ವಿಶೇಷವಾಗಿ ಗುರುತಿಸಿಕೊಂಡ ಪ್ರಾಣಿಗಳನ್ನು ಜೀವಕ್ಕಿಂತ ಹೆಚ್ಚು ಪ್ರೀತಿಸಲಾಗುತ್ತದೆ. ಅದಕ್ಕೆ ಹೊಸ ಉದಾಹರಣೆ ಎಂದರೆ ‘7 ಸ್ಟಾರ್​ ಸುಲ್ತಾನ್​’ (7 Star Sultan) ಎಂಬ ಟಗರು. ಟಗರು ಕಾಳಗದಲ್ಲಿ ಕಾದಾಡಿ ಅನೇಕ ಬಹುಮಾನ ಗೆದ್ದಿರುವ ಈ ಟಗರಿನ ಬಗ್ಗೆ ಸೋಶಿಯಲ್​ ಮೀಡಿಯಾದಲ್ಲಿ ಒಂದು ಅಭಿಯಾನ ಶುರುವಾಗಿದೆ. ಬಕ್ರೀದ್​ (Bakrid 2023) ಹಬ್ಬಕ್ಕೆ ಈ ಟಗರನ್ನು ಬಲಿ ಕೊಡುತ್ತಾರೆ ಎಂಬ ಸುದ್ದಿ ಹಬ್ಬಿರುವ ಬೆನ್ನಲ್ಲೇ ಅದನ್ನು ಉಳಿಸಿಕೊಳ್ಳಬೇಕು ಎಂದು ಜನರು ಪ್ರಯತ್ನಿಸುತ್ತಿದ್ದಾರೆ. ಸೋಶಿಯಲ್​ ಮೀಡಿಯಾದಲ್ಲಿ ‘7 ಸ್ಟಾರ್​ ಸುಲ್ತಾನ್​’ ಬಗ್ಗೆ ಅನೇಕ ಬಗೆಯ ವಿಡಿಯೋಗಳು ವೈರಲ್ ಆಗಿವೆ. ಡಾಲಿ ಧನಂಜಯ್​ ನಿರ್ಮಾಣದ ‘ಟಗರು ಪಲ್ಯ’ (Tagaru Palya Movie) ಸಿನಿಮಾದಲ್ಲೂ ಈ ಟಗರು ನಟಿಸಿದೆ ಎಂಬುದು ವಿಶೇಷ.

‘7 ಸ್ಟಾರ್​ ಸುಲ್ತಾನ್​’ ಹಿನ್ನೆಲೆ:

ಬಕ್ರೀದ್​ ಹಬ್ಬಕ್ಕೆ ಕುರುಬಾನಿ ನೀಡಬೇಕು ಎಂಬ ಉದ್ದೇಶದಿಂದ ಮುಸ್ಲಿಂ ಕುಟುಂಬವೊಂದು ಪುಟ್ಟ ಟಗರಿನ ಮರಿಯನ್ನು ತಂದು ಸಾಕಿತ್ತು. ಅದು ಸ್ವಲ್ಪ ದೊಡ್ಡದಾಗುತ್ತಿದ್ದಂತೆಯೇ ಅದನ್ನು ಮೊದಲ ಬಾರಿ ಟಗರು ಕಾಳಗಕ್ಕೆ ಇಳಿಸಲಾಯಿತು. ಮೊದಲ ಪಂದ್ಯದಲ್ಲೇ ಬಹುಮಾನ ಗೆದ್ದು ಎಲ್ಲರಿಗೂ ಆಶ್ಚರ್ಯ ಮೂಡಿಸಿತು ಆ ಟಗರು. ಕೇವಲ 8 ತಿಂಗಳಲ್ಲಿ ಹಲವು ಕಡೆಗಳಲ್ಲಿ ನಡೆದ ಟಗರು ಕಾಳಗದಲ್ಲಿ ಅನೇಕ ಪ್ರಶಸ್ತಿಗಳನ್ನು ಇದು ಪಡೆದುಕೊಂಡಿತು. ನಂತರ ‘7 ಸ್ಟಾರ್​ ಸುಲ್ತಾನ್​’ ಎಂದೇ ಅದು ಫೇಮಸ್​ ಆಯಿತು. ಇಡೀ ಬಾಗಲಕೋಟೆ ಜಿಲ್ಲೆಯಲ್ಲಿ ಇದು ಮನೆಮಾತಾಯಿತು. ಮಾಲೀಕರಿಗೆ ಇದರಿಂದ ಸಾಕಷ್ಟು ಹಣ, ಬಹುಮಾನ ಹರಿದುಬಂತು.

ಇದನ್ನೂ ಓದಿ: ಅಮೃತಾ ಪ್ರೇಮ್ ಹುಟ್ಟುಹಬ್ಬಕ್ಕೆ ರಿಲೀಸ್ ಆಯ್ತು ‘ಟಗರು ಪಲ್ಯ’ ಚಿತ್ರದ ಹೊಸ ಪೋಸ್ಟರ್

ಈ ವರ್ಷದ ಬಕ್ರೀದ್​ಗೆ ಕುರುಬಾನಿ?

‘7 ಸ್ಟಾರ್​ ಸುಲ್ತಾನ್​’ ಎಂಬ ಟಗರು ಸಿಕ್ಕಾಪಟ್ಟೆ ಫೇಮಸ್​ ಆಗಿದೆ. ಭಾರಿ ಜನಮೆಚ್ಚುಗೆ ಗಳಿಸಿದೆ ಎಂಬುದು ನಿಜ. ಆದರೆ ಅದನ್ನು ಆ ಮುಸ್ಲಿಂ ಕುಟುಂಬದವರು ತಂದಿದ್ದು ಕುರುಬಾನಿ ನೀಡುವ ಸಲುವಾಗಿ. ಹಾಗಾಗಿ ಈ ವರ್ಷದ ಬಕ್ರೀದ್​ಗೆ ಈ ಟಗರನ್ನು ಕುರುಬಾನಿ ನೀಡಲಾಗುವುದು ಎಂಬ ಸುದ್ದಿ ಹಬ್ಬಿದೆ. ಅನೇಕ ಜನರ ಪ್ರೀತಿ ಗಳಿಸಿರುವ ಈ ಟಗರನ್ನು ಸಾಯಿಸಬಾರದು ಎಂದು ಸೋಶಿಯಲ್​ ಮೀಡಿಯಾದಲ್ಲಿ ಅಭಿಯಾನ ಮಾಡಲಾಗುತ್ತಿದೆ. ಅದಕ್ಕೆ ಅನೇಕರು ಬೆಂಬಲ ಸೂಚಿಸುತ್ತಿದ್ದಾರೆ.

ಇದನ್ನೂ ಓದಿ: ‘ಶೂಟಿಂಗ್ ಮುಗಿದಿದೆ, ಸದ್ಯದಲ್ಲೇ ನಿಮ್ಮ ಮುಂದೆ ಬರ್ತೀವಿ’; ‘ಟಗರು ಪಲ್ಯ’ ಚಿತ್ರದ ಬಗ್ಗೆ ಅಪ್​ಡೇಟ್ ನೀಡಿದ ಧನಂಜಯ್

ಬಿಳಿ ಬಣ್ಣದ ‘7 ಸ್ಟಾರ್​ ಸುಲ್ತಾನ್​’ಗೆ ದೊಡ್ಡ ಅಭಿಮಾನಿ ಬಳಗ ಇದೆ. ಇದರ ವಿಡಿಯೋಗಳು ಸೋಶಿಯಲ್ ಮೀಡಿಯಾದಲ್ಲಿ ವೈರಲ್​ ಆಗಿವೆ. ಸಿನಿಮಾಗಳ ಮಾಸ್​ ಡೈಲಾಗ್​ಗಳನ್ನು ಅಳವಡಿಸಿ ಈ ಟಗರಿನ ವಿಡಿಯೋಗಳನ್ನು ಹಂಚಿಕೊಳ್ಳಲಾಗುತ್ತಿದೆ. ‘ಸುಲ್ತಾನ್​ ಟಗರಿನಿಂದ ಅದರ ಮಾಲೀಕರು ಕೂಡ ಫೇಮಸ್​ ಆಗಿದ್ದಾರೆ. ದಯವಿಟ್ಟು ಬಕ್ರೀದ್​ಗೆ ಕೊಲ್ಲಬೇಡಿ. ಅದರ ಬದಲು ಬೇರೆ ಮರಿಯನ್ನು ಕಡಿಯಿರಿ. ಅದನ್ನು ಕಳೆದುಕೊಂಡರೆ ನೀವು ತುಂಬ ಪಶ್ಚಾತ್ತಾಪ ಪಡುತ್ತೀರಿ. ಅದರ ಪ್ರೀತಿ ಕಳೆದುಕೊಂಡು ಕೊರಗುತ್ತೀರಿ. ದಯವಿಟ್ಟು ಈ ಟಗರನ್ನು ನಿಮ್ಮ ಬಳಿ ಇಟ್ಟುಕೊಳ್ಳಿ. ಅದು ಎಷ್ಟು ದಿನ ನಿಮ್ಮ ಜೊತೆ ಇರುತ್ತದೋ ಅಲ್ಲಿಯವರೆಗೂ ನಿಮಗೆ ಗೌರವ ಹೆಚ್ಚುತ್ತದೆ’ ಎಂದು ಅಭಿಮಾನಿಯೊಬ್ಬರು ಸೋಶಿಯಲ್​ ಮೀಡಿಯಾದಲ್ಲಿ ವಿಡಿಯೋ ಮೂಲಕ ಮನವಿ ಮಾಡಿಕೊಂಡಿದ್ದಾರೆ.

ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ.