‘ಕೌನ್ ಬನೇಗಾ ಕರೋಡ್ಪತಿ’ 1000ನೇ ಎಪಿಸೋಡ್; ಮಗಳ ಎದುರು ಕಣ್ಣೀರು ಹಾಕಿದ ಅಮಿತಾಭ್ ಬಚ್ಚನ್
Kaun Banega Crorepati: ‘ಕೌನ್ ಬನೇಗಾ ಕರೋಡ್ಪತಿ’ ಕಾರ್ಯಕ್ರಮದ ವೇದಿಕೆಯು ಈ 21 ವರ್ಷಗಳಲ್ಲಿ ಅನೇಕ ರೆಕಾರ್ಡ್ಗಳಿಗೆ ಸಾಕ್ಷಿ ಆಗಿದೆ. ಅದನ್ನು ವಿವರಿಸುತ್ತ ಅಮಿತಾಭ್ ಭಾವುಕರಾದರು. ಈ ವಿಶೇಷ ಎಪಿಸೋಡ್ ಡಿ.3ರಂದು ಪ್ರಸಾರ ಆಗಲಿದೆ.
ಕಿರುತೆರೆ ಪ್ರೇಕ್ಷಕರ ಫೇವರಿಟ್ ಕಾರ್ಯಕ್ರಮಗಳಲ್ಲಿ ಒಂದಾದ ‘ಕೌನ್ ಬನೇಗಾ ಬರೋಡ್ಪತಿ’ ಈಗ ಸಾವಿರ ಎಪಿಸೋಡ್ಗಳನ್ನು ಪೂರೈಸಿದೆ. ಅಮಿತಾಭ್ ಬಚ್ಚನ್ (Amitabh Bachchan) ನಡೆಸಿಕೊಡುವ ಈ ಶೋ ದೇಶಾದ್ಯಂತ ಫೇಮಸ್ ಆಗಿದೆ. ಯಶಸ್ವಿಯಾಗಿ 13 ಸೀಸನ್ಗಳವರೆಗೆ ಇದು ಸಾಗಿ ಬಂದಿದೆ. ಸಾವಿರಾರು ಜನರು ಹಾಟ್ ಸೀಟ್ನಲ್ಲಿ ಕುಳಿತು ಆಟ ಆಡಿದ್ದಾರೆ. ಜಗತ್ತಿನಲ್ಲಿರುವ ನೂರಾರು ವಿಷಯದ ಬಗೆಗಿನ ಮಾಹಿತಿಗಳ ಜೊತೆಗೆ ಮನರಂಜನೆಯನ್ನೂ ನೀಡುವ ‘ಕೌನ್ ಬನೇಗಾ ಕರೋಡ್ಪತಿ’ (Kaun Banega Crorepati) ಕಾರ್ಯಕ್ರಮ ಸೋನಿ (Sony Tv) ವಾಹಿನಿಯಲ್ಲಿ ಪ್ರಸಾರ ಆಗುತ್ತಿದೆ. 21 ವರ್ಷಗಳನ್ನು ಪೂರೈಸಿ, ಸಾವಿರದ ಎಪಿಸೋಡ್ಗೆ ಈ ಶೋ ಕಾಲಿಟ್ಟಿದೆ. ಆ ಸಲುವಾಗಿ ಒಂದು ವಿಶೇಷ ಪ್ರೋಮೋವನ್ನು ವಾಹಿನಿ ಹಂಚಿಕೊಂಡಿದೆ.
‘ಕೌನ್ ಬನೇಗಾ ಕರೋಡ್ಪತಿ’ ಕಾರ್ಯಕ್ರಮದ 1000ನೇ ಎಪಿಸೋಡ್ಗೆ ವಿಶೇಷ ಅತಿಥಿಗಳಾಗಿ ಅಮಿತಾಭ್ ಬಚ್ಚನ್ ಪುತ್ರಿ ಶ್ವೇತಾ ನವೇಲಿ ನಂದಾ ಮತ್ತು ಮೊಮ್ಮಗಳು ನವ್ಯಾ ನವೇಲಿ ನಂದಾ ಆಗಮಿಸಿದ್ದರು. ಈ 21 ವರ್ಷಗಳ ಮಹಾನ್ ಜರ್ನಿ ಹೇಗಿತ್ತು ಎಂಬುದನ್ನು ವಿವರಿಸುತ್ತ ಅಮಿತಾಭ್ ಭಾವುಕರಾದರು. ಕಣ್ಣೀರು ವರೆಸಿಕೊಂಡು ಕಾರ್ಯಕ್ರಮ ಮುಂದುವರಿಸಿದರು. ಈ ವಿಶೇಷ ಎಪಿಸೋಡ್ ಡಿ.3ರಂದು ಪ್ರಸಾರ ಆಗಲಿದೆ.
‘ಕೌನ್ ಬನೇಗಾ ಕರೋಡ್ಪತಿ’ ಕಾರ್ಯಕ್ರಮದ ವೇದಿಕೆಯು ಈ 21 ವರ್ಷಗಳಲ್ಲಿ ಅನೇಕ ರೆಕಾರ್ಡ್ಗಳಿಗೆ ಸಾಕ್ಷಿ ಆಗಿದೆ. ಮೊದಲ ಬಾರಿಗೆ ಒಂದು ಕೋಟಿ ರೂಪಾಯಿ ಗೆದ್ದವರು ಯಾರು? ಮೊದಲು ಬಾರಿ 5 ಕೋಟಿ ರೂಪಾಯಿ ಯಾರ ಪಾಲಾಯಿತು? 7 ಕೋಟಿ ರೂಪಾಯಿ ಗೆದ್ದು ಇತಿಹಾಸ ಬರೆದಿದ್ದು ಯಾರು? ಕೋಟಿ ರೂ. ಪಡೆದ ಮೊದಲ ಮಹಿಳೆ ಯಾರು? ಈ ಎಲ್ಲ ಪ್ರಶ್ನೆಗಳಿಗೆ ಉತ್ತರದಂತೆ ಇರುವ ಪ್ರೋಮೋವನ್ನು ಸೋನಿ ವಾಹಿನಿ ಶೇರ್ ಮಾಡಿಕೊಂಡಿದೆ.
ಎರಡು ದಶಕಗಳಿಗೂ ಹೆಚ್ಚು ಕಾಲದಿಂದ ಪ್ರಸಾರವಾಗುತ್ತಿರುವ ಈ ಕಾರ್ಯಕ್ರಮದ ಜೊತೆಗೆ ಅಮಿತಾಭ್ ಬಚ್ಚನ್ ಅವರಿಗೆ ಒಂದು ಎಮೋಷನಲ್ ಬಾಂಧವ್ಯ ಇದೆ. ದೇಶದ ಬೇರೆ ಬೇರೆ ಭಾಗಗಳಿಂದ ಬಂದ ಸ್ಪರ್ಧಿಗಳು ಹಾಟ್ ಸೀಟ್ನಲ್ಲಿ ಕುಳಿತು ಬಹುಮಾನ ಗೆದ್ದಿದ್ದಾರೆ. ಕೋಟ್ಯಂತರ ರೂಪಾಯಿ ಗೆದ್ದು ತಮ್ಮ ಕಷ್ಟಗಳಿಗೆ ಪರಿಹಾರ ಕಂಡುಕೊಂಡಿದ್ದಾರೆ. ಹಲವು ಸೆಲೆಬ್ರಿಟಿಗಳು ಈ ವೇದಿಕೆಗೆ ಬಂದು, ಹಣ ಗೆದ್ದಿದ್ದಾರೆ. ಆ ಹಣವನ್ನು ಚಾರಿಟಿ ಕೆಲಸಕ್ಕೆ ಬಳಸಿದ್ದಾರೆ. ಇಂಥ ನೂರಾರು ಘಟನೆಗಳಿಗೆ ‘ಕೌನ್ ಬನೇಗಾ ಕರೋಡ್ಪತಿ’ ಕಾರ್ಯಕ್ರಮದ ವೇದಿಕೆ ಸಾಕ್ಷಿ ಆಗಿದೆ. ಆ ಎಲ್ಲ ಘಟನೆಗಳನ್ನು 1000ನೇ ಎಪಿಸೋಡ್ನಲ್ಲಿ ಅಮಿತಾಭ್ ಬಚ್ಚನ್ ಮೆಲುಕು ಹಾಕಲಿದ್ದಾರೆ. ಈ ಕಾರ್ಯಕ್ರಮದ ಕನ್ನಡದ ಅವತರಣಿಕೆ ‘ಕನ್ನಡದ ಕೋಟ್ಯಾಧಿಪತಿ’ ಕೂಡ ಫೇಮಸ್ ಆಗಿದೆ. ಅದನ್ನು ಪುನೀತ್ ರಾಜ್ಕುಮಾರ್ ನಡೆಸಿಕೊಡುತ್ತಿದ್ದರು.
ಇದನ್ನೂ ಓದಿ:
ಸಂಪೂರ್ಣವಾಗಿ ಬದಲಾಯ್ತು ಅಭಿಷೇಕ್ ಬಚ್ಚನ್ ಚಹರೆ; ಇವರು ಅಮಿತಾಭ್ ಮಗನಾ ಎಂದು ಪ್ರಶ್ನಿಸಿದ ಫ್ಯಾನ್ಸ್
‘ಹಾಗಲ್ಲ ಸರ್..’ ಎಂದು ಅಮಿತಾಭ್ಗೆ ನಟನೆ ಹೇಳಿಕೊಟ್ಟ ದೀಪಿಕಾ, ಫರ್ಹಾ ಖಾನ್; ವಿಡಿಯೋ ವೈರಲ್
Published On - 3:38 pm, Mon, 29 November 21