ಬಿಗ್ಬಾಸ್ ತೆಲುಗು ಸೀಸನ್ 8 ಶೀಘ್ರ ಆರಂಭ, ಭಾಗಿಯಾಗುವ ಸ್ಪರ್ಧಿಗಳು ಯಾರು?
ಕಳೆದ ಬಾರಿ ಸಖತ್ ಜನಪ್ರಿಯತೆ ಗಳಿಸಿದ್ದ ಕೆಲವು ವಿವಾದಗಳನ್ನು ಸಹ ಸೃಷ್ಟಿಸಿದ್ದ ತೆಲುಗು ಬಿಗ್ಬಾಸ್ ಸೀಸನ್ 08 ಶೀಘ್ರವೇ ಆರಂಭವಾಗಲಿದೆ. ಈ ಬಾರಿ ಶೋನಲ್ಲಿ ಭಾಗಿಯಾಗಲಿರುವ ಕೆಲವು ಸ್ಪರ್ಧಿಗಳ ಹೆಸರು ಸಹ ಬಹಿರಂಗವಾಗಿದೆ.
Updated on:Jul 04, 2024 | 9:36 PM
ಬಿಗ್ಬಾಸ್ ತೆಲುಗು ಮತ್ತು ಕನ್ನಡದ ಕಳೆದ ಸೀಸನ್ ಭಾರಿ ಹಿಟ್ ಆಗಿದೆ. ಹಿಂದಿ, ತಮಿಳು, ಮಲಯಾಳಂ ಅಥವಾ ಇನ್ನಿತರೆ ಯಾವುದೇ ಭಾಷೆಗಳಿಗೆ ಹೋಲಿಸಿದರೆ ಕನ್ನಡ ಹಾಗೂ ತೆಲುಗಿನ ಬಿಗ್ಬಾಸ್ ಸೀಸನ್ ಭಾರಿ ಹಿಟ್ ಆಗಿದೆ. ತೆಲುಗಿನಲ್ಲಂತೂ ಶೋ ಗೆ ಭಾರಿ ಟಿಆರ್ಪಿ ದೊರಕಿದ್ದು ಮಾತ್ರವೇ ಅಲ್ಲದೆ. ಬಿಗ್ಬಾಸ್ ಸ್ಪರ್ಧಿಗಳಿಗೆ ದೊಡ್ಡ ಅಭಿಮಾನಿ ವರ್ಗ ಹುಟ್ಟಿಕೊಂಡಿದ್ದು, ಹೊರಗೆ ಸ್ಪರ್ಧಿಗಳ ಅಭಿಮಾನಿಗಳು ಪರಸ್ಪರ ಕಿತ್ತಾಡಿಕೊಂಡ ಘಟನೆ ಸಹ ನಡೆದವು. ಬಿಗ್ಬಾಸ್ ವಿನ್ನರ್ ಪಲ್ಲವಿ ಪ್ರಶಾಂತ್ ವಿರುದ್ಧ ಕೆಲ ಪ್ರಕರಣಗಳು ಸಹ ದಾಖಲಾದವು. ಇದೀಗ ಬಿಗ್ಬಾಸ್ ತೆಲುಗು ಮತ್ತೆ ಪ್ರಾರಂಭವಾಗುತ್ತಿದೆ.
ಕಳೆದ ಬಾರಿ ಭಾರಿ ಜನಪ್ರಿಯತೆ ದೊರೆತಿದ್ದ ಕಾರಣ ಈ ಬಾರಿ ತುಸು ಬೇಗನೇ ರಿಯಾಲಿಟಿ ಶೋ ಅನ್ನು ಪ್ರಾರಂಭ ಮಾಡಲಾಗುತ್ತಿದೆ. ಆಗಸ್ಟ್ 4 ರಂದು ಬಿಗ್ಬಾಸ್ ತೆಲುಗು ಸೀಸನ್ 8 ಪ್ರಾರಂಭ ಆಗಲಿದೆ. ಈ ಬಾರಿ ಬಿಗ್ಬಾಸ್ನಲ್ಲಿ ಭಾಗಿಯಾಗಲಿರುವ ಸ್ಪರ್ಧಿಗಳು ಈಗಾಗಲೇ ಖಾತ್ರಿ ಆಗಿದ್ದಾರೆ ಎನ್ನಲಾಗುತ್ತಿದೆ. ಕಳೆದ ಬಾರಿಯಂತೆಯೇ ಸಾಮಾಜಿಕ ಜಾಲತಾಣದ ಮೂಲಕ ಜನಪ್ರಿಯರಾದ ಸಾಮಾನ್ಯ ವ್ಯಕ್ತಿಗಳಿಗೆ ಆದ್ಯತೆ ನೀಡಲಾಗುತ್ತಿದೆ.
ಭಾರಿ ದುಬಾರಿ ಬೆಲೆಗೆ ಆಹಾರ ಮಾರಾಟ ಮಾಡುತ್ತಾ ಜನಪ್ರಿಯವಾಗಿರುವ ಕುಮಾರಿ ಆಂಟಿ ಈ ಬಾರಿ ಬಿಗ್ಬಾಸ್ ಮನೆಗೆ ಹೋಗಲಿದ್ದಾರೆ ಎನ್ನಲಾಗುತ್ತಿದೆ. ಕುಮಾರಿ ಆಂಟಿ ರಸ್ತೆ ಬದಿ ಅಂಗಡಿ ನಡೆಸುತ್ತಾರೆ. ಆದರೆ ಇವರ ಬಳಿ ಊಟ ಬಲು ದುಬಾರಿ, ಇದೇ ಕಾರಣಕ್ಕೆ ಈ ಆಂಟಿ ಸಾಮಾಜಿಕ ಜಾಲತಾಣದಲ್ಲಿ ಬಹಳ ವೈರಲ್ ಆಗಿದ್ದರು. ಈಗ ಬಿಗ್ಬಾಸ್ಗೂ ಹೋಗಲಿದ್ದಾರೆ.
ಇದನ್ನೂ ಓದಿ:Varthur Santhosh: ಬಿಗ್ಬಾಸ್ ಸೆಲೆಬ್ರಿಟಿ ವರ್ತೂರು ಸಂತೋಷ್ ವಿರುದ್ಧ ಪ್ರಕರಣ ದಾಖಲು
ಅಮೃತಾ ಪ್ರಣಯ್ ಈ ಬಾರಿ ಬಿಗ್ಬಾಸ್ಗೆ ಹೋಗಲಿದ್ದಾರೆ. ದೇಶವನ್ನೇ ಬೆಚ್ಚಿಬೀಳಿಸಿದ್ದ ಮರ್ಯಾದಾ ಹತ್ಯೆಯ ಸಂತ್ರಸ್ತೆ ಅಮೃತಾ ಪ್ರಣಯ್. ಅಮೃತಾ, ಪ್ರಣಯ್ ಎಂಬುವರನ್ನು ಪ್ರೀತಿಸಿ ಮದುವೆಯಾಗಿದ್ದರು, ಆದರೆ ಮದುವೆ ಇಷ್ಟವಿಲ್ಲದ ಅಮೃತಾರ ಶ್ರೀಮಂತ ತಂದೆ ಪ್ರಣಯ್ ಅನ್ನು ಹಾಡಹಗಲೆ ಕೊಲ್ಲಿಸಿದ್ದರು. ಅಮೃತಾ ಈ ಬಾರಿ ಬಿಗ್ಬಾಸ್ಗೆ ಬರಲಿದ್ದಾರೆ. ಡ್ರಗ್ಸ್ ಪ್ರಕರಣದ ಆರೋಪಿ ಹೇಮಾ ಸಹ ಈ ಬಾರಿ ಬಿಗ್ಬಾಸ್ಗೆ ಬರಲಿದ್ದಾರೆ ಎನ್ನಲಾಗುತ್ತಿದೆ. ಬೆಂಗಳೂರಿನಲ್ಲಿ ನಡೆದ ಡ್ರಗ್ಸ್ ಪಾರ್ಟಿಯಲ್ಲಿ ಪೊಲೀಸರ ಕೈಗೆ ಸಿಕ್ಕಿಕೊಂಡಿದ್ದ ನಟಿ ಹೇಮಾ, ಮಾ ಅಸೋಸಿಯೆಷನ್ನಿಂದ ಬ್ಯಾನ್ ಸಹ ಆಗಿದ್ದಾರೆ. ಅವರೂ ಸಹ ಬಿಗ್ಬಾಸ್ನಲ್ಲಿ ಭಾಗಿಯಾಗಲಿದ್ದಾರೆ ಎನ್ನಲಾಗುತ್ತಿದೆ.
ಜನಪ್ರಿಯ ಯೂಟ್ಯೂಬ್ ಕಪಲ್ ಆಗಿರುವ ನೇತ್ರಾ ಮತ್ತು ವಂಶಿ ಸಹ ಈ ಬಾರಿ ಬಿಗ್ಬಾಸ್ಗೆ ಆಗಮಿಸಲಿದ್ದಾರೆ ಎನ್ನಲಾಗುತ್ತಿದೆ. ಇದರ ಜೊತೆಗೆ ತೆಲುಗು ಚಿತ್ರರಂಗದ ಕೆಲವು ಹಿರಿಯ ನಟ-ನಟಿಯರು, ಟಿವಿ ಜಗತ್ತಿನ ಕೆಲವು ಗ್ಲಾಮರಸ್ ನಟಿಯರು ಸಹ ಬಿಗ್ಬಾಸ್ನಲ್ಲಿ ಭಾಗಿಯಾಗಲಿದ್ದಾರೆ ಎನ್ನಲಾಗುತ್ತಿದೆ. ಪ್ರತಿಬಾರಿಯಂತೆ ನಟ ನಾಗಾರ್ಜುನ ಅವರೇ ಈ ಬಾರಿಯೂ ಶೋ ನಡೆಸಿಕೊಡಲಿದ್ದಾರೆ.
ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ
Published On - 11:15 am, Thu, 4 July 24
