ಹರ್ಭಜನ್​​ ಸಿಂಗ್​ ಎಸೆತಕ್ಕೆ ಬೌಂಡರಿ ಬಾರಿಸಿದ ಅಮಿತಾಭ್​ ಬಚ್ಚನ್​; ಇರ್ಫಾನ್​ ಪಠಾಣ್ ಕಾಮೆಂಟರಿ

ಸಿನಿಮಾ ಮತ್ತು ಕ್ರಿಕೆಟ್​ ನಡುವೆ ಒಳ್ಳೆಯ ನಂಟು ಇದೆ. ಈ ಎರಡೂ ಕ್ಷೇತ್ರದ ಸೆಲೆಬ್ರಿಟಿಗಳು ಪರಸ್ಪರ ಬಾಂಧವ್ಯ ಹೊಂದಿದ್ದಾರೆ. ಅಮಿತಾಭ್​ ಬಚ್ಚನ್​ (Amitabh Bachchan) ನಡೆಸಿಕೊಡುತ್ತಿರುವ ‘ಕೌನ್​ ಬನೇಗಾ ಕರೋಡ್​ಪತಿ’ (Kaun Banega Crorepati) ಕಾರ್ಯಕ್ರಮಕ್ಕೆ ಇತ್ತೀಚೆಗೆ ಕ್ರಿಕೆಟ್​ ಆಟಗಾರರಾದ ಹರ್ಭಜನ್​ ಸಿಂಗ್​ (Harbhajan Singh) ಮತ್ತು ಇರ್ಫಾನ್​ ಪಠಾಣ್​​ (Irfan Pathan) ಅವರು ಅತಿಥಿಗಳಾಗಿ ಆಗಮಿಸಿದ್ದರು. ಈ ವೇಳೆ ಅದೇ ವೇದಿಕೆಯಲ್ಲಿ ಈ ಮೂವರೂ ಸೇರಿಕೊಂಡು ಕ್ರಿಕೆಟ್​ ಆಡಿದ್ದಾರೆ. ಹರ್ಭಜನ್​ ಸಿಂಗ್​ ಬೌಲಿಂಗ್​ ಮಾಡಿದರೆ, ಅಮಿತಾಭ್​ ಬಚ್ಚನ್​ ಅತ್ಯುತ್ತಮವಾಗಿ ಬ್ಯಾಟಿಂಗ್​ ಮಾಡಿದ್ದಾರೆ. ಅವರಿಬ್ಬರ ಆಟವನ್ನು ತಮ್ಮ ಕಾಮೆಂಟರಿ ಮೂಲಕ ಇರ್ಫಾನ್​ ಪಠಾಣ್​ ಅವರು ಸೊಗಸಾಗಿ ವಿವರಿಸಿದ್ದಾರೆ.

ಅಮಿತಾಭ್​ ಬಚ್ಚನ್​ ಅವರಿಗೆ ಕ್ರಿಕೆಟ್​ ಬಗ್ಗೆ ಸಖತ್​ ಆಸಕ್ತಿ ಇದೆ. ಅಂತಾರಾಷ್ಟ್ರೀಯ ಪಂದ್ಯಗಳನ್ನು ವೀಕ್ಷಿಸಿದ ಬಳಿಕ ಅವರು ತಮ್ಮ ಅಭಿಪ್ರಾಯಗಳನ್ನು ಸೋಶಿಯಲ್​ ಮೀಡಿಯಾ ಮೂಲಕ ಹಂಚಿಕೊಳ್ಳುತ್ತಾರೆ. ಅನೇಕ ಕ್ರಿಕೆಟ್​ ಪಟುಗಳು ಅವರ ‘ಕೌನ್​ ಬನೇಗಾ ಕರೋಡ್​ಪತಿ’ ಕಾರ್ಯಕ್ರಮಕ್ಕೆ ಬಂದುಹೋಗಿದ್ದಾರೆ. ಈಗ ಇರ್ಫಾನ್​ ಪಠಾಣ್​ ಮತ್ತು ಹರ್ಭಜನ್​ ಸಿಂಗ್​ ಅವರು ಆಗಮಿಸಿದ್ದಾರೆ.

‘ನಾವು ಮಹಾನ್​ ಲೆಜೆಂಡ್​ಗಳ ಜತೆ ಕ್ರಿಕೆಟ್​ ಆಡಿದ್ದೇವೆ. ಆದರೆ ಒಬ್ಬ ಲೆಜೆಂಡ್​ ಬಾಕಿ ಉಳಿದಿದ್ದಾರೆ’ ಎನ್ನುವ ಮೂಲಕ ಅಮಿತಾಭ್​ ಜತೆ ತಾವು ಕ್ರಿಕೆಟ್​ ಆಡಬೇಕು ಎಂದು ಇರ್ಫಾನ್​ ಪಠಾಣ್​ ಆಸೆ ವ್ಯಕ್ತಪಡಿಸಿದರು. ಅವರ ಆಸೆ ಕೇಳಿ ಅಮಿತಾಭ್​ ಒಂದು ಕ್ಷಣ ಅಚ್ಚರಿಪಟ್ಟರು. ಮರುಕ್ಷಣವೇ ಅವರು ಕ್ರಿಕೆಟ್​ ಆಡಲು ಸಜ್ಜಾದರು. ಕೌನ್​ ಬನೇಗಾ ಕರೋಡ್​ಪತಿ ವೇದಿಕೆಯೇ ಕ್ರಿಕೆಟ್​ ಮೈದಾನವಾಗಿ ಬದಲಾಯಿತು. ಹರ್ಭಜನ್​ ಸಿಂಗ್​ ಚೆಂಡು ಹಿಡಿದು ಸಜ್ಜಾದರು. ಇರ್ಫಾನ್​ ಪಠಾಣ್ ಕಾಮೆಂಟರಿ ಆರಂಭಿಸಿದರು.

ಹರ್ಭಜನ್​ ಅವರ ಎಸೆತಕ್ಕೆ ಅಮಿತಾಭ್​ ಬಚ್ಚನ್​ ಅವರು ಸಿಕ್ಸ್​, ಫೋರ್​ ಬಾರಿಸಿ ಎಲ್ಲರಿಂದ ಚಪ್ಪಾಳೆ ಗಿಟ್ಟಿಸಿಕೊಂಡರು. ಅವರನ್ನು ಔಟ್​ ಮಾಡಲು ಹರ್ಭಜನ್​ ಸಿಂಗ್​ಗೆ ಸಾಧ್ಯವಾಗಲಿಲ್ಲ. ‘ಅನೇಕ ಘಟಾನುಘಟಿ ಆಟಗಾರರ ವಿಕೆಟ್​ ಪಡೆದಿದ್ದೇನೆ. ನಿಮ್ಮನ್ನು ಕೂಡ ಔಟ್​ ಮಾಡಿದ್ದರೆ ನನ್ನ ನಿವೃತ್ತಿ ಜೀವನ ಅದ್ಭುತವಾಗಿ ಇರುತ್ತದೆ ಅಂತ ಭಾವಿಸಿದ್ದೆ’ ಎಂದಿದ್ದಾರೆ ಹರ್ಭಜನ್​ ಸಿಂಗ್​.

#KBC13 ke manch pe AB sir ne lagaaye apne balle se chauke aur chakke,Harbhajan Singh ki pitaai or hamari commentary,Dekhiye iss entertaining pal ko #KaunBanegaCrorepati ke #ShaandaarShukriya week mein, Mon-Fri, raat 9 baje, @SonyTV @SrBachchan @harbhajan_singh pic.twitter.com/egGdx4HKMN

— Irfan Pathan (@IrfanPathan) December 17, 2021

ಕಳೆದ 21 ವರ್ಷಗಳಿಂದ ಈ ಶೋ ನಡೆದುಕೊಂಡು ಬಂದಿದೆ. ಈಗ 13ನೇ ಸೀಸನ್​ ನಡೆಯುತ್ತಿದೆ. ಈ ಸೀಸನ್​ನಲ್ಲಿ ವೀರೇಂದ್ರ ಸೆಹ್ವಾಗ್​ ಮತ್ತು ಸೌರವ್​ ಗಂಗೂಲಿ ಕೂಡ ಪಾಲ್ಗೊಂಡಿದ್ದರು. ಪ್ರತಿ ಶುಕ್ರವಾರ ಬೇರೆ ಬೇರೆ ಕ್ಷೇತ್ರದ ಗಣ್ಯರು ಹಾಟ್​ ಸೀಟ್​ನಲ್ಲಿ ಕೂತು ಆಟ ಆಡುತ್ತಾರೆ.

ಇದನ್ನೂ ಓದಿ:

‘ಕೌನ್​ ಬನೇಗಾ ಕರೋಡ್​​ಪತಿ’ ಶೋನಲ್ಲಿ ಕನ್ನಡ ಸಿನಿಮಾ ಮಾತು; ಅಮಿತಾಭ್​ ಕಡೆಯಿಂದ ಶುಭ ಹಾರೈಕೆ

‘ಕೌನ್​ ಬನೇಗಾ ಕರೋಡ್​ಪತಿ’ 1000ನೇ ಎಪಿಸೋಡ್​; ಮಗಳ ಎದುರು ಕಣ್ಣೀರು ಹಾಕಿದ ಅಮಿತಾಭ್​ ಬಚ್ಚನ್​

Published On - 11:47 am, Sat, 18 December 21