‘ನಾಗಿಣಿ’ ಸೀರಿಯಲ್​ ನಟಿಯರಿಗೆ ರಣವೀರ್​ ಸಿಂಗ್ ಪೈಪೋಟಿ; ಸ್ನೇಕ್​ ಡ್ಯಾನ್ಸ್​ ಕಂಡು ನಿರ್ಮಾಪಕಿ ಫಿದಾ

Ranveer Singh: ಶೀಘ್ರವೇ ಆರಂಭ ಆಗಲಿರುವ ‘ನಾಗಿನ್​ 6’ ಧಾರಾವಾಹಿಯಲ್ಲಿ ನಾಗಿಣಿ ಪಾತ್ರವನ್ನು ಯಾವ ನಟಿ ಮಾಡುತ್ತಾರೆ ಎಂಬ ಕೌತುಕ ಮೂಡಿದೆ. ಈ ನಡುವೆ ರಣವೀರ್​ ಸಿಂಗ್​ ಸ್ನೇಕ್​ ಡ್ಯಾನ್ಸ್​ ಮಾಡಿ ಗಮನ ಸೆಳೆದಿದ್ದಾರೆ.

‘ನಾಗಿಣಿ’ ಸೀರಿಯಲ್​ ನಟಿಯರಿಗೆ ರಣವೀರ್​ ಸಿಂಗ್ ಪೈಪೋಟಿ; ಸ್ನೇಕ್​ ಡ್ಯಾನ್ಸ್​ ಕಂಡು ನಿರ್ಮಾಪಕಿ ಫಿದಾ
ಮೌನಿ ರಾಯ್, ರಣವೀರ್ ಸಿಂಗ್

ನಟ ರಣವೀರ್​ ಸಿಂಗ್ (Ranveer Singh)​ ಅವರ ಪ್ರತಿಭೆ ಎಂಥದ್ದು ಎಂಬುದನ್ನು ಹೊಸದಾಗಿ ಹೇಳಬೇಕಾಗಿಲ್ಲ. ಎಂಥ ಪಾತ್ರ ಕೊಟ್ಟರೂ ಅವರು ಅದಕ್ಕೆ ಜೀವ ತುಂಬುತ್ತಾರೆ. ಬಾಜಿರಾವ್​, ಅಲ್ಲಾವುದ್ದೀನ್​ ಖಿಲ್ಜಿ ಮುಂತಾದ ಪಾತ್ರಗಳ ಮೂಲಕ ಅವರು ಮಾಡಿದ ಮೋಡಿ ಅಷ್ಟಿಷ್ಟಲ್ಲ. ಸದ್ಯ ಅವರ ಕೈಯಲ್ಲಿ ಹಲವು ಸಿನಿಮಾಗಳಿವೆ. ಅವರು ನಟಿಸಿದ ಬಹುನಿರೀಕ್ಷಿತ ‘83’ ಸಿನಿಮಾ ಬಿಡುಗಡೆಗೆ ಸಜ್ಜಾಗಿದೆ. ‘ಜಯೇಶ್​ ಭಾಯ್​ ಜೋರ್ದಾರ್​’, ‘ಸರ್ಕಸ್​’, ‘ರಾಖಿ ಔರ್​ ರಾಣಿ ಕಿ ಪ್ರೇಮ್​ ಕಹಾನಿ’ ಸೇರಿದಂತೆ ಹಲವು ಸಿನಿಮಾಗಳಲ್ಲಿ ರಣವೀರ್​ ಸಿಂಗ್​ ನಟಿಸುತ್ತಿದ್ದಾರೆ. ಈ ನಡುವೆ ಅವರು ‘ನಾಗಿಣಿ’ ಸೀರಿಯಲ್​ (Naagini Serial) ನಟಿಯರಿಗೆ ಪೈಪೋಟಿ ನೀಡಿದ್ದಾರೆ. ವೇದಿಕೆ ಮೇಲೆ ಮೌನಿ ರಾಯ್​ (Mouni Roy) ಪುಂಗಿ ಊದಿದ್ದರೆ, ರಣವೀರ್​ ಸಿಂಗ್​ ಹಾವಿನಂತೆ ನರ್ತಿಸಿದ್ದಾರೆ. ಅದನ್ನು ಕಂಡು ನಿರ್ಮಾಪಕಿ ಏಕ್ತಾ ಕಪೂರ್​ (Ekta Kapoor) ಫುಲ್​ ಖುಷ್​ ಆಗಿದ್ದಾರೆ. ಸದ್ಯ ಈ ವಿಡಿಯೋ ಸಖತ್​ ವೈರಲ್​ ಆಗುತ್ತಿದೆ.

ರಣವೀರ್​ ಸಿಂಗ್​ ಅವರು ಹಿಂದಿಯ ‘ಕಲರ್ಸ್​ ಟಿವಿ’ಯಲ್ಲಿ ‘ದಿ ಬಿಗ್​ ಪಿಕ್ಚರ್​’ ಕಾರ್ಯಕ್ರಮವನ್ನು ನಡೆಸಿಕೊಡುತ್ತಿದ್ದಾರೆ. ಈ ಶೋಗೆ ಏಕ್ತಾ ಕಪೂರ್​ ಮತ್ತು ನಟಿ ಮೌನಿ ರಾಯ್​ ಅತಿಥಿಗಳಾಗಿ ಆಗಮಿಸಿದ್ದರು. ‘ನಾಗಿನ್​’ ಧಾರಾವಾಹಿಯ 5 ಸೀಸನ್​ಗಳನ್ನು ಯಶಸ್ವಿಯಾಗಿ ನಿರ್ಮಾಣ ಮಾಡಿದ ಖ್ಯಾತಿ ಏಕ್ತಾ ಕಪೂರ್​ ಅವರಿಗೆ ಸಲ್ಲುತ್ತದೆ. ಮೊದಲ ಸೀಸನ್​ನಲ್ಲಿ ನಾಗಿಣಿ ಪಾತ್ರವನ್ನು ಮಾಡುವ ಮೂಲಕ ಮೌನಿ ರಾಯ್​ ಅವರ ಅಪಾರ ಜನಪ್ರಿಯತೆ ಗಳಿಸಿದ್ದರು. ಅವರು ಎದುರು ಈಗ ರಣವೀರ್​ ಸಿಂಗ್​ ಸ್ನೇಕ್​ ಡ್ಯಾನ್ಸ್​ ಮಾಡಿದ್ದು ವಿಶೇಷವಾಗಿತ್ತು.

‘ಏಕ್ತಾ ಕಪೂರ್​ ಬಂದಿದ್ದಾರೆ ಎಂದಮೇಲೆ ನಾನು ನಾಗರಾಜ್​ ಪಾತ್ರಕ್ಕೆ ಆಡಿಷನ್​ ನೀಡುತ್ತೇನೆ’ ಎಂದು ವೇದಿಕೆಯಲ್ಲಿ ರಣವೀರ್ ಸಿಂಗ್​ ಸಜ್ಜಾದರು. ಮೌನಿ ರಾಯ್​ ಪುಂಗಿ ಊದಿದಂತೆ ನಟಿಸಿದರೆ, ರಣವೀರ್​ ಭರ್ಜರಿಯಾಗಿ ಸ್ಟೆಪ್​ ಹಾಕಿದರು. ಅದನ್ನು ನೋಡಿ ನಿರ್ಮಾಪಕಿ ಏಕ್ತಾ ಕಪೂರ್​ ಅವರಿಗೆ ಸಖತ್​ ಮೆಚ್ಚುಗೆ ಆಯಿತು. ‘ಇದನ್ನು ನೋಡಿದ ಮೇಲೆ ನಾಗಿಣಿಗಳ ಅವಶ್ಯಕತೆಯೇ ಇಲ್ಲ. ನಾಗರಾಜನಿಂದಲೇ ಕೆಲಸ ಮಾಡಿಸಿಕೊಳ್ಳಬಹುದು’ ಎಂದು ಏಕ್ತಾ ಕಪೂರ್​ ಹೊಗಳಿದ್ದಾರೆ.

‘ನಾಗಿನ್​’ ಧಾರಾವಾಹಿಯ 6ನೇ ಸೀಸನ್​ಗೆ ಸಕಲ ಸಿದ್ಧತೆ ನಡೆದಿದೆ. ರಣವೀರ್​ ಸಿಂಗ್​ ನಡೆಸಿಕೊಡುತ್ತಿರುವ ‘ದಿ ಬಿಗ್​ ಪಿಕ್ಚರ್​’ ಕಾರ್ಯಕ್ರಮ 2022ರ ಜ.23ಕ್ಕೆ ಅಂತ್ಯವಾಗಲಿದೆ. ಆ ಬಳಿಕ ‘ನಾಗಿನ್​ 6’ ಪ್ರಸಾರ ಆರಂಭ ಆಗಲಿದೆ. ಈ ಬಾರಿ ನಾಗಿಣಿ ಪಾತ್ರದಲ್ಲಿ ಯಾವ ನಟಿ ಕಾಣಿಸಿಕೊಳ್ಳುತ್ತಾರೆ ಎಂಬ ಕೌತುಕ ಮೂಡಿದೆ. ಆ ನಟಿಯ ಹೆಸರು ‘ಎಂ’ ಅಕ್ಷರದಿಂದ ಶುರುವಾಗುತ್ತದೆ ಎಂದು ಏಕ್ತಾ ಕಪೂರ್​ ಸುಳಿವು ಕೊಟ್ಟಿದ್ದಾರೆ. ಅದು ಮೌನಿ ರಾಯ್​ ಇರಬಹುದು ಎಂದು ಜನರು ಊಹಿಸುತ್ತಿದ್ದಾರೆ.

ಇದನ್ನೂ ಓದಿ:

Namratha Gowda: ಮದುವೆ ಆದ್ರೂ ನಾವು ಗಂಡ-ಹೆಂಡತಿ ಅಲ್ಲ ಎಂದ ನಾಗಿಣಿ ನಟ-ನಟಿ! ಏನಿದರ ಅಸಲಿ ಕಥೆ?

ಉದಯ ಟಿವಿಯಲ್ಲಿ ಹೊಸ ಧಾರಾವಾಹಿ ‘ಕನ್ಯಾದಾನ’; ಈ ಸೀರಿಯಲ್​ ಕಥೆ ಏನು?

Click on your DTH Provider to Add TV9 Kannada