ಅಡುಗೆಮನೆಯಲ್ಲೇ ಇದೆ ಸಣ್ಣ ನೋವಿಗೆ ಪರಿಹಾರ ನೀಡುವ ಪದಾರ್ಥಗಳು! ಹೇಗೆ ಬಳಸಬೇಕು ತಿಳಿದುಕೊಳ್ಳಿ

ತಲೆನೋವು, ಹಲ್ಲುನೋವು, ಹೊಟ್ಟೆನೋವು ಅಥವಾ ಸ್ನಾಯುಗಳ ನೋವು ಬಂದಾಗ ತಕ್ಷಣ ಪೇನ್‌ಕಿಲ್ಲರ್ ತೆಗೆದುಕೊಳ್ಳುವುದು ಸಾಮಾನ್ಯ. ಆದರೆ ಪ್ರತಿಯೊಂದು ಸಣ್ಣ ನೋವಿಗೂ ಮಾತ್ರೆಗಳನ್ನು ಸೇವಿಸುವುದು ಸೂಕ್ತವಲ್ಲ. ಮನೆಯ ಅಡುಗೆಮನೆಯಲ್ಲಿ ಇರುವ ಶುಂಠಿ, ಲವಂಗ, ಅರಿಶಿನ, ಅಜ್ವೈನ್ ಮತ್ತು ಕಾಳುಮೆಣಸು ಮುಂತಾದ ಕೆಲವು ಪದಾರ್ಥಗಳು ಸಣ್ಣಪುಟ್ಟ ಅಸ್ವಸ್ಥತೆಗಳಲ್ಲಿ ತಾತ್ಕಾಲಿಕ ಆರಾಮ ನೀಡಬಹುದು. ಹೌದು, ಇವು ವೈದ್ಯಕೀಯ ಚಿಕಿತ್ಸೆಗೆ ಪರ್ಯಾಯವಲ್ಲದಿದ್ದರೂ ಕೆಲವು ಸಣ್ಣ ಪುಟ್ಟ ನೋವುಗಳನ್ನು ಕಡಿಮೆ ಮಾಡಲು ಸಹಾಯ ಮಾಡುತ್ತದೆ. ತೀವ್ರ ನೋವು, ಗಾಯ, ನಿರಂತರ ಹೊಟ್ಟೆನೋವು, ಹಲ್ಲುನೋವು ಅಥವಾ ಇತರ ಗಂಭೀರ ಲಕ್ಷಣಗಳಿದ್ದರೆ ವೈದ್ಯರನ್ನು ಸಂಪರ್ಕಿಸುವುದು ಅಗತ್ಯ. ಹಾಗಾದರೆ ಅಡುಗೆಮನೆಯ ಯಾವ ಪದಾರ್ಥ ನೋವುಗಳನ್ನು ಗುಣಪಡಿಸಲು ಸಹಾಯ ಮಾಡಬಹುದು ಎಂಬುದನ್ನು ತಿಳಿದುಕೊಳ್ಳಿ.

ಅರಿಶಿನ- ಉರಿಯೂತ ಮತ್ತು ಸಣ್ಣ ನೋವಿಗೆ: ಅರಿಶಿನದಲ್ಲಿ ಕರ್ಕ್ಯುಮಿನ್ (Curcumin) ಎಂಬ ಸಂಯುಕ್ತವಿದ್ದು, ಇದು ಉರಿಯೂತದ ಕಡಿಮೆ ಮಾಡುವುದಕ್ಕೆ ಹೆಸರುವಾಸಿಯಾಗಿದೆ. ಸಣ್ಣಪುಟ್ಟ ಸ್ನಾಯು ನೋವು ಅಥವಾ ಉರಿಯೂತದ ಸಂದರ್ಭದಲ್ಲಿ ಅರಿಶಿನವನ್ನು ಆಹಾರದ ಭಾಗವಾಗಿ ಬಳಸಬಹುದು. ಅರಿಶಿನದ ಹಾಲನ್ನು ಕೆಲವರು ಸ್ನಾಯುಗಳ ನೋವು ಅಥವಾ ದೇಹದ ಅಸ್ವಸ್ಥತೆಯ ಸಂದರ್ಭದಲ್ಲಿ ಸೇವಿಸುತ್ತಾರೆ. ಆದರೆ ಗಾಯದ ಮೇಲೆ ಅರಿಶಿನ ಅಥವಾ ಯಾವುದೇ ಮನೆಮದ್ದನ್ನು ನೇರವಾಗಿ ಹಚ್ಚುವ ಮೊದಲು ಎಚ್ಚರಿಕೆ ವಹಿಸಬೇಕು. ತೆರೆದ ಗಾಯಕ್ಕೆ ಸ್ವಯಂ ಮನೆಮದ್ದು ಹಚ್ಚುವುದನ್ನು ತಪ್ಪಿಸುವುದು ಉತ್ತಮ.

ಲವಂಗ- ಹಲ್ಲುನೋವಿಗೆ ತಾತ್ಕಾಲಿಕ ಆರಾಮ: ಲವಂಗದಲ್ಲಿ ಯೂಜೆನಾಲ್ (Eugenol) ಎಂಬ ಸಂಯುಕ್ತವಿದೆ. ಇದು ಸೌಮ್ಯ ನೋವು ನಿವಾರಕ ಮತ್ತು ಸ್ಥಳೀಯ ಸಂವೇದನೆ ಕಡಿಮೆ ಮಾಡುವ ಗುಣಗಳನ್ನು ಹೊಂದಿದೆ. ಹಲ್ಲುನೋವಿಗೆ ಲವಂಗದಿಂದ ತಾತ್ಕಾಲಿಕವಾಗಿ ಆರಾಮ ಸಿಗಬಹುದು. ಆದರೆ ಹಲ್ಲಿನ ನೋವಿನ ಮೂಲ ಕಾರಣವಾದ ಕ್ಯಾವಿಟಿ, ಸೋಂಕು ಅಥವಾ ಹಲ್ಲಿನ ಬೇರೆ ಸಮಸ್ಯೆಗೆ ದಂತವೈದ್ಯರ ಸಲಹೆ ಅಗತ್ಯವಾಗಬಹುದು.

ಅಜ್ವೈನ್- ಗ್ಯಾಸ್ ಮತ್ತು ಹೊಟ್ಟೆಯ ಅಸ್ವಸ್ಥತೆಗೆ: ಅಜ್ವೈನ್ (Carom Seeds) ಅನ್ನು ಜೀರ್ಣಕ್ರಿಯೆಗೆ ಸಂಬಂಧಿಸಿದ ಸಣ್ಣಪುಟ್ಟ ಸಮಸ್ಯೆಗಳಿಗೆ ಸಾಂಪ್ರದಾಯಿಕವಾಗಿ ಬಳಸಲಾಗುತ್ತದೆ. ಗ್ಯಾಸ್ ಅಥವಾ ಹೊಟ್ಟೆ ಉಬ್ಬರದಂತಹ ಸೌಮ್ಯ ಸಮಸ್ಯೆಗಳಲ್ಲಿ ಅಜ್ವೈನ್ ಅನ್ನು ಆಹಾರದ ಭಾಗವಾಗಿ ಬಳಸಬಹುದು. ಆದರೆ ನಿರಂತರ ಹೊಟ್ಟೆನೋವು, ವಾಂತಿ, ಜ್ವರ ಅಥವಾ ಮಲದಲ್ಲಿ ರಕ್ತ ಕಂಡುಬಂದರೆ ಮನೆಮದ್ದುಗಳ ಬದಲು ವೈದ್ಯರನ್ನು ಸಂಪರ್ಕಿಸಬೇಕು.

ಶುಂಠಿ- ಮುಟ್ಟಿನ ನೋವು ಮತ್ತು ವಾಕರಿಕೆಗೆ: ಶುಂಠಿಯಲ್ಲಿ ಜಿಂಜರಾಲ್ (Gingerol) ಸೇರಿದಂತೆ ಹಲವು ಸಕ್ರಿಯ ಸಂಯುಕ್ತಗಳಿವೆ. ಶುಂಠಿ ಚಹಾ ಕೆಲವರಿಗೆ ವಾಕರಿಕೆ ಮತ್ತು ಮುಟ್ಟಿನ ಸಮಯದ ನೋವಿನಲ್ಲಿ ಆರಾಮ ನೀಡಬಹುದು. ಶುಂಠಿಯನ್ನು ಬಿಸಿ ನೀರಿನಲ್ಲಿ ಕುದಿಸಿ ಚಹಾ ರೂಪದಲ್ಲಿ ಸೇವಿಸಬಹುದು. ಆದರೆ ತುಂಬಾ ಪ್ರಮಾಣದಲ್ಲಿ ಸೇವಿಸುವುದರಿಂದ ಕೆಲವರಿಗೆ ಎದೆಯುರಿ ಅಥವಾ ಹೊಟ್ಟೆಯ ಅಸ್ವಸ್ಥತೆ ಉಂಟಾಗಬಹುದು.

ಇದನ್ನೂ ಓದಿ: ಮಳೆಗಾಲದಲ್ಲಿ ಕಿವಿಯಲ್ಲಿ ತುರಿಕೆ ಕಂಡುಬಂದರೆ ನಿರ್ಲಕ್ಷ್ಯ ಮಾಡಬೇಡಿ! ತಜ್ಞರ ಈ ಸಲಹೆಯನ್ನು ತಪ್ಪದೆ ಪಾಲಿಸಿ

ಕಾಳುಮೆಣಸು- ಗಂಟಲಿನ ಅಸ್ವಸ್ಥತೆಗೆ: ಕಾಳುಮೆಣಸು (Black Pepper) ಅಡುಗೆಯಲ್ಲಿ ಸಾಮಾನ್ಯವಾಗಿ ಬಳಸುವ ಮಸಾಲೆ. ಬಿಸಿ ಪಾನೀಯ ಅಥವಾ ಆಹಾರದೊಂದಿಗೆ ಸಣ್ಣ ಪ್ರಮಾಣದಲ್ಲಿ ಸೇವಿಸುವುದು ಗಂಟಲಿನ ಅಸ್ವಸ್ಥತೆಯಲ್ಲಿ ಕೆಲವರಿಗೆ ಆರಾಮ ಸಿಗಬಹುದು. ಆದರೆ ಜಾಯಿಂಟ್ ಪೇನ್‌ಗೆ ಕಾಳುಮೆಣಸಿನ ಹಾಲು ಕುಡಿದರೆ ನೋವು ಗುಣವಾಗುತ್ತದೆ ಎಂಬುದಕ್ಕೆ ಬಲವಾದ ವೈದ್ಯಕೀಯ ಸಾಕ್ಷ್ಯವಿಲ್ಲ. ಕೀಲು ನೋವು ನಿರಂತರವಾಗಿದ್ದರೆ ಅದರ ಕಾರಣ ಪತ್ತೆಹಚ್ಚುವುದು ಮುಖ್ಯ.

ಮನೆಮದ್ದು ಬಳಸುವಾಗ ಈ ವಿಷಯ ಮರೆಯಬೇಡಿ

• ತೀವ್ರ ಅಥವಾ ನಿರಂತರ ನೋವನ್ನು ನಿರ್ಲಕ್ಷಿಸಬೇಡಿ.
• ಗಾಯದ ಮೇಲೆ ತಿಳಿಯದೆ ಯಾವುದೇ ಪದಾರ್ಥ ಹಚ್ಚಬೇಡಿ.
• ಹಲ್ಲುನೋವು ಮುಂದುವರಿದರೆ ದಂತವೈದ್ಯರನ್ನು ಸಂಪರ್ಕಿಸಿ.
• ಹೊಟ್ಟೆನೋವಿನೊಂದಿಗೆ ವಾಂತಿ, ಜ್ವರ ಅಥವಾ ರಕ್ತಸ್ರಾವವಿದ್ದರೆ ತಕ್ಷಣ ವೈದ್ಯಕೀಯ ಸಲಹೆ ಪಡೆಯಿರಿ.
• ಯಾವುದೇ ಮನೆಮದ್ದಿನಿಂದ ಅಲರ್ಜಿ ಅಥವಾ ಅಸ್ವಸ್ಥತೆ ಉಂಟಾದರೆ ಬಳಸುವುದನ್ನು ನಿಲ್ಲಿಸಿ.
• ನಿಯಮಿತವಾಗಿ ಔಷಧ ಸೇವಿಸುತ್ತಿದ್ದರೆ ಹೊಸ ಮನೆಮದ್ದುಗಳನ್ನು ದೊಡ್ಡ ಪ್ರಮಾಣದಲ್ಲಿ ಬಳಸುವ ಮೊದಲು ವೈದ್ಯರ ಸಲಹೆ ಪಡೆಯಿರಿ.

ಆರೋಗ್ಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ