ಲೂಸ್ ಮೋಷನ್ ಕಡಿಮೆ ಮಾಡಲು ಸಹಾಯಕವಾಗುವ ಆಹಾರಗಳು

ಲೂಸ್ ಮೋಷನ್ ಅಥವಾ ಅತಿಸಾರ ಉಂಟಾದಾಗ ಪದೇಪದೇ ಮಲ ವಿಸರ್ಜನೆಯಾಗುತ್ತದೆ. ಇದರಿಂದ ದೇಹದಲ್ಲಿನ ನೀರು ಮತ್ತು ಅಗತ್ಯ ಲವಣಗಳು ಕಡಿಮೆಯಾಗಿ ಸುಸ್ತು, ನಿಶ್ಶಕ್ತಿ ಹಾಗೂ ನಿರ್ಜಲೀಕರಣದ ಅಪಾಯ ಉಂಟಾಗಬಹುದು. ಇಂತಹ ಸಂದರ್ಭದಲ್ಲಿ ಆಹಾರ ಸೇವನೆ ಮತ್ತು ದೇಹದಲ್ಲಿ ನೀರಿನ ಸಮತೋಲನ ಕಾಪಾಡಿಕೊಳ್ಳುವುದು ಮುಖ್ಯ. ಬಾಳೆಹಣ್ಣು, ಅನ್ನ, ಮೊಸರು ಮತ್ತು ಖಿಚಡಿಯಂತಹ ಸುಲಭವಾಗಿ ಜೀರ್ಣವಾಗುವ ಆಹಾರಗಳನ್ನು ಸೇವಿಸಬಹುದು. ಅದರ ಜೊತೆಗೆ ಕೆಲವು ಸರಳ ಸಲಹೆಗಳು ಆರೋಗ್ಯ ಕಾಪಾಡಿಕೊಳ್ಳಲು ಸಹಾಯ ಮಾಡಬಹುದು.

ಬಾಳೆಹಣ್ಣು ಮತ್ತು ಅನ್ನ ಸೇವಿಸಿ

ಸಾಮಾನ್ಯವಾಗಿ ಬಾಳೆಹಣ್ಣಿನಲ್ಲಿ ಕರಗುವ ನಾರಿನಾಂಶವಿದ್ದು, ಮಲದ ಸ್ಥಿರತೆ ಸುಧಾರಿಸಲು ಸಹಾಯ ಮಾಡಬಹುದು. ಅತಿಸಾರ ಉಂಟಾದಾಗ ಬಾಳೆಹಣ್ಣು ತಿನ್ನುವುದು ದೇಹಕ್ಕೆ ಶಕ್ತಿಯನ್ನು ನೀಡುತ್ತದೆ. ವೈಟ್ ರೈಸ್ ಕೂಡ ಸುಲಭವಾಗಿ ಜೀರ್ಣವಾಗುವ ಆಹಾರವಾಗಿದ್ದು, ದೇಹಕ್ಕೆ ಅಗತ್ಯವಾದ ಶಕ್ತಿಯನ್ನು ಒದಗಿಸುತ್ತದೆ. ಮಸಾಲೆ ಮತ್ತು ಎಣ್ಣೆ ಹೆಚ್ಚಿಲ್ಲದ ಆಹಾರವನ್ನು ಆಯ್ಕೆ ಮಾಡುವುದು ಉತ್ತಮ.

ಮೊಸರು ಮತ್ತು ಖಿಚಡಿ ತಿನ್ನಬಹುದೇ?

ಮೊಸರಿನಲ್ಲಿರುವ ಕೆಲವು ಪ್ರಯೋಜನಕಾರಿ ಬ್ಯಾಕ್ಟೀರಿಯಾಗಳು ಕರುಳಿನ ಆರೋಗ್ಯಕ್ಕೆ ನೆರವಾಗಬಹುದು. ಆದರೆ ಕೆಲವರಿಗೆ ಅತಿಸಾರದ ಸಂದರ್ಭದಲ್ಲಿ ಹಾಲಿನ ಉತ್ಪನ್ನಗಳು ಅಸ್ವಸ್ಥತೆಯನ್ನು ಹೆಚ್ಚಿಸಬಹುದು. ಮೊಸರು ಸೇವಿಸಿದ ನಂತರ ತೊಂದರೆ ಹೆಚ್ಚಾದರೆ ಅದನ್ನು ತಪ್ಪಿಸಿ. ಅಕ್ಕಿ ಮತ್ತು ಹೆಸರುಬೇಳೆಯಿಂದ ತಯಾರಿಸಿದ ಖಿಚಡಿ ಸುಲಭವಾಗಿ ಜೀರ್ಣವಾಗುವ ಆಹಾರವಾಗಿದೆ. ಇದರಿಂದ ಕಾರ್ಬೋಹೈಡ್ರೇಟ್ ಮತ್ತು ಪ್ರೋಟೀನ್ ದೊರೆಯುತ್ತದೆ. ಕಡಿಮೆ ಮಸಾಲೆ ಮತ್ತು ಕಡಿಮೆ ಎಣ್ಣೆ ಬಳಸಿ ತಯಾರಿಸಿದ ಖಿಚಡಿಯನ್ನು ಸೇವಿಸಬಹುದು.

ಇದನ್ನೂ ಓದಿ: ಮಲಬದ್ಧತೆಯ ಸಮಸ್ಯೆ ಕಾಡುತ್ತಿದ್ದರೆ ಆಹಾರ ಮತ್ತು ಜೀವನಶೈಲಿಯಲ್ಲಿ ಈ ಬದಲಾವಣೆಗಳನ್ನು ಮಾಡಿ

ನೀರಿನ ಕೊರತೆ ತಡೆಯಲು ಏನು ಮಾಡಬೇಕು?

ಅತಿಸಾರದ ಸಮಯದಲ್ಲಿ ದೇಹದಲ್ಲಿನ ನೀರು ಮತ್ತು ಲವಣಗಳ ಕೊರತೆಯನ್ನು ತುಂಬಲು ಓಆರ್‌ಎಸ್‌ (ORS) ದ್ರಾವಣ ಬಹಳ ಮುಖ್ಯ. ಔಷಧ ಅಂಗಡಿಯಲ್ಲಿ ದೊರೆಯುವ ಓಆರ್‌ಎಸ್‌ ಪ್ಯಾಕೆಟ್‌ ಅನ್ನು ಸೂಚಿಸಿರುವ ಪ್ರಮಾಣದ ಶುದ್ಧ ನೀರಿನಲ್ಲಿ ಬೆರೆಸಿ ಕುಡಿಯಬೇಕು. ತೆಂಗಿನಕಾಯಿ ನೀರು ಮತ್ತು ಸಾಮಾನ್ಯ ನೀರು ದ್ರವಾಂಶವನ್ನು ಒದಗಿಸಬಹುದು. ಆದರೆ ತೀವ್ರ ಅತಿಸಾರದ ಸಂದರ್ಭದಲ್ಲಿ ಇವು ಓಆರ್‌ಎಸ್‌ಗೆ ಪರ್ಯಾಯವಲ್ಲ. ನಿಂಬೆ ನೀರು ಕುಡಿಯಬಹುದು. ಆದರೆ ಹೆಚ್ಚು ಸಕ್ಕರೆ ಸೇರಿಸಿದ ಪಾನೀಯಗಳು ಅತಿಸಾರವನ್ನು ಹೆಚ್ಚಿಸಬಹುದು. ಹೀಗಾಗಿ ಸಕ್ಕರೆ ಪ್ರಮಾಣದ ಬಗ್ಗೆ ಎಚ್ಚರಿಕೆ ವಹಿಸಬೇಕು.

ಯಾವಾಗ ವೈದ್ಯರನ್ನು ಸಂಪರ್ಕಿಸಬೇಕು?

ಅತಿಸಾರ ಮುಂದುವರಿದರೆ, ಮಲದಲ್ಲಿ ರಕ್ತ ಕಂಡುಬಂದರೆ, ತೀವ್ರ ಹೊಟ್ಟೆನೋವು ಅಥವಾ ಜ್ವರ ಕಾಣಿಸಿಕೊಂಡರೆ ವೈದ್ಯರನ್ನು ಸಂಪರ್ಕಿಸಿ. ಮೂತ್ರ ಕಡಿಮೆಯಾಗುವುದು, ತೀವ್ರ ಬಾಯಾರಿಕೆ, ತಲೆಸುತ್ತು ಅಥವಾ ಅತಿಯಾದ ನಿಶ್ಶಕ್ತಿ ನಿರ್ಜಲೀಕರಣದ ಲಕ್ಷಣಗಳಾಗಿರಬಹುದು. ಇಂತಹ ಸಂದರ್ಭಗಳಲ್ಲಿ ತಕ್ಷಣ ವೈದ್ಯಕೀಯ ನೆರವು ಪಡೆಯಬೇಕು.

ಗಮನಿಸಿ: ಈ ಮಾಹಿತಿ ಸಾಮಾನ್ಯ ಆರೋಗ್ಯ ಜಾಗೃತಿಗಾಗಿ ಮಾತ್ರ. ಅತಿಸಾರ ತೀವ್ರವಾಗಿದ್ದರೆ ಅಥವಾ ಕಡಿಮೆಯಾಗದಿದ್ದರೆ ವೈದ್ಯರ ಸಲಹೆ ಪಡೆಯುವುದು ಅಗತ್ಯ.

ಆರೋಗ್ಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ