Food Divorce Trend: ಒಂದೇ ಮನೆಯಲ್ಲಿ ವಾಸ, ಆದರೆ ಊಟ ಮಾತ್ರ ಬೇರೆ! ಇದರ ಅರ್ಥವೇನು?

ಗಂಡ-ಹೆಂಡತಿ ಎಂದರೆ ಒಟ್ಟಿಗೆ ಸಮಯ ಕಳೆಯುವುದು, ಒಟ್ಟಿಗೆ ಊಟ ಮಾಡುವುದು ಎಂಬುದು ಭಾರತೀಯ ಕುಟುಂಬಗಳಲ್ಲಿ ಸಾಮಾನ್ಯ. ಆದರೆ ಬದಲಾಗುತ್ತಿರುವ ಜೀವನಶೈಲಿ, ವಿಭಿನ್ನ ಆಹಾರ ಪದ್ಧತಿ ಮತ್ತು ಫಿಟ್ನೆಸ್ ಗುರಿಗಳ ನಡುವೆ ಈಗ ಫುಡ್ ಡಿವೋರ್ಸ್ (Food Divorce) ಎಂಬ ಹೊಸ ಟ್ರೆಂಡ್ ಚರ್ಚೆಗೆ ಬಂದಿದೆ. ಹೆಸರನ್ನು ಕೇಳಿ ಗಾಬರಿಯಾಗಬೇಕಿಲ್ಲ. ಫುಡ್ ಡಿವೋರ್ಸ್ ಎಂದರೆ ದಂಪತಿಗಳು ಪರಸ್ಪರ ವಿಚ್ಛೇದನ ಪಡೆಯುವುದು ಎಂದಲ್ಲ. ಬದಲಿಗೆ, ಒಂದೇ ಮನೆಯಲ್ಲಿ ವಾಸಿಸುತ್ತಿದ್ದರೂ ತಮ್ಮ ತಮ್ಮ ಆರೋಗ್ಯ, ರುಚಿ, ಸಮಯ ಮತ್ತು ಆಹಾರ ಅಗತ್ಯಗಳಿಗೆ ಅನುಗುಣವಾಗಿ ಬೇರೆಬೇರೆ ಆಹಾರ ಸೇವಿಸುವುದು.

ಫುಡ್ ಡಿವೋರ್ಸ್ ಎಂದರೇನು?

ಫುಡ್ ಡಿವೋರ್ಸ್ ಎನ್ನುವುದು ಸಂಬಂಧ ಮುರಿದುಕೊಳ್ಳುವುದಕ್ಕೆ ಸಂಬಂಧಿಸಿದ ಪದವಲ್ಲ. ದಂಪತಿಗಳು ತಮ್ಮ ಆಹಾರದ ಆಯ್ಕೆಯಲ್ಲಿ ಸ್ವಾತಂತ್ರ್ಯ ಹೊಂದುವುದೇ ಇದರ ಅರ್ಥ. ಉದಾಹರಣೆಗೆ, ಒಬ್ಬರಿಗೆ ಮನೆಯ ಸಾಂಪ್ರದಾಯಿಕ ಊಟ ಇಷ್ಟವಿದ್ದರೆ ಮತ್ತೊಬ್ಬರಿಗೆ ಸಲಾಡ್, ಪ್ರೋಟೀನ್‌ಯುಕ್ತ ಆಹಾರ ಅಥವಾ ಹೊರಗಿನ ಆಹಾರ ಇಷ್ಟವಾಗಬಹುದು. ಪ್ರತಿಯೊಬ್ಬರೂ ತಮ್ಮ ಅಗತ್ಯಕ್ಕೆ ತಕ್ಕಂತೆ ಆಹಾರ ಆಯ್ಕೆ ಮಾಡಿಕೊಳ್ಳುತ್ತಾರೆ. ಅಂದರೆ ಸಂಬಂಧ ಒಂದೇ, ಆದರೆ ಆಹಾರದ ಆಯ್ಕೆ ಮಾತ್ರ ಬೇರೆ.

ಈ ಟ್ರೆಂಡ್ ಏಕೆ ಹೆಚ್ಚುತ್ತಿದೆ?

ವಿಭಿನ್ನ ಫಿಟ್ನೆಸ್ ಗುರಿಗಳು: ಪ್ರತಿಯೊಬ್ಬರ ದೇಹದ ಅಗತ್ಯ ಒಂದೇ ಆಗಿರುವುದಿಲ್ಲ. ಒಬ್ಬರು ತೂಕ ಇಳಿಸಿಕೊಳ್ಳಲು ಪ್ರಯತ್ನಿಸುತ್ತಿದ್ದರೆ, ಮತ್ತೊಬ್ಬರು ಸ್ನಾಯುಗಳನ್ನು ಹೆಚ್ಚಿಸಲು ಹೆಚ್ಚಿನ ಪ್ರೋಟೀನ್ ಸೇವಿಸುತ್ತಿರಬಹುದು. ಹೀಗಾಗಿ ಇಬ್ಬರೂ ಒಂದೇ ರೀತಿಯ ಆಹಾರ ಸೇವಿಸುವ ಬದಲು ತಮ್ಮ ತಮ್ಮ ಗುರಿಗೆ ಅನುಗುಣವಾಗಿ ಊಟ ಮಾಡಿಕೊಳ್ಳಲು ಆರಂಭಿಸುತ್ತಿದ್ದಾರೆ.

ವಿಭಿನ್ನ ಆಹಾರ ರುಚಿ: ಒಬ್ಬರಿಗೆ ಮಸಾಲೆಯುಕ್ತ ಆಹಾರ ಇಷ್ಟವಾಗಬಹುದು, ಮತ್ತೊಬ್ಬರಿಗೆ ಸರಳ ಹಾಗೂ ಕಡಿಮೆ ಎಣ್ಣೆಯ ಆಹಾರ ಇಷ್ಟವಾಗಬಹುದು. ಇಂತಹ ಸಂದರ್ಭದಲ್ಲಿ ಪ್ರತಿದಿನ ಒಬ್ಬರ ಇಷ್ಟದ ಆಹಾರವನ್ನೇ ಇಬ್ಬರೂ ಸೇವಿಸುವ ಅಗತ್ಯವಿಲ್ಲ.

ಬ್ಯುಸಿ ಜೀವನಶೈಲಿ: ಇಬ್ಬರೂ ಉದ್ಯೋಗದಲ್ಲಿರುವ ದಂಪತಿಗಳಲ್ಲಿ ಕೆಲಸದ ಸಮಯ, ಶಿಫ್ಟ್‌ಗಳು ಮತ್ತು ಪ್ರಯಾಣದ ವೇಳಾಪಟ್ಟಿ ವಿಭಿನ್ನವಾಗಿರಬಹುದು. ಹೀಗಾಗಿ ಪ್ರತಿದಿನ ಒಂದೇ ಸಮಯಕ್ಕೆ ಊಟ ಮಾಡುವುದು ಸಾಧ್ಯವಾಗುವುದಿಲ್ಲ. ಇಂತಹ ಸಂದರ್ಭಗಳಲ್ಲಿ ಆಹಾರದ ವಿಚಾರಕ್ಕೆ ಜಗಳ ಮಾಡುವ ಬದಲು ತಮ್ಮ ತಮ್ಮ ಸಮಯಕ್ಕೆ ತಕ್ಕಂತೆ ಊಟ ಮಾಡಿಕೊಳ್ಳುವುದು ಸುಲಭವಾಗಬಹುದು.

ಫುಡ್ ಡಿವೋರ್ಸ್‌ನ ಪ್ರಯೋಜನಗಳೇನು?

ಈ ರೀತಿಯ ಆಹಾರ ಸ್ವಾತಂತ್ರ್ಯವನ್ನು ಪರಸ್ಪರ ಅರ್ಥಮಾಡಿಕೊಂಡು ಅನುಸರಿಸಿದರೆ ಕೆಲವು ಪ್ರಯೋಜನಗಳಿರಬಹುದು.

• ತಮ್ಮ ಆರೋಗ್ಯ ಗುರಿಗೆ ತಕ್ಕಂತೆ ಆಹಾರ ಆಯ್ಕೆ ಮಾಡಬಹುದು.
• ಆಹಾರದ ವಿಚಾರದಲ್ಲಿ ಅನಗತ್ಯ ಒತ್ತಡ ಕಡಿಮೆಯಾಗಬಹುದು.
• ವಿಭಿನ್ನ ಆಹಾರ ಅಗತ್ಯಗಳನ್ನು ಸುಲಭವಾಗಿ ನಿರ್ವಹಿಸಬಹುದು.
• ಕೆಲಸದ ಸಮಯಕ್ಕೆ ಅನುಗುಣವಾಗಿ ಊಟದ ಸಮಯವನ್ನು ಹೊಂದಿಸಿಕೊಳ್ಳಬಹುದು.
• ಒಬ್ಬರ ಆಹಾರ ಪದ್ಧತಿಯನ್ನು ಮತ್ತೊಬ್ಬರು ಬಲವಂತವಾಗಿ ಅನುಸರಿಸುವ ಅಗತ್ಯ ಇರುವುದಿಲ್ಲ.

ಫುಡ್ ಡಿವೋರ್ಸ್‌ನ ಅನಾನುಕೂಲಗಳೇನು?

ಒಟ್ಟಿಗೆ ಊಟ ಮಾಡುವುದು ಕೇವಲ ಹೊಟ್ಟೆ ತುಂಬಿಸುವ ಕ್ರಿಯೆಯಲ್ಲ. ಕುಟುಂಬದಲ್ಲಿ ಇದು ಮಾತುಕತೆ, ಭಾವನಾತ್ಮಕ ಸಂಪರ್ಕ ಮತ್ತು ಒಟ್ಟಿಗೆ ಸಮಯ ಕಳೆಯುವ ಅವಕಾಶವೂ ಆಗಿರಬಹುದು. ಪ್ರತಿದಿನವೂ ಬೇರೆಬೇರೆ ಸಮಯಕ್ಕೆ ಅಥವಾ ಬೇರೆ ಬೇರೆ ರೀತಿಯ ಊಟ ಮಾಡುವುದು ಮತ್ತು ಊಟದ ಸಮಯವನ್ನೇ ಒಟ್ಟಿಗೆ ಕಳೆಯದಿರುವುದು ದಂಪತಿಗಳ ನಡುವಿನ ಸಂವಹನವನ್ನು ಕಡಿಮೆ ಮಾಡುವ ಸಾಧ್ಯತೆ ಇದೆ. ವಿಶೇಷವಾಗಿ ಭಾರತೀಯ ಕುಟುಂಬಗಳಲ್ಲಿ ಒಟ್ಟಿಗೆ ಕುಳಿತು ಊಟ ಮಾಡುವ ಸಂಪ್ರದಾಯಕ್ಕೆ ಭಾವನಾತ್ಮಕ ಮಹತ್ವವಿದೆ. ಆದ್ದರಿಂದ ಆಹಾರ ಬೇರೆ ಇದ್ದರೂ ಸಾಧ್ಯವಾದಾಗ ಒಟ್ಟಿಗೆ ಕುಳಿತು ಊಟ ಮಾಡುವುದು ಸಂಬಂಧದ ಬಾಂಧವ್ಯವನ್ನು ಕಾಪಾಡಿಕೊಳ್ಳಲು ಸಹಾಯ ಮಾಡಬಹುದು.

ಆರೋಗ್ಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ