Health Tips: ಬೆಂಡೆಕಾಯಿ ನೋಡಿ ಮೂಗು ಮುರಿಯಬೇಡಿ; ಬಿಪಿ, ಡಯಾಬಿಟಿಸ್​ಗೆ ಇದೇ ರಾಮಬಾಣ

ಮನುಷ್ಯನಲ್ಲಿ ಆಗಾಗ ಕಾಣಿಸಿಕೊಳ್ಳುವ ಆರೋಗ್ಯ ಸಮಸ್ಯೆಗಳಿಗೆ ಮನೆಯಲ್ಲಿ ನಾವು ದಿನನಿತ್ಯ ಬಳಸುವ ವಸ್ತುಗಳಲ್ಲೇ ಪರಿಹಾರವಿರುತ್ತದೆ. ಆದರೆ, ಎಷ್ಟೋ ಬಾರಿ ಅವುಗಳ ಉಪಯೋಗ ನಮಗೆ ಗೊತ್ತಿರುವುದಿಲ್ಲ. ಬೆಂಡೆಕಾಯಿ ಹಲವು ಜನರಿಗೆ ಫೇವರಿಟ್ ತರಕಾರಿಯಾದರೆ ಇನ್ನು ಕೆಲವರು ಬೆಂಡೆಕಾಯಿಯನ್ನು ಕಂಡರೆ ಮೂಗು ಮುರಿಯುತ್ತಾರೆ. ಲೋಳೆ ಅಂಶವಿರುವ ಈ ತರಕಾರಿಯನ್ನು ಆಗಾಗ ಸೇವಿಸುವುದರಿಂದ ಜೀರ್ಣಕ್ರಿಯೆಗೆ ಬಹಳ ಸಹಕಾರಿ. ಬೆಂಡೆಕಾಯಿಯ ಪಲ್ಯ, ಸಾಸಿವೆ, ಬೆಂಡೆ ಫ್ರೈ, ಕರಿ, ಸಾಂಬಾರು ಹೀಗೆ ನಾನಾ ರೀತಿಯ ಅಡುಗೆಯನ್ನು ಮಾಡಬಹುದು. ಎಳೆಯದಾದ ಬೆಂಡೆಕಾಯಿಯನ್ನು ಹಸಿಯಾಗಿಯೂ ತಿನ್ನಬಹುದು. ಮಧುಮೇಹ (Diabetes) , ರಕ್ತದೊತ್ತಡ (BP) ಇರುವವರು ಬೆಂಡೆಕಾಯಿಯನ್ನು ತಿಂದರೆ ಆರೋಗ್ಯಕ್ಕೆ ಬಹಳ ಒಳ್ಳೆಯದು.

1. ಬೆಂಡೆಕಾಯಿಯಲ್ಲಿ ವಿಟಮಿನ್ ಬಿ, ವಿಟಮಿನ್ ಸಿ ಫೋಲಿಕ್ ಆ್ಯಸಿಡ್, ಕ್ಯಾಲ್ಷಿಯಂ, ಪೊಟ್ಯಾಸಿಯಂ ಅಂಶಗಳು ಹೆಚ್ಚಾಗಿ ಇರುವುದರಿಂದ ಇದರಲ್ಲಿ ನಮ್ಮ ದೇಹಕ್ಕೆ ಬೇಕಾದ ಲವಣಾಂಶ, ಪೌಷ್ಠಿಕಾಂಶಗಳು ಹೇರಳವಾಗಿವೆ. ಬೆಂಡೆಕಾಯಿ ಡಯಾಬಿಟಿಸ್ ಇರುವವರಿಗೆ ಬಹಳ ಉತ್ತಮವಾದ ತರಕಾರಿ ಎಂದು ಸಂಶೋಧನೆಯೇ ಹೇಳಿದೆ.

2. ಬೆಂಡೆಕಾಯಿಯಲ್ಲಿ ಹೇರಳವಾದ ಫೈಬರ್ ಅಥವಾ ನಾರಿನಂಶ ಇರುವುದರಿಂದ ಡಯಾಬಿಟಿಸ್​ಗೆ ರಾಮಬಾಣವಿದ್ದಂತೆ. ಹಾಗೇ, ರಕ್ತದ ಸಕ್ಕರೆ ಪ್ರಮಾಣವನ್ನು ಕಡಿಮೆ ಮಾಡಿ, ಜೀರ್ಣಕ್ರಿಯೆ ಸುಧಾರಿಸಲು ಕೂಡ ಸಹಕಾರಿಯಾಗಿದೆ.

3. ಡಯಾಬಿಟಿಸ್ ಇರುವರಲ್ಲಿ ಬಹುತೇಕರಲ್ಲಿ ಅಧಿಕ ಕೊಬ್ಬಿನಂಶ (ಕೊಲೆಸ್ಟ್ರಾಲ್) ಇರುತ್ತದೆ. ಅಂಥವರು ಬೆಂಡೆಕಾಯಿಯಂತಹ ಆ್ಯಂಟಿಆಕ್ಸಿಡೆಂಟ್​ ಹೆಚ್ಚಾಗಿರುವ ತರಕಾರಿಯನ್ನು ತಿನ್ನುವುದರಿಂದ ದೇಹದ ಕೊಬ್ಬಿನಾಂಶ ಕಡಿಮೆಯಾಗುತ್ತದೆ.

ಬೆಂಡೆಕಾಯಿ

4. ಬೆಂಡೆಕಾಯಿಯನ್ನು ಕೇವಲ ತರಕಾರಿಯಾಗಿ ಮಾತ್ರ ನೋಡದೆ ನಿಮ್ಮ ದಿನನಿತ್ಯದ ಡಯಟ್​ನಲ್ಲಿಯೂ ಬಳಸಿಕೊಳ್ಳಬಹುದು. ಬೆಂಡೆಕಾಯಿಯನ್ನು ಚೆನ್ನಾಗಿ ತೊಳೆದು, ರಾತ್ರಿ ಪೂರ್ತಿ ಸ್ವಚ್ಛವಾದ ನೀರಿನಲ್ಲಿ ನೆನೆಸಿಟ್ಟು ಬೆಳಗ್ಗೆ ಆ ನೀರನ್ನು ಕುಡಿದರೆ ರಕ್ತ ಹೀನತೆಯನ್ನು ತಡೆಗಟ್ಟಬಹುದು.

5. ಬೆಂಡೆಕಾಯಿಯ ನೀರನ್ನು ಕುಡಿಯುವುದರಿಂದ ದೇಹದಲ್ಲಿ ಹಿಮೋಗ್ಲೋಬಿನ್ ಮಟ್ಟ ಹೆಚ್ಚಾಗುತ್ತದೆ. ಹಾಗೇ, ಗಂಟಲಿನ ಸಮಸ್ಯೆ, ಕೆಮ್ಮು ಮುಂತಾದ ಸಮಸ್ಯೆಗಳು ದೂರವಾಗುತ್ತವೆ.

6. ಮಲಬದ್ಧತೆಯ ಸಮಸ್ಯೆ ಇರುವವರು ಬೆಂಡೆಕಾಯಿಯನ್ನು ಹೆಚ್ಚಾಗಿ ಬಳಸುವುದು ಒಳ್ಳೆಯದು. ಇದರಲ್ಲಿ ನಾರಿನಂಶ ಹೆಚ್ಚಾಗಿರುವುದರಿಂದ ಬೆಂಡೆಕಾಯಿಯಿಂದ ಮಾಡಿದ ಪದಾರ್ಥಗಳ ಸೇವನೆಯಿಂದ ಮಲಬದ್ಧತೆಯ ಸಮಸ್ಯೆ ಪರಿಹಾರವಾಗುತ್ತದೆ.

7. ಬೆಂಡೆಕಾಯಿಯು ನಮ್ಮ ಮೂಳೆಗಳನ್ನು ಬಲಗೊಳಿಸಲು ಸಹಕಾರಿ. ಹಾಗೇ, ಚರ್ಮ, ಕೂದಲಿನ ಆರೋಗ್ಯ ಕೂಡ ಸುಧಾರಿಸುವ ಶಕ್ತಿ ಈ ತರಕಾರಿಯಲ್ಲಿದೆ. ಹೀಗಾಗಿ, ಮಹಿಳೆಯರು ಹೆಚ್ಚಾಗಿ ಬೆಂಡೆಕಾಯಿಯ ಪದಾರ್ಥಗಳನ್ನು ತಿನ್ನುವುದರಿಂದ ಬಹಳಷ್ಟು ಉಪಯೋಗಗಳನ್ನು ಪಡೆಯಲು ಸಾಧ್ಯವಿದೆ.

ಇದನ್ನೂ ಓದಿ: Health Tips: ನಿಮ್ಮ‌ ಮೂಳೆಗಳನ್ನು ಶಕ್ತಿಯುತವಾಗಿಸಲು ಏನೆಲ್ಲಾ ಮಾಡಬಹುದು?

Health Tips: ನೀವು ಅಧಿಕ ರಕ್ತದೊತ್ತಡದಿಂದ ಬಳಲುತ್ತಿದ್ದರೆ ಬೀಟ್​ರೂಟ್ ಉಪಯೋಗದ ಬಗ್ಗೆ ತಿಳಿಯಲೇಬೇಕು..

(Health Tips: How is Ladies Finger beneficial for Diabetes and BP Okra Nutrition and Health Benefits)

Published On - 7:40 pm, Mon, 2 August 21