ಮಂಕಿಪಾಕ್ಸ್: ಯುರೋಪ್​​​ನಲ್ಲಿ ತುರ್ತು ಕ್ರಮ ಕೈಗೊಳ್ಳಲು ವಿಶ್ವ ಆರೋಗ್ಯ ಸಂಸ್ಥೆ ಕರೆ

ಲಂಡನ್: ಮಂಕಿಪಾಕ್ಸ್ (monkeypox) ಪ್ರಕರಣ ಹೆಚ್ಚಾಗುತ್ತಿದ್ದಂತೆ ಯುರೋಪ್​​ನಲ್ಲಿ(Europe) ತುರ್ತು ಕ್ರಮ ಕೈಗೊಳ್ಳಲು ವಿಶ್ವ ಆರೋಗ್ಯ ಸಂಸ್ಥೆ(WHO) ಕರೆ ನೀಡಿದೆ. ಕಳೆದ ಎರಡು ವಾರಗಳಲ್ಲಿ ಈ ಪ್ರದೇಶದಲ್ಲಿ ಮಂಕಿಪಾಕ್ಸ್ ಪ್ರಕರಣಗಳು ಮೂರು ಪಟ್ಟು ಹೆಚ್ಚಾಗಿದೆ ಎಂದು ವಿಶ್ವ ಆರೋಗ್ಯ ಸಂಸ್ಥೆಯ ಯುರೋಪ್ ಮುಖ್ಯಸ್ಥರು ಶುಕ್ರವಾರ ಎಚ್ಚರಿಸಿದ್ದಾರೆ. ಈ ಅಪರೂಪದ ಕಾಯಿಲೆ ಖಂಡದಲ್ಲಿ ಬೇರೂರದಂತೆ ಖಚಿತಪಡಿಸಿಕೊಳ್ಳಲು ಹೆಚ್ಚಿನ ಕ್ರಮ ಕೈಗೊಳ್ಳುವಂತೆ ಅವರು ಇತರ ದೇಶಗಳನ್ನು ಒತ್ತಾಯಿಸಿದರು. ಏಕಾಏಕಿ ಪ್ರಕರಣಗಳು ಹೆಚ್ಚುತ್ತಿದ್ದು ಜಾಗತಿಕ ಆರೋಗ್ಯ ತುರ್ತುಸ್ಥಿತಿ ಎಂದು ಘೋಷಿಸಲು ಆಗಿಲ್ಲ ಎಂದು ಕಳೆದ ವಾರ ಯುಎನ್ ಆರೋಗ್ಯ ಏಜೆನ್ಸಿಯ ನಿರ್ಧಾರದ ಹೊರತಾಗಿಯೂ ಹೆಚ್ಚಿನ ಪ್ರಯತ್ನಗಳ ಅಗತ್ಯವಿದೆ ಎಂದು ಡಾ. ಹ್ಯಾನ್ಸ್ ಕ್ಲೂಗೆ ಹೇಳಿಕೆಯಲ್ಲಿ ತಿಳಿಸಿದ್ದಾರೆ. “ಈ ರೋಗದ ಹರಡುವಿಕೆಯನ್ನು  ತಡೆಯುವುದಕ್ಕಾಗಿ  ತುರ್ತು ಮತ್ತು ಸಂಘಟಿತ ಕ್ರಮವು ಕಡ್ಡಾಯವಾಗಿದೆ” ಎಂದು ಕ್ಲೂಗೆ ಹೇಳಿದರು.

ಇಲ್ಲಿಯವರೆಗೆ ವಿಶ್ವದಾದ್ಯಂತ 51 ದೇಶಗಳಿಂದ 5,000 ಕ್ಕೂ ಹೆಚ್ಚು ಮಂಕಿಪಾಕ್ಸ್ ಪ್ರಕರಣಗಳು ವರದಿಯಾಗಿವೆ ಎಂದು ಯುಎಸ್ ಸೆಂಟರ್ಸ್ ಫಾರ್ ಡಿಸೀಸ್ ಕಂಟ್ರೋಲ್ ಅಂಡ್ ಪ್ರಿವೆನ್ಷನ್ ತಿಳಿಸಿದೆ. ಯುರೋಪ್‌ನಲ್ಲಿನ ಸೋಂಕುಗಳ ಸಂಖ್ಯೆಯು ಜಾಗತಿಕ ಒಟ್ಟು ಮೊತ್ತದ ಶೇ 90 ಅನ್ನು ಪ್ರತಿನಿಧಿಸುತ್ತದೆ ಎಂದು ಕ್ಲೂಗೆ ಹೇಳಿದ್ದಾರೆ. ಯುರೋಪಿಯನ್ ಪ್ರದೇಶದ 31 ದೇಶಗಳಲ್ಲಿ  ಈ ಪ್ರಕರಣ ಕಂಡು ಬಂದಿದೆ.

ವಿಶ್ವ ಆರೋಗ್ಯ  ಸಂಸ್ಥೆಗೆ ವರದಿಯಾದ ಡೇಟಾ ಪ್ರಕಾರ ಶೇ 99 ಪ್ರಕರಣಗಳು ಪುರುಷರಲ್ಲಿ ಕಂಡು ಬಂದಿದೆ ಎಂದು ತೋರಿಸುತ್ತದೆ.  ಅವುಗಳಲ್ಲಿ ಹೆಚ್ಚಿನವು ಪುರುಷರೊಂದಿಗೆ ಲೈಂಗಿಕ ಸಂಪರ್ಕ ಹೊಂದಿರುವ ಪುರುಷರಲ್ಲಿವೆ ಎಂದು ಕ್ಲೂಗೆ ಹೇಳಿದರು. ಆದರೆ ಮಕ್ಕಳು ಸೇರಿದಂತೆ ಮನೆಯ ಸಂಪರ್ಕಗಳಲ್ಲಿ ಈಗ “ಸಣ್ಣ ಸಂಖ್ಯೆಯ” ಪ್ರಕರಣಗಳಿವೆ ಎಂದು ಅವರು ಹೇಳಿದರು. ಹೆಚ್ಚಿನ ಜನರು ದದ್ದು, ಜ್ವರ, ಆಯಾಸ, ಸ್ನಾಯು ನೋವು, ವಾಂತಿ ಮತ್ತು ಶೀತ ಸೇರಿದಂತೆ ರೋಗಲಕ್ಷಣಗಳನ್ನು ವರದಿ ಮಾಡಿದ್ದಾರೆ.

ಮಂಕಿಪಾಕ್ಸ್ ಹೊಂದಿರುವ ಯಾರೊಂದಿಗಾದರೂ ನಿಕಟ ದೈಹಿಕ ಸಂಪರ್ಕದಲ್ಲಿರುವವರು ಅಥವಾ ಅವರ ಬಟ್ಟೆ ಅಥವಾ ಬೆಡ್‌ಶೀಟ್‌ಗಳು ಬಳಸುತ್ತಿದ್ದರೆ ಸೋಂಕಿನ ಅಪಾಯ ಹೆಚ್ಚು ಎಂದು ವಿಜ್ಞಾನಿಗಳು ಎಚ್ಚರಿಸಿದ್ದಾರೆ. ಮಕ್ಕಳು ಮತ್ತು ಗರ್ಭಿಣಿಯರು ಬೇಗನೆ ರೋಗಕ್ಕೆ ತುತ್ತಾಗುವ ಸಾಧ್ಯತೆ ಇದೆ ಎಂದು ಅವರು ಹೇಳಿದ್ದಾರೆ.

ಶೇ10 ರಷ್ಟು ರೋಗಿಗಳು ಚಿಕಿತ್ಸೆಗಾಗಿ ಅಥವಾ ಪ್ರತ್ಯೇಕವಾಗಿರಲು ಆಸ್ಪತ್ರೆಗೆ ದಾಖಲಾಗಿದ್ದಾರೆ. ಒಬ್ಬ ವ್ಯಕ್ತಿಯನ್ನು ತೀವ್ರ ನಿಗಾ ಘಟಕಕ್ಕೆ ದಾಖಲಿಸಲಾಗಿದೆ. ಯಾವುದೇ ಸಾವುಗಳು ವರದಿಯಾಗಿಲ್ಲ.

Published On - 7:17 pm, Fri, 1 July 22