ವಿಚಿತ್ರ ವಾಸನೆಯ ನೋನಿ ಹಣ್ಣಿಗೆ ಇಷ್ಟೊಂದು ಆರೋಗ್ಯ ಪ್ರಯೋಜನಗಳಿವೆಯೇ? ಆರೋಗ್ಯ ತಜ್ಞರು ಹೇಳುವುದೇನು?

ಹೊರನೋಟಕ್ಕೆ ವಿಚಿತ್ರವಾಗಿ ಕಾಣುವ, ವಿಶಿಷ್ಟ ವಾಸನೆ ಹೊಂದಿರುವ ನೋನಿ ಹಣ್ಣು (Noni Fruit) ಇತ್ತೀಚಿನ ದಿನಗಳಲ್ಲಿ ಆರೋಗ್ಯದ ಬಗ್ಗೆ ಹೆಚ್ಚಿನ ಆಸಕ್ತಿ ವಹಿಸುವವರ ಗಮನ ಸೆಳೆಯುತ್ತಿದೆ. ಹವಾಯಿ ಮತ್ತು ಪಾಲಿನೇಷ್ಯನ್ ಪ್ರದೇಶಗಳಲ್ಲಿ ಸಾಂಪ್ರದಾಯಿಕವಾಗಿ ಬಳಸಲಾಗುತ್ತಿರುವ ಈ ಹಣ್ಣನ್ನು Morinda citrifolia ಎಂದು ಕರೆಯಲಾಗುತ್ತದೆ. ನೋನಿ ಜ್ಯೂಸ್‌ನ್ನು ಆರೋಗ್ಯವರ್ಧಕ ಪಾನೀಯ ಎಂದು ಹೇಳಲಾಗುತ್ತದೆ. ಹಾಗಾದರೆ ಇದು ಆರೋಗ್ಯಕ್ಕೆ ಹೇಗೆ ಪೂರಕ, ಯಾವ ರೀತಿಯ ಸಮಸ್ಯೆಗಳನ್ನು ನಿವಾರಿಸುತ್ತದೆ ಎಂಬುದನ್ನು ಸ್ಟೋರಿ ಮೂಲಕ ತಿಳಿದುಕೊಳ್ಳಿ.

ನೋನಿ ಹಣ್ಣು ಎಂದರೇನು?

ನೋನಿ ಹಣ್ಣು Morinda citrifolia ಎಂಬ ಸಸ್ಯದಿಂದ ದೊರೆಯುತ್ತದೆ. ಇದು ದಕ್ಷಿಣ ಮತ್ತು ಆಗ್ನೇಯ ಏಷ್ಯಾ, ಪೆಸಿಫಿಕ್ ದ್ವೀಪಗಳು ಮತ್ತು ಆಸ್ಟ್ರೇಲಿಯಾದ ಕೆಲವು ಪ್ರದೇಶಗಳಲ್ಲಿ ಕಂಡುಬರುತ್ತದೆ. ಇದರ ಹಣ್ಣು ಸಾಮಾನ್ಯವಾಗಿ ಹಸಿರು ಅಥವಾ ಬಿಳಿ ಬಣ್ಣದಲ್ಲಿದ್ದು, ಪಕ್ವವಾದಾಗ ವಿಶಿಷ್ಟವಾದ ವಾಸನೆ ಹೊಂದಿರುತ್ತದೆ. ಕೆಲವು ಪ್ರದೇಶಗಳಲ್ಲಿ ಇದರ ಹಣ್ಣು, ಎಲೆ ಮತ್ತು ಬೇರುಗಳನ್ನು ಸಾಂಪ್ರದಾಯಿಕ ಚಿಕಿತ್ಸಾ ಪದ್ಧತಿಗಳಲ್ಲಿ ಬಳಸಲಾಗಿದೆ. ಇತ್ತೀಚೆಗೆ ಮಾರುಕಟ್ಟೆಯಲ್ಲಿ ನೋನಿ ಜ್ಯೂಸ್, ನೋನಿ ಎಸ್ಟ್ರಾಕ್ಟ್ ಮತ್ತು ಸಪ್ಲಿಮೆಂಟ್ ರೂಪದಲ್ಲಿಯೂ ಇದು ಲಭ್ಯವಿದೆ.

ಹಾನಿಗೊಳಗಾದ ಕೋಶಗಳನ್ನು ರಿಪೇರಿ ಮಾಡುತ್ತದೆ ಎಂಬುದು ಎಷ್ಟು ಸತ್ಯ?

ನೋನಿ ಹಣ್ಣಿನ ಬಗ್ಗೆ ಹೆಚ್ಚು ಪ್ರಚಾರವಾಗಿರುವ ಹೇಳಿಕೆಗಳಲ್ಲಿ ಇದು ಕೂಡ ಒಂದು. ನೋನಿಯಲ್ಲಿ ವಿವಿಧ ಸಸ್ಯಸಂಬಂಧಿ ಸಂಯುಕ್ತಗಳು ಮತ್ತು ಆ್ಯಂಟಿಆಕ್ಸಿಡೆಂಟ್‌ಗಳು ಇವೆ. ಇವು ದೇಹದಲ್ಲಿನ ಓಕ್ಸಿಡೇಟಿವ್ ಸ್ಟ್ರೆಸ್ (oxidative stress) ವಿರುದ್ಧ ರಕ್ಷಣೆ ನೀಡಲು ಕೆಲವು ರೀತಿಯಲ್ಲಿ ಸಹಾಯ ಮಾಡಬಹುದು ಎಂಬುದು ಆರಂಭಿಕ ಸಂಶೋಧನೆಗಳಿಂದ ತಿಳಿದು ಬಂದಿದೆ. ಹಾನಿಗೊಳಗಾದ ಕೋಶಗಳನ್ನು ರಿಪೇರಿ ಮಾಡುತ್ತದೆ ಎಂಬುದಕ್ಕೆ ಸಾಕಷ್ಟು ಪುರಾವೆಗಳಿಲ್ಲ. ಈ ಬಗ್ಗೆ ಹೆಚ್ಚಿನ ಸಂಶೋಧನೆ ನಡೆಯಬೇಕಾಗಿದೆ.

ರಕ್ತದೊತ್ತಡ ಮತ್ತು ಹೃದಯದ ಆರೋಗ್ಯಕ್ಕೆ ಸಹಾಯವಾಗುತ್ತದೆಯೇ?

ನೋನಿ ಉತ್ಪನ್ನಗಳು ರಕ್ತದೊತ್ತಡದ ಮೇಲೆ ಪರಿಣಾಮ ಬೀರುತ್ತವೆ ಎಂಬುದರ ಕುರಿತು ಕೆಲವು ಸಣ್ಣ ಪ್ರಮಾಣದ ಅಧ್ಯಯನಗಳು ನಡೆದಿವೆ. ಆದರೆ ನೋನಿ ಜ್ಯೂಸ್‌ನ್ನು ರಕ್ತದೊತ್ತಡದ ಔಷಧಿಗೆ ಪರ್ಯಾಯವಾಗಿ ಬಳಸಲು ಸಾಧ್ಯವಿಲ್ಲ. ಹೈ ಬಿಪಿ ಇರುವವರು ವೈದ್ಯರು ಸೂಚಿಸಿರುವ ಔಷಧಿ ಮತ್ತು ಆಹಾರ ಪದ್ಧತಿಯನ್ನು ಮುಂದುವರಿಸಬೇಕು. ನೋನಿ ಜ್ಯೂಸ್ ಸೇವಿಸಲು ಬಯಸಿದರೆ, ವಿಶೇಷವಾಗಿ ಈಗಾಗಲೇ ಔಷಧಿ ಸೇವಿಸುತ್ತಿದ್ದರೆ, ವೈದ್ಯರ ಸಲಹೆ ಪಡೆಯುವುದು ಒಳ್ಳೆಯದು.

ಆ್ಯಂಟಿಆಕ್ಸಿಡೆಂಟ್‌ಗಳಿವೆಯೇ?

ಹೌದು. ನೋನಿ ಹಣ್ಣಿನಲ್ಲಿ ವಿವಿಧ ಸಸ್ಯಸಂಬಂಧಿ ಸಂಯುಕ್ತಗಳು ಮತ್ತು ಆ್ಯಂಟಿಆಕ್ಸಿಡೆಂಟ್‌ಗಳು ಕಂಡುಬರುತ್ತವೆ. ಆ್ಯಂಟಿಆಕ್ಸಿಡೆಂಟ್‌ಗಳು ದೇಹದಲ್ಲಿನ ಓಕ್ಸಿಡೇಟಿವ್ ಸ್ಟ್ರೆಸ್ ಅನ್ನು ನಿಯಂತ್ರಿಸುವ ಪ್ರಕ್ರಿಯೆಗಳಲ್ಲಿ ಪಾತ್ರವಹಿಸುತ್ತವೆ. ಆದರೆ ಇದನ್ನು ಆಧರಿಸಿ ನೋನಿ ಹಣ್ಣು ವೃದ್ಧಾಪ್ಯವನ್ನು ತಡೆಯುತ್ತದೆ, ಸುಕ್ಕುಗಳನ್ನು ನಿವಾರಿಸುತ್ತದೆ ಎಂದು ಹೇಳಲು ಸಾಕಷ್ಟು ಪುರಾವೆಗಳಿಲ್ಲ. ಚರ್ಮದ ಆರೋಗ್ಯಕ್ಕೆ ಸಮತೋಲಿತ ಆಹಾರ, ಸರಿಯಾಗಿ ನಿದ್ರೆ ಮಾಡುವುದು ಹೆಚ್ಚು ಮುಖ್ಯ.

ಇದನ್ನೂ ಓದಿ: ಬೆಂಡೆಕಾಯಿ ಎಲ್ಲರಿಗೂ ಒಳ್ಳೆಯದಲ್ಲವೇ? ಈ ಔಷಧಿ ಸೇವಿಸುವವರು ತಿಳಿಯಬೇಕಾದ ವಿಷಯಗಳು!

ಖಾಲಿ ಹೊಟ್ಟೆಯಲ್ಲಿ ನೋನಿ ಜ್ಯೂಸ್ ಕುಡಿಯಬಹುದೇ?

ಕೆಲವು ಕಡೆಗಳಲ್ಲಿ ನೋನಿ ಜ್ಯೂಸ್‌ನ್ನು ಬೆಳಗ್ಗೆ ಖಾಲಿ ಹೊಟ್ಟೆಯಲ್ಲಿ ಕುಡಿಯಲು ಸಲಹೆ ನೀಡಲಾಗುತ್ತದೆ. ಆದರೆ ಖಾಲಿ ಹೊಟ್ಟೆಯಲ್ಲಿ ಸೇವಿಸಿದರೆ ಹೆಚ್ಚು ಆರೋಗ್ಯ ಪ್ರಯೋಜನ ಸಿಗುತ್ತದೆ ಎಂಬುದಕ್ಕೆ ದೃಢವಾದ ವೈಜ್ಞಾನಿಕ ಸಾಕ್ಷ್ಯವಿಲ್ಲ. ಅದನ್ನು ಸೇವಿಸಬೇಕೆಂದಿದ್ದರೆ ಉತ್ಪನ್ನದ ಲೇಬಲ್‌ನಲ್ಲಿ ಸೂಚಿಸಿರುವ ಪ್ರಮಾಣವನ್ನು ಪಾಲಿಸುವುದು ಉತ್ತಮ. ಹೆಚ್ಚು ಪ್ರಮಾಣದಲ್ಲಿ ಸೇವಿಸುವುದರಿಂದ ಹೆಚ್ಚುವರಿ ಆರೋಗ್ಯ ಪ್ರಯೋಜನ ಸಿಗುತ್ತದೆ ಎಂಬುದಿಲ್ಲ.

ಕಿಡ್ನಿ ಸಮಸ್ಯೆ ಇರುವವರು ಬಹಳ ಎಚ್ಚರ ವಹಿಸಿ!

ನೋನಿ ಉತ್ಪನ್ನಗಳನ್ನು ಎಲ್ಲರೂ ನಿರ್ಬಂಧವಿಲ್ಲದೆ ಸೇವಿಸಬೇಕು ಎನ್ನುವುದು ಸರಿಯಲ್ಲ. ನೋನಿ ಜ್ಯೂಸ್‌ನಲ್ಲಿ ಪೊಟ್ಯಾಸಿಯಂ ಪ್ರಮಾಣ ಗಮನಾರ್ಹವಾಗಿರಬಹುದು. ಕೆಲವು ವರದಿಗಳಲ್ಲಿ ಹೆಚ್ಚಿನ ಪ್ರಮಾಣದ ನೋನಿ ಜ್ಯೂಸ್ ಸೇವನೆಯೊಂದಿಗೆ ಕಿಡ್ನಿ ಸಮಸ್ಯೆಗಳು ಎಚ್ಚರ ವಹಿಸಬೇಕು ಎಂಬುದು ವ್ಯಕ್ತವಾಗಿದೆ. ಆದರೆ ಅದಕ್ಕೂ ಮೊದಲು ನೋನಿ ಜ್ಯೂಸ್ ಅಥವಾ ಸಪ್ಲಿಮೆಂಟ್ ಆರಂಭಿಸುವ ಮೊದಲು ವೈದ್ಯರ ಸಲಹೆ ಪಡೆಯಬೇಕು.

ಔಷಧಿ ಸೇವಿಸುವವರು ಏಕೆ ಜಾಗರೂಕರಾಗಬೇಕು?

ನೋನಿ ಕೆಲವು ಔಷಧಿಗಳೊಂದಿಗೆ ಪರಸ್ಪರ ಪ್ರತಿಕ್ರಿಯಿಸುವ ಸಾಧ್ಯತೆ ಇರುವುದರಿಂದ ಬಿಪಿ, ಕಿಡ್ನಿ, ಲಿವರ್ ಅಥವಾ ಇತರ ದೀರ್ಘಕಾಲೀನ ಕಾಯಿಲೆಗಳಿಗೆ ಔಷಧಿ ಸೇವಿಸುವವರು ವೈದ್ಯರಿಗೆ ನೋನಿ ಜ್ಯೂಸ್ ಅಥವಾ ಸಪ್ಲಿಮೆಂಟ್ ಸೇವಿಸುವ ಬಗ್ಗೆ ತಿಳಿಸಬೇಕು.

ನೋನಿ ಹಣ್ಣಿನಲ್ಲಿ ವಿವಿಧ ಸಸ್ಯಸಂಬಂಧಿ ಸಂಯುಕ್ತಗಳು ಮತ್ತು ಆ್ಯಂಟಿಆಕ್ಸಿಡೆಂಟ್‌ಗಳು ಕಂಡುಬರುತ್ತವೆ. ಕೆಲವು ಸಣ್ಣ ಅಧ್ಯಯನಗಳಲ್ಲಿ ನೋನಿ ಉತ್ಪನ್ನಗಳು ಆರೋಗ್ಯದ ಮೇಲೆ ಬೀರುವ ಪರಿಣಾಮಗಳ ಬಗ್ಗೆ ಪರಿಶೀಲಿಸಲಾಗಿದೆ. ಆದರೆ ಯಾವುದೇ ಗಂಭೀರ ಕಾಯಿಲೆಯನ್ನು ಗುಣಪಡಿಸುತ್ತದೆ ಅಥವಾ ಹಾನಿಗೊಳಗಾದ ಕೋಶಗಳನ್ನು ಮತ್ತೆ ಸಂಪೂರ್ಣವಾಗಿ ಸರಿಪಡಿಸುತ್ತದೆ ಎಂದು ಹೇಳಲು ಪ್ರಸ್ತುತ ಸಾಕಷ್ಟು ವೈಜ್ಞಾನಿಕ ಸಾಕ್ಷ್ಯವಿಲ್ಲ.

ಸೂಚನೆ: ಈ ಲೇಖನವು ಆರೋಗ್ಯ ಮಾಹಿತಿಗಾಗಿ ಮಾತ್ರ. ಯಾವುದೇ ಔಷಧಿ ಸೇವಿಸುವುದು ಅಥವಾ ಹೊಸ ಸಪ್ಲಿಮೆಂಟ್ ಆರಂಭಿಸುವ ಮೊದಲು ಅರ್ಹ ವೈದ್ಯರ ಸಲಹೆ ಪಡೆಯುವುದು ಬಹಳ ಒಳ್ಳೆಯದು.

ಆರೋಗ್ಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ