‘ಬೆಂಗಳೂರು ಭಾರತದ ಯುರೋಪ್ ಇದ್ದಂತೆ! ಸಿಲಿಕಾನ್ ಸಿಟಿಗೆ ಫಿದಾ ಆದ ಯುವತಿಯ ವಿಡಿಯೋ ವೈರಲ್
ಇನ್ಸ್ಟಾಗ್ರಾಮ್ ಯುವತಿಯೊಬ್ಬರು ಬೆಂಗಳೂರನ್ನು ಭಾರತದ 'ಯುರೋಪ್' ಎಂದು ಬಣ್ಣಿಸಿರುವ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗಿದೆ. ತಾನು ಭಾರತದ ಹಲವು ನಗರಗಳಿಗೆ ಭೇಟಿ ನೀಡಿದ್ದರೂ, ಬೆಂಗಳೂರಿನಲ್ಲಿರುವ ಉದ್ಯೋಗಾವಕಾಶ, ಅದ್ಭುತ ಹವಾಮಾನ ಮತ್ತು ಇಲ್ಲಿನ ಪರಿಸರ ಬೇರೆಲ್ಲೂ ಇಲ್ಲ ಎಂದು ಅವರು ಹೇಳಿದ್ದಾರೆ. ನಗರದಲ್ಲಿ ಟ್ರಾಫಿಕ್ ಸಮಸ್ಯೆ ಇದ್ದರೂ, ಇಲ್ಲಿನ ಸೌಂದರ್ಯಕ್ಕೆ ಮನಸೋತು ಬೆಂಗಳೂರಿಗೆ 5/5 ರೇಟಿಂಗ್ ನೀಡಿದ್ದಾರೆ.
Updated on: Jul 05, 2026 | 11:03 AM
ಮುಖ್ಯಾಂಶಗಳು
- ಅದ್ಭುತ ಹವಾಮಾನ ಮತ್ತು ಉದ್ಯೋಗಾವಕಾಶಕ್ಕೆ ಮನಸೋತು ಬೆಂಗಳೂರನ್ನು ಯುರೋಪ್ ಎಂದ ಯುವತಿ.
- ಟ್ರಾಫಿಕ್ ಸಮಸ್ಯೆ ಇದ್ದರೂ ಸಿಲಿಕಾನ್ ಸಿಟಿಗೆ ಐದಕ್ಕೆ ಐದು ರೇಟಿಂಗ್ ನೀಡಿದ ನೆಟ್ಟಿಗರು.
- ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆದ ಇನ್ಸ್ಟಾಗ್ರಾಮ್ ಪ್ರಭಾವಿ ಯುವತಿಯ ವಿಡಿಯೋ.
ಬೆಂಗಳೂರು, ಜುಲೈ 05: ಸಿಲಿಕಾನ್ ಸಿಟಿ ಬೆಂಗಳೂರು ಅಂದ ತಕ್ಷಣ ನೆನಪಾಗುವುದು ಐಟಿ ಕಂಪನಿಗಳು, ತಲೆನೋವು ತರಿಸುವ ಟ್ರಾಫಿಕ್ ಜಾಮ್ ಹಾಗೂ ದುಬಾರಿ ಮನೆ ಬಾಡಿಗೆ. ಆದರೆ, ಇದೇ ಬೆಂಗಳೂರನ್ನು ಭಾರತದ ‘ಯುರೋಪ್’ ಎಂದು ಕರೆದು, ನಗರದ ಸೌಂದರ್ಯವನ್ನು ಕೊಂಡಾಡಿರುವ ಯುವತಿಯೊಬ್ಬಳ ವಿಡಿಯೋ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗಿದೆ. ಇನ್ಸ್ಟಾಗ್ರಾಮ್ನ ‘sukoon.se.batein’ ಎಂಬ ಖಾತೆಯಲ್ಲಿ ಶೇರ್ ಆಗಿರುವ ವಿಡಿಯೋದಲ್ಲಿ ಯುವತಿಯೊಬ್ಬರು ತಮಗೆ ಬೆಂಗಳೂರು ಏಕೆ ಇಷ್ಟ ಮತ್ತು ಈ ನಗರದ ಮೇಲಿರುವ ಪ್ರೀತಿಯನ್ನು ಮುಕ್ತವಾಗಿ ಹಂಚಿಕೊಂಡಿದ್ದಾರೆ.
ಭಾರತದಲ್ಲೇ ಎಲ್ಲೂ ಇಲ್ಲದ ಮ್ಯಾಜಿಕ್ ಇಲ್ಲಿದೆ!
ವಿಡಿಯೋದಲ್ಲಿ ಮಾತನಾಡಿರುವ ಯುವತಿ, ಭಾರತದಲ್ಲಿ ಎಲ್ಲಾದರೂ ಯುರೋಪ್ ಇದ್ದರೆ, ಅದು ನಮ್ಮ ಬೆಂಗಳೂರಿನಲ್ಲೇ ಇದೆ. ನಾನು ಸ್ವಲ್ಪ ಅತಿಶಯೋಕ್ತಿಯಾಗಿ ಹೇಳುತ್ತಿದ್ದೇನೆ ಅನಿಸಬಹುದು. ಆದರೆ ನಿಜ ಹೇಳಬೇಕೆಂದರೆ, ನಾನು ಭಾರತದ ಅದೆಷ್ಟೋ ಸುಂದರ ನಗರಗಳಿಗೆ ಭೇಟಿ ನೀಡಿದ್ದೇನೆ. ಪ್ರಕೃತಿಯ ದೃಷ್ಟಿಯಿಂದ ಹಲವು ನಗರಗಳು ಅದ್ಭುತವಾಗಿವೆ. ಆದರೆ ಬೆಂಗಳೂರಿನಲ್ಲಿ ಎಲ್ಲವೂ ಇದೆ ಎಂದು ಹೊಗಳಿದ್ದಾರೆ.
ಮುಂದುವರಿದು ಮಾತನಾಡಿದ ಅವರು, ಇಲ್ಲಿ ಅತ್ಯುತ್ತಮ ಉದ್ಯೋಗಾವಕಾಶಗಳಿವೆ. ಇನ್ನು ಇಲ್ಲಿನ ಹವಾಮಾನವಂತೂ ಬಹಳ ಅದ್ಭುತವಾಗಿದೆ. ಹೌದು, ನಗರದಲ್ಲಿ ಟ್ರಾಫಿಕ್ ಸಮಸ್ಯೆ ಸ್ವಲ್ಪ ಇದೆ, ಆದರೆ ಪರವಾಗಿಲ್ಲ. ಇಲ್ಲಿನ ಹವಾಮಾನ ಎಷ್ಟು ಚೆನ್ನಾಗಿದೆ ಎಂದರೆ, ನಿಮಗೆ ಎಲ್ಲವೂ ಇಷ್ಟವಾಗಲು ಶುರುವಾಗುತ್ತದೆ. ನನ್ನ ಪ್ರಕಾರ ಬೆಂಗಳೂರಿಗೆ ಐದಕ್ಕೆ ಐದು (5/5) ರೇಟಿಂಗ್ ನೀಡುತ್ತೇನೆ ಎಂದು ಖುಷಿಯಿಂದ ಹೇಳಿಕೊಂಡಿದ್ದಾರೆ.
View this post on Instagram
ನೆಟ್ಟಿಗರ ಪ್ರತಿಕ್ರಿಯೆ ಹೇಗಿದೆ?
ಈ ವಿಡಿಯೋ ಜಾಲತಾಣಗಳಲ್ಲಿ ಅಪ್ಲೋಡ್ ಆದ ಬೆನ್ನಲ್ಲೇ ಭಾರಿ ಚರ್ಚೆ ಸೃಷ್ಟಿಸಿದೆ. ಕೇವಲ ಕಷ್ಟಗಳನ್ನೇ ಚರ್ಚಿಸುವ ಇಂಟರ್ನೆಟ್ ಜಗತ್ತಿನಲ್ಲಿ, ಬೆಂಗಳೂರಿನ ಸಕಾರಾತ್ಮಕ ಮತ್ತು ಸುಂದರವಾದ ಮುಖವನ್ನು ಪರಿಚಯಿಸಿದ್ದಕ್ಕೆ ಅನೇಕರು ಸಂತಸ ವ್ಯಕ್ತಪಡಿಸಿದ್ದಾರೆ.
ವಿಡಿಯೋಗೆ ಕಮೆಂಟ್ ಮಾಡಿರುವ ನೆಟ್ಟಿಗರೊಬ್ಬರು, ಬೆಂಗಳೂರಿನ ಹವಾಮಾನ ನಗರದ ಎಲ್ಲಾ ಕೆಡುಕುಗಳನ್ನು ಮರೆಮಾಚುವಷ್ಟು ಸೊಗಸಾಗಿದೆ ಎಂದಿದ್ದಾರೆ. ಮತ್ತೊಬ್ಬರು, ನಗರಕ್ಕೆ ತನ್ನದೇ ಆದ ಒಂದು ವೈಬ್ ಇದೆ ನಿಜ, ಆದರೆ ಇಲ್ಲಿನ ಟ್ರಾಫಿಕ್ ನಮ್ಮ ತಾಳ್ಮೆಯನ್ನು ಪರೀಕ್ಷಿಸುತ್ತದೆ ಎಂದು ಲೇವಡಿ ಮಾಡಿದ್ದಾರೆ. ಇಲ್ಲಿ ವಾಸ ಮಾಡಿದವರಿಗೆ ಮಾತ್ರ ಬೆಂಗಳೂರಿನ ಮೇಲಿರುವ ಈ ಪ್ರೀತಿ ಅರ್ಥವಾಗುತ್ತದೆ ಎಂದು ಹಳೆಯ ನೆನಪುಗಳನ್ನು ಹಂಚಿಕೊಂಡಿದ್ದಾರೆ.
ಒಟ್ಟಿನಲ್ಲಿ, ಕೆಲಸದ ಒತ್ತಡ ಮತ್ತು ನಿತ್ಯದ ಜಂಜಾಟದ ನಡುವೆಯೂ ನಮ್ಮ ಹೆಮ್ಮೆಯ ಬೆಂಗಳೂರು ತನ್ನ ಹಸಿರು ಮತ್ತು ಹವಾಮಾನದಿಂದ ಜನರ ಹೃದಯ ಗೆಲ್ಲುತ್ತಲೇ ಇರುತ್ತದೆ ಎಂಬುದಕ್ಕೆ ಈ ವೈರಲ್ ವಿಡಿಯೋ ಸಾಕ್ಷಿಯಾಗಿದೆ.
ಕರ್ನಾಟಕದ ಇನ್ನಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
