ಸದನದಲ್ಲಿ ಅಹೋರಾತ್ರಿ ಧರಣಿಗೆ ಕಾಂಗ್ರೆಸ್ ನಿರ್ಧಾರ: ಮನವೊಲಿಕೆಗೆ ಅಶೋಕ್, ಯಡಿಯೂರಪ್ಪ, ಕಾಗೇರಿ ಪ್ರಯತ್ನ

ಬೆಂಗಳೂರು: ವಿಧಾನಸಭೆಯಲ್ಲಿ ಕಾಂಗ್ರೆಸ್ ಶಾಸಕರು ಆಹೋರಾತ್ರಿ ಧರಣಿ ನಡೆಸಲು ಮುಂದಾಗಿರುವ ಹಿನ್ನೆಲೆಯಲ್ಲಿ ಕಾಂಗ್ರೆಸ್​ ನಾಯಕರ ಮನವೊಲಿಸಲು ಮಾಜಿ ಮುಖ್ಯಮಂತ್ರಿ ಬಿ.ಎಸ್.ಯಡಿಯೂರಪ್ಪ ಮತ್ತು ಕಂದಾಯ ಸಚಿವ ಆರ್.ಅಶೋಕ್ ಪ್ರಯತ್ನಿಸಿದರು. ಈ ಮಧ್ಯೆ ಕಾಂಗ್ರೆಸ್ ಶಾಸಕಾಂಗ ಪಕ್ಷದ ನಾಯಕ ಸಿದ್ದರಾಮಯ್ಯ ಸ್ಪೀಕರ್ ವಿಶ್ವೇಶ್ವರ ಹೆಗಡೆ ಅವರನ್ನು ಭೇಟಿಯಾಗಿ ಧರಣಿ ನಿರತ ಶಾಸಕರಿಗೆ ಅಗತ್ಯ ಸೌಕರ್ಯ ಕಲ್ಪಿಸಬೇಕೆಂದು ವಿನಂತಿಸಿದರು. ಈಶ್ವರಪ್ಪ ರಾಜೀನಾಮೆ ನೀಡುವವರೆ ಹೋರಾಟ ಮುಂದುವರಿಸುವುದಾಗಿ ಕಾಂಗ್ರೆಸ್ ಹೇಳಿದೆ. ವಿಪಕ್ಷ ನಾಯಕ ಸಿದ್ದರಾಮಯ್ಯ ಅವರನ್ನು ಭೇಟಿಯಾದ ಸ್ಪೀಕರ್ ವಿಶ್ವೇಶ್ವರ ಹೆಗಡೆ ಕಾಗೇರಿ, ಶಾಸಕರಿಗೆ ಪೂರಕ ವ್ಯವಸ್ಥೆ ಕಲ್ಪಿಸಬೇಕೆಂದು ವಿಧಾನಸಭೆ ಕಾರ್ಯದರ್ಶಿಗೆ ಸೂಚಿಸಿದರು.

ಈಶ್ವರಪ್ಪ ರಾಜೀನಾಮೆ ಕೊಡುವವರೆಗೆ ಹೋರಾಟ ಕೈಬಿಡುವುದಿಲ್ಲ ಎಂದು ವಿಧಾನ ಪರಿಷತ್​ನಲ್ಲಿ ಪ್ರತಿಪಕ್ಷ ನಾಯಕ ಬಿ.ಕೆ.ಹರಿಪ್ರಸಾದ್ ಹೇಳಿದರು. ಹಿಜಾಬ್ ವಿಚಾರದ ಬಗ್ಗೆ ನಡೆದ ಚರ್ಚೆಯನ್ನು ಪ್ರಸ್ತಾಪಿಸಿದ ಹರಿಪ್ರಸಾದ್, ಸೋದರಿಯರಾದ ತೇಜಸ್ವಿನಿ ಹಾಗೂ ಭಾರತಿ ಶೆಟ್ಟಿ ಆ ಹೆಣ್ಣುಮಕ್ಕಳ ಬಗ್ಗೆ ಮಾತನಾಡಬೇಕಿತ್ತು. ಆದರೆ ಸುಮ್ಮನೆ ಕುಳಿತಿದ್ದಾರೆ. ಪ್ರಕರಣವು ನ್ಯಾಯಾಲಯದಲ್ಲಿ ಇರುವುದರಿಂದ ನಾವು ಮಾತನಾಡುತ್ತಿಲ್ಲ. ನ್ಯಾಯಾಲಯದ ತೀರ್ಪು ಬರಲಿ, ಆಮೇಲೆ ನಾವು ಏನು ಮಾತನಾಡಬೇಕೋ ಆ ಮಾತು ಆಡುತ್ತೇವೆ ಎಂದು ಹರಿಪ್ರಸಾದ್ ಹೇಳಿದರು.

ಲಾಲ್‌ಚೌಕ್‌ನಲ್ಲಿ ತ್ರಿವರ್ಣ ಧ್ವಜ ಹಾರಿಸಿದಾಗ ಗುಂಡೇಟಿನಿಂದ ಯಾರಾದರೂ ಸತ್ತಿದ್ರಾ. ಬಹು ಸಂಸ್ಕೃತಿಯ ದೇಶವಾಗಿದ್ದಕ್ಕೆ ರಾಷ್ಟ್ರಧ್ವಜದಲ್ಲಿ 3 ಬಣ್ಣಗಳಿವೆ. ಸ್ವಾತಂತ್ರ್ಯ ಬಂದಾಗ ದೇಶದಲ್ಲಿ 552 ಮಹಾರಾಜರಿದ್ದರು, ಅವರೆಲ್ಲರಿಗೂ ಅವರದ್ದೇ ಪ್ರತ್ಯೇಕ ಧ್ವಜವಿತ್ತು. ಸರ್ದಾರ್ ವಲ್ಲಭಭಾಯ್ ಪಟೇಲ್ ಅವರು ದೇಶವನ್ನು ಒಂದು ಮಾಡಿದರು. ಆರ್​ಎಸ್​ಎಸ್​ ಬಗ್ಗೆ ಸರ್ದಾರ್ ಪಟೇಲರು ಏನು ಹೇಳಿದ್ದಾರೆಂದು ಹೇಳಬೇಕೆ ಎಂದು ಪ್ರಶ್ನಿಸಿದರು.

ತಮ್ಮ ಭಾಷಣದ ವೇಳೆ ಬಿ.ಕೆ.ಹರಿಪ್ರಸಾದ್ ಅವರು ನಾಗಪುರವನ್ನು ಹಾವಿನಪುರ ಎಂದರು. ಆಗ ಮೇಲೆದ್ದು ನಿಂತ ಆಯನೂರು ಮಂಜುನಾಥ್ ‘ನಮಗೂ ನಿಮ್ಮಂತೆ ಮಾತನಾಡೋಕೆ ಬರುತ್ತೆ, ಮಾತಿನ ಮೇಲೆ ಹಿಡಿತವಿರಲಿ. ನಾವು ಕೊತ್ವಾಲಪುರದಿಂದ ಬಂದಿಲ್ಲ, ಹುಷಾರ್. ನಿಮ್ಮಂತೆ ನಾವು ಹೈಕಮಾಂಡ್​ಗೆ ಭಿಕ್ಷೆ ಬೇಡಿ ಸ್ಥಾನ ಪಡೆದಿಲ್ಲ’ ಎಂದು ಎಚ್ಚರಿಸಿದರು. ‘ಆರ್​ಎಸ್ಎಸ್​ನವರದ್ದು ಡೋಂಗಿತನ. ಕೊತ್ವಾಲಪುರದವರನ್ನು ಬೆಳೆಸಿದವರು’ ಯಾರು ಎಂದು ಹರಿಪ್ರಸಾದ್ ಲೇವಡಿ ಮಾಡಿದರು. ಈ ವೇಳೆ ಬಿಜೆಪಿ-ಕಾಂಗ್ರೆಸ್ ಸದಸ್ಯರ ನಡುವೆ ವಾಗ್ವಾದ ನಡೆಯಿತು.

ಸಭಾ ನಾಯಕ ಕೋಟ ಶ್ರೀನಿವಾಸ ಪೂಜಾರಿ ಮಾತನಾಡಿ, ನಿಲುವಳಿ ಸೂಚನೆ ತಿರಸ್ಕಾರ ಆದ ಮೇಲೂ ಚರ್ಚೆ ಮಾಡಲಾಗಿದೆ. ಕಾಂಗ್ರೆಸ್​ನವರದ್ದು ಚರ್ವಿತ ಚರ್ವಣ. ರಾಜಕೀಯ ಕಾರಣಕ್ಕೆ ಇದನ್ನು ಬೆಳೆಸಬೇಡಿ ಎಂದು ಮನವಿ ಮಾಡಿದರು. ಸಭಾಪತಿ ಹೊರಟ್ಟಿ ಮಾತನಾಡಿ, ನಿಲುವಳಿ ಸೂಚನೆ ಮೇಲೆ‌ ಚರ್ಚೆಗೆ ಅವಕಾಶವಿಲ್ಲ. ನಿಲುವಳಿ ಸೂಚನೆಯನ್ನು ನಿನ್ನೆಯೇ ತಿರಸ್ಕಾರ ಮಾಡಲಾಗಿದೆ ಎಂದು ಕಾಗದ ಪತ್ರಗಳನ್ನು ಮಂಡನೆಗೆ ತೆಗೆದುಕೊಂಡರು. ಇದನ್ನು ಖಂಡಿಸಿ ಕಾಂಗ್ರೆಸ್ ಸದಸ್ಯರು ಪರಿಷತ್ ಬಾವಿಗಿಳಿದರು. ಈಶ್ವರಪ್ಪ ವಿರುದ್ಧ ಭಿತ್ತಿಪತ್ರ ಹಿಡಿದು ಕೈ ಸದಸ್ಯರ ಧರಣಿ ಮುಂದುವರಿಸಿದರು. ವಿಧಾನ ಪರಿಷತ್​ನಲ್ಲೂ ಅಹೋರಾತ್ರಿ ಧರಣಿ ನಡೆಸಲು ಕಾಂಗ್ರೆಸ್ ನಿರ್ಧರಿಸಿದೆ. ಈಶ್ವರಪ್ಪ ಅವರನ್ನು ಸಂಪುಟದಿಂದ ಕೈಬಿಡಬೇಕು ಮತ್ತು ದೇಶದ್ರೋಹ ಆರೋಪದಡಿ ಪ್ರಕರಣ ದಾಖಲಿಸಬೇಕು ಎಂದು ಒತ್ತಾಯಿಸಿದರು.

ವಿಧಾನ ಪರಿಷತ್ ಸದನದ ಒಳಗೆ ಕಾಂಗ್ರೆಸ್ ಸದಸ್ಯರಿಂದ ಧರಣಿ ವಿಚಾರಕ್ಕೆ ಎಚ್​.ವಿಶ್ವನಾಥ್​ ಬೇಸರ ವ್ಯಕ್ತಪಡಿಸಿದರು. ಸಿಎಂ ಆದವರು ಸಭಾನಾಯಕರು, ವಿಪಕ್ಷದವರನ್ನು ಕರೆಸಿ ಸಮಾಧಾನ ಮಾಡಬೇಕು. ವಿಧಾನಸಭೆಯಲ್ಲಿ ಯಾರೂ ಮಲಗುವುದು ಬೇಡ. ಮುಖ್ಯಮಂತ್ರಿ ಎಲ್ಲರನ್ನೂ ಸಾಮರಸ್ಯದಿಂದ ಮಾತನಾಡಿ, ಸಮಸ್ಯೆ ಬಗೆಹರಿಸಲಿ ಎಂದು ಆಗ್ರಹಿಸಿದರು.

ವಿಧಾನ ಪರಿಷತ್ ಸದಸ್ಯೆ ಭಾರತಿ ಶೆಟ್ಟಿ ಮಾತನಾಡಿ, ರಾಷ್ಟ್ರ ಮೊದಲು ಎಂಬ ಪರಿಕಲ್ಪನೆಯನ್ನು ಮಕ್ಕಳಿಗೆ ಕಲಿಸಬೇಕು. ಈಶ್ವರಪ್ಪ ಮಾತನಾಡಿದ್ದು ತಪ್ಪು ಎಂದು ನನಗೆ ಅನಿಸುತ್ತಿಲ್ಲ. ಭಯೋತ್ಪಾದಕರ ಗುಂಡಿಗೆ ಎದೆ ಕೊಟ್ಟು ಕಾಶ್ಮೀರದಲ್ಲಿ ಧ್ವಜ ಹಾರಿಸಿದವರಲ್ಲಿ ಈಶ್ವರಪ್ಪ ಮೊದಲಿನವರು ಎಂದರು. ಹುಬ್ಬಳ್ಳಿ ಈದ್ಗಾ ಮೈದಾನದಲ್ಲಿ ರಾಷ್ಟ್ರಧ್ವಜ ಹಾರಿಸಲು ಪ್ರೇರಣೆ ನೀಡಿದವರು ಅಂದು ರಾಜ್ಯಾಧ್ಯಕ್ಷರಾಗಿದ್ದ ಈಶ್ವರಪ್ಪ. ಈದ್ಗಾ ಮೈದಾನದಲ್ಲಿ ರಾಷ್ಟ್ರಧ್ವಜ ಹಾರಿಸಲು ನಾನೂ ಹೋಗಿದ್ದೆ. ರಾಷ್ಟ್ರಧ್ವಜ ಹಾರಿಸಲು ಹೋದಾಗ ಜಲಿಯನ್ ವಾಲಾಬಾಗ್ ರೀತಿಯ ಅನುಭವ ಉಂಟಾಗಿತ್ತು ಎಂದರು.

ಪರಿಷತ್ ಸದಸ್ಯೆ ತೇಜಸ್ವಿನಿ ಗೌಡ ಮಾತನಾಡಿ, ಮುಂದೊಂದು ದಿನ ಕೇಸರಿ ಧ್ವಜ ಬರುತ್ತೋ ಇಲ್ಲವೋ ಗೊತ್ತಿಲ್ಲ. ಕೇಸರಿ ಅಂದಾಕ್ಷಣ ಯಾಕೆ ಮೈಮೇಲೆ ಭೂತ ಬರುತ್ತದೆ. ಹಸಿರು ಬಿಳಿಗೆ ಹೇಗೆ ಗೌರವ ಕೊಡ್ತೀರೋ ಅದೇ ರೀತಿ ಕೇಸರಿಗೂ ಪ್ರಾಮುಖ್ಯತೆ ಕೊಡಿ ಎಂದು ಸಲಹೆ ಮಾಡಿದರು.

ಕುಶಲ ವಿಚಾರಿಸಿ, ಕ್ಷಮೆ ಕೋರಿದ ಕಾಗೇರಿ

ಕೆಪಿಸಿಸಿ ಅಧ್ಯಕ್ಷ ಡಿ.ಕೆ.ಶಿವಕುಮಾರ್ ಅವರನ್ನು ಭೇಟಿಯಾದ ಸ್ಪೀಕರ್ ವಿಶ್ವೇಶ್ವರ ಹೆಗಡೆ​ ಕಾಗೇರಿ ನಿನ್ನೆ (ಫೆ.16) ವಿಧಾನಸಭೆಯಲ್ಲಿ ನಡೆದ ಘಟನೆ ಬಗ್ಗೆ ಕ್ಷಮೆಯಾಚಿಸಿದರು. ನೀವು ಕಾಂಗ್ರೆಸ್​ ಅಧ್ಯಕ್ಷರು, ಜವಾಬ್ದಾರಿ ಸ್ಥಾನದಲ್ಲಿದ್ದೀರಿ. ನೀವು ನಿನ್ನೆಯಷ್ಟು ಸಿಟ್ಟಾಗಿದುದನ್ನು ಎಂದೂ ನೋಡಿರಲಿಲ್ಲ ಎಂದರು. ಕಾಗೇರಿ ಮತ್ತು ಡಿಕೆಶಿ ಅಕ್ಕಪಕ್ಕ ಕುಳಿತು ಮಾತನಾಡಿದರು. ಈ ವೇಳೆ ಡಿಕೆಶಿ ಫೋಟೊ ತೆಗೆಯಿರಿ ಎಂದಾಗ, ಕಾಗೇರಿ ಅದೆಲ್ಲಾ ಬೇಡ ಎಂದರು.

ಇದನ್ನೂ ಓದಿ: ವಿಧಾನಸಭೆಯಲ್ಲಿ ಕಾಂಗ್ರೆಸ್ ವಿರುದ್ಧ ಹರಿಹಾಯ್ದ ಸಿಎಂ ಬಸವರಾಜ ಬೊಮ್ಮಾಯಿ: ಅಹೋರಾತ್ರಿ ಧರಣಿಗೆ ಕಾಂಗ್ರೆಸ್ ನಿರ್ಧಾರ

ಇದನ್ನೂ ಓದಿ: ಸಂಧಾನ ಸಭೆ ವಿಫಲ: ವಿಧಾನಸಭೆಯಲ್ಲಿ ಧರಣಿ ಮುಂದುವರಿಸಲು ವಿಪಕ್ಷ ಕಾಂಗ್ರೆಸ್ ನಿರ್ಧಾರ