ಬೆಂಗಳೂರಿನ ವಾಲ್ಡೋರ್ಫ್ ಶಾಲೆಗಳಿಗೆ ಜರ್ಮನ್ ಶಿಕ್ಷಕ ಭೇಟಿ

ವಾಲ್ಡೋರ್ಫ್ ಬೋಧನಾ (Waldorf Methodology) ವಿಧಾನದಲ್ಲಿ ಪರಿಣಿತರಾಗಿರುವ ಜರ್ಮನಿಯ (Germany) ನಿವೃತ್ತ ಶಾಲಾ ಶಿಕ್ಷಕ ಜೋಚೆನ್ ಜಾನ್ (Jochen Jahn) ಅವರು ಜಗತ್ತಿನಾದ್ಯಂತ ಶಾಲೆಗಳಲ್ಲಿ ಈ ವಿಧಾನವು ಹೇಗೆ ಕಾರ್ಯನಿರ್ವಹಿಸುತ್ತದೆ ಎಂಬುದನ್ನು ಅರ್ಥಮಾಡಿಕೊಳ್ಳಲು ವಿಶ್ವ ಪ್ರವಾಸದಲ್ಲಿದ್ದಾರೆ ಎಂದು ಟೈಮ್ಸ್ ಆಫ್ ಇಂಡಿಯಾ ವರದಿ ಮಾಡಿದೆ. ಭಾರತದಲ್ಲಿ ಕಳೆದ ಮೂರು ತಿಂಗಳುಗಳಿಂದ ನೆಲೆಸಿರುವ ಜಾನ್ ಬೆಂಗಳೂರಿನಲ್ಲಿ ಒಂದು ತಿಂಗಳ ಕಾಲ ಮೂರು ಪ್ರಮುಖ ವಾಲ್ಡೋರ್ಫ್ ಶಾಲೆಗಳಿಗೆ ಮಾರ್ಗದರ್ಶನ ಮತ್ತು ಬೋಧನೆ ನೀಡುತ್ತಿದ್ದರು.

ವಾಲ್ಡೋರ್ಫ್ ವಿಧಾನದಲ್ಲಿ, 1 ರಿಂದ 8 ನೇ ತರಗತಿಯವರೆಗಿನ ವಿದ್ಯಾರ್ಥಿಗಳ ಬ್ಯಾಚ್‌ಗೆ ಶಿಕ್ಷಕರಾಗಿ ಮುಂದುವರಿಯುತ್ತಾರೆ. ಜಾನ್ ಅವರ ವೃತ್ತಿಜೀವನದಲ್ಲಿ ಇಂತಹ ಐದು ಚಕ್ರಗಳನ್ನು ಪೂರ್ಣಗೊಳಿಸಿದ್ದಾರೆ. ನಿವೃತ್ತಿಯ ನಂತರ, ಜಾನ್ ಪ್ರಪಂಚದ ಉಳಿದ ಭಾಗಗಳಲ್ಲಿ ಈ ವ್ಯವಸ್ಥೆಯು ಹೇಗೆ ಕಾರ್ಯನಿರ್ವಹಿಸುತ್ತದೆ ಎಂಬುದನ್ನು ಅನ್ವೇಷಿಸಲು ಬಯಸಿ ತಮ್ಮ ಮಾರ್ಪಡಿಸಿದ ಟೊಯೋಟಾ ಲ್ಯಾಂಡ್ ಕ್ರೂಸರ್‌ನಲ್ಲಿ ಪ್ರಯಾಣವನ್ನು ಪ್ರಾರಂಭಿಸಿದರು. ಈ ಟೊಯೋಟಾವನ್ನು ಅವರು ಬ್ರೌನಿ ಎಂದು ಪ್ರೀತಿಯಿಂದ ಕರೆಯುತಾರೆ. ಮಾರ್ಚ್ 2022 ರಲ್ಲಿ, ಅವರು ಟರ್ಕಿ, ಜಾರ್ಜಿಯಾ ಮತ್ತು ಇರಾನ್ ಶಾಲೆಗಳೊಂದಿಗೆ ತಮ್ಮ ಪ್ರವಾಸವನ್ನು ಪ್ರಾರಂಭಿಸಿದರು.

ಜಾನ್, ತಮ್ಮ ತಾಯಿಯ ಮರಣದ ನಂತರ, ಜರ್ಮನಿಗೆ ಹಿಂದಿರುಗಿದರು. ಅವರು ನವೆಂಬರ್ 2022 ರಲ್ಲಿ ತಮ್ಮ ಪ್ರವಾಸವನ್ನು ಪುನರಾರಂಭಿಸಿದರು. ಮೊದಲು ಪಾಕಿಸ್ತಾನಕ್ಕೆ ಪ್ರಯಾಣಿಸಿ ನಂತರ ಡಿಸೆಂಬರ್‌ನಲ್ಲಿ ವಾಘಾ ಗಡಿಯ ಮೂಲಕ ಭಾರತವನ್ನು ಪ್ರವೇಶಿಸಿದರು. ಜನವರಿಯಿಂದ ಏಪ್ರಿಲ್ ವರೆಗೆ, ಜಾನ್ ಒಂಬತ್ತು ಇಂಡಿಯನ್ ವಾಲ್ಡೋರ್ಫ್ ಶಾಲೆಗಳಲ್ಲಿದ್ದ, ವಿದ್ಯಾರ್ಥಿಗಳೊಂದಿಗೆ ತರಗತಿಗಳಿಗೆ ಹಾಜರಾಗುವುದು, ವ್ಯವಸ್ಥೆಯ ಬಗ್ಗೆ ಪ್ರತಿಬಿಂಬಿಸುವುದು, ಶಿಕ್ಷಕರಿಗೆ ಮಾರ್ಗದರ್ಶನ ನೀಡುವುದು ಮತ್ತು ಅಧ್ಯಾಪಕರು ಮತ್ತು ಪೋಷಕರಿಗೆ ಸೆಮಿನಾರ್‌ಗಳನ್ನು ನೀಡುವ ಕೆಲಸವನ್ನು ಮಾಡಿದರು.

ಶನಿವಾರ ಹೊರಡುವ ಮೊದಲು, ಜಾನ್ ಬೆಂಗಳೂರು ಸ್ಟೈನರ್ ಶಾಲೆ, ಕಿಂಗ್ಡಮ್ ಆಫ್ ಚೈಲ್ಡ್​ಹುಡ್​ ಮತ್ತು ಅದ್ವಯ ಶಾಲೆಗಳಿಗೆ ಭೇಟಿ ನೀಡಿದರು. ಜಾನ್ ಪಂಜಾಬ್‌ನಲ್ಲಿ ದೇಶದ ಸರ್ಕಾರಿ ಶಾಲಾ ವ್ಯವಸ್ಥೆಯ ಅನುಭವವನ್ನು ಪಡೆದರು. “ನಾನು ಎಂಟು ವರ್ಷದ ಮಗುವನ್ನು ನೋಡಿದೆ ಮತ್ತು ಅವನ ಸ್ಕೂಲ್ ಬ್ಯಾಗ್ ಅನ್ನು ನೋಡಿದೆ. ತುಂಬಾ ಪುಸ್ತಕಗಳಿವೆ. ನಾನು ಅವನ ಗಣಿತ ಪುಸ್ತಕವನ್ನು ತೆಗೆದುಕೊಂಡೆ. ಕೆಲವು ವಿಷಯಗಳು ಅವರ ವಯಸ್ಸಿಗೆ ಅವರ ಗ್ರಹಿಕೆಯ ಶಕ್ತಿಯನ್ನು ಮೀರಿದೆ. ಶಾಲೆಗೆ ಹೋಗುವುದು ನನಗೆ ಇಷ್ಟವಿಲ್ಲ ಎಂದು ಆ ಬುಡುಗ ನಂಗೆ ಹೇಳಿದ. ಶಾಲೆಯ ಎಲ್ಲಾ ಗಮನವು ಜ್ಞಾನವನ್ನು ಪಡೆಯುವುದರ ಮೇಲಿದೆ” ಎಂದು ಜಾನ್ ಹೇಳಿದರು.

“ಭಾರತೀಯ ಶಿಕ್ಷಣ ವ್ಯವಸ್ಥೆಯಲ್ಲಿನ ಒಂದು ದೊಡ್ಡ ಸಮಸ್ಯೆ ಎಂದರೆ ಪೋಷಕರು ಮಕ್ಕಳನ್ನು ಶಾಲೆಗೆ ಬೇಗನೆ ಸೇರಿಸಲು ಇಷ್ಟಪಡುತ್ತಾರೆ. ಮಕ್ಕಳು ಒಂದನೇ ತರಗತಿ ಸೇರುವಾಗ ಅವರು 6 ರಿಂದ 7 ವರ್ಷ ವಯಸ್ಸಿನವರಾಗಿರಬೇಕು. ಅಭಿವೃದ್ಧಿಗೆ ಅಗತ್ಯವಿರುವ ಅವರ ಎಲ್ಲಾ ಶಕ್ತಿಗಳು ಶೈಕ್ಷಣಿಕವಾಗಿ ಬದಲಾಗುತ್ತಿವೆ,” ಎಂದು ಜಾನ್ ಹೇಳಿದರು.

ಇದನ್ನೂ ಓದಿ: ಜಯನಗರದ ವಿಜಯ ಪಿಯು ಕಾಲೇಜಿನ ಅವಳಿ ವಿದ್ಯಾರ್ಥಿಗಳು ಒಂದೇ ಅಂಕ ಗಳಿಸಿದ್ದಾರೆ

“ವಾಲ್ಡೋರ್ಫ್ ಶಾಲೆಗಳು ತಮ್ಮನ್ನು ತಾವು ಹೆಚ್ಚು ನಂಬಬೇಕು. ಹೆಚ್ಚಿನ ಶಾಲೆಗಳು ಪೋಷಕರ ಒತ್ತಡಕ್ಕೆ ಮಣಿದು ಉನ್ನತ ಶ್ರೇಣಿಗಳಲ್ಲಿ ಒಬ್ಬನೇ ತರಗತಿ ಶಿಕ್ಷಕರನ್ನು ಹೊಂದುವ ಬದಲು ವಿಷಯ ಶಿಕ್ಷಕರನ್ನು ನೇಮಿಸುತ್ತಾರೆ. ಸ್ಪರ್ಧಾತ್ಮಕ ಪರೀಕ್ಷೆಗಳಿಗೆ ತಯಾರಾಗಲು ಸಾಕಷ್ಟು ಸಮಯವಿದೆ ಎಂದು ಭಾರತೀಯ ಪೋಷಕರು ಅರ್ಥಮಾಡಿಕೊಳ್ಳಬೇಕು” ಎಂದು ಜಾನ್ ಹೇಳಿದರು.

ವಾಲ್ಡೋರ್ಫ್ ಶಿಕ್ಷಣ ಎಂದರೇನು?

ವಾಲ್ಡೋರ್ಫ್ ಶಿಕ್ಷಣವನ್ನು ಸ್ಟೈನರ್ ಶಿಕ್ಷಣ ಎಂದೂ ಕರೆಯುತ್ತಾರೆ, ಇದು ಮಾನವಶಾಸ್ತ್ರದ ಸಂಸ್ಥಾಪಕ ರುಡಾಲ್ಫ್ ಸ್ಟೈನರ್ ಅವರ ಶೈಕ್ಷಣಿಕ ತತ್ತ್ವಶಾಸ್ತ್ರವನ್ನು ಆಧರಿಸಿದೆ. ಇದರ ಶೈಕ್ಷಣಿಕ ಶೈಲಿಯು ಸಮಗ್ರವಾಗಿದೆ, ವಿದ್ಯಾರ್ಥಿಗಳ ಬೌದ್ಧಿಕ, ಕಲಾತ್ಮಕ ಮತ್ತು ಪ್ರಾಯೋಗಿಕ ಕೌಶಲ್ಯಗಳನ್ನು ಅಭಿವೃದ್ಧಿಪಡಿಸುವ ಉದ್ದೇಶವನ್ನು ಹೊಂದಿದೆ. ಇದು ಕಲ್ಪನೆ ಮತ್ತು ಸೃಜನಶೀಲತೆಯ ಮೇಲೆ ಕೇಂದ್ರೀಕರಿಸುತ್ತದೆ. ಶಿಕ್ಷಕರು ಪಠ್ಯಕ್ರಮದ ವಿಷಯ, ಬೋಧನಾ ವಿಧಾನಗಳು ಮತ್ತು ಆಡಳಿತದಲ್ಲಿ ಹೆಚ್ಚಿನ ಸ್ವಾಯತ್ತತೆಯನ್ನು ಹೊಂದಿದ್ದಾರೆ.