ಅಂಧರು ಬಟನ್ ಪ್ರೆಸ್ ಮಾಡಿದ್ರೆ ಸಾಕು, ಅವರಿದ್ದಲ್ಲಿಗೆ ಬರುತ್ತೆ ಬಿಎಂಟಿಸಿ ಬಸ್! ಬಂದಿದೆ ಹೊಸ ಡಿವೈಸ್
ಬಿಎಂಟಿಸಿ ಬಸ್ನಲ್ಲಿ ಪ್ರತಿದಿನ ನೂರಾರು ಅಂಧರು ಪ್ರಯಾಣ ಮಾಡುತ್ತಾರೆ. ಆದರೆ, ಪ್ರಯಾಣ ಮಾಡಬೇಕಾದ ಬಸ್ ಎಲ್ಲಿದೆ? ಆ ಬಸ್ ತಾವಿರುವ ಜಾಗಕ್ಕೆ ಯಾವಾಗ ಬರುತ್ತದೆ ಎಂದು ತಿಳಿದುಕೊಳ್ಳಲು ಕಷ್ಟವಾಗುತ್ತಿತ್ತು. ಹಾಗಾಗಿ ಅವರಿಗಾಗಿಯೇ ಹೊಸದೊಂದು ಡಿವೈಸ್ ಅಭಿವೃದ್ಧಿಪಡಿಸಲಾಗಿದೆ. ದೆಹಲಿ ಐಐಟಿ ಅಭಿವೃದ್ಧಿಪಡಿಸಿದ ಆ ಸಾಧನದ ವಿಶೇಷವೇನು? ಹೇಗೆ ಕೆಲಸ ಮಾಡುತ್ತದೆ? ವಿವರ ಇಲ್ಲಿದೆ.
Updated on: Jun 01, 2025 | 10:28 AM
ಬೆಂಗಳೂರು, ಜೂನ್ 1: ಬಿಎಂಟಿಸಿ (BMTC) ನಿಗಮದಲ್ಲಿ 6800 ಬಸ್ಸುಗಳಿವೆ. ಪ್ರತಿದಿನ 40 ಲಕ್ಷ ಮಂದಿ ಪ್ರಯಾಣ ಮಾಡುತ್ತಾರೆ. ಅದರಲ್ಲಿ ನೂರಾರು ಅಂಧರು ಕೂಡ ಸೇರಿದ್ದಾರೆ. ಬೆಂಗಳೂರಿನಲ್ಲಿ ದೃಷ್ಟಿಮಾಂದ್ಯರು ಓಡಾಡುವ ಸ್ಥಳದಲ್ಲಿ, ಅವರು ಪ್ರಯಾಣ ಮಾಡುವ ಬಸ್ ಯಾವ ನಿಲ್ದಾಣಕ್ಕೆ ಬರುತ್ತದೆ ಎಂಬುದನ್ನು ಅವರು ಸುಲಭವಾಗಿ ತಿಳಿಯಲು ಹೊಸದೊಂದು ತಂತ್ರಜ್ಞಾನವನ್ನು ಅಭಿವೃದ್ಧಿಪಡಿಸಲಾಗಿದೆ. ಅಂಧರು, ನಗರದ ಯಾವುದೇ ಬಸ್ ಸ್ಟ್ಯಾಂಡ್ನಲ್ಲಿ ನಿಂತು ಈ ರಿಮೋಟ್ ಡಿವೈಸ್ ಪ್ರೆಸ್ ಮಾಡಿದರೂ ಸಾಕು, ಬಿಎಂಟಿಸಿ ಬಸ್ಗಳು (BMTC Buses) ಅವರು ಇರುವ ಜಾಗದಲ್ಲಿ ನಿಲ್ಲಲಿವೆ. ದೃಷ್ಟಿ ಚೇತನರಿಗಾಗಿ ವಿಶೇಷವಾಗಿ ರಿಮೋಟ್ ಡಿವೈಸ್ ಸಿದ್ದಪಡಿಸಿದ್ದು, ಬ್ರೈಲ್ ಮಾದರಿಯಲ್ಲಿ ಅಂಧರಿಗಾಗಿ ವ್ಯವಸ್ಥೆ ಮಾಡಲಾಗಿದೆ. ಅವರು ಆ ರಿಮೋಟ್ನಲ್ಲಿ ಬಟನ್ ಪ್ರೆಸ್ ಮಾಡಿದರೆ, ಆ ಮಾರ್ಗದ ಬಸ್ಗಳಿಗೆ ಮಾಹಿತಿ ಗೊತ್ತಾಗಲಿದೆ ಎಂದು ಬಿಎಂಟಿಸಿ ಮೂಲಗಳು ತಿಳಿಸಿವೆ.
ಮೊದಲ ಹಂತದಲ್ಲಿ 25 ಬಸ್ಗಳಲ್ಲಿ ಸಾದನ ಅಳವಡಿಕೆ
ಮೊದಲ ಹಂತದಲ್ಲಿ ಬಿಎಂಟಿಸಿಯ 25 ಬಸ್ಗಳಲ್ಲಿ ಕಮ್ಯುನಿಕೇಷನ್ ಡಿವೈಸ್ಗಳನ್ನು ಅಳವಡಿಸಲಾಗಿದೆ. ಈಗಾಗಲೇ 401K ಯಲಹಂಕ ಟು ಕೆಂಗೇರಿ, 401KB ಯಶವಂತಪುರ ಟು ಕೆಂಗೇರಿ ಮಾರ್ಗದಲ್ಲಿ ಸಂಚಾರ ಮಾಡುವ ಬಿಎಂಟಿಸಿ ಬಸ್ಗಳಲ್ಲಿ ಈ ವ್ಯವಸ್ಥೆ ಅಳವಡಿಸಲಾಗಿದೆ. ಯಶವಂತಪುರ ಟು ಕೆಂಗೇರಿ ಮಾರ್ಗದಲ್ಲಿ ಅತಿ ಹೆಚ್ಚಿನ ದೃಷ್ಟಿಮಾಂದ್ಯರು ಸಂಚಾರ ಮಾಡುವುದು ಬಿಎಂಟಿಸಿಗೆ ಗೊತ್ತಾಗಿದೆ. ಈ ನವೆಂಬರ್ ಒಳಗೆ ಬಿಎಂಟಿಸಿಯ 500 ಬಸ್ಗಳಿಗೆ ಈ ಆನ್ ಬೋರ್ಡ್ ಟೆಕ್ನಾಲಜಿ ಅಳವಡಿಸಲಾಗುತ್ತದೆ.ಮುಂದಿನ ದಿನಗಳಲ್ಲಿ ಎಲ್ಲಾ ಬಸ್ಗಳಲ್ಲಿ ಅಳವಡಿಸಲು ಚಿಂತನೆ ನಡೆಸಲಾಗಿದೆ.
ಬಿಎಂಟಿಸಿಯ ಈ ಕ್ರಮಕ್ಕೆ ದೃಷ್ಟಿಮಾಂದ್ಯರಿಂದಲೂ ಮೆಚ್ಚುಗೆ ವ್ಯಕ್ತವಾಗಿದೆ. ಇದರಿಂದ ನಮಗೆ ತಿಂಬಾ ಸಹಾಯವಾಗಿದೆ ಎಂದು ವಿಶೇಷಚೇತನ ನಿತಿನ್ ಎಂಬವರು ‘ಟಿವಿ9’ಗೆ ತಿಳಿಸಿದ್ದಾರೆ.
ಇದನ್ನೂ ಓದಿ: ವಿದ್ಯಾರ್ಥಿಗಳು KSRTC ಬಸ್ ಪಾಸ್ ವಿತರಣೆ ಆರಂಭ: ಅರ್ಜಿ ಸಲ್ಲಿಕೆ ಹೇಗೆ? ಇಲ್ಲಿದೆ ವಿವರ
ಒಟ್ಟಿನಲ್ಲಿ ದೃಷ್ಟಿ ವಿಶೇಷ ಚೇತನರಿಗಾಗಿ ಬಿಎಂಟಿಸಿ ಖಾಸಗಿ ಎನ್ಜಿಒ ಜೊತೆಗೂಡಿ ಇಂತಹದ್ದೊಂದು ಹೊಸ ಪ್ರಯತ್ನಕ್ಕೆ ಮುಂದಾಗಿರುವುದು ನಿಜಕ್ಕೂ ಶ್ಲಾಘನೀಯ. ನಗರದ ಎಲ್ಲಾ ಬಿಎಂಟಿಸಿ ಬಸ್ಗಳಲ್ಲೂ ಈ ಡಿವೈಸ್ಗಳನ್ನು ಅಳವಡಿಸಿದರೆ, ಮತ್ತಷ್ಟು ಅಂಧರಿಗೆ ತುಂಬಾ ಸಹಾಯ ಆಗುವುದಂತೂ ಖಂಡಿತ.
