ನಾರಾಯಣಗುರು, ಭಗತ್​ಸಿಂಗ್ ಪಾಠ ಕೈಬಿಟ್ಟಿಲ್ಲ, ಹೆಡಗೆವಾರ್ ವಿಚಾರ ಸೇರಿಸಿದರೆ ಏನು ತಪ್ಪು: ಸಚಿವ ಸುನಿಲ್​ ಕುಮಾರ್

ಬೆಂಗಳೂರು: ಪಠ್ಯಪುಸ್ತಕ ಪರಿಷ್ಕರಣೆ ಸಂಬಂಧ ಶಿಕ್ಷಣ ಸಚಿವರು ಮತ್ತು ಸಂಬಂಧಿಸಿದ ಅಧಿಕಾರಿಗಳೊಂದಿಗೆ ಚರ್ಚೆ ನಡೆಸಿದ್ದೇನೆ. ಸಮಾಜದಲ್ಲಿದ್ದ ವಿಷಯವೊಂದನ್ನು ಕನ್ನಡಕ್ಕೆ ಸೇರಿಸಲಾಗಿದೆ. ನಾರಾಯಣಗುರು, ಭಗತ್ ಸಿಂಗ್ ವಿಚಾರವನ್ನು ಕೈಬಿಟ್ಟಿಲ್ಲ. ಆರ್​ಎಸ್​ಎಸ್​ ಸಂಸ್ಥಾಪಕ ಕೇಶವ ಬಲಿರಾಂ ಹೆಡಗೇವಾರ್ ಅವರ ವಿಚಾರವನ್ನು ಪಠ್ಯದಲ್ಲಿ ಸೇರಿಸಿರುವುದರಲ್ಲಿ ತಪ್ಪೇನಿದೆ ಎಂದು ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ಸಚಿವ ವಿ.ಸುನಿಲ್ ಕುಮಾರ್ ಕೇಳಿದರು.

ನಗರದಲ್ಲಿ ಗುರುವಾರ ಮಾಧ್ಯಮ ಪ್ರತಿನಿಧಿಗಳೊಂದಿಗೆ ಮಾತನಾಡಿದ ಅವರು, ಹೆಡಗೆವಾರ್ ಅವರ ವಿಷಯ ಸೇರಿಸಿವುದರಿಂದ ಏನೋ ತಪ್ಪಾಗಿದೆ ಎಂದು ನನಗೆ ಅನ್ನಿಸುವುದಿಲ್ಲ. ದೇಶದ ಸ್ವಾಭಿಮಾನ, ಶೌರ್ಯದ ಬಗ್ಗೆ ಹೇಳಬೇಕು ಎನ್ನುವ ಚಿಂತನೆ ಮೊದಲಿನಿಂದಲೂ ಇತ್ತು. ಮೆಕಾಲೆ ರೂಪಿಸಿದ ಶಿಕ್ಷಣ ಪದ್ಧತಿಯ ಹಿಡಿತದಿಂದ ನಾವು ಬಿಡಿಸಿಕೊಳ್ಳಬೇಕು. ಭಾರತೀಯ ಶಿಕ್ಷಣ ಪದ್ಧತಿ ಬರಬೇಕು. ಭಾರತದ ಮಕ್ಕಳಿಗೆ ಮೊಘಲರ ಶಿಕ್ಷಣ, ಟಿಪ್ಪುವಿನ ಶಿಕ್ಷಣ, ಔರಂಗಾಜೇಬನ ಶಿಕ್ಷಣ ಬೇಕು ಎಂಬುದು ನಮ್ಮ ವಾದವಲ್ಲ. ಭಾರತದ ಶಿಕ್ಷಣ ನಮಗೆ ಬೇಕಿದೆ. ಪಠ್ಯಪುಸ್ತಕ ಪರಿಷ್ಕರಣೆಗೆಂದು ರೂಪಿಸಿದ್ದ ತಜ್ಞರ ಸಮಿತಿ ಇದನ್ನು ಒಪ್ಪಿದೆ. ಹೀಗಾಗಿಯೇ ಪಠ್ಯ ಪುಸ್ತಕ ಪರಿಷ್ಕರಿಸಲಾಗಿದೆ ಎಂದು ಹೇಳಿದರು.

ಆರ್​ಎಸ್​ಎಸ್​ ಸಂಸ್ಥಾಪಕರಾದ ಕೇಶವ ಬಲಿರಾಂ ಹೆಡಗೆವಾರ್​ ಅವರ ಚಿಂತನೆಗಳಿಂದ ಪ್ರೇರಣೆ ಪಡೆದು ಕೋಟ್ಯಂತರ ಜನರು ದೇಶದ ಕೆಲಸ ಮಾಡುತ್ತಿದ್ದಾರೆ. ದೇಶದ ವಿಚಾರದಲ್ಲಿ ನಮಗೆ ಬದ್ಧತೆ ಇದೆ. ಚಕ್ರವರ್ತಿ ಸೂಲಿಬೆಲೆ ಅವರ ತಾಯಿಗೆ ವಂದಿಸುವೆ ಎನ್ನುವ ಲೇಖನ ಪಠ್ಯದಲ್ಲಿದೆ. ಅದನ್ನು ಸೂಲಿಬೆಲೆ ಅಥವಾ ಬೇರೆ ಯಾರಾದರೂ ಬರೆದಿರಲಿ. ಅದರ ವಿಚಾರ ಏನು? ತಾಯಿ ಭಾರತಿಯನ್ನು ವಂದಿಸುತ್ತೇನೆ ಎನ್ನುವುದು ಅವರ ವಿಚಾರ. ಅದನ್ನು ವಿರೋಧಿಸುವುದು ಏಕೆ ಎಂದು ಪ್ರಶ್ನಿಸಿದರು.

ತಾಯಿ ಭಾರತಿಯನ್ನು ವಿರೋಧಿಸುತ್ತೇನೆ ಎನ್ನುವುದು ನಿಮ್ಮ ನಿಲುವಾದರೆ ನೀವು ಯಾರನ್ನು ವಂದಿಸುತ್ತೀರಿ ಎಂದು ಪ್ರಶ್ನಿಸಬೇಕಾಗುತ್ತದೆ. ಯಾವ ವಿಷಯವನ್ನು ಆಧರಿಸಿ ನೀವು ಚರ್ಚೆ ಆರಂಭಿಸಿದ್ದೀರಿ ಎನ್ನುವ ಬಗ್ಗೆ ನಾವು ಚರ್ಚಿಸಬೇಕು. ವಿಷಯವನ್ನು ಗಮನಿಸಿದ ಮೇಲೆ ಬರೆದವರು ಯಾರು ಎಂದು ಯೋಚಿಸಬೇಕು. ಟೀಕೆ ಮಾಡುವವರ ಪರ ಕಾಂಗ್ರೆಸ್ ಒಲವು ತೋರುತ್ತಿದೆ ಎಂದು ಟೀಕಿಸಿದರು.

ನಮ್ಮ ದೇಶದಲ್ಲಿ ರಾಮಾಯಣ ಅಥವಾ ಮಹಾಭಾರತವನ್ನು ಯಾರೊಬ್ಬರೂ ಟೀಕಿಸಲು ಸಾಧ್ಯವಿಲ್ಲ. ಹೆಡಗೆವಾರ್ ಕಂಡರೆ ಕಾಂಗ್ರೆಸ್​ಗೆ ಭಯ ಯಾಕೆ? ಚಕ್ರವರ್ತಿ ಸೂಲಿಬೆಲೆ ದೇಶದ ಬಗ್ಗೆ ಆಳವಾಗಿ ಅಧ್ಯಯನ ಮಾಡಿಲ್ವಾ? ತಾಯಿ ಭಾರತಿ ಎಂಬ ವಿಚಾರವನ್ನೂ ವಿರೋಧಿಸುವುದು ಏಕೆ ಎಂದು ಪ್ರಶ್ನಿಸಿದರು.

ತಾಜಾ ಸುದ್ದಿಗೆ ಇಲ್ಲಿ ಕ್ಲಿಕ್ ಮಾಡಿ

Published On - 3:22 pm, Thu, 19 May 22