Metro Pillar Collapse: ಮೆಟ್ರೋ ಕಾಮಗಾರಿಯಲ್ಲಿ ತಾಯಿ, ಮಗು ಸಾವು; ದುರಂತಕ್ಕಿದೆ ಹಲವು ಕಾರಣ, ಪೊಲೀಸ್ ತನಿಖೆ ಆರಂಭ

ಬೆಂಗಳೂರು: ನಗರದ ಹೆಬ್ಬಾಳ ಸಮೀಪ ಮಂಗಳವಾರ (ಡಿ 10) ನಮ್ಮ ಮೆಟ್ರೋ ಕಾಮಗಾರಿಗೆಂದು ನಿಲ್ಲಿಸಿದ್ದ ಪಿಲ್ಲರ್ ಕುಸಿದು ತಾಯಿ-ಮಗು ಸಾವನ್ನಪ್ಪಿದ ಹೃದಯವಿದ್ರಾವಕ ಘಟನೆಗೆ ಸಂಬಂಧಿಸಿದಂತೆ ಗೋವಿಂದಪುರ ಠಾಣೆ ಪೊಲೀಸರು ತನಿಖೆ ಆರಂಭಿಸಿದ್ದಾರೆ. ಒಟ್ಟು ಮೂರು ಹಂತಗಳಲ್ಲಿ ತನಿಖೆ ನಡೆಯಲಿದೆ. ಮೊದಲ ಹಂತದಲ್ಲಿ ಮೆಟ್ರೋ ಅಧಿಕಾರಿಗಳು, 2ನೇ ಹಂತದಲ್ಲಿ ಗುತ್ತಿಗೆದಾರರು ಹಾಗೂ ಎಂಜಿನಿಯರ್​ಗಳು, 3ನೇ ಹಂತದಲ್ಲಿ ಐಐಎಸ್​ಸಿ ಹಾಗೂ ವಿಧಿವಿಜ್ಞಾನ (ಎಫ್​ಎಸ್​ಎಲ್) ವರದಿಯ ಆಧಾರದ ಮೇಲೆ ತನಿಖೆ ನಡೆಯಲಿದೆ. ಪ್ರಕರಣಕ್ಕೆ ಸಂಬಂಧಿಸಿದಂತೆ ಮೆಟ್ರೋ ನಿಗಮದ ಮುಖ್ಯ ಎಂಜಿನಿಯರ್, ಸೈಟ್ ಇಂಜಿನಿಯರ್ ಹಾಗೂ ಗುತ್ತಿಗೆದಾರರ ಹೇಳಿಕೆಗಳನ್ನು ಇಂದು ಮತ್ತು ನಾಳೆ (ಡಿ 11-12) ಪೊಲೀಸರು ದಾಖಲಿಸಿಕೊಳ್ಳಲಿದ್ದಾರೆ. ಮೆಟ್ರೋ ಪಿಲ್ಲರ್ ಕಂಬಿ ಕುಸಿತದ ಬಗ್ಗೆ ಪೊಲೀಸರು ವಿಸ್ತೃತ ಪರಿಶೀಲನೆ ನಡೆಸಲಿದ್ದು, ತನಿಖಾ ವರದಿಯ ನಂತರ ಘಟನೆಯ ನಿಖರ ಕಾರಣ ತಿಳಿದುಬರಲಿದೆ.

ದುರಂತಕ್ಕೆ ಯಾರೆಲ್ಲಾ ಹೊಣೆ?

ಪಿಲ್ಲರ್ ಕುಸಿದು ಸಂಭವಿಸಿದ ದುರಂತದಲ್ಲಿ ತಾಯಿ-ಮಗು ಮೃತಪಟ್ಟ ನಂತರ ಪ್ರಕರಣದ ಹೊಣೆಗಾರಿಕೆ ಯಾರದು ಎಂಬ ಪ್ರಶ್ನೆ ಚರ್ಚೆಗೆ ಗ್ರಾಸವಾಗಿದೆ. ಈ ಕುರಿತು ಹಲವು ಮೂಲಗಳಿಂದ ‘ಟಿವಿ9’ ಮಾಹಿತಿ ಕಲೆಹಾಕಿದೆ. ಬೆಂಗಳೂರು ಮೆಟ್ರೋ ನಿಗಮದ ಮುಖ್ಯ ಎಂಜಿನಿಯರ್ ರಂಗನಾಥ್, ಎಕ್ಸಿಕ್ಯುಟಿವ್ ಎಂಜಿನಿಯರ್ ಹೆಗ್ಗರೆಡ್ಡಿ ಅವರು ಒಟ್ಟಾರೆ ನಿರ್ಮಾಣ ಕಾಮಗಾರಿಗಳನ್ನು ಗಮನಿಸುತ್ತಿದ್ದಾರೆ. ಕಾಮಗಾರಿಯ ಗುತ್ತಿಗೆ ನಿರ್ವಹಿಸುತ್ತಿರುವ ಎನ್​ಸಿಸಿ ಕಂಪನಿಯ ಎಂಜಿನಿಯರ್ ವಿಕಾಸ್ ಕುಮಾರ್ ಅವರು ಕಾಮಗಾರಿಯ ನಿರ್ವಹಣೆಯನ್ನು ಗಮನಿಸಬೇಕಿತ್ತು ಎಂದು ಮೂಲಗಳು ಹೇಳಿವೆ.

ಕಂಬಕ್ಕೆ ಕಾಂಕ್ರಿಟ್ ಹಾಕಿರಲಿಲ್ಲ

ಮೆಟ್ರೋ ಕಾಮಗಾರಿಗೆ ಕಾಂಕ್ರಿಟ್ ಫುಟಿಂಗ್ ಆಗಿತ್ತು, ವರ್ಟಿಕಲ್ ಪಿಲ್ಲರ್ ಸ್ಟೀಲ್ ಕೆಲಸ ಬಹುತೇಕ ಮುಗಿದಿತ್ತು. ಪಿಲ್ಲರ್​ಗೆ ಅರ್ಧಂಬರ್ಧ ಕಾಂಕ್ರಿಟ್ ಹಾಕಲು ಬರುವುದಿಲ್ಲ. ಒಟ್ಟಿಗೆ ಒಂದೇ ಬಾರಿಗೆ ಕಾಂಕ್ರೀಟ್ ಹಾಕಬೇಕಿತ್ತು. ಅದಕ್ಕಾಗಿ ರಾಡ್ ಕಟ್ಟಿದ್ದ ಬಾರ್ ಬೆಂಡರ್​ಗಳು ಕಾಯುತ್ತಿದ್ದರು. ಸಾಮಾನ್ಯವಾಗಿ ಅಷ್ಟು ದೊಡ್ಡದಾದ ರಾಡ್​ಗಳನ್ನು ನಿಲ್ಲಿಸಿದ ಮೇಲೆ ತಕ್ಷಣ ಅಥವಾ ಒಂದು ದಿನದೊಳಗೆ ಕಾಂಕ್ರಿಟ್ ಹಾಕಬೇಕು. ಆದರೆ ಅರವತ್ತು ಅಡಿಯ ಸ್ಟೀಲ್ ಪಿಲ್ಲರ್​ಗೆ ಕಾಂಕ್ರಿಟ್ ಹಾಕುವುದು ತಡವಾಗಿದೆ. ಇದರ ಜೊತೆಗೆ ಯಾವುದೇ ಸುರಕ್ಷತಾ ಕ್ರಮಗಳನ್ನೂ ಜರುಗಿಸಿಲ್ಲ. ಹೀಗಾಗಿ ಕಬ್ಬಿಣದ ರಾಡ್​ಗಳು ಎಡಕ್ಕೆ ವಾಲಿಕೊಂಡಿವೆ. ಅದಕ್ಕೆ ನಾಲ್ಕೂ ಕಡೆಗಳಿಂದ ಜಾಕ್ ಹಾಕಿ ನಿಲ್ಲಿಸಿಕೊಳ್ಳಬೇಕಿತ್ತು. ಈ ಕೆಲಸ ಆಗಿರಲಿಲ್ಲ.

ಅನುಷ್ಠಾನದಲ್ಲಿ ಲೋಪ

ಈ ಕಾಮಗಾರಿಗಾಗಿ ಗುತ್ತಿಗೆದಾರರು ₹ 2166 ಕೋಟಿ ರೂಪಾಯಿ ಖರ್ಚು ಮಾಡುತ್ತಿದ್ದಾರೆ. ಆದರೂ ಹಲವು ರೀತಿಯ ಲೋಪ ಎಸಗಿರುವುದು ಬೆಳಕಿಗೆ ಬಂದಿದೆ. ಇಷ್ಟು ದೊಡ್ಡದಾದ ಮತ್ತು ಎತ್ತರದ ಕಾಮಗಾರಿ ಮಾಡುವ ವೇಳೆ ರೋಪ್ (ಹಗ್ಗ) ಹಾಕಿ ರಾಡ್​ಗಳನ್ನು ಅಕ್ಕಪಕ್ಕ ಬಾಗದಂತೆ ನಿಲ್ಲಿಸಿರಬೇಕಿತ್ತು. ಎನ್​ಸಿಸಿ ಮತ್ತು ಬಿಎಂಆರ್​ಸಿಎಲ್​ನ ಸಿವಿಲ್ ಎಂಜಿನಿಯರಿಂಗ್ ವಿಭಾಗದ ಎಂಜಿನಿಯರ್​ಗಳು ಈ ಅಂಶವನ್ನು ತಪಾಸಣೆ‌ ಮಾಡಬೇಕಿತ್ತು. ಆದರೆ ಎರಡು ಕಂಪನಿಗಳ ಎಂಜಿನಿಯರ್​ಗಳು ಈ ವಿಚಾರದಲ್ಲಿ ನಿರ್ಲಕ್ಷ್ಯ ವಹಿಸಿದ್ದಾರೆ.

ಇಂಥ ಬೃಹತ್ ಕಾಮಗಾರಿ ನಡೆಯುವಾಗ ಆ ರಸ್ತೆಯಲ್ಲಿ ವಾಹನ ಸಂಚಾರ ಮತ್ತು ಜನರ ಸಂಚಾರಕ್ಕೆ ನಿರ್ಬಂಧ ಹೇರಬೇಕಿತ್ತು. ಆದರೆ ಈ ಅಂಶವನ್ನು ಖಾತ್ರಿಪಡಿಸಿಕೊಳ್ಳುವಲ್ಲಿಯು ಎರಡೂ ಸಂಸ್ಥೆಗಳು ವಿಫಲವಾಗಿರುವುದನ್ನು ಈ ದುರಂತವು ಎತ್ತಿತೋರಿಸಿದೆ.

ಇದನ್ನೂ ಓದಿ: ಮೆಟ್ರೋ ನಿರ್ಮಾಣಕ್ಕೆ ಈವರೆಗೆ 18 ಬಲಿ; ಇನ್ನಾದರೂ ಬೆಂಗಳೂರು ನಾಗರಿಕರಿಗೆ ಸಿಗಬಹುದೇ ಸುರಕ್ಷಾ ಖಾತ್ರಿ

Published On - 3:29 pm, Wed, 11 January 23