ಕಲಬುರಗಿ ಜಿಲ್ಲಾ ಪೊಲೀಸರಿಗೆ ಒಂದು ವಾರದ ಸೈಬರ್ ಸೆಕ್ಯೂರಿಟಿ ತರಬೇತಿ; ಸಂಪೂರ್ಣ ವಿವರ ಇಲ್ಲಿದೆ

ಕಲಬುರಗಿ, ಸೆ.16: ರಾಜ್ಯದ ಸೈಬರ್ ಸುರಕ್ಷತೆ ಸಾಮರ್ಥ್ಯಗಳನ್ನು ಹೆಚ್ಚಿಸುವ ಪ್ರಯತ್ನದಲ್ಲಿ, CySecK (ಕರ್ನಾಟಕ ರಾಜ್ಯದ ಸೈಬರ್ ಸೆಕ್ಯುರಿಟಿಯ ಕೆ-ಟೆಕ್ ಸೆಂಟರ್ ಆಫ್ ಎಕ್ಸಲೆನ್ಸ್) ವತಿಯಿಂದ ಕಲಬುರಗಿ (Kalaburagi) ಜಿಲ್ಲೆಯಲ್ಲಿನ ಪೊಲೀಸ್ ಸಿಬ್ಬಂದಿಗೆ ಒಂದು ವಾರದ ತರಬೇತಿ ಕಾರ್ಯಕ್ರಮವನ್ನು ಹಮ್ಮಿಕೊಳ್ಳಲಾಗಿತ್ತು. ಕಲಬುರಗಿಯ ಎಸ್ಪಿ (SP) ಕಚೇರಿಯ ಪೊಲೀಸ್ ಭವನದಲ್ಲಿ ಸೆಪ್ಟೆಂಬರ್ 11 ರಿಂದ ಸೆಪ್ಟೆಂಬರ್ 15, 2023 ರವರೆಗೆ ನಡೆದ ಐದು ದಿನಗಳ ಸಮಗ್ರ ತರಬೇತಿಯಲ್ಲಿ 220 ಪೊಲೀಸ್ ಸಿಬ್ಬಂದಿಗಳು ಸಕ್ರಿಯವಾಗಿ ಭಾಗವಹಿಸಿದ್ದರು.

ಸೈಬರ್ ತಂತ್ರಜ್ಞಾನಗಳು ಮತ್ತು ಸೈಬರ್ ಅಪರಾಧ ತನಿಖೆಗಳಲ್ಲಿ ಅಗತ್ಯವಾದ ಜ್ಞಾನ ಮತ್ತು ಕೌಶಲ್ಯಗಳೊಂದಿಗೆ ಪೊಲೀಸ್ ಸಿಬ್ಬಂದಿಗಳನ್ನು ಸಜ್ಜುಗೊಳಿಸುವುದು ಈ ತರಬೇತಿ ಕಾರ್ಯಕ್ರಮದ ಪ್ರಮುಖ ಉದ್ದೇಶವಾಗಿತ್ತು. ಇದಲ್ಲದೆ, ಸಾರ್ವಜನಿಕರಿಗೆ ಶಿಕ್ಷಣ ನೀಡುವಲ್ಲಿ ಅವರನ್ನು ಸಬಲೀಕರಣಗೊಳಿಸುವ ಉದ್ದೇಶದಿಂದ, ಕಾನ್ಸ್‌ಟೇಬಲ್‌ಗಳಿಗೆ ಸೈಬರ್ ಅಪಾಯಗಳು ಮತ್ತು ನೈರ್ಮಲ್ಯ ಅಭ್ಯಾಸಗಳ ಕುರಿತು ಅಧಿವೇಶನವನ್ನು ನಡೆಸಲಾಯಿತು.

ಇದನ್ನೂ ಓದಿ:RBI Recruitment 2023: 66 ಐಟಿ ಸೆಕ್ಯುರಿಟಿ ಎಕ್ಸ್‌ಪರ್ಟ್, ಐಟಿ ಸಿಸ್ಟಮ್ ಅಡ್ಮಿನಿಸ್ಟ್ರೇಟರ್ ಹುದ್ದೆಗಳಿಗೆ ಆನ್‌ಲೈನ್‌ನಲ್ಲಿ ಅರ್ಜಿ ಸಲ್ಲಿಸಿ; ವಾರ್ಷಿಕ ವೇತನ ರೂ. 57,24,000

ತಾಂತ್ರಿಕ ತರಬೇತಿ ಕಾರ್ಯಾಗಾರ

ಸೈಬರ್ ಕ್ರೈಮ್ ತನಿಖಾ ತರಬೇತಿಯನ್ನು ಎರಡು ಬ್ಯಾಚ್‌ಗಳಲ್ಲಿ ನಡೆಸಲಾಗಿದ್ದು, ಪ್ರತಿ ಬ್ಯಾಚ್‌ನಲ್ಲಿ 80 ಕ್ಕೂ ಹೆಚ್ಚು ಅಧಿಕಾರಿಗಳು ಎರಡು ದಿನಗಳ ಸಮಗ್ರ ತರಬೇತಿಯನ್ನು ಪಡೆದಿದ್ದಾರೆ. ಮೊದಲ ದಿನ, ಶ್ರೀ ಮಹೇಶ್ ವಸ್ತ್ರದ್ ಅವರು ಇಂಟರ್ನೆಟ್ ಮೂಲಗಳು, ನೆಟ್‌ವರ್ಕ್ ವಿವರಗಳು, ಬ್ಲಾಕ್‌ಚೈನ್, ಕ್ರಿಪ್ಟೋಕರೆನ್ಸಿಗಳು ಸೇರಿದಂತೆ ಪ್ರಮುಖ ವಿಷಯಗಳ ಬಗ್ಗೆ ಮಾಹಿತಿ ನೀಡಿದರು.

ಎರಡನೇ ದಿನ, ಶ್ರೀ ಸಮರ್ಥ್ ಭಟ್ ನೇತೃತ್ವದಲ್ಲಿ, ಡಿಜಿಟಲ್ ಸಾಕ್ಷ್ಯವನ್ನು ನಿರ್ವಹಿಸಲು ಸರಿಯಾದ ಕಾರ್ಯವಿಧಾನಗಳು, ಸೈಬರ್ ಫೋರೆನ್ಸಿಕ್ಸ್‌ನಲ್ಲಿ ಸೂಕ್ತ ಉಪಕರಣಗಳು ಮತ್ತು ತಂತ್ರಗಳ ಬಳಕೆಯನ್ನು ಸಮಗ್ರವಾಗಿ ಪ್ರದರ್ಶಿಸಲಾಯಿತು. ಇದರ ನಂತರ, ತರಬೇತಿಯಲ್ಲಿ ಭಾಗವಹಿಸಿದವರಿಗೆ ತಮ್ಮ ತಿಳುವಳಿಕೆ ಮತ್ತು ಪ್ರಾವೀಣ್ಯತೆಯನ್ನು ಮೌಲ್ಯಮಾಪನ ಮಾಡಲು ಆನ್‌ಲೈನ್ ಪರೀಕ್ಷೆ ನಡೆಸಲಾಯಿತು.

ಸೈಬರ್ ನೈರ್ಮಲ್ಯ

ಸೆಪ್ಟೆಂಬರ್ 13 ರಂದು, ಸೈಬರ್ ಜಾಗೃತಿ ಮತ್ತು ಸೈಬರ್ ನೈರ್ಮಲ್ಯ ಅಭ್ಯಾಸಗಳ ಬಗ್ಗೆ ಅರ್ಧ ದಿನದ ಅಧಿವೇಶನವನ್ನು ಶ್ರೀ ಕಾರ್ತಿಕ್ ರಾವ್ ಬಪ್ಪನಾಡ್ ಅವರು ನಡೆಸಿದರು. 50 ಕ್ಕೂ ಹೆಚ್ಚು ಬೀಟ್ ಕಾನ್‌ಸ್ಟೆಬಲ್‌ಗಳು ಈ ಸಭೆಯಲ್ಲಿ ಪಾಲ್ಗೊಂಡರು. ಇನ್ನು ಈ ವೇಳೆ ಮಾತನಾಡಿದ ಅವರು ‘ಸೈಬರ್ ವಂಚನೆಯನ್ನು ಎದುರಿಸಲು ಮತ್ತು ತಡೆಗಟ್ಟಲು ಉತ್ತಮ ಅಭ್ಯಾಸಗಳ ಜ್ಞಾನ ಮತ್ತು ಅರಿವನ್ನು ಈ ಸಭೆಯಲ್ಲಿ ಮನವರಿಕೆ ಮಾಡಲಾಯಿತು. “ಸೈಬರ್ ಸಾಧನಗಳ ಬಳಕೆ ಈಗ ನಮ್ಮ ಸಮಾಜದ ಎಲ್ಲಾ ವಯಸ್ಕರು ಮತ್ತು ಮಕ್ಕಳಲ್ಲಿ ಸಾಮಾನ್ಯವಾಗಿದೆ.

ಇದನ್ನೂ ಓದಿ:Cyber Security Expert: ಭಾರತದಲ್ಲಿ ವೃತ್ತಿಪರ ಸೈಬರ್ ಭದ್ರತಾ ತಜ್ಞರಾಗುವುದು ಹೇಗೆ? ಕೋರ್ಸ್, ಅರ್ಹತೆ, ಉದ್ಯೋಗ ಅವಕಾಶಗಳು ಹೇಗಿವೆ?

‘ಸೈಬರ್ ಚಾನೆಲ್‌ಗಳ ಮೂಲಕ ಹೆಚ್ಚುತ್ತಿರುವ ವಂಚನೆಗಳೊಂದಿಗೆ, ಈ ವಂಚಕರು ಅಳವಡಿಸಿಕೊಂಡಿರುವ ತಂತ್ರಗಳ ಅರಿವು ಮತ್ತು ಸೈಬರ್ ಜಾಗದಲ್ಲಿ ಮಾಡಬೇಕಾದ ಮತ್ತು ಮಾಡಬಾರದ ಸಂಗತಿಗಳ ಅರಿವು ಬಹಳ ಮುಖ್ಯವಾಗಿದೆ. ಬೀಟ್ ಕಾನ್‌ಸ್ಟೆಬಲ್‌ಗಳ ಅಧಿವೇಶನವು ಸೈಬರ್ ನೈರ್ಮಲ್ಯದ ಅಭ್ಯಾಸಗಳು ಮತ್ತು ಪೋಷಕರಿಗೆ ಸೈಬರ್ ಜಗತ್ತಿನಲ್ಲಿ ಮಕ್ಕಳ ಪಾಲನೆ ಕುರಿತು ಸಲಹೆಗಳನ್ನು ಒದಗಿಸಲಾಯಿತು. ತರಬೇತಿ ಪಡೆದಿರುವ ಅಧಿಕಾರಿಗಳು ಈಗ ಸೈಬರ್‌ ಸುರಕ್ಷತೆಯ ಬಗ್ಗೆ ಸಾರ್ವಜನಿಕರಿಗೆ ಜಾಗೃತಿ ಮೂಡಿಸಲು ಉತ್ತಮವಾಗಿ ಸಜ್ಜಾಗಿದ್ದಾರೆ.” ಎಂದರು.

ಸಮಾರೋಪ ಅಧಿವೇಶನ

ತರಬೇತಿಯ ಸಮಾರೋಪ ದಿನದಂದು ಹೆಚ್ಚುವರಿ SP ಶ್ರೀ. ಎನ್ ಶ್ರೀನಿಧಿ, ಅವರು ಸೈಬರ್ ಯುಗದಲ್ಲಿ ವೈಯಕ್ತಿಕ ಮತ್ತು ವೃತ್ತಿಪರ ಬೆಳವಣಿಗೆಗೆ ನಿರಂತರವಾದ ಕೌಶಲ್ಯದ ಅಗತ್ಯಗಳ ಬಗ್ಗೆ ಬೆಳಕು ಚೆಲ್ಲಿದರು. ಯಶಸ್ವಿ ಐದು ದಿನಗಳ ತರಬೇತಿ ಕಾರ್ಯಕ್ರಮದ ಅಚಲ ಬೆಂಬಲ ಮತ್ತು ಸಹಕಾರಕ್ಕಾಗಿ ಎಸ್ಪಿ, ಎಎಸ್ಪಿ ಮತ್ತು ಪೊಲೀಸ್ ಇನ್ಸ್‌ಪೆಕ್ಟರ್ ಗಳ ನೇತೃತ್ವದಲ್ಲಿ ಇಡೀ ಕಲಬುರಗಿ ಪೊಲೀಸ್ ತಂಡಕ್ಕೆ CySecK ತನ್ನ ಹೃತ್ಪೂರ್ವಕ ಕೃತಜ್ಞತೆಯನ್ನು ಸಲ್ಲಿಸಿತು.

ಐಟಿಬಿಟಿ, ಆರ್.ಡಿ.ಪಿ.ಆರ್ ಹಾಗೂ ಕಲಬುರ್ಗಿ ಜಿಲ್ಲಾ ಉಸ್ತುವಾರಿ ಸಚಿವ ಪ್ರಿಯಾಂಕ್ ಖರ್ಗೆ ಮಾತನಾಡಿ “ಪೊಲೀಸರಿಗೆ ಸೈಬರ್ ಭದ್ರತೆ ತರಬೇತಿ ಕೇವಲ ಒಂದು ಆಯ್ಕೆಯಾಗಿಲ್ಲ, ಇದು ನಮ್ಮ ಡಿಜಿಟಲ್ ಯುಗದಲ್ಲಿ ಅನಿವಾರ್ಯವಾಗಿದೆ. ಸೈಬರ್ ಬೆದರಿಕೆಗಳನ್ನು ಪರಿಣಾಮಕಾರಿಯಾಗಿ ಎದುರಿಸಲು ಮತ್ತು ಸೈಬರ್ ಜಾಗದಲ್ಲಿ ಪ್ರತಿಯೊಬ್ಬರಿಗೂ ಸುರಕ್ಷಿತ ವಾತಾವರಣವನ್ನು ಸೃಷ್ಟಿಸಲು ಮತ್ತು ನೈಜ ಪ್ರಪಂಚದಿಂದ ಡಿಜಿಟಲ್ ಜಗತ್ತಿಗೆ ಅಪರಾಧವು ಹೇಗೆ ಸಾಗಿದೆ ಎಂಬುದರ ಕುರಿತು ಅವರಿಗೆ ಅರಿವು ಮೂಡಿಸಲು ನಮ್ಮ ಪೊಲೀಸರಿಗೆ ಸಹಾಯ ಮಾಡುವ ನಮ್ಮ ಪ್ರಯತ್ನದಲ್ಲಿ, ಈ ತರಬೇತಿಯು ಅತ್ಯಗತ್ಯವಾಗಿತ್ತು ಎಂದರು.

ಇದನ್ನೂ ಓದಿ:Facebook ಬಳಸುವ ಮುನ್ನ ಎಚ್ಚರ; ಫೇಸ್​ಬುಕ್​ ಗೆಳೆಯನನ್ನು ನಂಬಿ 12 ಲಕ್ಷ ರೂ. ಕಳೆದುಕೊಂಡ ಸೈಬರ್ ತಜ್ಞ

CySecK ಅಂದರೆ?

CySecK, ಸೈಬರ್ ಸೆಕ್ಯುರಿಟಿ ಕ್ಷೇತ್ರದಲ್ಲಿ ಕರ್ನಾಟಕದ ಪ್ರಮುಖ ಸರ್ಕಾರಿ ಉಪಕ್ರಮವಾಗಿದ್ದು, ಪ್ರತಿಷ್ಠಿತ ಇಂಡಿಯನ್ ಇನ್‌ಸ್ಟಿಟ್ಯೂಟ್ ಆಫ್ ಸೈನ್ಸ್ (IISc) ಕ್ಯಾಂಪಸ್‌ನಿಂದ IISc ಆಂಕರ್ ಇನ್‌ಸ್ಟಿಟ್ಯೂಟ್ ಮತ್ತು ಕರ್ನಾಟಕ ಸ್ಟೇಟ್ ಕೌನ್ಸಿಲ್ ಫಾರ್ ಸೈನ್ಸ್ ಅಂಡ್ ಟೆಕ್ನಾಲಜಿ (KSCST) ಅನುಷ್ಠಾನ ಸಂಸ್ಥೆಯಾಗಿ ಕಾರ್ಯನಿರ್ವಹಿಸುತ್ತದೆ. IT, Bt, ಮತ್ತು S&T ಇಲಾಖೆಯ ಅಡಿಯಲ್ಲಿ ಕರ್ನಾಟಕ ಇನ್ನೋವೇಶನ್ ಮತ್ತು ಟೆಕ್ನಾಲಜಿ ಸೊಸೈಟಿ (KITS) ಇಂದ ಸ್ಥಾಪಿತವಾದ CySecK, ಸೈಬರ್-ಸುರಕ್ಷಿತ ವಾತಾವರಣವನ್ನು ಸೃಷ್ಟಿಸಲು, ಉದ್ಯಮದ ಸಹಯೋಗವನ್ನು ಬೆಳೆಸಲು, ಕೌಶಲ್ಯ ಅಂತರವನ್ನು ಕಡಿಮೆ ಮಾಡಲು, ಜಾಗೃತಿ ಮೂಡಿಸಲು ಮತ್ತು ಹೊಸತನವನ್ನು ಚಾಲನೆ ಮಾಡಲು ಸಮರ್ಪಿಸಲಾಗಿದೆ. ಸೈಬರ್ ಭದ್ರತೆಯ ಕ್ಷೇತ್ರ ದಲ್ಲಿ CySecK ಪ್ರಮಾಣೀಕರಣ, ಉತ್ತಮ ಅಭ್ಯಾಸಗಳು, ಸಂಶೋಧನೆ ಮತ್ತು ಅಭಿವೃದ್ಧಿ ಹಾಗೂ ತಾಂತ್ರಿಕ ತರಬೇತಿ ಕಾರ್ಯಕ್ರಮಗಳು ಸೈಬರ್ ಭದ್ರತೆಯನ್ನು ಉತ್ತೇಜಿಸುತ್ತದೆ.

ರಾಜ್ಯದ ಮತ್ತಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ

Published On - 9:43 pm, Sat, 16 September 23