Kantara Painting: ಮೈಸೂರಿನ ಉರಗ ಸಂರಕ್ಷಕ ಸ್ನೇಕ್ ಶ್ಯಾಮ್ ಮನೆಯ ಗೋಡೆಯಲ್ಲಿ ಮಹಿಷಾಸುರ, ಕಾಂತಾರ
Snake Shyam: ಸ್ನೇಕ್ ಶ್ಯಾಮ್ ಮನೆ ಮುಂದೆ ಸಾಗುವ ಪ್ರತಿಯೊಬ್ಬರೂ ಒಂದು ಕ್ಷಣ ನಿಂತು ಈ ಚಿತ್ರಗಳನ್ನು ನೋಡಿಯೇ ಮುಂದೆ ಸಾಗುತ್ತಾರೆ. ಅಷ್ಟು ಆಕರ್ಷಕವಾಗಿ ಇವು ಮೂಡಿಬಂದಿವೆ.
Updated on: Dec 26, 2022 | 5:49 PM
ಎಲ್ಲರೂ ಮಾಡುವುದು ಹೊಟ್ಟೆಗಾಗಿ ಗೇಣು ಬಟ್ಟೆಗಾಗಿ, ಜೊತೆಗೆ ನೆಮ್ಮದಿಯಾಗಿ ವಾಸ ಮಾಡುವ ಮನೆಗಾಗಿ. ಹಾಗಾಗಿ ತಾವು ವಾಸ ಮಾಡುವ ಮನೆ ಆಕರ್ಷಕವಾಗಿ ಕಾಣಬೇಕೆಂಬುದು ಎಲ್ಲರ ಬಯಕೆ. ಅದಕ್ಕಾಗಿ ಮನೆಯ ಮುಂಭಾಗವನ್ನು ಆಕರ್ಷಣೀಯವಾಗಿಸಲು ಸಾಕಷ್ಟು ಒತ್ತು ನೀಡಿರುತ್ತಾರೆ. ತರಾವರಿಯಾಗಿ ಸಿಂಗರಿಸಿರುತ್ತಾರೆ. ದೇಶ ವಿದೇಶಗಳನ್ನು ಸುತ್ತಾಡಿ ಮನೆಯ ಮುಂದಕ್ಕೆ ಒಪ್ಪುವ ವಸ್ತುಗಳನ್ನು ತಂದು ಹಾಕಿರುತ್ತಾರೆ. ಆದರೆ ಮೈಸೂರಿನ ಉರಗ ಸಂರಕ್ಷಕ ಸ್ನೇಕ್ ಶ್ಯಾಮ್ (Snake Shyam) ಮಾತ್ರ ಕೊಂಚ ಡಿಫರೆಂಟ್. ತಮ್ಮ ಮನೆಯ ಮುಂಭಾಗ ಸ್ನೇಕ್ ಶ್ಯಾಮ್ ಮಾಡಿಸಿರುವ ಪೇಂಟಿಂಗ್ ಎಲ್ಲರ ಆಕರ್ಷಣೆಯ ಕೇಂದ್ರ ಬಿಂದುವಾಗಿದೆ. ‘ಕಾಂತಾರ’ (Kantara) ಸಿನಿಮಾದಲ್ಲಿ ತೋರಿಸಿದಂತೆ ದೈವದ ಚಿತ್ರ ಇಲ್ಲಿ ರಾರಾಜಿಸುತ್ತಿವೆ. ಜೊತೆಗೆ ಮಹಿಷಾಸುರನ (Mahishasura) ಚಿತ್ರ ಕೂಡ ಗಮನ ಸೆಳೆಯುತ್ತಿದೆ.
ಸ್ನೇಕ್ ಶ್ಯಾಮ್ ಅವರು ಮೈಸೂರು ಕೆಆರ್ಎಸ್ ರಸ್ತೆಯಲ್ಲಿರುವ ತಮ್ಮ ಮನೆಯ ಮುಂದೆ ಒಂದು ಕಡೆ ಕಾಂತಾರ ಸಿನಿಮಾದ ಪಂಜುರ್ಲಿ ದೈವ, ವರಾಹವನ್ನು ಹಾಗೂ ಮತ್ತೊಂದು ಕಡೆ ಮೈಸೂರಿನ ಚಾಮುಂಡಿ ಬೆಟ್ಟದಲ್ಲಿರುವ ಮಹಿಷಾಸುರನ ಪ್ರತಿಮೆಯ ಚಿತ್ರವನ್ನು ಬಿಡಿಸಿದ್ದಾರೆ. ಮೈಸೂರಿನ ಕಲಾವಿದ ಯೋಗಾನಂದ್ ಬಿಡಿಸಿರುವ ಈ ಎರಡು ಚಿತ್ರಗಳು ಆಕರ್ಷಣೆಯ ಕೇಂದ್ರ ಬಿಂದುವಾಗಿವೆ.
ಇದನ್ನೂ ಓದಿ: ಮೈಸೂರಿನ ಖ್ಯಾತ ಉರಗ ಸಂರಕ್ಷಕ ಸ್ನೇಕ್ ಶ್ಯಾಮ್ ಮೇಲೆ ನಾಗರಹಾವು ದಾಳಿ
ಸ್ನೇಕ್ ಶ್ಯಾಮ್ ಮನೆ ಮುಂದೆ ಸಾಗುವ ಪ್ರತಿಯೊಬ್ಬರು ಒಂದು ಕ್ಷಣ ನಿಂತು ಈ ಚಿತ್ರಗಳನ್ನು ನೋಡಿಯೇ ಮುಂದೆ ಸಾಗುತ್ತಾರೆ. ಅಷ್ಟು ಅದ್ಭುತವಾಗಿ ಈ ಚಿತ್ರಗಳು ಮೂಡಿಬಂದಿವೆ. ಇನ್ನು ಈ ಚಿತ್ರಗಳನ್ನು ಬರೆಸಿದ ಮೇಲೆ ಸ್ನೇಕ್ ಶ್ಯಾಮ್ ಅವರ ಧ್ಯಾನ, ಸ್ನೇಹಿತರ ಜೊತೆ ಹರಟೆ, ಮಾತುಕತೆ, ನಿದ್ದೆ, ಕಾಫಿ, ಊಟ ಎಲ್ಲವೂ ಇಲ್ಲೇ ಆಗಿ ಹೋಗಿದೆ. ಈ ಎರಡು ಚಿತ್ರಗಳು ಸ್ನೇಕ್ ಶ್ಯಾಮ್ ಅವರನ್ನು ಒಂದು ರೀತಿ ಮಂತ್ರ ಮುಗ್ಧರನ್ನಾಗಿಸಿದೆ. ಕಲಾವಿದ ಯೋಗಾನಂದ್ ಕೈಚಳಕದ ಮೋಡಿಗೆ ಸ್ನೇಕ್ ಶ್ಯಾಮ್ ಬೆರಗಾಗಿದ್ದಾರೆ.
ಇದನ್ನೂ ಓದಿ: ಮೈಸೂರು: ಮಗುವಿನ ಶಾಲಾ ಶೂನಲ್ಲಿ ಇತ್ತೊಂದು ಚಿಕ್ಕ ನಾಗರಹಾವು, ಸ್ನೇಕ್ ಶ್ಯಾಮ್ ಅದನ್ನು ಹಿಡಿದೊಯ್ದರು!
ಕಾಂತಾರ ಸಿನಿಮಾ ಕುರಿತು ಸ್ನೇಕ್ ಶ್ಯಾಮ್ ಮಾತು:
‘ನನ್ನ ಜೀವನದಲ್ಲಿ ನಾನು ನೋಡಿದ ಅತ್ಯುತ್ತಮ ಚಿತ್ರ ಕಾಂತಾರ. ಇದರಲ್ಲಿನ ಉತ್ತಮ ಸಂದೇಶಗಳು ನನ್ನನ್ನು ಪ್ರಭಾವಗೊಳಿಸಿದವು. ದೈವದ ಶಕ್ತಿ. ಮನುಷ್ಯನ ದುರಾಸೆ. ಮನುಷ್ಯನಿಗೆ ಕೋಟಿ ಕೋಟಿ ಇದ್ದರೂ ಬೇಕಾಗಿರುವುದು ನೆಮ್ಮದಿ. ಹೀಗೆ ಹತ್ತ ಹಲವು ಸಂದೇಶಗಳು ಇಷ್ಟವಾದವು. ಅದರ ನೆನಪಿಗಾಗಿ ಕಾಂತಾರ ಚಿತ್ರವನ್ನು ಬಿಡಿಸಿದೆ’ ಎಂದು ಸ್ನೇಕ್ ಶ್ಯಾಮ್ ಹೇಳಿದ್ದಾರೆ.
ಈ ಚಿತ್ರಗಳಿಂದ ಖುಷಿ, ನೆಮ್ಮದಿ:
‘ಅದೇನೋ ಗೊತ್ತಿಲ್ಲ, ಚಿಕ್ಕಂದಿನಿಂದಲೂ ಆ ಮಹಿಷಾಸುರನ ಮೇಲೆ ಏನೋ ವಿಚಿತ್ರ ಆಕರ್ಷಣೆ. ಆದರೆ ಏಕೆ ಏನು ಅಂತಾ ಗೊತ್ತಿಲ್ಲ. ಆತನನ್ನು ನೋಡಿದರೆ ನೋಡುತ್ತಲೆ ಇರಬೇಕೆಂಬ ಭಾವ ಮೂಡುತ್ತದೆ. ಅದಕ್ಕಾಗಿ ಮನೆಯ ಮುಂದೆ ಮಹಿಷಾಸುರನ ಚಿತ್ರ ಬಿಡಿಸಿದ್ದೇನೆ. ಆ ಎರಡು ಚಿತ್ರಗಳ ಮುಂದೆ ಕುಳಿತರೇ ಅದೇನೋ ಖುಷಿ ನೆಮ್ಮದಿ ತನ್ನಿಂದ ತಾನೇ ಬಂದು ಬಿಡುತ್ತದೆ’ ಎಂಬುದು ಸ್ನೇಕ್ ಶ್ಯಾಮ್ ಮಾತುಗಳು.
ಒಟ್ನಲ್ಲಿ ಸದಾ ಒಂದಲ್ಲ ಒಂದು ಕಾರಣಕ್ಕೆ ಸುದ್ದಿಯಾಗುವ ಸ್ನೇಕ್ ಶ್ಯಾಮ್ ಈ ಬಾರಿ ತಮ್ಮ ಮನೆಯ ಮುಂದೆ ಮಾಡಿಸಿರುವ ವಿಭಿನ್ನ ಪೇಂಟಿಂಗ್ನಿಂದ ಗಮನ ಸೆಳೆಯುತ್ತಿದ್ದಾರೆ.
ರಾಮ್, ಟಿವಿ9 – ಮೈಸೂರು
ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ.
