Azim Premji University: ಕೋವಿಡ್ನಿಂದ ಮಕ್ಕಳಲ್ಲಿ ಶೇ. 92ರಷ್ಟು ಕಲಿಕೆಯ ಗ್ರಹಿಕೆ ನಷ್ಟ, ಜ್ಞಾನದ ಅಡಿಪಾಯ ಮತ್ತೆ ಗಟ್ಟಿಗೊಳಿಸುವ ಅನಿವಾರ್ಯತೆ ಇದೆ
Azim Premji University: ಶೇ 92ರಷ್ಟು ಮಕ್ಕಳು, ಗಣಿತ ವಿಷಯದಲ್ಲಿ ಮೊದಲಿನಿಗಿಂತ ಶೇ 80ರಷ್ಟು ಮರೆಯುವ ಸಾಮರ್ಥ್ಯವನ್ನು ಹೊಂದಿದ್ದಾರೆ. ಉದಾಹರಣೆಗೆ ಅವರ ಸ್ವಂತಿಕೆ ಪದಗಳಲ್ಲಿ ವ್ಯಕ್ತಪಡಿಸುವುದರಲ್ಲಿ, ಅದರಲ್ಲೂ ಗಣಿತ ವಿಷಯಕ್ಕೆ ಸಂಬಂಧಿಸಿದಂತೆ ಕೂಡುವುದು, ಕಳೆಯುವುದರಲ್ಲಿ ಮಕ್ಕಳು ಮೊದಲಿಗಿಂತ ಈಗ ಸೋಲುತ್ತಿದ್ದಾರೆ.
Updated on: Feb 12, 2021 | 4:52 PM
ಬೆಂಗಳೂರು:ಕೋವಿಡ್ ಸಾಂಕ್ರಾಮಿಕದಿಂದಾಗಿ ಶಾಲೆ ಮುಚ್ಚಲ್ಪಟ್ಟಿದ್ದವು. ಇದರಿಂದ ಮಕ್ಕಳ ಕಲಿಕೆಯಲ್ಲಿ ಅಪಾರ ನಷ್ಟ ಉಂಟಾಗಿದೆ ಎಂಬುದನ್ನು ಅಜೀಂ ಪ್ರೆಮ್ಜಿ ವಿಶ್ವವಿದ್ಯಾಲಯ ಕೈಗೊಂಡಿದ್ದ ಅಧ್ಯಯನದಿದ ತಿಳಿದುಬಂದಿದೆ. ‘ಸಾಂಕ್ರಾಮಿಕ ಸಮಯದಲ್ಲಿ ಕಲಿಕೆಯ ನಷ್ಟ’ ಕುರಿತಾಗಿ ನಡೆಸಿದ ಅಧ್ಯಯನವನ್ನು ಅಜೀಂ ಪ್ರೆಮ್ಜಿ ವಿಶ್ವವಿದ್ಯಾಲಯವು ಬುಧವಾರ ಬಿಡುಗಡೆ ಮಾಡಿದೆ.
ಕೋವಿಡ್ ಸಾಂಕ್ರಾಮಿಕ ರೋಗವು ಶಿಕ್ಷಣದ ಮೇಲೆ ಅತಿಯಾದ ಪರಿಣಾಮ ಬೀರಿದೆ. ಸುಮಾರು 10 ತಿಂಗಳುಗಳ ಕಾಲ ಮುಚ್ಚಲ್ಪಟ್ಟಿದ್ದ ಶಾಲೆಗಳಿಂದಾಗಿ ಮಕ್ಕಳ ಶಿಕ್ಷಣಕ್ಕೆ ಹೊಡೆತ ಬಿದ್ದಿದೆ. ಈ ಸಂದರ್ಭದಲ್ಲಿ ಆನ್ಲೈನ್ ಕಲಿಕೆಯ ವಿಧಾನಗಳು ಭಾರತದಾದ್ಯಂತ ಪರ್ಯಾಯವಾಗಿ ಉಪಯೋಗಿಸಿಕೊಳ್ಳಲಾಯಿತು. ಆದರೆ, ಹಿಂದುಳಿದ ಅಥವಾ ಹಳ್ಳಿಗಳಲ್ಲಿನ ಮಕ್ಕಳಿಗೆ ಇದು ಪರಿಣಾಮ ಬೀರಿದೆ ಎಂದು ಅಧ್ಯಯನ ತಿಳಿಸಿದೆ.
ಜನವರಿ 21ಕ್ಕೆ ಕೈಗೆತ್ತಿಕೊಂಡ ಈ ಅಧ್ಯಯನದ ಪ್ರಕಾರ, ಶಾಲೆಗಳ ತರಗತಿಯಲ್ಲಿ ಕೂತು ಕಲಿಯುತ್ತಿದ್ದ ಗ್ರಹಿಕೆಗಿಂತ, ಆನ್ಲೈನ್ ಕಲಿಕೆಯಿಂದಾಗಿ ಮಕ್ಕಳು ಹಿಂದಿನ ತರಗತಿಯಲ್ಲಿ ಕಲಿತ ವಿಷಯವನ್ನು ಹೆಚ್ಚು ಮರೆಯವ ಸಾಮರ್ಥ್ಯವನ್ನು ಹೊಂದುತ್ತಿದ್ದಾರೆ. 5 ರಾಜ್ಯಗಳಲ್ಲಿ, 44 ಜಿಲ್ಲೆಗಳ 1137 ಶಾಲೆಗಳಲ್ಲಿ 16,067 ಪ್ರಾಥಮಿಕ ಶಾಲಾ ಮಕ್ಕಳಲ್ಲಿ ಕಲಿಕೆಯನ್ನು ಮರೆತ ಉದಾಹರಣೆಗಳು ಕಾಣಸಿಗುತ್ತವೆ.
ಇದನ್ನೂ ಓದಿ: Budget 2021 | ಶಿಕ್ಷಣ ವಲಯದ ನಿರೀಕ್ಷೆಗಳೇನು? ಡಿಜಿಟಲ್ ಶಿಕ್ಷಣಕ್ಕೆ ಸಿಗಬಹುದೇ ಒತ್ತು?
ಗ್ರಹಿಕಾ ಸಾಮರ್ಥ್ಯದ ನಷ್ಟ: ಶೇ 92ರಷ್ಟು ಮಕ್ಕಳು, ಗಣಿತ ವಿಷಯದಲ್ಲಿ ಮೊದಲಿನಿಗಿಂತ ಶೇ 80ರಷ್ಟು ಮರೆಯುವ ಸಾಮರ್ಥ್ಯವನ್ನು ಹೊಂದಿದ್ದಾರೆ. ಉದಾಹರಣೆಗೆ ಒಂದು ಸಾರಾಂಶವನ್ನು ಓದುವ ಗ್ರಹಿಕೆಯಾಗಲೀ, ಅವರ ಸ್ವಂತಿಕೆಯಲ್ಲಿ ಪದಗಳಲ್ಲಿ ವ್ಯಕ್ತಪಡಿಸುವುದರಲ್ಲಿ, ಅದರಲ್ಲೂ ಗಣಿತ ವಿಷಯಕ್ಕೆ ಸಂಬಂಧಿಸಿದಂತೆ ಕೂಡುವುದು, ಕಳೆಯುವುದರಲ್ಲಿ ಮಕ್ಕಳು ಮೊದಲಿಗಿಂತ ಈಗ ಸೋಲುತ್ತಿದ್ದಾರೆ.
ಮಾರ್ಚ್ 2020ರಿಂದ ಜನವರಿ 2021ರ ವರೆಗೆ ಅಂದರೆ ಶಾಲೆಗಳು ಮುಚ್ಚಲ್ಪಟ್ಟ ದಿನದವರೆಗೆ ಅಜೀಂ ಪ್ರೇಮ್ಜಿ ಫೌಂಡೇಶನ್ನ 200ಕ್ಕೂ ಹೆಚ್ಚು ಶಿಕ್ಷಕರು ಮತ್ತು 400ಕ್ಕೂ ಹೆಚ್ಚು ಸದಸ್ಯರು ಮಕ್ಕಳ ಶಿಕ್ಷಣದ ಕುರಿತಾಗಿ ಮೌಲ್ಯಮಾಪನ ಮಾಡಿದ್ದಾರೆ.
ಶಾಲೆಗಳು ತೆರೆದ ನಂತರ ಹೆಚ್ಚು ಬೆಂಬಲ ಅಗತ್ಯ: ಭಾರತಕ್ಕೆ ಹಾಗೂ ಇಡೀ ವಿಶ್ವಕ್ಕೆ ಕೊರೊನಾ ಸಾಂಕ್ರಾಮಿಕದಿಂದ ದೊಡ್ಡ ಮಟ್ಟದ ಹೊಡೆತ ಉಂಟಾಗಿದೆ. ಶಿಕ್ಷಣಕ್ಕೆ ನೀಡಿದ ಹೊಡೆತದ ನಷ್ಟವನ್ನು ಎದುರಿಸಬೇಕಾಗಿದೆ. ಬಹುಮುಖ್ಯವಾಗಿ, ಶಾಲೆಗಳು ಮತ್ತೆ ತೆರೆದಾಗ ಈ ಕೊರತೆಯನ್ನು ನೀಗಿಸಲು ಶಿಕ್ಷಕರಿಗೆ ಸಮಯ ನೀಡಬೇಕು. ಇವುಗಳಲ್ಲಿ, ಶಾಲೆಯ ರಜಾ ದಿನಗಳನ್ನು ರದ್ದುಗೊಳಿಸುವುದು, 2021ರ ಶೈಕ್ಷಣಿಕ ಅವಧಿಯನ್ನು ವಿಸ್ತರಿಸುವುದು ಮತ್ತು ಪಠ್ಯಕ್ರಮಗಳನ್ನು ಪುನರ್ರಚಿಸುವುದು, ಕಾಲೇಜು ಸಮಯವನ್ನು ಮರುರೂಪಿಸುವುದು ಒಳಗೊಂಡಿದೆ ಎಂದು ಅಜೀಂ ಪ್ರೇಮ್ಜಿ ವಿಶ್ವವಿದ್ಯಾಲಯದ ಉಪಕುಲಪತಿ ಅನುರಾಗ್ ಬೆಹರ್ ಅಭಿಪ್ರಾಯಪಟ್ಟಿದ್ದಾರೆ.
ಕೋವಿಡ್ನಿಂದಾಗಿ ಕಲಿಕೆಯ ನಷ್ಟಕ್ಕೆ ಪರಿಹಾರ: ಮಕ್ಕಳು ಶಾಲೆಗೆ ಮತ್ತೆ ಹೋಗುವಾಗ ಹಿಂದಿನ ತರಗತಿಯ ಜ್ಞಾನದ ಅಡಿಪಾಯವನ್ನು ಮತ್ತೆ ಗಟ್ಟಿಗೊಳಿಸುವ ಅನಿವಾರ್ಯತೆ ಇದೆ. ಇದಕ್ಕೆ ಸಂಬಂಧಿಸಿದಂತೆ ಪಠ್ಯಕ್ರಮಗಳು, ಸಮಯದ ಅವಧಿ ಹಾಗೂ ಸುಜ್ಜಿತ ಶಿಕ್ಷಣಕ್ಕೆ ಸಂಬಂಧಿಸಿದ ಬೆಂಬಲ ಅಗತ್ಯವಿದೆ ಎಂದು ವರದಿ ತಿಳಿಸಿದೆ.
ವಿದ್ಯಾರ್ಥಿಗಳ ಕಲಿಕೆಯ ಸಾಮರ್ಥ್ಯದ ಕುರಿತಾಗಿ ಶಿಕ್ಷಕರು ಗಮನವಹಿಸಬೇಕು. ಶಿಕ್ಷಣ ಮತ್ತು ಇತರ ಕಲಿಕೆಗೆ ಸಂಬಂಧಿಸಿದಂತೆ ವಿದ್ಯಾರ್ಥಿಗಳೊಂದಿಗೆ ಶಿಕ್ಷಕರು ಅಗತ್ಯವಾದ ಮೌಲ್ಯಮಾಪನ ಹೊಂದಿರಬೇಕು. ಒಟ್ಟಿನಲ್ಲಿ ಕಲಿಕೆಯ ನಷ್ಟವನ್ನು ಸುಧಾರಿಸಲು ಶಿಕ್ಷಕರಿಗೆ ಸಮಯದ ಅಗತ್ಯವಿದೆ ಎಂಬುದನ್ನು ಅಧ್ಯಯನ ತಿಳಿಸಿದೆ.
