ಗಣೇಶ ವಿಸರ್ಜನಾ ಮೆರವಣಿಗೆ ವೇಳೆ ಮಾದಿಗ ಸಮುದಾಯದ ಯುವಕನ ಕೊಲೆ: ಕಾರಣ ಇಲ್ಲಿದೆ

ತುಮಕೂರು, ಸೆಪ್ಟೆಂಬರ್​​ 21: ಗಣೇಶ ವಿಸರ್ಜನಾ ಮೆರವಣಿಗೆ ವೇಳೆ ನಡೆದ ಗಲಾಟೆ ವಿಕೋಪಕ್ಕೆ ಹೋಗಿ ಯುವಕನೋರ್ವನ ಕೊಲೆ ನಡೆದಿರುವ ಘಟನೆ ತುಮಕೂರು ಜಿಲ್ಲೆಯ ಮಧುಗಿರಿ ತಾಲೂಕಿನ ಕಸಾಪುರ ಗ್ರಾಮದ ಮಾರಮ್ಮ ದೇವಸ್ಥಾನದ ಬಳಿ ನಡೆದಿದೆ. ಸಿಂಹಾದ್ರಿ (17) ಮೃತ ಯುವಕನಾಗಿದ್ದು, ಮಗನ ಸಾವಿನ ವಿಚಾರ ತಿಳಿದು ತಾಯಿ ಅನ್ನಪೂರ್ಣ ಅಸ್ವಸ್ಥರಾಗಿದ್ದಾರೆ. ಆಕೆಯನ್ನು ತುಮಕೂರಿನ ಜಿಲ್ಲಾ ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ನೀಡಲಾಗಿದೆ.

ಯುವಕನ ತಾಯಿ ದೂರಿನ ಅನ್ವಯ FIR

ಗಣೇಶ ವಿಸರ್ಜನಾ ಕಾರ್ಯಕ್ರಮದ ವೇಳೆ ನೀನು ಕೀಳು ಜಾತಿಯವನು ಎಂದು ಸಿಂಹಾದ್ರಿಗೆ ನಿಂದಿಸಿ, ಬಳಿಕ ಕಲ್ಲಿನಿಂದ ಹಲ್ಲೆ ನಡೆಸಿ ನಾಯಕ ಸಮುದಾಯದ ಮಾರುತೇಶ್ (24) ಎಂಬಾತ ಕೊಲೆ ಮಾಡಿರುವ ಆರೋಪ ಕೇಳಿಬಂದಿದೆ. ಘಟನೆಗೂ ಅರ್ಧ ಗಂಟೆ ಮುಂಚೆ ಮಗ ತನಗೆ ಕರೆ ಮಾಡಿದ್ದ. ಹುಷಾರಿಲ್ಲ ಅಂತಾ ಹೇಳಿದ್ದ, ಆಸ್ಪತ್ರೆಗೆ ಹೋಗು ಅಂತಾ ಹೇಳಿದ್ದೆ. ಬಳಿಕ ಹುಡುಗಿ ವಿಚಾರಕ್ಕೆ ನಾಯಕರ ಹಟ್ಟಿಗೆ ಕರೆಸಿದ್ದಾರೆ ಎಂದಿದ್ದ. ಆ ರೀತಿಯ ವಿಚಾರಕ್ಕೆ ನೀನು ಹೋಗಬೇಡ ಅಂತಾ ಹೇಳಿದ್ದೆ. ಆದರೆ ಅದೇ ಕೊನೆ ಮತ್ತೆ ನನ್ನ ಮಗ ಜೀವಂತವಾಗಿ ಬರಲಿಲ್ಲ. ನಿನ್ನೆ ಎಂಟರಿಂದ ಹತ್ತು ಜನ ಸೇರಿ ಹಲ್ಲೆ ನಡೆಸಿ ಕೊಲೆಗೈದಿದ್ದಾರೆ. ನೀನ್ಯಾಕೆ ನಮ್ಮ ಗಣೇಶ ಬಳಿ ಬಂದಿದ್ದೀಯಾ ಎಂದು ಹತ್ಯೆಗೈದಿದ್ದಾರೆ. ಈ ಸಂಬಂಧ ಒಬ್ಬನನ್ನು ಮಾತ್ರ ಬಂಧಿಸಿದ್ದಾರೆ, ಉಳಿದವರ ವಿರುದ್ಧವೂ ಕ್ರಮ ಆಗಬೇಕೆಂದು ಮೃತ ಯುವಕನ ತಾಯಿ ಆಗ್ರಹಿಸಿದ್ದಾರೆ. ಘಟನೆ ಬಗ್ಗೆ ಅನ್ನಪೂರ್ಣ ಅವರ ದೂರಿನ ಅನ್ವಯ ಮಿಡಿಗೇಶಿ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಇದನ್ನೂ ಓದಿ: ತೋಟದಲ್ಲಿ ಗಾಂಜಾ ಗಿಡ ಬೆಳೆದು ಸಿಕ್ಕಿಬಿದ್ದ ಪೊಲೀಸಪ್ಪನ ಪುತ್ರ: ಅತ್ತ ತಂದೆಯಿಂದ ಜಾಗೃತಿ, ಇತ್ತ ಮಗನಿಂದ ಕುಕೃತ್ಯ!

ಇನ್ನು ಪ್ರಕರಣ ಸಂಬಂಧ ಮೃತ ಸಿಂಹಾದ್ರಿ ತಾಯಿ ಅನ್ನಪೂರ್ಣ ಅವರನ್ನು ಬಿಜೆಪಿ ರಾಜ್ಯಕಾರ್ಯಕಾರಿಣಿ ಸದಸ್ಯ ಹಾಗೂ ಮಾದಿಗ ಮಹಾ ಸಭಾ ಜಿಲ್ಲಾಧ್ಯಕ್ಷ ಹುಚ್ಚಯ್ಯ ಭೇಟಿ ಮಾಡಿದ್ದಾರೆ. ವರ್ಷದ ಹಿಂದೆ ಮನೆಯಲ್ಲಿದ್ದ ವ್ಯಕ್ತಿಯ ಹೊರತಂದು ವಾಹನ ಹತ್ತಿಸಿ ಕೊಲೆ ಮಾಡಲಾಗಿತ್ತು. ನಂತರ ಐಡಿ ಹಳ್ಳಿಯಲ್ಲೂ ಇದೇ ರೀತಿ ಮಾದಿಗರ ಹುಡುಗನ ಕೊಲೆ ನಡೆದಿತ್ತು. ಇಂತಹ ಘಟನೆಗಳಿ ಮಧುಗಿರಿ ತಾಲೂಕಿನಲ್ಲಿ ದಿನೇ ದಿನೆ ನಡೆಯುತ್ತಿವೆ ಎಂದವರು ದೂರಿದ್ದಾರೆ. ಶಾಸಕರು ಮತ್ತು ಸರ್ಕಲ್​​ ಇನ್ಸ್​​ಪೆಕ್ಟರ್​​ ವಿರುದ್ಧವೂ ಗಂಭೀರ ಆರೋಪ ಮಾಡಿದ್ದಾರೆ.

ಮತ್ತಷ್ಟು ಸುದ್ದಿ ಓದಲು ಇಲ್ಲಿ ಕ್ಲಿಕ್​​ ಮಾಡಿ.