ಕೊರೊನಾ ಲಸಿಕೆಯ ಬಗ್ಗೆ ಸುಳ್ಳು ಸುದ್ದಿ ಹರಡದಂತೆ ತಡೆಯಲು ಫೇಸ್​ಬುಕ್​ನಿಂದ ಹೊಸ ಅಸ್ತ್ರ

ಕೊರೊನಾ ಲಸಿಕೆಯ ಬಗೆಗಿನ ಸುಳ್ಳು ಸುದ್ದಿ ತಡೆಗಟ್ಟಲು ಫೇಸ್​ಬುಕ್ ಸಂಸ್ಥೆ ಹೊಸ ಅಸ್ತ್ರ ಪ್ರಯೋಗಿಸಿದೆ. ಕೊವಿಡ್ ಲಸಿಕೆಯ ತಪ್ಪು ಮಾಹಿತಿಗಳನ್ನು ಫೇಸ್​ಬುಕ್​ನಿಂದ ತೆಗೆದುಹಾಕುವುದಾಗಿ ಹೇಳಿದೆ. ಕಳೆದ ಅಕ್ಟೋಬರ್​ನಲ್ಲಿ ಆಲ್ಫಾಬೆಟ್ ಇಂಕ್ (ಗೂಗಲ್) ಸಂಸ್ಥೆ ಯೂಟ್ಯೂಬ್ ಕುರಿತಾಗಿ ಇದೇ ನಿರ್ಧಾರವನ್ನು ತಾಳಿತ್ತು.

ಸಾರ್ವಜನಿಕ ವೇದಿಕೆಯಲ್ಲಿ ಹಲವು ಆರೋಗ್ಯ ತಜ್ಞರು ತಮ್ಮ ತಮ್ಮ ಅಭಿಪ್ರಾಯಗಳನ್ನು ಹಂಚಿಕೊಳ್ಳುತ್ತಿದ್ದು, ಫೇಸ್​ಬುಕ್​ ನೀತಿಗಳನ್ನು ಮೀರುವ ಅಂತಹ ವಿಚಾರಗಳನ್ನು ತೆಗೆದುಹಾಕುವುದಾಗಿ ಫೇಸ್​ಬುಕ್​ ಹೇಳಿದೆ. ಕೊರೊನಾ ಲಸಿಕೆಯ ಬಗ್ಗೆ ಹರಿದಾಡುವ ತಪ್ಪು ಮಾಹಿತಿಗಳು ಅಪಾಯ ತಂದೊಡ್ಡುವ ಸಾಧ್ಯತೆಯಿದೆ ಎಂದು ಫೇಸ್​ಬುಕ್ ಅಭಿಪ್ರಾಯಪಟ್ಟಿದೆ.

ಫೈಜರ್ ಮತ್ತು ಮಾಡೆರ್ನಾ ಲಸಿಕೆ ತಯಾರಿಕಾ ಸಂಸ್ಥೆಗಳು ಅಮೆರಿಕ ಬಳಿ, ಲಸಿಕೆಯ ತುರ್ತು ಬಳಕೆಗೆ ಅನುಮತಿ ಕೋರಿವೆ. ಫೈಜರ್ ಲಸಿಕೆಯ ಬಳಕೆಗೆ ಬುಧವಾರ ಅನುಮತಿ ಸೂಚಿಸಿರುವ ಬ್ರಿಟನ್, ಲಸಿಕೆ ಹಂಚಿಕೆಯಲ್ಲಿ ಮುಂಚೂಣಿಯಲ್ಲಿರುವ ಆಸಕ್ತಿ ತೋರಿದೆ.

ಈ ಸಂದರ್ಭದಲ್ಲಿ ವಿವಿಧ ಸಿದ್ಧಾಂತದ ಹಿನ್ನೆಲೆಯ ಲಸಿಕೆ ವಿರೋಧಿ ಪೋಸ್ಟ್​ಗಳು ಫೇಸ್​ಬುಕ್​ನಲ್ಲಿ ವೈರಲ್ ಆಗಿದ್ದನ್ನು ಸಂಶೋಧಕರು ಗುರುತಿಸಿದ್ದಾರೆ. ಫಸ್ಟ್ ಡ್ರಾಫ್ಟ್ ಅಧ್ಯಯನದ ಪ್ರಕಾರ, ಫೇಸ್​ಬುಕ್ ಮತ್ತು ಇನ್ಸ್ಟಾಗ್ರಾಮ್​ನಲ್ಲಿ ನಡೆದ ಶೇ. 84ರಷ್ಟು ಸಂವಹನವು ಕೊವಿಡ್ ಲಸಿಕೆ ಕುರಿತದ್ದಾಗಿದೆ.

ಲಸಿಕೆ ಸುರಕ್ಷತೆ, ಅದರ ಪರಿಣಾಮಗಳು, ಲಸಿಕೆಗೆ ಬಳಸಿರುವ ಅಂಶಗಳು, ಲಸಿಕೆಯ ಅಡ್ಡಪರಿಣಾಮಗಳು ಇತ್ಯಾದಿ ಸುಳ್ಳು ಸುದ್ದಿಗಳನ್ನು ಹೊರಹಾಕುವುದಾಗಿ ಫೇಸ್​ಬುಕ್ ತಿಳಿಸಿದೆ. ಹಾಗೆಂದು ರಾತ್ರೋರಾತ್ರಿ ಈ ಕೆಲಸ ಮಾಡಿ ಮುಗಿಸಲು ಸಾಧ್ಯವಿಲ್ಲ ಎಂದಿರುವ ಫೇಸ್​ಬುಕ್, ಯಾವತ್ತಿನಿಂದ ನಿಯಮಗಳು ಕಾರ್ಯರೂಪಕ್ಕೆ ಬರಲಿವೆ ಎಂದು ತಿಳಿಸಿಲ್ಲ.

ಕೊರೊನಾ ಲಸಿಕೆಯ ಬಗ್ಗೆ ಅಧೈರ್ಯ ಮೂಡಿಸುವ ಜಾಹೀರಾತುಗಳನ್ನೂ ನಿಷೇಧಿಸುವುದಾಗಿ ಫೇಸ್​ಬುಕ್ ಕಳೆದ ಅಕ್ಟೋಬರ್​ನಲ್ಲಿ ಹೇಳಿತ್ತು. ಅದರಂತೆ ಲಸಿಕೆ ವಿರೋಧಿ ಫೇಸ್​ಬುಕ್ ಪೇಜನ್ನು ಮತ್ತು ಕೆಲವು ಖಾಸಗಿ ಗುಂಪುಗಳನ್ನು ಫೇಸ್​ಬುಕ್​ನಿಂದ ತೆಗೆದುಹಾಕಿತ್ತು.

Published On - 6:43 pm, Fri, 4 December 20