YouTube Top Videos | ಇಡೀ ಜಗತ್ತಿನ ಜನಸಂಖ್ಯೆಗಿಂತಲೂ ಹೆಚ್ಚು ವೀಕ್ಷಣೆ ಕಂಡಿದೆ ಈ ವಿಡಿಯೋ! ಹಾಗಾದ್ರೆ ಟಾಪ್​ 3 ಹಾಡುಗಳು ಯಾವುವು?

ಯೂಟ್ಯೂಬ್​! ಕೆಲ ವರ್ಷಗಳ ಹಿಂದೆ ಒಂದಷ್ಟು ಜನರಿಗೆ ಮಾತ್ರ ಪರಿಚಿತವಾಗಿದ್ದ ಯೂಟ್ಯೂಬ್​ (YouTube) ಇಂದು ಬಹುಪಾಲು ಜನರ ಅವಿಭಾಜ್ಯ ಅಂಗವಾಗಿದೆ. ಕೈಯಲ್ಲಿ ಮೊಬೈಲ್​ ಇದ್ದಾಗ ನಮಗರಿವಿಲ್ಲದಂತೆಯೇ ಅದೆಷ್ಟೋ ಸಲ ಯೂಟ್ಯೂಬ್ ಒಳಹೊಕ್ಕು ಬಂದಿರುತ್ತೇವೆ. ಹೊಸ ಸಿನಿಮಾದ ಟೀಸರ್, ಟ್ರೇಲರ್​ ಬಂದಾಗ, ಹಾಡು ಬಿಡುಗಡೆಯಾದಾಗ, ಯಾವುದೋ ಸುದ್ದಿ ನೋಡಬೇಕಾದಾಗ, ಅಡುಗೆ ಮಾಡುವುದು ಹೇಗೆಂದು ತಿಳಿಯಬೇಕಾದಾಗೆಲ್ಲಾ ನಮ್ಮ ಕೈಬೆರಳು ಯೂಟ್ಯೂಬ್​ ದಾರಿ ಹಿಡಿದುಬಿಡುತ್ತೆ. ಆದರೆ, ಈ ಯೂಟ್ಯೂಬ್​ನಲ್ಲಿ ಇದುವರೆಗೆ ಅತಿಹೆಚ್ಚು ನೋಡಲ್ಪಟ್ಟ ಟಾಪ್​ 3 ವೀಡಿಯೋಗಳು (Top 3 Videos)​ ಯಾವುದೆಂದು ಯಾವತ್ತಾದರೂ ಹುಡುಕಿದ್ದೀರಾ?

ದೇಶ, ಭಾಷೆಗಳ ಗಡಿದಾಟಿ ಜಗತ್ತಿನೆಲ್ಲೆಡೆ ಹಬ್ಬಿಕೊಂಡಿರುವ ಯೂಟ್ಯೂಬ್​ನಲ್ಲಿ ಕೆಲ ವಿಡಿಯೋಗಳು ಹೆಚ್ಚೂ ಕಡಿಮೆ ಈ ಜಗತ್ತಿನ ಜನಸಂಖ್ಯೆಯನ್ನೂ ಮೀರಿದ ಪ್ರಮಾಣದಲ್ಲಿ ವೀಕ್ಷಣೆ ಕಂಡಿವೆ! ಈ ವಿಷಯ ಅಚ್ಚರಿ ಅನಿಸಿದರೂ ಸತ್ಯ. ಯೂಟ್ಯೂಬ್​ನ ಟಾಪ್​ 3 ವಿಡಿಯೋಗಳು ಕ್ರಮವಾಗಿ 7.9 ಬಿಲಿಯನ್​, 7.2 ಬಿಲಿಯನ್​ ಮತ್ತು 5.1 ಬಿಲಿಯನ್​ ವೀಕ್ಷಣೆ ಕಂಡಿವೆ. ಇನ್ನೊಂದೆಡೆ ಈ ಜಗತ್ತಿನ ಒಟ್ಟಾರೆ ಜನಸಂಖ್ಯೆ ಎಷ್ಟು ಎಂದು ಹುಡುಕಿದರೆ ಕಳೆದ ವರ್ಷದ ಲೆಕ್ಕದಲ್ಲಿ ಗೂಗಲ್​ 7.8 ಬಿಲಿಯನ್​ ಎಂದು ತೋರಿಸುತ್ತದೆ. ಅಂದರೆ ಯೂಟ್ಯೂಬ್​ನ ನಂಬರ್​ 1 ವಿಡಿಯೋ ಜಗತ್ತಿನ ಪ್ರಸ್ತುತ ಜನಸಂಖ್ಯೆಗಿಂತಲೂ ಅಧಿಕ ವೀಕ್ಷಣೆ ಕಂಡಿದೆ.

ಯೂಟ್ಯೂಬ್​ನ ನಂಬರ್​ ಒನ್​ ವಿಡಿಯೋ ಯಾವುದು?
ಯೂಟ್ಯೂಬ್​ನಲ್ಲಿ ಇದುವರೆಗೆ ಅತಿ ಹೆಚ್ಚು ವೀಕ್ಷಣೆ ಕಂಡು ನಂಬರ್ 1 ಸ್ಥಾನದಲ್ಲಿರುವುದು ಒಂದು ಮಕ್ಕಳ ಹಾಡು. ಕೆಲ ವರ್ಷಗಳಿಂದೀಚೆಗೆ ಚಿಕ್ಕ ಮಕ್ಕಳು ಮೊಬೈಲ್​ ಕಡೆಗೆ ಅತಿ ಹೆಚ್ಚು ಆಕರ್ಷಿತರಾಗಿದ್ದಾರೆ. ಹಟ ಮಾಡಿದಾಗೆಲ್ಲಾ ಪೋಷಕರು ಮಕ್ಕಳ ಕೈಗೆ ಮೊಬೈಲ್​ ಕೊಟ್ಟು ಸಮಾಧಾನ ಮಾಡುವುದನ್ನು ಕಲಿತುಕೊಂಡಿದ್ದಾರೆ. ಇದರ ಪರಿಣಾಮವೋ ಏನೋ ಎಂಬಂತೆ ಯುಟ್ಯೂಬ್​ನಲ್ಲಿ ಅತಿ ಹೆಚ್ಚು ವೀಕ್ಷಣೆ ಕಂಡಿರುವ ವೀಡಿಯೋ ಎಂಬ ದಾಖಲೆಗೆ ‘ಬೇಬಿ ಶಾರ್ಕ್​ ಡ್ಯಾನ್ಸ್’ (Baby Shark Dance) ಪಾತ್ರವಾಗಿದೆ. ಜೂನ್​ 18, 2016ರಲ್ಲಿ ಬಿಡುಗಡೆಯಾದ ಈ ವಿಡಿಯೋ ಬರೋಬ್ಬರಿ 799,60,10,902 ಬಾರಿ ವೀಕ್ಷಣೆಯಾಗಿದೆ. ಅಂದ್ರೆ ಬಹುತೇಕ 8 ಶತಕೋಟಿ ವೀಕ್ಷಣೆ.. ಅಂದ್ರೆರೆ ಜಗತ್ತಿನ ಸಂಖ್ಯೆಯನ್ನೂ ದಾಟಿ ವ್ಯೂಸ್ ಕೊಟ್ಟಿದೆ.

ಎರಡನೇ ಸ್ಥಾನದಲ್ಲಿ ದೆಸ್ಪಸಿತೋ..
ಯೂಟ್ಯೂಬ್​ನಲ್ಲಿ ಎರಡನೇ ಅತಿ ಹೆಚ್ಚು ವೀಕ್ಷಣೆ ಪಡೆದ ವಿಡಿಯೋ ದೆಸ್ಪಸಿತೋ (Despacito). ಬಹುಶಃ ಈ ವಿಡಿಯೋ ನೋಡಿರದಿದ್ದರೂ ಇದರ ರಾಗವನ್ನು ನಿಮ್ಮ ಕಿವಿ ಕೇಳದೇ ಇರುವುದು ಅಸಾಧ್ಯವೇ ಸರಿ. ಏಕೆಂದರೆ, ಮೂರ್ನಾಲ್ಕು ವರ್ಷಗಳಲ್ಲಿ ಅತ್ಯಂತ ಜನಪ್ರಿಯವಾದ ಈ ಹಾಡು ಭಾಷೆಗಳ ಎಲ್ಲೆ ಮೀರಿ ಜನರ ಬಾಯಲ್ಲಿ ನುಲಿದಾಡಿದೆ. ಲೂಯಿಸ್​ ಫಾನ್ಸಿ ಎಂಬ ಕಲಾವಿದನ ಯೂಟ್ಯೂಬ್​ ಚಾನೆಲ್​ನಲ್ಲಿ ಜನವರಿ 13, 2017ರಲ್ಲಿ ಬಿಡುಗಡೆಯಾದ ಈ ವಿಡಿಯೋ 722,01,48,622 ಬಾರಿ ವೀಕ್ಷಣೆ ಕಂಡಿದೆ.

ಮೂರನೇ ಸ್ಥಾನದಲ್ಲಿ ಶೇಪ್​ ಆಫ್​ ಯೂ
ಎಡ್​ ಶೀರನ್​ ಯೂಟ್ಯೂಬ್​ ಚಾನೆಲ್​ನಲ್ಲಿ ತೆರೆಕಂಡ ಆ್ಯಮ್​ ಇನ್​ ಲವ್​ ವಿತ್​ ದ ಶೇಪ್​ ಆಫ್​ ಯೂ ಹಾಡು ಯುವ ಸಮೂಹವನ್ನು ಅಕ್ಷರಶಃ ಮೋಡಿಗೆ ಒಳಗಾಗಿಸಿತ್ತು. ಹದಿಹರೆಯದವರ ಅಂತಾರಾಷ್ಟ್ರೀಯ ಗೀತೆಯಂತಾಗಿದ್ದ ಶೇಪ್​ ಆಫ್​ ಯೂ (Shape of You) ವಿಡಿಯೋ ಸಾಂಗ್​ ದೆಸ್ಪಸಿತೋ ಹಾಡಿನ ಬೆನ್ನಲ್ಲೇ ಬಿಡುಗಡೆಯಾಗಿತ್ತು. ಜನವರಿ 30, 2017ರಂದು ಬಿಡುಗಡೆಯಾದ ಈ ಹಾಡು 519,77,56,060 ವೀಕ್ಷಕರನ್ನು ಸೆಳೆಯುವ ಮೂಲಕ ಮೂರನೇ ಸ್ಥಾನದಲ್ಲಿದೆ.

ಒಟ್ಟಾರೆ ಈ ಮೂರೂ ಹಾಡುಗಳು ಜಗತ್ತಿನೆಲ್ಲೆಡೆ ಅಭಿಮಾನಿಗಳನ್ನು ಹೊಂದಿದ್ದು, ಮೂರ್ನಾಲ್ಕು ವರ್ಷಗಳ ನಂತರವೂ ಅದೇ ತಾಜಾತನದೊಂದಿಗೆ ನೋಡುಗರನ್ನು ಸೆಳೆಯುತ್ತಿವೆ. ಜಗತ್ತಿನ ಜನಸಂಖ್ಯೆಗಿಂತ ಹೆಚ್ಚು ವೀಕ್ಷಕರಿದ್ದಾರೆ ಎಂಬ ಮಾತ್ರಕ್ಕೆ ಪ್ರತಿಯೊಬ್ಬರೂ ಈ ವಿಡಿಯೋ ನೋಡಿರುತ್ತಾರೆ ಎಂದು ಅರ್ಥವೇನಲ್ಲ. ಆದರೆ, ನೋಡಿರುವವರೇ ಪದೇ ಪದೇ ನೋಡುವ ಮೂಲಕ ಇಷ್ಟು ಗರಿಷ್ಠ ವೀಕ್ಷಣೆಗೆ ಕಾರಣರಾಗಿದ್ದಾರೆಂದರೆ ಇವುಗಳ ಜನಪ್ರಿಯತೆಯನ್ನು ಅಂದಾಜು ಮಾಡಬಹುದು.

ಇದನ್ನೂ ಓದಿ: ಕೆಜಿಎಫ್ ಚಾಪ್ಟರ್​-2​ ಟೀಸರ್​ ಯೂಟ್ಯೂಬ್​ನಿಂದ ಗಳಿಸಿದ್ದೆಷ್ಟು ಗೊತ್ತಾ?
ಗಂಡ ಝೂಮ್ ಮೀಟಿಂಗ್​ನಲ್ಲಿದ್ದಾಗಲೇ ಜುಮ್ಮನೆ ಮುತ್ತಿಕ್ಕಲು ಬಂದ ಪತ್ನಿ! ನಂತರ ಆಗಿದ್ದು ಮಾತ್ರ