PEN Literary Award: ಮೇ 23ರಂದು ಲೇಖಕಿ ಜೇದಿ ಸ್ಮಿತ್ಗೆ ‘ಪೆನ್ ಸಾಹಿತ್ಯ ಸೇವಾ ಪುರಸ್ಕಾರ’ ಪ್ರದಾನ
Zadie Smith : ಪ್ರಸಕ್ತ ಸಾಲಿನ ಪೆನ್ ಅಮೆರಿಕಾ ಸಾಹಿತ್ಯ ಸೇವಾ ಪುರಸ್ಕಾರಕ್ಕೆ ಭಾಜನರಾಗಿರುವ ‘ವೈಟ್ ಟೀಥ್’ ಖ್ಯಾತಿಯ ಲೇಖಕಿ ಜೇದಿ ಸ್ಮಿತ್, ಅತ್ಯಂತ ಕಿರಿಯ ವಯಸ್ಸಿನ ಲೇಖಕಿ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ. ಅವರಿಗೆ ಕೇವಲ 46 ವರ್ಷ.
Updated on:May 15, 2022 | 12:13 PM
Pen Literary Award : ಮನುಷ್ಯನ ಮನಸ್ಥಿತಿ, ಆಲೋಚನೆಯನ್ನು ಅರ್ಥ ಮಾಡಿಕೊಳ್ಳಲು ಓದು ನಮಗೆ ಸಶಕ್ತ ಮಾಧ್ಯಮ. ಇದನ್ನು ಬರೆವಣಿಗೆಯಲ್ಲಿ ಕಟ್ಟಿಕೊಡುವ ಮೂಲಕ ಅಪಾರ ಸಂಖ್ಯೆಯಲ್ಲಿ ಓದುಗರನ್ನು ಹಿಡಿದಿಡುವ ಶಕ್ತ ಬರಹಗಾರರಿಗೆ ಪೆನ್ ಸಾಹಿತ್ಯ ಪುರಸ್ಕಾರವನ್ನು ನೀಡಲಾಗುತ್ತ ಬಂದಿದೆ. ಪ್ರಸಕ್ತ ಸಾಲಿನ ಪೆನ್/ಆಡಿಬಲ್ ಲಿಟರರಿ ಸರ್ವೀಸ್ ಅವಾರ್ಡ್ ಲೇಖಕಿ ಜೇದಿ ಸ್ಮಿತ್ (Zadie Smith) ಅವರಿಗೆ ಲಭಿಸಿದ್ದು. ಪುರಸ್ಕಾರ ಸಮಾರಂಭವನ್ನು ಇದೇ ತಿಂಗಳಿನಲ್ಲಿ ಹಮ್ಮಿಕೊಳ್ಳಲಾಗಿದೆ. ಈತನಕ ಈ ಪ್ರಶಸ್ತಿಯನ್ನು ಪಡೆದ ಲೇಖಕರಲ್ಲಿ ಜೇದಿ ಅತ್ಯಂತ ಕಿರಿಯ ವಯಸ್ಸಿನ (46ವಯಸ್ಸಿನ) ಲೇಖಕರು ಎಂಬುದು ಗಮನಾರ್ಹ. ‘ಅವರ ಕಾದಂಬರಿಗಳಲ್ಲಿರುವ ಸಮಕಾಲೀನ ದೃಷ್ಟಿಕೋನ, ಒಳನೋಟ, ವಿಮರ್ಶಾತ್ಮಕ ನಿಲುವುಳ್ಳ ಗಟ್ಟಿಧ್ವನಿ ಅತ್ಯಂತ ಪ್ರಭಾವಶಾಲಿಯುಳ್ಳದ್ದಾಗಿದೆ.’ ಎಂದು ಪೆನ್ ಅಮೆರಿಕಾದ (PEN America) ಅಧ್ಯಕ್ಷ ಅಧ್ಯಕ್ಷ ಅಯಾದ್ ಅಖ್ತರ್ ಅಭಿಪ್ರಾಯ ವ್ಯಕ್ತಪಡಿಸಿದ್ದನ್ನು ಇಲ್ಲಿ ಸ್ಮರಿಸಬಹುದು.
ಜೇದಿ ಸ್ಮಿತ್ ಬರೆದ ಕಾದಂಬರಿಗಳಲ್ಲಿ ‘White Teeth’ ಮತ್ತು ‘NW’ ಬಹುಪ್ರಸಿದ್ಧಿ ಪಡೆದಿವೆ. ‘ಚೇಂಜಿಂಗ್ ಮೈ ಮೈಂಡ್’ ಮತ್ತು ‘ಇಂಟಿಮೇಷನ್ಸ್’ ನಂತಹ ಪ್ರಬಂಧ ಸಂಗ್ರಹಗಳು ಸಾಕಷ್ಟು ಓದುಗರನ್ನು ಸೆಳೆದಿವೆ. 2002 ರಲ್ಲಿ, ಸ್ಮಿತ್ ಅಮೆರಿಕದ ಪ್ರತಿಷ್ಠಿತ ರಾಯಲ್ ಸೊಸೈಟಿ ಆಫ್ ಲಿಟರೇಚರ್‌ನ ಫೆಲೋ ಆಗಿ ಆಯ್ಕೆಯಾಗಿದ್ದರು. ನಂತರ 2006 ರಲ್ಲಿ ತಮ್ಮ ಕಾದಂಬರಿ ‘ವೈಟ್ ಟೀತ್’ ಗಾಗಿ ಆರೆಂಜ್ ಪ್ರಶಸ್ತಿಗೆ ಭಾಜನರಾದರು. ‘ಟೈಮ್ ನಿಯತಕಾಲಿಕದ 100 ಅತ್ಯುತ್ತಮ ಇಂಗ್ಲಿಷ್ ಭಾಷೆಯ ಕಾದಂಬರಿಗಳ ಪಟ್ಟಿಯಲ್ಲಿ (1923-2005) ಈ ಕಾದಂಬರಿಯೂ ಒಳಗೊಂಡಿದೆ.
ಬರೆವಣಿಗೆ ವಿಷಯವಾಗಿ ಸ್ಮಿತ್ ಅಭಿಪ್ರಾಯ ಹೀಗಿದೆ, ‘ನಿಮ್ಮ ದೌರ್ಬಲ್ಯ ಅಥವಾ ನಿಮ್ಮಿಂದ ಸಾಧ್ಯವಾಗದ ವಿಷಯ, ವಿಚಾರದ ಬಗ್ಗೆ ಹೆಚ್ಚು ಒತ್ತು ಕೊಡುವುದು ಬೇಡ. ಹಾಗೆಂದು ನಿಮ್ಮಿಂದ ಅಸಾಧ್ಯವಾದದ್ದೆಲ್ಲಾ ದೊಡ್ಡ ಸಂಗತಿ ಎಂಬ ನಿರ್ಲಕ್ಷ್ಯವೂ ಬೇಡ. ಅಂಥ ಸಂಗತಿಯನ್ನು ಮಾನ್ಯವಾಗಿಯೇ ಕಂಡು ನಿಮ್ಮ ಮಿತಿಯನ್ನು ಸ್ವೀಕರಿಸುವ ಮನೋಭಾವ ರೂಢಿಸಿಕೊಳ್ಳಿ.’
ಮೇ 23 ರಂದು ಮ್ಯಾನ್‌ಹ್ಯಾಟನ್‌ನಲ್ಲಿ ನ್ಯಾಚುರಲ್ ಹಿಸ್ಟರಿ ಮ್ಯೂಸಿಯಂನಲ್ಲಿ ನಡೆಯಲಿರುವ ಪೆನ್ ಅಮೆರಿಕದ ವಾರ್ಷಿಕ ಸಾಹಿತ್ಯ ಉತ್ಸವದಲ್ಲಿ ಸ್ಮಿತ್ ಪೆನ್ ಪುರಸ್ಕಾರವನ್ನು ಸ್ವೀಕರಿಸಲಿದ್ದಾರೆ. ಈ ಹಿಂದೆ ಪೆನ್ ಸಾಹಿತ್ಯ ಸೇವಾ ಪುರಸ್ಕಾರವನ್ನು ಟೋನಿ ಮಾರಿಸನ್, ಸ್ಟೀಫನ್ ಸೋನ್‌ಹೈಮ್ ಮತ್ತು ಮಾರ್ಗರೇಟ್ ಅಟ್‌ವುಡ್‌ ಪಡೆದುಕೊಂಡಿದ್ದರು.
Published On - 12:09 pm, Sun, 15 May 22
